Abantu Abaselula Bayabuza . . .
Kutheni Ndityebe Kangaka?
“Ndicinga ukuba ndityebe gqitha, nangona xa ndijonga amaphepha abonisa ubunzima obufanelekileyo, ngokutsho kwawo andityebanga.”—UPatti.
“Ukutyeba . . . kukwenza uzive ungenasidima tu kwaphela. Ukususela kwibanga lesibini bendityebile . . . Ndaqala ngelo xesha ukuba lilifa lokugculelwa.”—UJudd.
UKUTYEBA. Phantse kube yeyona nto yoyikwa kakhulu ngabantu abaselula abathile, ngokukodwa abangamantombazana. Xa kwenziwa uhlolisiso kwelinye iqela lamantombazana akubudala bokuhamba isikolo, angama-58 ekhulwini kuwo ayezigqala etyebile.
Ngokutsho kolunye uhlolisiso lwaseUnited States, ama-34 ekhulwini kumantombazana akwishumi elivisayo atyebileyo aye asebenzisa iipilisi zokunciphisa umzimba. Phantse ibe yintombazana enye kwamane eye yabhenela ekugabheni! Inikela ingxelo ngolunye uhlolisiso, iThe New Teenage Body Book ithi: “Okothusayo kukuba, phantse isiqingatha sabantwana abaneminyaka esithoba ubudala nama-80 ekhulwini abantwana abaneminyaka elishumi nabaneminyaka elishumi elinanye ubudala bebenciphisa umzimba. Athile angama-70 ekhulwini kumantombazana aneminyaka elishumi elinambini kuse kwelishumi elinesithandathu ebezama ukunciphisa umzimba—ibe angama-90 ekhulwini aneminyaka elishumi elinesixhenxe ebenciphisa umzimba.”
Ukuxhalabela Ukuncipha
Kangangeenkulungwane, ukuba nomzimba othe futhu kwakuliqhayiya kumadoda nakumabhinqa. Kodwa ebudeni beminyaka yee-1920, ishishini lefashoni laseUnited States lenza iinguqulelo ezithile. Ngequbuliso ukuba ngumalamb’ edlile kwaba yeyona nto ilibhongo. Kumashumi eminyaka kamva, ukuncipha kusaqhubeka kuthandwa. Umabonwakude namaphephancwadi bayayintyontyela le mbono ngezibhengezo ezibalaselisa amadoda namabhinqa anciphileyo abonisa ngempahla yefashoni. Ibethwa ngoyaba into yokuba aba bantu banciphileyo bazibulalisa ngendlala! Izigidi zolutsha (nabantu abakhulu) ngobuqhetseba ziye zaqeqeshelwa ukukholelwa kwelokuba ukuze ube nomtsalane kufuneka unciphe. Ngoko, akumangalisi ukuba ulutsha olunemizimba nje ephakathi lusoloko lucinga ukuba lutyebile ibe alunamtsalane.
Ingcinezelo yoontanga nayo ayincedi. Abakwishumi elivisayo abatyebileyo basoloko belilifa lokuhlekwa, lokugculelwa nokuchwethelwa ecaleni, nto leyo ebangela oko omnye umbhali awakuchaza ngokuthi “yintlungu engathethekiyo engqondweni”—intlungu enokukuthi mbende ude ube ngumntu omkhulu.
Ngubani Lo Uthi Utyebile?
Ngethamsanqa, enoba utyebe ngokwenene okanye akunjalo eyona nto ibalulekileyo asiyondlela obonakala ngayo xa unxibe impahla yokuqubha—ubuncinane ngokwembono yezonyango. Ngokuqhelekileyo oogqirha bathi umntu utyebe ngokugqithiseleyo xa edlula ngama-20 ekhulwini kubunzima obumfaneleyo. Noko ke, amaphepha abonisa isithomo nobunzima obufanelekileyo anikela nje imiyinge, ibe asenokunganabi ngesibakala sokuba bumele bube ngakanani ubunzima bomntu osempilweni. Ngoko ke bambi oogqirha bakhetha ukukulinganisa ukutyeba ngokugqithisileyo kungekhona nje kuphela ngobunzima kodwa kwanangamanqatha asemzimbeni. Ngokwe-A Parent’s Guide to Eating Disorders and Obesity, “amanqatha afanele abe ngama-20 kuse kuma-27 ekhulwini kwizicwili zomzimba wamabhinqa aze kwizicwili zomzimba wamadoda abe li-15 kuse kuma-22 ekhulwini.”
Bambi abaphandi bakholelwa kwelokuba lumbalwa ngokwentelekiso ulutsha olutyebe ngokwenene. Ngokwembono yabezempilo, kusenokungabikho sizathu kwaphela sokuba unciphise umzimba. Kuhlolisiso olukhankanywe ekuqaleni, amantombazana angaphezu kwesiqingatha ekwenziwa uhlolisiso kuwo ayezigqala etyebile, kodwa kuphela ali-15 ekhulwini awayetyebe ngokwenene.
Kutheni Ndikhangeleka Ngale Ndlela?
Oku kusenokungakuthuthuzeli xa uzijonga esipilini; usenokuzibona ungenawo umzimba ocinga ukuba ngowona unomtsalane. Enye intombazana ekwishumi elivisayo yakhalaza yathi: “Ndifuna ukunciphisa umzimba, ndibe mde ndize ndimile kakuhle.”
Noko ke, khumbula ukuba ngenxa yokuba ukwishumi elivisayo, umzimba wakho uguquka ngokukhawuleza. UGqr. Iris Litt uthi: “Ngokuqhelekileyo amakhwenkwe namantombazana aba nobunzima obungakumbi xa efikisa. Kodwa ngoxa amakhwenkwe esiba nezicwili zezihlunu ezingakumbi, amantombazana wona aba nezicwili ezingakumbi zamanqatha. Xa ifikisa, amanqatha omzimba wentombazana anda ukusuka kwisibhozo ekhulwini—mlinganiselo lowo amakhwenkwe namantombazana aba nawo xa esengabantwana—aye kutsho kumanqatha omzimba amalunga nangama-22 ekhulwini. Kwangaxeshanye, iinguqulelo kumathambo zandisa ubunzima intombazana enabo. Amakhwenkwe aba namagxa abanzi, ngoxa amantombazana esiba namanqe axandileyo.” Ezi nguqulelo zithabatha ixesha. Kodwa intombazana emile kakubi eneminyaka eli-11 okanye eli-12 ubudala inokuthi xa igqibile ukufikisa ibe yekwishumi elivisayo enomzimba omile kakuhle. Kodwa, kusenokungabi njalo.
Ukuba oko kube njalo kuwe, kusenokuba kungenxa yemizila yemfuza oyizuz’ ilifa kubazali bakho. Bambi oogqirha bakholelwa kwelokuba, ibala lesikhumba sakho, indlela eziyiyo iinwele zakho nesithomo sakho, indlela omile ngayo zonke ezi zinto “zibhalwe encwadini,” njengokuba umdumisi wabhalayo, kwimizila yemfuza ekukhawulweni. (INdumiso 139:16) UGqr. Lawrence Lamb ephuhlisa ingongoma efana naleyo umdumisi awaphefumlelwa ukuba ayibhale, kwincwadi yakhe ethi The Weighting Game uthi: “Wazalwa unombhalo wobomi bakho obonisa ubunzima omele ube nabo, ubungakanani bamanqatha ofanele ube nawo, kumanqanaba awahlukeneyo obomi bakho.”
Uhlolisiso lubonise oko kubangelwa ziiseli zemfuza kwindlela omile ngayo. Abantwana abakhuliswa ngoosinga-bazali badla ngokuba nemizimba efana neyabazali babo bokwenene, kungakhathaliseki ukuba oosinga-bazali babo banemizimba enjani. Ibe ekubeni amawele enemizila yemfuza efanayo, akufanele kusimangalise ukuba amawele abe nobunzima obufanayo.
Kuthetha ntoni oku kuwe? Ngokomzekelo, masithi abazali bakho bobabini batyebe ngokugqithisileyo. Ngoko angama-80 ekhulwini amathuba okuba nawe ube njalo. Xa ingumzali omnye otyebileyo lo mlinganiselo uyehla ube sisiqingatha. Umthambo nohlobo oluthile lokutya lusenokukunceda ukusa kumlinganiselo othile. Kodwa ubukhulu becala, sidla ngokuhlala simile ngale ndlela yethu. Ukuba unomzimba omncinane, unciphile ibe ubhitye ngendalo. Kodwa ukuba iiseli zakho zemfuza zikwenze watyeba—watukutukwana waza wanamanqatha angakumbi—wena wawungenzelwanga ukuba unciphe. Kwanakwindlela obulinganiswa ngayo ubunzima kwezonyango, usenokubonakala unobunzima obungakumbi kunendlela othanda ngayo.
Ukwaneliseka Ngumzimba Wakho
Ngaba uyakuphoxa? Mhlawumbi. Kodwa iindaba ezimnandi zezokuba uYehova uThixo wadala isibini sokuqala esingabantu, uAdam noEva, safezeka enyameni. Nangona saye asafezeka saza sadlulisela ukungafezeki kubantwana baso, uThixo uya kuqinisekisa ukuba naziphi na iziphako esizizuz’ ilifa ziya kulungiswa kwihlabathi lakhe elitsha.—Yobhi 14:4; Roma 5:12; 2 Petros 3:13.
Khumbula, imilinganiselo yobuhle isenokuba ibangelwe yindlela obujongwa ngayo kwindawo ohlala kuyo nayindlela wena obujonga ngayo. Ngaloo ndlela, indlela obujongwa ngayo ubuhle ayifani ehlabathini lonke yaye isenokuguquka ngokuhamba kwexesha. Ngoko kutheni “uvumela ihlabathi likuphembelelele ekubeni ufane nalo”? (Roma 12:2, Phillips) Kutheni unikezela kwimilinganiselo neembono zalo ezidla ngokuba zezitenxileyo?
Asikho isizathu sokuba uzijongele phantsi okanye udandatheke kuba nje unganciphanga. UThixo akasigwebi ngesithomo okanye ngokumila kwemizimba yethu. IBhayibhile ithi: “Umntu ukhangela umphandle, uYehova ukhangela intliziyo.” (1 Samuweli 16:7) Ewe, eyona nto ibalulekileyo kuThixo ‘ngumntu ofihlakeleyo wentliziyo’—kungekhona ubungakanani bamanqe okanye besinqe sakho. (1 Petros 3:4) Yaye ukuba uchwayitile, unobulali, unobubele yaye unenkxalabo ngabanye, ngokuqhelekileyo abantu baya kuba nomdla kuwe.
Oku akuthethi ukuba akukho nto unokuyenza ukuphucula inkangeleko yakho. Kodwa ukuba akwanelisekanga ngokupheleleyo ngumzimba wakho, akuyomfuneko ukuba wohlwaye umzimba wakho ngokungatyi nto leyo abantu abathe phithi yiyo. Mhlawumbi into nje ekufuneka uyenze kukuphaphela indlela onxiba ngayo nemibala yempahla oyinxibayo, ukhetha impahla nemibala equma ezi ndawo ucinga ukuba ziziphako nekwenza kubonakale ngokucacileyo ukufaneleka kwembonakalo yakho.
Sekunjalo, usenokuvakalelwa kukuba kuya kuba luncedo kuwe ukuwunciphisa kancinane umzimba wakho. Okanye ukutyeba kusenokuba kukubangela iingxaki ezininzi kuze ke kufuneke unciphise umzimba ungenzeli nje inkangeleko kodwa ngenxa yezizathu zempilo. Indlela onokukwenza ngokukhuseleke ngayo oku iya kuba ngumxholo wenqaku elilandelayo.
[Ibhokisi ekwiphepha 26]
“Ndibhitye Gqitha”
Asilulo lonke ulutsha oluvakalelwa kukuba ukuba ngumalamb’ edlile kuliqhayiya. UMark oselula ukhalaza athi: “Ndiyinkwenkwe eneminyaka eli-15 ubudala enqinileyo yaye kusoloko kuhlekiswa ngam.” Ukubhitya kuyenye into ebangelwa kukufikisa. Umzimba osakhulayo usebenzisa iikilojoule ezininzi kakhulu. Oselula usenokubhitya de akhule ngokwaneleyo. Nalapha iiseli zemfuza zifak’ isandla. Kambe ke, ukugula okanye ukungalungelelani kwamadlala nako kusenokubangela ukubhitya ngokugqithiseleyo, ibe kubalulekile ukuba ukhe udibane nogqirha xa kunjalo. Uncedo lwengcali lusenokufuneka nakulutsha olungatyiyo ngenxa yokudandatheka okanye olukhathazwa kukutya ngokungalungelelananga okuqatha, njengokoyika ukutyeba ngokugqith’ emgceni.
Enoba imeko iyintoni na, ukuba ucinga ukuba ubhitye kakhulu, dibana nogqirha. Kusenokwenzeka ukuba kufuneka nje ufunde ukuyamkela—uze mhlawumbi ufunde ukuyithanda—inkangeleko yakho.
[Umfanekiso okwiphepha 25]
Abaninzi bacinga ukuba batyebile kuba bengamilanga njengabantu ababonisa ngempahla yefashoni kumaphephancwadi