“Akukho Nto Siyibandezwayo!”

Kuye kwenziwa amagqabaza ngabafundisi-ntsapho nabanye ngokuba abantwana bamaNgqina kaYehova babandezwa okuthile ngokungavunyelwa ukuthelela kuyolo lwesikolo lokubhiyozela iKrismesi, i-Ista neHalloween. Okulandelayo yimizekelo yamagqabaza ambalwa enziwe ngabantwana abangamaNgqina kaYehova, bechaza ngeeleta isizathu sokuba bengavumi ukuba nenxaxheba ekubhiyozeleni ezi holide.

“NANGONA ndabachazela abo ndifunda nabo isizathu sokungazibhiyozeli ezi zinto, sekunjalo babevakalelwa kukuba ndandibandezwa okuthile. Kodwa kwakungenjalo! Kaloku, basoloko belinda de kufike iKrismesi okanye enye iholide ukuze bafumane izipho, ngoxa ndiphiwa izipho ndize ndiye kumatheko okuzonwabisa ebudeni bonyaka wonke. Ndiyazi ukuba andithandwa yintsapho yakowethu kuphela kodwa libandla noYehova, ibe oko kubaluleke ngakumbi kum kunayo nayiphi na iholide.”—UBecky, oneminyaka eli-13 ubudala.

“Ndiyazi ukuba zonke iiholide zinemvelaphi engalunganga. UYesu akazange azalwe ngosuku lweKrismesi. Intsapho yakowethu ayifanele yenze nto esikhundleni seeholide ezinjalo. Intsapho yakowethu isoloko ifumaneka nanini na ndiyifuna. Oku kokona kufaneleke ngakumbi kum kunaso nasiphi na isipho enokundinika sona.”—UJosh, oneminyaka eli-15 ubudala.

“IKrismesi. Andibandezwa nto kuba asiyoyamaKristu kakade. Kulunge ngakumbi ukwazi ukuba abazali bam bandiphe isipho kunokwamkela isipho esivela kumntu ongaziwayo onguSanta. I-Ista. Kunzima kakhulu ukuyithethela i-Ista kuba abantu baya kuthi yenzelwa ‘uYesu novuko lwakhe,’ okanye kukusuka nje ‘uye kuzingela amaqanda.’ Kodwa amaqanda adibene ngantoni noYesu kakade? Kwaigama elithi Ista livela kuthixokazi wakudala. IHalloween. Ingcamango eyintloko yexesha leHalloween ayinamtsalane tu kum. Iziporho namagqwirha, ANJANI WONA AMASIKIZI!”—UKatie, oneminyaka eli-10 ubudala.

“Njengoselula andizange ndizive ndibuhlungu ngenxa yokuphoswa yimibhiyozo yeeholide zehlabathi. Abazali bam abazange bandixelele ukuba ‘akunakwenza oku okanye okuya ngenxa yokuba ungomnye wamaNgqina kaYehova,’ kodwa ndenziwa ndaqhelana neBhayibhile kunye neembono zikaYehova malunga nezi holide. Kwicala lezipho, ekhaya, siphana izipho unyaka wonke.”—URyan, oneminyaka eli-17 ubudala.

“Kwiholide nganye kubhiyozelwa into ebubuxoki yaye ijoliswe kwizinto ezibubuxoki. Uninzi lwabantwana endibaziyo lubhiyozela iiholide ukuze lufumane iilekese okanye izipho. Into endinayo nelunge ngakumbi kuneeholide yintlangano emangalisayo yamaNgqina kaYehova. Kunokuba libe yinto yosuku olunye, njengeholide, iLizwi likaYehova uThixo linesigidimi esonwabisayo esihlala sihleli.”—UBrooke, oneminyaka eli-14 ubudala.

“Izizathu zokungaziva ndiphoswa ziiholide ezithile: 1. IBhayibhile ithi ziphosakele. 2. Andizikhathalele. 3. Umama notata bayandipha izipho.”—UBrandi, oneminyaka emithandathu ubudala.

“Andiziva ndibandezwa nto. Akundikhathazi. Ndiyazifumana izipho, ibe sidlala imidlalo ethile size sibe namatheko okuzonwabisa. Ndifumana izinto ezininzi ngaphandle kokubhiyozela iiholide. Ndifuna ukuhlala ndiliNgqina kuyo nantoni na endiyenzayo ibe akukho nto inokundijika.”—UBrianne, oneminyaka esithoba ubudala.

“Ndiya kwibanga lesithathu ibe andizisoli ngokuvuma ukuba ndingomnye wamaNgqina kaYehova. Ngesinye isihlandlo enye inkwenkwe yathi ndimele ukuba ndibuhlungu ngenxa yokungafumani zipho ngeKrismesi, kodwa ndathi ndifumana izipho unyaka wonke. Yandula ke yathi ndinethamsanqa. Ndicinga ukuba akumele kubekho Ngqina likaYehova lizisolayo kuba liliNgqina likaYehova.”—UJeff, oneminyaka eli-10 ubudala.

“Mna nodade wethu senza eyethu iholide yentsapho ngokuvuyisana nabazali bethu xa bekhumbula usuku lomtshato wabo. Ndifumana uvuyo olukhulu ngokuceba izipho namakhadi nezinye izinto ndize ndincede abazali bam bacebe izipho zokothusana kunaxa ndifumana izipho kwabanye abantu. Ukupha kuluyolo ngaphezu kokuphiwa.”—URachel, oneminyaka eli-16 ubudala.

“Xa ndandiselula, ezinye iiholide zazinzima kum. Kodwa kamva ndaqonda ukuba ezi holide zinokubangela ukubawa, iimpikiswano nosizi. Xa kukho amaxesha abekelwe ukupha, akothuswa seso sipho usifumanayo. Bendiya kukhetha ukufumana izipho ezikhethekileyo nangaliphi na ixesha ebudeni bonyaka. Ukubhiyoza okanye ukungabhiyozi kuyinxalenye nje encinane yesigqibo esikhulu ngakumbi: ukuzahlulela okanye ukungazahluleli ukuze ukhonze uYehova. Xa ndiyicinga le nto ngaloo ndlela, olona khetho luchanileyo lucacile.”—UBen, oneminyaka eli-13 ubudala.

“Xa ndandisemncinane, kwakukho amaxesha endandiziva ndiphoswa kokuthile, kodwa kamva ndahleka xa ndacinga indlela amaqanda, uYesu nomvundla weIsta ezingadibani ngayo zonke ezo zinto. Xa ndandimdadlana yaye abazali bam bendicacisela imvelaphi yayo yonke le mifuziselo, ndayifumanisa ingamasikizi. Kwandenza buhlungu ukucinga indlela uYehova noYesu abamele ukuba bavakalelwa ngayo ngokunxulunyaniswa neembono ezinjalo zobuhedeni.”—UAlexa, oneminyaka eli-18 ubudala.

“Ebudeni bexesha leKrismesi, ukuba sesikolweni kunokuba yeyona nto idandathekisayo ibe kunokwenza uzive ulahliwe. Ndandula ke ndaqonda ukuba ukubhiyozela iKrismesi akuzicombululi iingxaki zakho, akuyimanyanisi intsapho yakowenu, ibe akukwenzi uzive wonwabile. Kuphela kukuphila ngemilinganiselo yeBhayibhile okunokukwenza oku.”—UJoe, oneminyaka eli-15 ubudala.

“Kunokubhiyozela iKrismesi okanye nayiphi na enye iholide, siba noSuku Olukhulu Lwezinto Zokudlala. Sifumana isipho semali esisichithela kwizinto esizithandayo. Komnye unyaka ndanikela intetho eklasini yam ngonqulo lwam. Kunokulandela indlela yehlabathi, ndizibekela eyam indlela yokuya kwiintlanganiso, ukuya kwinkonzo yasentsimini, nokwenza umthandazo zibe yinxalenye yobomi bam. Ndiza kubhaptizwa kule ndibano izayo.”—UGeorge, oneminyaka eli-11 ubudala.

“Ndiyakuthanda ukuphiwa izipho, ibe ndiyazifumana ebudeni bonyaka wonke. Andiziva ndiphoswa kangako ngamatheko. Ndimenza avuye uYehova xa ndimela inyaniso. Kuyahlekisa ukubona abanye endifunda nabo abangengomaKristu, abangamaHindu, amaYuda nabanye, bebhiyozela iKrismesi baze bafumane izipho kodwa bangasazi isizathu sobukho baloo holide.”—UJulia, oneminyaka eli-12 ubudala.

“Xa ndandiphoswa ziiholide esikolweni ndandingazisoli. Abantwana benza izinto ezininzi zobugqwirha, ezinjengokunxibela iHalloween. Andiphoswa nto tu. Ndiyabaxelela indlela abazali bam abandithengela ngayo izinto ebudeni bonyaka wonke. Bandixelela ngecawa yabo, nendlela ekruqula ngayo, ibe ndibaxelela ngeentlanganiso esiziqhubela epakini ngamathuba athile, ibe maxa wambi baba nomona. Kodwa mna andibamoneli nganto. Lilonke ndithi, kuphela yenza abahlobo nabo bazihlonelayo iinkolelo zakho uze ungaze uvumele mfundi okanye mfundisi-ntsapho akunyanzelele ukwenza nantoni na enxamnye nokuthanda kukaYehova.”—UJustin, oneminyaka eli-12 ubudala.

“Ngaba ndiziva ndibandezwa okuthile? Nakanye, kuba siba nawo amanye amatheko, ibe xa abantu bebhiyozela iKrismesi, abantwana ngokuyintloko bacinga ngoSanta Claus, okanye ngexesha le-Ista bacinga ngomvundla we-Ista, kodwa ndiyazi ukuba ezi zinto zinemvelaphi yonqulo lobuhedeni. Ndiyayithanda inkonzo yasentsimini kuba indenza ndimilisele ingqondo enyanisweni.”—USharon, oneminyaka esibhozo ubudala.

“Ngokunyanisekileyo ndingathi andizange ndizive ndinganelisekanga ngokuba ngomnye wamaNgqina kaYehova. Mna nentsapho yakowethu sinokuninzi esizonwabisa ngako. Xa kukho amatheko okuzonwabisa esikolweni umama uyandikhupha siye kufumana isidlo sasemini. Abazali bam baye bazise izimuncumuncu esikolweni ngaphandle kwesizathu esikhethekileyo ibe bonke abantwana bayazi ukuba siyazonwabisa. Ndinolwalamano olusondele gqitha nabazali bam ibe xa abantwana bendibuza isizathu sokungazibhiyozeli iiholide, ndibaxelela ukuba ndibhiyoza yonke imihla. Linokuziva njani iNgqina lishiywa lodwa?”—UMegan, oneminyaka eli-13 ubudala.

“IHalloween. Kutheni abantwana benxiba njengabatyholi, nanjengabadlali bencwadi yamabali ahlekisayo? Abantwana behla benyuka bengena kwimizi ngemizi ukuze bafumane iingxowa ezizele iilekese. Okanye bagibisele amaqanda ezindlwini, babophelele amaphepha asetyenziswa kwizindlu zangasese emithini, ibe okona kubi nangakumbi kukuba abazali abaninzi bahambisana nabo.”—UZachary, oneminyaka eli-10 ubudala.

“Andimele ndilinde usuku olukhethekileyo ukuze ndifumane izipho. Umama notata bandiphathela izinto zokudlala ezininzi ngalo lonke ixesha. IHalloween lunqulo lwemimoya efileyo. Iphosakele. Ekuphela koThixo esifanele simnqule nguYehova.”—UNicholas, oneminyaka emithandathu ubudala.