Abantu Abaselula Bayabuza . . .

Kutheni Ndibhitye Kangaka Nje?

UJUSTIN unciphile yaye womelele kodwa akanelisekanga kwaphela ngumzimba wakhe. Evuma uthi: “Ndifuna ukuthi fuku nje kancinane.” Ngoku utya izidlo ezihlanu ngosuku, nto leyo elingana nomlinganiselo wamandla oziikilojoules ezingama-16 800. Noko ke, ngoku ufuna ukukhulisa izihlunu. Ngoko wongezelela ngelithi: “Ngezinye iintsuku ngaphambi kokuba siye emsebenzini, mna nomhlobo wam sivuka ekuseni kakhulu siye kwigumbi lomthambo ukuze siphakamise iintsimbi.”

UVanessa naye ubhityile. Kodwa wanelisekile ngumzimba wakhe. UVanessa ukhumbula oku: “Xa ndandisemncinane, abantwana babethanda ukundihleka baze bathi ndinqinile. Kodwa ngoku andisazikhathazi ngaloo nto. Ndizamkela njengoko ndinjalo.”

‘Zamkele njengoko unjalo.’ Oko kuvakala kulicebiso elihle. Kodwa kusenokuba licebiso olifumanisa kunzima ukulilandela. Njengokwishumi elivisayo, usenokuba ‘usentlahleni yobutsha.’ (1 Korinte 7:36) Elona xesha linzima gqitha lelo lokuguquka emzimbeni elibizwa ngokuba kukufikisa. Ebudeni bokufikisa, amalungu omzimba wakho asenokukhula ngokungalinganiyo; izandla, imilenze nobuso bakho busenokubonakala bungahambisani nomzimba wakho ngendlela eyothusayo.a Oku kusenokukwenza uzive ungakhululekanga yaye ungathandeki. Kwakhona ke khumbula ukuba asilulo lonke ulutsha olukhula ngesantya esifanayo. Ngoko ke ngoxa bambi oontanga bakho sele bakhekile emzimbeni okanye abangamantombazana benemizimba enjengeyabafazi, usenokubonakala ubhityile xa uzithelekisa nabo.

Nangona kuthethwa kakhulu ngolutsha oluvakalelwa kukuba lutyebile, ngokufuthi ulutsha oluvakalelwa kukuba lubhitye kakhulu alukhathalelwa. Oku kusenokuba njalo ngokukhethekileyo phakathi kweqela elithile lohlanga nakwamanye amazwe apho ukubhitya kugqalwa njengophawu lobuhle. Kwimimandla enjalo intombazana ebhityileyo kunokuhlekiswa ngayo kuba “inqinile.”

Kuthekani ngamakhwenkwe? Ngokutsho komphengululi uSusan Bordo, “uhlolisiso lwenkangeleko yomzimba oluye lwenziwa kumashumi eminyaka ngaphambi kweminyaka yee-1980 luye lwabonisa ukuba xa amabhinqa ezijonga esipilini, ayikho enye into ayibonayo ngaphandle kweziphako.” Kuthekani ngamadoda? Lo kaBordo uhlabela mgama esithi: “Amadoda azijonga esipilini azibone enomzimba OMHLE okanye abona okubhetele kunoko kwakulindelekile.” Kodwa kwiminyaka yakutshanje, oko sekuqalise ukutshintsha. Ephawula ukuba ngaphezu kwekota yabantu abenza uqhaqho lokulungisa amalungu omzimba ngamadoda, uBordo unxulumanisa olu tshintsho lukhoyo ngoku lokuba nomdla kwamadoda aselula ekomeleleni nokuba nemizimba yamadoda “efezekileyo” aboniswa kwizibhengezo zeempahla zangaphantsi eUnited States nakwamanye amazwe aseNtshona. Ngokuqhelekileyo, oku kuye kwawaphembelela amakhwenkwe akwishumi elivisayo. Asenokuvakalelwa engafanelekanga ukuba akanawo umzimba onezihlunu wababonisi bempahla abangamadoda.

Ngoko ke ukuba ubhityile, usenokuzifumanisa uzibuza, ‘Yintoni le iphosakeleyo ngam?’ Iindaba ezimnandi zezokuba kusenokwenzeka ukuba akukho nto iphosakeleyo.

Isizathu Sokuba Ubhitye

Kulutsha oluninzi, kuyinto nje eqhelekileyo ukubhitya. Ngokufuthi iba yingxaki nje yokukhula nokuguqulwa ngokukhawuleza kokutya emzimbeni kubantu abafikisayo. Ngokuqhelekileyo inkqubo yakho yokuguqula ukutya iza kuzinza njengoko usiya ukhula. Ngoko ke, ukuba ubhitye kakhulu phezu kwako nje ukutya ukutya okusempilweni, kuya kuba kuhle ukubona ugqirha ukuze ahlole naziphi na iingxaki zempilo, ezinjengesifo seswekile, esinokubangela ukuba unciphe ngomzimba.

USteven Levenkron, ingcali eyaziwayo kwiingxaki zokutya, wathi kuVukani!: “Ndikhumbula ibhinqa eliselula elalibhitye kakhulu elathunyelwa kum lineanorexia, yaye lalikhangeleka njengomntu oneengxaki zokutya. Kodwa kungekudala ndaqonda ukuba ingxaki yalo yeyasemzimbeni, kungekhona eyasengqondweni. Ugqirha walo wentsapho akazange akufumanise ukuba linesifo sikaCrohn, isifo esinzulu samathumbu. Ukungabonwa kwesi sifo kwakunokuyibulala le ntombazana.” Ukuba unesifo seswekile okanye esinye isifo esibangela ukuba unciphe ngokomzimba, ungaba wenza kakuhle ukuba ulandela icebiso likagqirha wakho ngononophelo.

Kakade ke, maxa wambi ukubhitya kusenokuba luphawu lokukhathazeka ngokweemvakalelo. Kwincwadi yakhe ethi Anatomy of Anorexia, uGqr. Levenkron uthi abanye abaphengululi bathi inani elithile “labantu abanesifo seswekile abaxhomekeke kwinaliti baneengxaki zokutya, abatya kakhulu abangenakuzibamba abanebulimia nabaneanorexia.” Ugqirha ofanelekayo unokufumanisa enoba kukho ingxaki enjalo yokutya kusini na.b

Amacebiso Asebenzisekayo

Masithi sele umbonile ugqirha wakho yaye ubhityile kodwa usempilweni. Uza kuthini ke? KuYobhi 8:11, iBhayibhile ithi: “Ngaba isityalo somkhanzi siya kukhula sibe side kungekho mgxobhozo? Ngaba ingcongolo iya kukhula ibe nkulu kungekho manzi?” Njengokuba isityalo sichuma xa sikwindawo efanelekileyo yaye sisondliwa, ngoko kufuneka utye ngokulungeleleneyo ukuze ukhule ube ngumntu omdala osempilweni. Oku kubalulekile enoba uzama ukutyeba okanye ukuncipha.

Noko ke, musa ukuhendeka ekubeni uqalise ukutya ukutya okuninzi okunamafutha ukuze utyebe ngokukhawuleza. Xa wayesenza uhlolisiso ngokutya okutyiwa ngabo baqeqeshelwa ukwakha umzimba, isazi ngemibandela yokutya uSusan Kleiner waphawula ukuba batya ukutya okuneekilojoules ezingama-25 000 ngosuku! Kodwa ngokutsho kukaKleiner, “okona kukhathazayo okuye kwafunyaniswa kolu hlolisiso kukuba babesitya, ngokomlinganiselo, amanqatha angaphezu kweegram ezingama-200 ngosuku. Oko kulingana namafutha afumaneka kwizitena zebhotolo ezibini! Ngexesha nje elifutshane, oko kwanele ukuba kwenze abantu abaninzi bagule. Ukuba kwenziwa umkhwa wokutya ngale ndlela ixesha elide, amafutha amaninzi kangako aya kukhokelela kwisifo sentliziyo.”

Ngokutsho kweSebe Lezolimo laseUnited States (U.S. Department of Agriculture [USDA]), isiseko sokutya ngokulungeleleneyo ziicarbohydrate ezinjengesonka, ukutya okuziinkozo, irayisi nepasta. Okulandelayo ngokubaluleka yimifuno neziqhamo. IUSDA icebisa ukuba inyama nokutya okwenziwa ngobisi kutyiwe ngobungcathu.

Ukuze ukubek’ esweni oko ukutyayo nobungakanani bento oyityayo, unokuzama ukuyibhala phantsi into oyityayo. Phatha incwadana kangangeveki, uze ubhale yonke into oyityayo nexesha otya ngalo. Unokumangaliswa xa ufumanisa ukuba akutyi kangangokuba ucinga, ingakumbi xa usoloko ungxamile. Njengomntu okwishumi elivisayo odlamkileyo, ngokulula usenokusebenzisa iikilojoules ezingama-12 600 okanye ngaphezulu ngosuku! Yaye usenokufumanisa ukuba ukutya okutyayo akulungelelananga njengoko kufanele kube njalo—ngokutya okuninzi okuthengiswa kwiivenkile zokutyela okufana neeburger nepizza nokungafumani iziqhamo nemifuno eyaneleyo.

Kuthekani ngeepilisi zezondlo ezibiza imali eninzi? Kusenokwenzeka ukuba aziyomfuneko. Iingcali ezininzi zikholelwa ekubeni unako ukufumana sonke isondlo esifunwa ngumzimba wakho ngokutya ukutya okusempilweni. Ngaphezu koko, ziphephe izicombululo ezikhawulezileyo njengeeanabolic steroids. Okubuhlungu kukuba, ukusebenzisa kakubi isteroid akuyongxaki nje ekumakhwenkwe akwishumi elivisayo. IThe New York Times inikela le ngxelo: “Ukusetyenziswa okungakumbi [kweesteroid] phakathi kwamantombazana, nto leyo abanye abaphengululi abathi ngokuyinxalenye yinto ethile enxamnye neanorexia, kuye kwafikelela nakumanqanaba amakhwenkwe kwiminyaka yee-1980.” Okothusayo kukuba amantombazana akwishumi elivisayo angama-175 000 eUnited States ayavuma ukuba asebenzisa iianabolic steroids. Ezi ziyobisi ziye zanxulunyaniswa neengxaki ezininzi eziyingozi, kuquka neenwele ezingafunwayo ezikhula ebusweni, iingxaki kwinkqubo yokuya exesheni, nomhlaza wamabele kumabhinqa, umhlaza wedlala eliyiprostate kumadoda, nokuvaleka kwemithambo yegazi nomhlaza wesibindi kumabhinqa namadoda. Iisteroid azifanele zithatyathwe ngaphandle kwemvume naphantsi kweliso likagqirha.

Ukuthozama Nokuba Nembono Yokwenene

IBhayibhile isixelela ukuba ‘sithozame ekuhambeni noThixo wethu.’ (Mika 6:8) Ukuthozama kuquka ukuqonda kukabani iintsilelo zakhe. Ukuthozama kuya kukunceda ukuba ube nembono yokwenene ngenkangeleko yakho. Ewe, akukho nto iphosakeleyo ngokufuna ukuba ngokhangelekayo. Kodwa ukuthi phithi yinkangeleko yakho akuyongenelo kuye nabani na—ngaphandle nje kwakwishishini lefashoni nelokunciphisa umzimba. Iingcali zokwakha umzimba ziyavuma ukuba amadoda aqhelekileyo akanamzila wemfuza wokuba abe kudidi lwehlabathi labo bakha umzimba, enoba atya ngokufanelekileyo okanye aziqeqesha kakuhle kangakanani na. Yaye ukuba uyintombazana, kusenokwenzeka ukuba umzimba wakho awunakuze wondleke, enoba utya kangakanani na.

Okubangela umdla kukuba, ukunikela ingqalelo kwiimpahla zakho kunokukunceda ukuba ufihle oko ukugqala njengeziphene emzimbeni. Kuphephe ukunxiba izinto ezibonakalisa ezo nkalo zomzimba wakho. Abanye bacebisa ukuba unxibe imibala ekhanyayo, ekubeni imibala engakhanyiyo ityekela ekwenzeni abantu ababhityileyo bakhangeleke bebhitye kakhulu.

Kwakhona, khumbula ukuba eyona nto ibaluleke kakhulu kunenkangeleko yakho bubuntu bakho. Ekugqibeleni, ukuba noncumo oluhle nokubaphatha kakuhle abanye kuya kukwenza ube nomtsalane kwabanye kunezihlunu ezomeleleyo okanye ubungakanani bomzimba wakho. Ukuba abahlobo bakho bahlala bekujongela phantsi ngenxa yendlela okhangeleka ngayo, funa abantu abakuxabisayo ngenxa yendlela oyiyo ngaphakathi—oko iBhayibhile ikubiza ngokuba ‘ngumntu ofihlakeleyo wentliziyo.’ (1 Petros 3:4) Okokugqibela, ungaze ulibale ukuba “umntu nje ubona okubonakalayo emehlweni; kodwa uYehova yena, ubona oko ikuko intliziyo.”—1 Samuweli 16:7.

[Imibhalo esemazantsi]

[Umfanekiso okwiphepha 14]

Olunye ulutsha luyazigxeka kuba lubhityile