Ubomi Obungenazintlungu Busondele!
IMICHIZA entsonkothileyo yomzimba esikhusela ekonzakaleni imangalisa ngokwenene. Ukufunda ngayo kufanele kusishukumisele ekubeni sidumise uMdali, ngokufana nomdumisi weBhayibhile owabhala wathi: “Ndiyabulela kuwe ngenxa enokuba ndenziwe ngokoyikekayo, ngokubalulekileyo.” (INdumiso 139:14) Enyanisweni, nguThixo kuphela onokwenza kubekho ubomi obungenazintlungu! Kodwa uya kukwenza njani oku?
Phawula ukuba phambi kokuba ithethe ngedinga lokupheliswa kweentlungu nokusulwa kweenyembezi, iBhayibhile isixelela ‘ngezulu elitsha nomhlaba omtsha; kuba elokuqala izulu nowokuqala umhlaba udlule.’ (ISityhilelo 21:1, 4) Kakade ke, iBhayibhile ayithethi ukuba izulu lethu lokoqobo nomhlaba wethu wokoqobo ziza kudlula. unoko, ngamafutshane, ithi, endaweni yale nkqubo ikhoyo kuza kubakho inkqubo yezinto entsha. Ewe, urhulumente omtsha ongaphezulu kunabantu uya kwenza sinandiphe ubomi obungenantlungu kulo mhlaba.
Xa ichaza lo rhulumente, iBhayibhile ithi ‘uThixo wamazulu uya kumisa ubukumkani [okanye, urhulumente] obuya kuzicola buzigqibe zonke ezo zikumkani, bona bume ngonaphakade.’ (Daniyeli 2:44) Xa uYesu Kristu wayesemhlabeni, wasifundisa ukuthandazela lo rhulumente ubuBukumkani xa wathi: “Thandazani ngoko nina nenjenje: Bawo wethu osemazulwini, malingcwaliswe igama lakho. Mabufike ubukumkani bakho. Makwenziwe ukuthanda kwakho nasemhlabeni, njengokuba kusenziwa emazulwini.”—Mateyu 6:9, 10.
Noko ke, inzaliseko yalo mthandazo ingakwenza njani uphile ubomi obungenazintlungu?
Umlawuli Onamandla Angaphezu Kwawomntu
Konke kuxhomekeke kubulumko namandla alowo uThixo amnyule njengentloko yorhulumente Wakhe. Lowo ke nguYesu Kristu. Isiprofeto seBhayibhile sithi ngaye: “Urhulumente uya kuba semagxeni akhe . . . ukwanda korhulumente wakhe noxolo akuyi kuba nasiphelo.”—Isaya 9:6, 7, King James Version.
Ubulumko bukaYesu, ngoku osezulwini, bubodlula lee obakhe nawuphi na ugqirha wasemhlabeni. Uyazi ngokupheleleyo indlela esebenza ngayo imizimba yethu, kuquka nenkqubo yayo yokuzikhusela ekonzakaleni. Xa wayengumntu emhlabeni kwiminyaka eli-1 900 eyadlulayo, kwakungekho sifo okanye ukubandezeleka awayengakwazi kukunyanga. Ngaloo ndlela wayebonisa oko aza kukwenza ngomlinganiselo ongakumbi xa enguMlawuli woBukumkani bukaThixo. Ngesinye isihlandlo, iBhayibhile ithi:
“Kweza kuye izihlwele ezininzi, zinazo iziqhwala, iimfama, izidenge, izilima, nabanye abaninzi, zababeka phantsi ezinyaweni zikaYesu; wabaphilisa; zada zamangaliswa izihlwele ezo, zakubona izidenge zithetha, izilima ziphilile, iziqhwala zihamba, neemfama zibona.” (Mateyu 15:30, 31) Phakathi kokubandezeleka uYesu aza kukunyanga ebudeni bolawulo lwakhe eBukumkanini koko koyikeka kakhulu, iintlungu ezingapheliyo.
Eneneni, enjani yona ukumangalisa intsikelelo okuya kuba yiyo oko! Ibe akuyi kwenzelwa abambalwa kuphela. Nali idinga loMdali: “Akayi kuthi ummi wakhona, Ndiyafa.” (Isaya 33:24) Ngoko, phantsi kolawulo loBukumkani bukaThixo, eli dinga liya kuzalisekiswa, “kungabi sabakho . . . nantlungu.”—ISityhilelo 21:4.
Phantsi kolawulo loBukumkani oluzukileyo lukaKristu, imichiza yethu yomzimba emininzi, kuquka naleyo isikhusela ekonzakaleni, iya kusebenza ngokufezekileyo ngenxa yokuba isono esasizuz’ ilifa siya kuba sishenxisiwe. Inkqubo yomzimba wethu yokusilumkisa ngento esinayo ayisayi kuphinda isithuthumbise. Okuvuyisayo kukuba, ngokutsho kweziprofeto zeBhayibhile ngoku ezizalisekayo, sisemgubasini welo hlabathi litsha, apho iintlungu zingasayi kuphinda zikhathaze bantu.—Mateyu 24:3-14, 36-39; 2 Timoti 3:1-5; 2 Petros 3:11-13.
Unokubunandipha ubomi phantsi koBukumkani bukaThixo xa uhlobo lweentlungu oluthwaxa izigidi zabantu namhlanje luya kube lungasekho. Kodwa ikho into ekufuneka uyenze. UYesu Kristu wachaza eyona nto isisiseko ifunekayo xa wathi kumthandazo wakhe kuThixo: “Bubo ke obu ubomi obungunaphakade, ukuba mabakwazi, wena ukuphela koThixo oyinyaniso, naye uYesu Kristu omthumileyo.”—Yohane 17:3.
AmaNgqina kaYehova aya kukuvuyela ukukunceda ekuzuzeni olu lwazi lubalulekileyo. Cela nje omnye wawo kummandla wakho, okanye ubhalele kubapapashi beli phephancwadi, uchaza umnqweno onawo wokuba nesifundo seBhayibhile kwikhaya lakho okanye kwenye indawo ekulungeleyo. Ngoko kuya kwenziwa amalungiselelo okuba ufunde okungakumbi ngeenjongo zikaThixo zokuba abantu banandiphe ubomi obungenazintlungu.