Lowo Uya Kukhusela Izilwanyana Zethu Zasendle
KUSUSELA ekuqaliseni kwembali yabantu, abantu bebeyoliswa kukufundisisa ngezilwanyana zasendle. Noko ke, okulusizi kukuba, emva kokuba uThixo enike umntu imvume yokongezelela inyama ekutyeni kwakhe, uxabiso ngezilwanyana zasendle lwaguqukela ekubeni kukuzibulala ngokungeyomfuneko nangenkohlakalo kufunwa iintloko zazo ukwenzela ukuhombisa.—Genesis 2:19, 20; 9:2; 10:9; 25:27.
Kodwa bambi abantu baqhubeka bezithanda izilwanyana zasendle zomhlaba. Malunga neminyaka engama-3 000 eyadlulayo, amazwi akwiNdumiso 104 abhalwa ngumthandi wezilwanyana zasendle. Ubiza izidalwa eziliqela ngamagama, ezinjengamaesile amaqwarhashe, (NW), iingonyama, amagogo, iimbila, nengwamza. Ufundisiso lwakhe lweentaka, iingoma zeentaka, namarhamncwa asendle, umdumisi lwamshukumisela ukuba enze le ndumiso: “Zonke ziphela [uYehova] uzenze ngobulumko.”—INdumiso 104:10-12, 17-21, 24.
Eneneni, uYehova uThixo ngokufanelekileyo unokukholiswa yimisebenzi yakhe yendalo emangalisayo. (Genesis 1:31) Ngaloo ndlela, sinokuqiniseka ukuba akayi kuvumela ukuba izilwanyana zasendle ezisaseleyo emhlabeni zitshatyalaliswe. Ngokuvisisana noko, uThixo waphefumlela umdumisi ukuba abhale inkcazelo efanele ibe ziindaba ezimnandi kubo bonke abathandi bezilwanyana zasendle. Sixelelwa ukuba ‘ihlabathi alisayi kushukunyiswa naphakade kanaphakade.’ (INdumiso 104:5) Inkxalabo enjalo ngentlalo-ntle yesi sijikelezilanga ngokuqinisekileyo iquka izidalwa eziphila kuso. (Isaya 45:18) UYesu Kristu wayingqinela inkxalabo kaThixo ngezidalwa zasendle xa wathi: “Abathengiswa ngeepeni ezimbini na oongqatyana abahlanu? Ukanti akukho namnye kubo olityelweyo emehlweni kaThixo.” (Luka 12:6) Inkxalabo kaThixo ngezidalwa zakhe ikwabalaseliswa kwiNdumiso 104, indinyana 14, efundeka ngolu hlobo: “Ulontshulisela iinkomo utyani, nomfuno wokunceda umntu; ukuze kuphume isonka emhlabeni.”
Ngokuvisisana nezi zibakala, uYehova uThixo akasayi kubanyamezela ngonaphakade abantu abamkhanyelayo nabasongela ikamva lomhlaba nezilwanyana zawo zasendle. Ibethelela oku, INdumiso 104 iqukumbela ngala mazwi aqinisekisayo: “Mabagqitywe ehlabathini aboni, bangabi sabakho abangendawo.”—INdumiso 104:35.
Hayi indlela ekuthuthuzela ngayo ukwazi ukuba uThixo ukuchazile ukuba uzimisele ‘ukonakalisa abo bawonakalisayo umhlaba.’ (ISityhilelo 11:18) Ngelo xesha ezinye iziprofeto ngoku ezizaliseka ngokomfuziselo ziya kuzaliseka ngokoqobo. Ngokomzekelo, ngomprofeti wakhe uHoseya, uYehova uThixo uthi: “Ngaloo mini ndobenzela umnqophiso namarhamncwa asendle, neentaka zezulu, nezinambuzane zomhlaba; ndaphule isaphetha nekrele nemfazwe, ezo zinto zingabikho ezweni; ndibahlalise bekholosile.”—Hoseya 2:18; Isaya 11:6-9.
Khawuzithelekelele ukuloo Paradisi isemhlabeni iza kubakho. Elinjani ukuchwayitisa lona ixesha ekuya kuba lilo! ‘Kodwa kufuneka ntoni ukuze ubani azizuz’ ilifa ezo ntsikelelo?’ usenokuba uyazibuza. Okokuqala, kufuneka ufundisise iLizwi likaThixo. Yaye kwabo bazithoba kulwalathiso lweBhayibhile, uYehova uThixo wenza esi sithembiso simangalisayo: “Amalungisa aya kulidla ilifa ilizwe, ahlale kulo ngonaphakade.”—INdumiso 37:29.