“Ukufunda Isifundo Sokunyamezela”
NJENGOKO sisondela ekupheleni kwenkulungwane yama-20, ngaba uluntu ngokubanzi luye lwafunda zifundo zithile kwimbali yalo enogonyamelo ukususela ngowe-1914? UFederico Mayor, ongumalathisi jikelele weUNESCO (uMbutho weZizwe Ezimanyeneyo Wezemfundo, Ezenzululwazi Nezempucuko), wayengenathemba kakhulu kwinqaku awalibhalela iThe Unesco Courier. “Ihlabathi elinengozi eqondakalayo . . . alibangeli mincili. Iimfundiso zonqulo, ubuzwe, ikhethe lobuhlanga nelamaqela obuzwe, ukuthiya amaYuda: umoya wenkululeko uye wavuselela intiyo. . . . Ukuwohloka kwenkqubo endala kuye kwabangela zonke iintlobo zezinto ezintsha, zimbi zazo ezibangela isiphithiphithi esikhulu—nogonyamelo luye lwesamela.”
Yintoni ebangela ugonyamelo lwesamele? Kutheni abantu bethiyene yaye bebulalana ngenxa nje yokungafani konqulo okanye imvelaphi yobuzwe? Enoba kukwindawo eyayisakuba yiYugoslavia, eIndiya, kumNtla Ireland, eUnited States, okanye naphi na ehlabathini, esinye sezizathu eziyintloko kukufundiswa ngendlela ephosakeleyo. Endaweni yokufunda ukunyamezelana nokuba nentlonelo, abantu baye bafunda ukungathembani nentiyo kubazali babo, ezikolweni zabo, nakwibutho loluntu ngokubanzi.
UFederico Mayor waqhubeka: “Masiyeke ukuthandabuza unyamezelo olusibangela sinyamezele izinto ezingenakunyamezeleka—ubuhlwempu, indlala nokubandezeleka kwezigidi zabantu. Ukuba senjenjalo, siya kufumana ukufudumala komanyano lobuzalwana.” Le yimvakalelo ebalaseleyo. Kodwa ziziphi iindlela ezisebenzisekayo ezinokuguqula umoya wobumnyama osisizekabani soku kweli hlabathi kuthiwa lelokhanyo?
Ngaphezu kweminyaka engama-2 500 eyadlulayo, uIsaya wabhala la mazwi kaYehova: “Bonke abantwana bakho baya kuba ngabafundi bakaYehova, lube lukhulu uxolo lwabantwana bakho.” (Isaya 54:13) Ekubeni ‘uThixo eluthando,’ ngokucacileyo abo baphila ngemigaqo yakhe ngokunyanisekileyo baya kufunda uxolo, kungekhona imfazwe; uthando, kungekhona intiyo; ukunyamezela, kungekhona ukunganyamezeli.—1 Yohane 4:8.
Ngoobani abakhuthaza le mfundiso ekhokelela abantu eluxolweni eluthandweni nasekunyamezeleni? Ngoobani abahlala bemanyene kungakhathaliseki imvelaphi yabo yobuzwe? Ngoobani abaye bafumana imfundo yeBhayibhile eye yaguqula yonke indlela yabo yokuphila yentiyo yayileyo yothando? Sikukhuthaza ukuba uhlolisise iimfundiso nezinto ezenziwa ngamaNgqina kaYehova ukuze ufumanise isizathu sokuba amanyane ehlabathini lonke.—Yohane 13:34, 35; 1 Korinte 13:4-8.