Kungekudala—Ihlabathi Lobe Lingenazintlungu!
NGABA ihlabathi elingenazintlungu lisemnyango? Ezinjani zona ukuba mnandi iindaba kubantu abakhathazwa ziintlungu—enoba ziintlungu ezingokwasemzimbeni, ezingokwasengqondweni okanye ezingokweemvakalelo! Ngokomzekelo, izigidi beziya kukuvuyela gqitha ukushenxiswa kweentlungu eziqatha emzimbeni ezibangelwa ziintlobo ezithile zomhlaza, kukuphazamiseka kwemithambo-luvo nezifo ezithile zentliziyo. Abo baneengxaki eziqatha ezingokwasengqondweni bebeya kukuvuyela ukukhululeka kwiimbandezelo zabo ngokufuthi ezingenakuchazwa. Yaye izigidi ezingakumbi beziya kuchwayita ukuba nje iintlungu ezinazo ezingokweemvakalelo nezibangelwa kukoyika, lusizi, ukuziva unetyala, ukukhathazeka nokudideka beziya kuphela. Kodwa ngaba sikufuna ngokwenene ukubona zonke iintlungu ziphela?
UAllan Basbaum oyingcali ngokusebenza kwamalungu omzimba kwiYunivesithi yaseKhalifoniya eSan Francisco uthi, “Ukungaziva nje kwaphela iintlungu kuthetha intlekele.” Wayenesizathu esifanelekileyo sokuthetha oku. Njengothunywashe wokusilumkisa ngengozi, intlungu yasemzimbeni isibangela siqonde ukuba kukho okuthile okuyingozi okwenzekayo.
Ukungakwazi ukuva intlungu yasemzimbeni kunokubangela intlekele ngokwenene. Oku kucaciswe kule ngxelo yephephancwadi iTime: “Uncumo lobuhlobo lwenkwenkwe eneminyaka elishumi elinesibini ubudala lwahluke gqitha kwimbonakalo yayo elusizi. Iingalo nemilenze yayo inesiphene yaye igobile, ngokungathi yakhe yahlaselwa sisifo sokungomeleli kwamathambo. Iminwe yayo ayiphelelanga. Edolweni inenxeba elikhulu, yaye imilebe yayo idlakadlaka kukuziluma. Ikhangeleka kanye ngokungathi ngumntwana lo ubebethwa . . . Yazalwa inesifo esingokwemfuza nesinqabileyo esiyenza ingaziva iintlungu. Iminwe yayo isenokuba yaminxiselwa okanye yatsha ngenxa yokuba yayingasisusi isandla sayo kwizinto ezitshisayo okanye eziyingozi. Amathambo namalungu ayo enzakele ngenxa yokuba yayibetheka kabuhlungu ngoxa ihamba okanye ibaleka. Idolo layo liyagxiza ngenxa yokukhasela kwizinto ezibukhali eyayingenakuziva. Ukuba nje inokwaphuka ithambo okanye ikruneke kusikrotyana, ayinakuva zintlungu zinokuyibangela ukuba icele uncedo.”
Bambi abantu bayakhawuleza ukuthi nguThixo ongunobangela weenkathazo ezinjalo nobugxwayiba ezikubo izigidi zabantu. Phofu ke, ngaba ngokufanelekileyo sinokumbek’ ityala uThixo ngenxa yokubandezeleka koluntu?
Ngaba NguThixo Obekek’ Ityala?
Kangangeminyaka enokuba ngama-6 000 ngoku, uluntu belungamakhoboka eentlungu zasemzimbeni, ezingokwasengqondweni nezingokweemvakalelo. Enyanisweni, kwiinkulungwane ezinokuba li-19 ezadlulayo, umpostile uPawulos ongumKristu wayechan’ ucwethe xa wathi: “Yonke indalo iyancwina, inenimba kunye, unangoku.” (Roma 8:22) Phezu kwazo nje izinto ezininzi zokubulala iintlungu ezifumaneka kwiivenkile zamayeza nemigudu yoogqirha neengcaphephe zezigulo zengqondo, ukukhotyokiswa okwandileyo ziintlobo zonke zeentlungu kuyaqhubeka. Ewe, bambi baye bamqalekisa uThixo ngenxa yeentlungu abazivayo, kwananjengokuba umfazi wendoda enguYobhi wabongoza ukuba enjenjalo kwiinkulungwane ezininzi ezadlulayo! Noko ke, njengokuba noYobhi waphawulayo, umoya onjalo ngowobudenge ibe awufanelekanga.—Yobhi 2:9, 10.
Akunakuba yinto efanelekileyo ukumbeka ityala uThixo ngokukhotyokiswa okuqhubekayo koluntu ziintlungu. Kunoko, lixoki elingabonakaliyo nabazali bethu bokuqala abanobutyala. Njani?
IZibhalo zibonisa ukuba nangona ekuqaleni sasilungile, isidalwa esithile sokomoya sabawela igunya nokubalasela. Njengoko kuqalisa ubomi babantu emhlabeni, saba nombono wesizwe soluntu sikumhlaba oyiparadisi, sonke sihlonela ngokupheleleyo uThixo onguSomandla, uYehova. Siqhutywa yintliziyo eyathi yaba nolunya, esi sidalwa sokomoya samvukela uMdali, sifuna abantu banqule baze bahlonele sona. Iinjongo zaso ezingendawo zazibonakalisa xa sathi ngobuqhophololo saxoka. Oku, kwazisa isono ehlabathini.
UYehova uThixo waxelela umntu wokuqala, uAdam, ukuba ukutya isiqhamo somthi wokwazi okulungileyo nokubi kwakuya kuphumela ekufeni. (Genesis 2:15-17) Kodwa umfazi ka-Adam, uEva, walukuhlelwa ekubeni angathobeli. Esebenzisa inyoka njengesithethi sakhe, uMkhohlisi ongumoya wamxelela oku umfazi: “Anisayi kufa. Kuba esazi uThixo ukuba, mhlana nithe nadla kuzo, oqabuka amehlo enu [akaEva nawendoda yakhe], [nize nobabini] nibe njengoThixo, nazi okulungileyo nokubi.” (Genesis 3:1-5) Obo yayibubuxoki bokuqala, yaye babangela ukuba esi sidalwa sokomoya singendawo sibe negama lokuba ‘nguyise wamaxoki.’ (Yohane 8:44) Ukusebenzisa kwaso inyoka ngeso sihlandlo emyezweni wase-Eden kuvisisana nendlela esichazwa ngayo eZibhalweni ‘njengenyoka yakudala, leyo kuthiwa nguMtyholi, uSathana ke.’—ISityhilelo 12:9.
Ukuncwina nokukhotyokiswa ziintlungu kwabakho eluntwini ngenxa yesono. Ngokuvisisana nelizwi likaThixo, kanye ngosuku uAdam awona ngalo, uThixo wawisa isigwebo sokufa kwabo bakreqi. Ngokwembono kaYehova, ngokuwiswa kweso sigwebo, uAdam noEva bafa ngolo suku. (Thelekisa uLuka 20:37, 38.) E-Eden, uYehova waxelela loo mfazi wokuqala wonileyo oku: “Ndiya kukwandisa kakhulu ukubulaleka kwakho ekumitheni, uzale abantwana unembulaleko.” (Genesis 3:16) UAdam wayeya kutsala nzima ngaphandle komyezo wase-Eden kumhlaba owahluke gqitha kwiParadisi. UYehova wathi: “Uya kudla ukudla kokubila kobuso bakho, ude ubuyele emhlabeni, kuba uthatyathwe kuwo; ngokuba uluthuli, uya kubuyela kwaseluthulini.” (Genesis 3:17-19) Ngaloo ndlela kwaba kuyaqala ke ukukhotyokiswa kwesizwe sabantu ziintlungu.
Ngoko ke, ukukhotyokiswa ziintlungu kunxulumene nokungafezeki, isono nokufa okwazuzw’ ilifa kuAdam. Kunjengokuba umpostile uPawulos ekubeka ngolu hlobo: “Isono sangena ngamntu mnye ehlabathini, kwangena ke ukufa ngaso isono; kwaza ngokunjalo ukufa kwabatyhutyha abantu bonke, ekubeni bonke bonayo.” (Roma 5:12) Kodwa iLizwi likaThixo liyasinceda ukuba sizinyamezele iintlungu, kuba lisixelela isizathu sokuba uYehova ezivumele yaye lisiqinisekisa ukuba ngokukhawuleza ziza kuphela. UThixo wamvumela ‘uyise wamaxoki’ oyinyoka, uSathana uMtyholi, ukuba amthuthumbise uYobhi olilungisa aze ngaloo ndlela avavanye ingqibelelo yakhe. UMtyholi wayeme ngelokuba uYobhi wayemkhonza uThixo ngenxa yokuzingca, kungekhona ngenxa yothando. (Yobhi 1:8-12) Kodwa uYobhi wahlala ethembekile kuThixo, engqina ukuba abantu abangafezekanga banokumkhonza ngenxa yothando yaye ngokunyanisekileyo banokuluphakamisa ulongamo Lwakhe phezu kwako nje ukuvavanywa ngokuqatha kokholo lwabo. Ukunyamezela kukaYobhi njengomgcini wengqibelelo kwafak’ isandla ekungcwalisweni kwegama likaYehova, kwangqina ukuba uSathana ulixoki, yaye kwambangela ukuba avuzwe ngokutyebileyo loo solusapho ungumzekelo. (Yobhi 42:12-17; Yakobi 5:11) Ngokusuka kumava kaYobhi, sinokugqiba kwelokuba xa injongo kaThixo ifeziwe, ukukhotyokiswa koluntu ziintlungu kuya kuphela. Kodwa sinokuqiniseka njani ngaloo nto?
Indlela Eziya Kuphela Ngayo Iintlungu
Enyanisweni, uYehova ulungiselele iindlela eziphumelela gqitha ukuphelisa ukukhotyokiswa koluntu ziintlungu. Oku ukwenze ngesizinzi sedini lentlawulelo loNyana wakhe, uYesu Kristu. UYesu ‘uyiMvana kaThixo, ethwala isuse isono sehlabathi.’ (Yohane 1:29) Weza emhlabeni, “engazanga kulungiselelwa; weza kulungiselela, nokuncama ubomi bakhe [obufezekileyo bobuntu], bube yintlawulelo yokukhulula abaninzi.” (Mateyu 20:28) Ngenxa yokungathobeli, uAdam waphulukana nobomi obufezekileyo bobuntu, nawo onke amalungelo namathemba abo. Ibe koko kanye kuhlawulelwayo ngedini lentlawulelo likaYesu. (1 Timoti 2:5, 6; Hebhere 7:26) Eneneni, “wenjenje uThixo ukulithanda kwakhe ihlabathi [loluntu], ude wancama unyana wakhe okuphela kwamzeleyo, ukuze bonke abakholwayo kuye bangatshabalali, koko babe nobomi obungunaphakade.”—Yohane 3:16.
Kwakhona uThixo uthembise ngokucacileyo ukuba ukukhotyokiswa ziintlungu kuya kuphela. Exela kusengaphambili ixesha lokupheliswa kweentlungu ezinxulumene nesono, umpostile ongumKristu uYohane waphefumlelwa nguThixo ukuba abhale oku:
“Ndabona izulu elitsha, nomhlaba omtsha; kuba elokuqala izulu nowokuqala umhlaba udlule, nolwandle alusekho. . . . Ndeva izwi elikhulu liphuma emazulwini, lisithi: Yabona, umnquba lo kaThixo unabantu; uya kuhlala nabo emnqubeni, bona babe ngabantu bakhe, yena uThixo abe nabo enguThixo wabo; azisule uThixo zonke iinyembezi emehlweni abo, kungabi sabakho kufa, kungabi sabakho nasijwili, nakukhala, nantlungu; ngokuba izinto zokuqala zigqithile. Waza lowo uhleli phezu kwetrone [uYehova uThixo] wathi, Uyabona, izinto zonke ndizenza ntsha. Athi kum, Bhala; ngokuba lawo ngamazwi ayinyaniso, athembekileyo.”—ISityhilelo 21:1-5.
Kungekudala uluntu oluthobelayo luya kungenelwa ngokuzeleyo kwidini lentlawulelo likaYesu. Oku kuya kwenzeka kulawulo loBukumkani ekudala buthandazelwa ngabathe tye, besithi: “Bawo wethu osemazulwini, malingcwaliswe igama lakho. Mabufike ubukumkani bakho. Makwenziwe ukuthanda kwakho nasemhlabeni, njengokuba kusenziwa emazulwini.” (Mateyu 6:9, 10) EkuBukumkani basezulwini, uYesu Kristu uya kulawula ade azibeke phantsi kweenyawo zakhe zonke iintshaba, kuquka ukukhotyokiswa ziintlungu notshaba lokugqibela, ukufa.—1 Korinte 15:25, 26.
Ewe, ngokuphathelele uluntu oluthobelayo, kungekudala uThixo ‘uya kuzisula zonke iinyembezi, kungabi sabakho kufa, nasijwili, nakukhala, nantlungu.’ (ISityhilelo 21:4) Aya kuthi ke amazwi eziprofeto alandelayo ngoku anentsingiselo yokomoya azaliseke nangokoqobo: “Mbonge uYehova, mphefumlo wam, . . . uloxolela bonke ubugwenxa bakho; ulophilisa zonke izifo zakho.” “Akayi kuthi ummi wakhona, Ndiyafa.”—INdumiso 103:1-3; Isaya 33:24.
Ziya Kuphela Nini Iintlungu?
Isiphelo sokukhotyokiswa ziintlungu sigalelekile. Ewe, siya kufika kumhla wethu, ibe esi sizukulwana siya kusibona. Ukuzaliseka kweziprofeto zeBhayibhile kubonisa ukuba siphila esiphelweni sale nkqubo yezinto engendawo. Iimfazwe ezingenakuthelekiswa, iindlala, neenyikima zomhlaba, kwanokushunyayelwa kweendaba ezilungileyo ngamaNgqina kaYehova ehlabathini lonke, kuyinxalenye ‘yomqondiso’ oyintlanganisela ‘wobukho’ bukaYesu obungabonakaliyo kuzuko loBukumkani basezulwini.—Mateyu 24:3-14, 21, 34.
Kungekudala, “elokuqala izulu nowokuqala umhlaba,” inkqubo yezinto elungelelaniswe nguSathana uMtyholi noorhulumente bayo, iya kudlula. “Ulwandle” olungenakuzola olungabantu abangendawo luya kupheliswa. Ngoko ke simi kanye emgubasini ‘wezulu elitsha’ elingurhulumente osikelelwe nguThixo noya kulawula ‘kumhlaba omtsha,’ ibutho labantu abangamalungisa. Apha kuya kube “kumi ubulungisa.”—ISityhilelo 21:1; 2 Petros 3:13.
Njengoko iintsikelelo ezinjalo phantsi korhulumente omtsha—uBukumkani bukaThixo—zisondele ngolu hlobo, yomelela. Funa ulwazi olubhekele phaya olungehlabathi elitsha elobe lingenazintlungu nakufa. Eneneni, khangela phambili kusuku olusikelelekileyo ngoku olusondele gqitha xa bonke abantu abathanda nabathobela uYehova uThixo beya kuphila kwihlabathi elingenazintlungu.