Umbhiyozo WaseSapporo Wekhephu Nomkhenkce

Ngumbhaleli kaVukani! eJapan

BUDENI beenyanga ezinde zobusika, iSapporo, isixeko esikumntla weJapan, sigqunywa likhephu. Kangangeenyanga ezintlanu kuse kwezintandathu zonyaka, abemi babephantse bangabi nayo kwaphela into yokuzonwabisa de oosomaqhuzu beso sixeko badibana ngeentloko baza bacinga ngento ethile: umbhiyozo wekhephu ekuboniswa kuwo imifanekiso eqingqiweyo emikhulu eyenziwe ngekhephu.

Ngowe-1950, abafundi kwisikolo semfundo ephakamileyo bancedwa bakha imifanekiso eqingqiweyo emithandathu, enomphakamo osusela kwiimitha ezintathu ukusa kwezine. Abantu abamalunga nama-50 000 beza kubona “uVenus de Milo” owenziwe ngomkhenkce nekhephu neminye imifanekiso eqingqiweyo. IYuki Matsuri, okanye uMbhiyozo Wekhephu, waba ke uqala kakuhle ngolo hlobo.

Ukutyhubela iminyaka lo mbhiyozo uye wamkhulu waza wathandwa. Sithetha nje nyaka ngamnye, abakhenkethi abamalunga nezigidi ezibini, abaquka abaninzi abavela kumazwe angaphandle, beza apha beze kutyebis’ amehlo yaye bebamb’ ongezantsi kukubona la makhulu emifanekiso eqingqiweyo eyenziwe ngomkhenkce nekhephu. Eli theko leentsuku ezisixhenxe lasebusika linezinto ezibukekayo lingenanto yakwenza nonqulo liye lalelona likhulu kunamanye afana nalo eJapan.

Ukuhambahamba Kulo Mbhiyozo

Kwiindawo ezintathu ekwenzelwa kuzo imibhiyozo, iPaki iŌdori iyeyona iphambili. Le ndawo eyayisakuba yindawo yokulahla ikhephu ikummandla olingana nezitrato zasesixekweni ezili-11 embindini weSapporo. Kule ndawo naseMakomanai, ekufutshane apho, kukho le mifanekiso iqingqiweyo mikhulu enomtsalane. Abantwana iyabamangalisa kakhulu loo mifanekiso mikhulu ngokungaqhelekanga kunaleyo bayithandayo ikwiinkqubo zikamabonwakude nakwiincwadi ezinemifanekiso ehlekisayo. Kukho umfanekiso womdlali wala maxesha ongummangaliso ekuthiwa ngu-Ultraman amakhwenkwana athanda ukumlinganisa. Yaye kufutshane nalapho kukho umfanekiso oqingqiweyo kaChibi Maruko-chan nabahlobo bakhe, abantwana abaveliswa kumfanekiso kamabonwakude othandwayo ohlekisayo.

Nabantu abakhulu bayamangaliswa. Umfanekiso oqingqiweyo weSakhiwo Somculo WeOpera SaseParis (Paris Opera House) esenziwe kakuhle ngendlela ekhethekileyo, safezekiswa ngeendonga ezinemifanekiso ekroliweyo eqhele-qhele kwanemifanekiso eqingqiweyo yeemvumi uyabukeka. Kukho iNdlu Yowiso-mthetho YaseJamani (German Diet House) endala, isakhiwo esimbejembeje esenziwe ngekhephu. Ungayibona lula iNqaba Yama-Arabhu (Arabian Castle) enomfanekiso kaAladdin ‘nesibane sakhe somlingo.’

Kukho nemifanekiso eqingqiweyo ekwiCitizens Square emifutshane kakhulu kuba imi ngakwimifanekiso eqingqiweyo emide, emininzi kuyo ibhalwe izigidimi ezikhethekileyo. Kukho nomfanekiso oqingqiweyo weBrandenburg Gate omi apho njengesikhumbuzo somanyano obelukho kutshanje eJamani. Eminye yale mifanekiso ibonakalisa inkxalabo ekhoyo ngomhlaba, izinto eziphila kuwo nezilwanyana.

Ekupheleni kwePaki iŌdori kukho i-International Square apho amaqela ezemidlalo avela kumazwe amaninzi akhuphisana khona namanye. Abanye kubantu abenza le mifanekiso eqingqiweyo ziincutshe eziqhele ukusebenza ngamatye okwakha nawokwenza imifanekiso nangezinye izinto. Ngamnye wanikwa ikyubhu yekhephu eliqiniswe ngamanzi kusengaphambili aze anikwe iintsuku ezintathu zokuba abe sele eyigqibile imifanekiso yakhe eqingqiweyo ukuze ingene kukhuphiswano.

Kodwa yenziwa njani le mifanekiso eqingqiweyo mikhulu kangaka yaye abo bayenzayo bazifumana njani iinkcukacha ezichanileyo ezimangalisa ngolo hlobo?

Indlela Eyenziwa Ngayo Imifanekiso Eqingqiweyo Yekhephu

Ukwakha umfanekiso omkhulu kangako akuyondlwan’ iyanetha. Xa kusenziwa omnye nje kuphela, ukuwakha kunokuthabatha ithuba elingangenyanga, xa usenziwa ngumntu omnye ubunokuthabatha iintsuku ezingaphezu kwe-1 500. Omnye omkhulu owangeniswayo kukhuphiswano yayingumfanekiso owawufana ncam neFlinders Street Station, eMelbourne, eOstreliya. Wawuziimitha ezingama-35 ubude, uziimitha ezingama-35 ububanzi yaye uziimitha ezili-15 umphakamo. Kwafuneka imithwalo engama-1 400 yeelori ezithwala ubunzima obuziitoni ezintlanu ukuze kuthuthwe iitoni ezingama-7 000 zekhephu elasetyenziswa kuwo. Akumangalisi ngoko ukuba ukususela ngowe-1955 umsebenzi omninzi wokwenza imifanekiso emikhulu eqingqiweyo ubusenziwa ngumkhosi wokhuselo, waza kamva wancediswa ngabo baqeqeshelwa umsebenzi wokucima umlilo. Makhe sibone indlela abayenza ngayo le mifanekiso mikhulu ngolu hlobo yenziwe ngekhephu.

Okokuqala, kufuneka kukhethwe loo nto iza kwenziwa. Kuqokelelwe inkcazelo nemifanekiso. Kwakuba kukho ezi zinto, kwenziwa umfanekiso waloo nto iza kwenziwa ngodongwe, ngepapier-mâché, okanye ngezinye izinto. Kwandule ke, malunga nenyanga ngaphambi kombhiyozo, kuqokelelwe ikhephu elicocekileyo lize lithuthelwe kwindawo oza kwakhelwa kuyo loo mfanekiso. Apho ke lifika lothulwe, lihlohlwe kwisakhelo samaplanga esikhulu lize liqiniswe ngamanzi. Emva koko siyasuswa eso sakhelo, kubekwe izinto zokukhwela abo baza kwakha loo mfanekiso kuze ke kuqaliswe ukuqingqwa kwawo ngenyameko.

Ngokufuthi besebenza ubusuku bonke apho amaqondo obushushu engaphantsi kweqondo lokukhenkcisa, abasebenzi basebenzisa amazembe nemihlakulo xa besawuqala umsebenzi baze basebenzise nezinye izixhobo ezincinane zokuqingqa xa sebengene nzulu kuloo msebenzi.

Abantu ngabanye namaqela amancinane anokuba nenxaxheba kulo msebenzi uvuyisayo. Malunga nesithathu samakhulu abantu abafake izicelo zokungenela olu khuphiswano abavela kulo lonke elo lizwe abakhethwe ngabaququzeleli banikwa ukhokelo oluvela kwiqela elikhethekileyo leengcali. Ngamnye ofake isicelo sokungenela ukhuphiswano unikwa ikyubhu eziimitha ezimbini yekhephu eliqinisiweyo aze anikwe iintsuku ezintlanu ukuba akugqibe oko akwenzayo.

Izinto Ezintle Ezinomtsalane

Imifanekiso eqingqiweyo eyenziwe ngomkhenkce kuphela ibenza buthi chatha ubuhle balo mbhiyozo. Ubukhulu becala yona le yenziwa ngamalungu oMbutho Wabaqingqi Bomkhenkce (Ice Carvers Union). Abaninzi kubo ngabapheki abavela kwiihotele zodumo abaye ngokufuthi babonise ubuchule babo kwiindawo zokutyela. Bayakulangazelela ukuza eSapporo, yaye izinto abazenzayo ziyabukeka.

Umculo neminye imiboniso yongezelela ulonwabo kulo mbhiyozo. Kubakho ukhuphiswano, amaqela amatshayo, umdaniso, nomdlalo wokutyibilika ekhephini, nezinye izinto ezingakumbi. Abantwana nabo bayavuyiswa kukubakho kwezinto zokutyibilika ezilungiselelwe bona ukuze nabo bonwabe, ezakhiwe kanye apha kule mifanekiso iqingqiweyo.

Elona xesha lilungileyo lokubukela lo mbhiyozo kusebusuku. Izigidi zezibane ezincinane zixhonywa kumasebe emithi engenamagqabi ekuloo paki, kuze kubekho nezibane ezikhanyise ngqo kuloo mifanekiso iqingqiweyo ibengezelayo, nto leyo etsho kubekho ukukhanya nombala ohlab’ umxhelo kwelo lizwe loyolo ebusika. Ngemva kokubona loo mbhiyozo, uya kuchukumiseka koko kunokuphunyezwa ziingqondo ezikwaziyo ukuyila nazizandla zomntu ezinobuchule azinikwe nguThixo.

[Imifanekiso ekwiphepha 15]

Imifanekiso eqingqiweyo emikhulu yomkhenkce njengalo ungezantsi isenokuba ziimitha ezingama-35 ububanzi neemitha ezili-15 umphakamo, ifuna iitoni ezingama-7 000 zekhephu ukuze yakhiwe