Imbono YeBhayibhile
Ngaba UYehova NguThixo Wemfazwe?
BAMBI abafundi beBhayibhile kudala bambek’ ityala uYehova ngokuthi nguthixo wemfazwe, nosoloko enxanelwe igazi. Ngokomzekelo, kwincwadi yakhe ethi The Story of Civilization—Man’s Own Show, uGeorge A. Dorsey wavakalisa ukuba uThixo weBhayibhile, uYehova, “nguThixo wabaphangi, wabathuthumbisi, wabaphumi-mkhosi, woloyiso, wawo wonke umnqweno wenkohlakalo.” Umhlalutyi weBhayibhile uRoland H. Bainton wakubethelela oku: “Imfazwe iliwa ngendlela ebonakalisa uvelwano ngakumbi xa uThixo engathabath’ icala.”
Ngaba ngokwenene uYehova nguthixo wemfazwe? Ngaba, njengokuba abathile bebonisa, ukunandipha ngokwenene ukubulala abantu abamsulwa?
Imigwebo Yexesha Elidluleyo
Liyinyaniso elokuba, iBhayibhile iyibalisa ngokucacileyo imigwebo kaYehova uThixo etshabalalisayo yexesha elidluleyo. Noko ke, yayisoloko ijoliswe kubantu abangahloneli Thixo. Ngokomzekelo, kwakusemva kokuba ihlabathi lomhla kaNowa “lalizele lugonyamelo” apho uYehova wathi: “Yabona, ndihlisa unogumbe wamanzi ehlabathini, wokonakalisa yonke inyama enomoya wokuphila.” (Genesis 6:11, 17) Ngokuphathelele omnye umgwebo, kuphela kwakungenxa yokuba izixeko zaseSodom naseGomora “zazizinikele ekuziphatheni okubi ngokwesini yaye zazityekele kwinkanuko egqwethekileyo” ukuze uThixo ‘azinisele isulfure nomlilo.’—Yuda 7, The New Berkeley Version; Genesis 19:24.
Ngaba uThixo wayenxanelwe ukuyonakalisa yonke inyama ngomhla kaNowa? Okanye ngaba wayezuza uyolo oluthile olubusathanarha ngokutshabalalisa abemi baseSodom naseGomora? Ukuze sifumane impendulo kule mibuzo, makhe sikhangele kwiziganeko zangaphambi koMkhukula womhla kaNowa. Emva kokuchaza ukuba uThixo wayeza kubatshayela kuthi tu abantu abangendawo emhlabeni ukuze acoce ihlabathi elinogonyamelo, iBhayibhile ithi: “UYehova . . . kwaba buhlungu kuye entliziyweni.” Ewe, uThixo waba buhlungu ngenxa yokuba ‘konke ukuyila kweengcinga zentliziyo [yabantu] kwakubububi bodwa imihla yonke.’ Ngenxa yoko, ukuze asindise abaninzi kangangoko kwakunokwenzeka kuNogumbe owayesondela, uThixo wathumela uNowa, “umvakalisi wobulungisa,” ukuze avakalise isigidimi sesilumkiso aze akhe nomkhombe wokusindisa uluntu.—Genesis 6:3-18; 2 Petros 2:5.
Ngokufanayo, ngaphambi kokuba athumele izithunywa zezulu ukuba ziye kutshabalalisa iSodom neGomora, uThixo wathi: “Ndiya kukha ndihle, ndikhangele ukuba baphelelisele na ngokwesikhalo sayo . . . ndazi.” (Genesis 18:20-32) UYehova wamqinisekisa uAbraham (omtshana wakhe uLote wayehlala eSodom) ukuba ukuba uthe wafumana abantu abangamalungisa abalishumi, ezo zixeko zaziya kuxolelwa. Ngaba uThixo ochwayitiswa kukuphalaza igazi wayeya kukukhathalela ukwenza inceba okunjalo? Kwelinye icala, ngaba asinakutsho kusini na ukuba inceba lolunye lwezona mpawu zibalaseleyo zobuntu anazo uYehova? (Eksodus 34:6) Yena uthi: “Unakanye ukuba kube mnandi kum ukufa kongendawo; kumnandi kum ukubuya kongendawo endleleni yakhe, aphile.”—Hezekile 33:11.
Imigwebo kaThixo etshabalalisayo ibisoloko ibangelwa kukuba abantu abangendawo bakhaba ngaw’ omane xa kufuneka belahle ikhondo elibi, kungengakuba kuxhelw’ eXhukwane kuYehova xa ebulala abantu. Kodwa usenokubuza, ‘Ngaba uYehova akazange akhuthaze amaSirayeli ukuba alwe namaKanan aze awatshabalalise kuthi tu?’
Iimfazwe ZikaThixo Zazifuneka Ukuze Kubekho Uxolo
Imbali isizobela umfanekiso ombi kakhulu ngokuphathelele ubomi bamaKanan—ayengabantu abangendawo ngendlela egqithiseleyo. Ukusebenzisana nemimoya, ukubingelela ngabantwana, ugonyamelo olwenziwa ngenkohlakalo, neendlela ezahlukahlukeneyo zonqulo lwesini esigqwethekileyo ezo zinto zazisisonka sawo semihla ngemihla. NjengoThixo wokusesikweni nonekhwele, uYehova wayengenakuzivumela ezi zenzo zimanyumnyezi kangaka ukuba ziphazamisane noxolo nonqabiseko lwabantu abamsulwa, ngokukodwa uSirayeli. (Duteronomi 5:9) Ngokomzekelo, khawufan’ ucinge nje ukuba kummandla ohlala kuwo bekungekho mkhosi wamapolisa athembekileyo okanye amajoni okunyanzelisa imithetho yelizwe—ngaba oko bekungayi kukhokelela kwisiphithiphithi nogonyamelo oluhlasimlis’ umzimba’? Ngokufanayo, uYehova wanyanzeleka ukuba athabath’ isenzo nxamnye namaKanan ngenxa yoburheletyo bawo nangenxa yengozi yokwenene awayeluchanaba kuyo unqulo lokwenyaniso. Ngoko ke, wavakalisa oku: “Lenziwe inqambi nelizwe elo; ndiyabuvelela ubugwenxa babo.”—Levitikus 18:25.
Okusesikweni kukaThixo kwaphunyezwa xa imikhosi etshabalalisayo kaThixo—imikhosi yamaSirayeli—yatshabalalisa amaKanan. Isibakala sokuba uThixo wakhetha ukusebenzisa abantu ekuphumezeni lo mgwebo, kunokusebenzisa umlilo okanye umkhukula, asizange sisinciphise isigwebo. Ngaloo ndlela, xa yayisilwa nezizwe ezisixhenxe zakwaKanan, imikhosi yamaSirayeli yayalelwa oku: “Uze ungasindisi nanye into ephefumlayo.”—Duteronomi 20:16.
Noke ke, njengalowo ubuhlonelayo ubomi, uThixo akazange ancomele ukuba kubulawe ngokungenalusini. Ngokomzekelo, xa abemi besinye sezixeko zakwaKanan, iGibheyon, bacela ukwenzelwa inceba, uYehova wasamkela eso sicelo sabo. (Yoshuwa 9:3-27) Ngaba uthixo wemfazwe nondlongondlongo wayeya kukwenza oku? Nakanye, kodwa uThixo othanda uxolo nokusesikweni wayenokwenjenjalo.—INdumiso 33:5; 37:28.
Imilinganiselo KaYehova Ikhuthaza Uxolo
Ngokuphindaphindiweyo, iBhayibhile inxulumanisa intsikelelo kaThixo noxolo. Oko kungenxa yokuba uYehova ngumthandi woxolo, kungekhona imfazwe. (Numeri 6:24-26; INdumiso 29:11; 147:12-14) Ngenxa yoko, xa uKumkani uDavide wanqwenela ukwakhela uYehova itempile yokumnqula, uThixo wamxelela oku: “Akuyi kulakhela ndlu igama lam, ngokuba uphalaze igazi elininzi ehlabathini phambi kwam.”—1 Kronike 22:8; IZenzo 13:22.
Ngoxa wayesesemhlabeni, uDavide oMkhulu, uYesu Kristu, wathetha ngexesha laxa ukuthanda okusesikweni kukaThixo kwakungayi kumvumela ukuba abunyamezele ubungendawo esibubonayo namhlanje. (Mateyu 24:3, 36-39) Njengoko wenzayo ngoMkhukula womhla kaNowa nangentshabalaliso yeSodom neGomora, kungekudala uThixo uya kugweba ukuze aphelise bonke abantu abazingcayo, abangendawo, ngaloo ndlela elungiselela ukuba phantsi kolawulo loBukumkani bakhe basezulwini kubekho uxolo.—INdumiso 37:10, 11, 29; Daniyeli 2:44.
Ngokucacileyo, uYehova akathixo wamfazwe osoloko enxanelwe igazi. Kwelinye icala, akarhoxobisi ekunikeleni isohlwayo esingokomthetho xa sifuneka. Ukuthanda kukaThixo okulungileyo kubangela ukuba athabath’ isenzo ngenxa yabo bamthandayo ngokutshabalalisa le nkqubo ingendawo ibacinezelayo. Xa esenza oko, uxolo lokwenyaniso luya kwanda ehlabathini lonke njengoko abalulamileyo bemnqula ngokumanyeneyo uYehova, “uThixo woxolo.”—Filipi 4:9.
[Inkcazelo Ngomfanekiso okwiphepha 16]
David and Goliath/The Doré Bible Illustrations/Dover Publications, Inc.