Yintoni Oyiphathelwe Ziinkwenkwezi?
NGUMBHALELI KAVUKANI! EBRAZIL
“NGABA ukuvile oko sikuphathelwe ziinkwenkwezi, ukuba kulo Julayi uzayo siza kungqubana noMars?” La mazwi oncuthu lwengoma kaCole Porter ayichaza kakuhle inkolelo eqhelekileyo neyamandulo yokuba ikamva lomntu ngandlel’ ithile lihlobene neenkwenkwezi.a Kodwa ngaba lukho naluphi na ulwalamano lokwenene phakathi kwezinto zasezulwini nobomi boluntu kulo mhlaba? Ukuba kunjalo, luchaphazeleka njani uluntu? Ukuba akunjalo, yiyiphi injongo efezwa ziinkwenkwezi?
Akumangalisi ke ukuba abantu abaninzi kangaka benomdla kwikamva xa sicinga ngezinye zeziganeko ezivusa umxhelo kutshanje—ukuwa koDonga lwaseBerlin nokuwohloka ngokukhawuleza kwendawo eyayisakuba yiSoviet Union, ukungathenjwa kweenkokeli zobupolitika, intiyo yobuhlanga egqubayo eAfrika naseYurophu, ubutshaba kwezonqulo eIndiya naseIreland, ukunyuka ngokukhawuleza kwamaxabiso ezinto okuthwaxa amazwe amaninzi kangaka nemvukelo yolutsha. Ngokwengxelo evela kwiYunivesithi yaseHamburg, owe-1992 ube ngowona nyaka ubunemilo ukususela ekupheleni kweMfazwe Yehlabathi II, unamadabi angama-52 aliwa kuxhotyiwe kumazwe ahlukahlukeneyo. Abantu abathanda uxolo ngokuzenzekelayo bayabuza: ‘Sinokujonga phi ukuze sifumane ukuzola, uxolo nonqabiseko?’
Ukungaqiniseki ngekamva kuye kwakhokelela ekwandeni kokuxela ithamsanqa ngeendlela zako ezahlukahlukeneyo. Mhlawumbi eyona nto yaziwa kakhulu kukuvumisa ngeenkwenkwezi. Ukuvumisa ngeenkwenkwezi kwahlukile kwinzululwazi yeenkwenkwezi “kona kukuvumisa ngempembelelo ekuthiwa iinkwenkwezi nezijikelezi-langa zinayo kwimicimbi yabantu nakwiziganeko zehlabathi oko kubonakala kwindlela ezimi ngayo.” Namhlanje, izigidi zabantu ziziva zinyanzelekile ukufunda ngehoroscope yazo ukuze zazi ngekamva lazo.b
Ezinye izinto abavumisi ngeenkwenkwezi abathi balixela kwangaphambili ikamva lazo ngumphumo weengxaki zomtshato neengxaki zempilo, ukubekwa nokususwa esihlalweni kweenkokeli zobupolitika, owona mhla ulungileyo wokuvula ishishini elitsha neenombolo omawuzisebenzise ukuze uphumelele ilottery.
Ingxelo yeReuters yabika ukuba uNancy Reagan wayesoloko eqhagamshelana nomvumisi ngeenkwenkwezi uJoan Quigley efuna ukwazi ixesha umyeni wakhe, owayesakuba ngumongameli waseUnited States, awayefanele anikele ngalo iintetho zakhe nangexesha inqwelo-moya yakhe eyayifanele ihambe ize ifike ngalo. INew Catholic Encyclopedia yadiza ukuba “uPopu Julius II [1503-13] ukuvumisa ngeenkwenkwezi wayekusebenzisa ukuze amisele usuku lwakhe lokuthweswa isithsaba noPaul III [1534-49] wayekusebenzisa ukuze amisele iyure efanelekileyo yeNgqungquthela nganye.” UAlfred Hug, umalathisi womzi-mveliso waseSwitzerland osebenzisa ukuvumisa ngeenkwenkwezi ukuze acebise abatyali-mali kwinkqubo yokuthengisa izahlulo zamashishini, uqinisekisa ngelokuba kunemiphumo emihle. Uthi, “Kubhalwe kwiinkwenkwezi.”
Licacile elokuba abaninzi bavakalelwa kukuba iinkwenkwezi ziyabuphembelela ubomi babantu. Kwaqala njani ukuvumisa ngeenkwenkwezi? Ngaba incwadi yamandulo iBhayibhile inekuthethayo ngokuvumisa ngeenkwenkwezi nangabavumisi ngeenkwenkwezi?
[Imibhalo esemazantsi]
a “KwiTshayina yamandulo, . . . imiqondiso eyenzeka esibhakabhakeni kwakunye neentlekele zokwemvelo kwakucingelwa ukuba zazintama izenzo ezilungileyo nezenzo eziphosakeleyo zoMlawuli norhulumente wakhe.”—The International Encyclopedia of Astronomy.
b Ihoroscope “yindlela ezima ngayo izijikelezi-langa nemiqondiso yeenkwenkwezi eyenzeka ngexesha elithile (njengasekuzalweni kukabani)” yaye isetyenziswa ngabavumisi ngeenkwenkwezi ukuze bazame ukuxela kwangaphambili iziganeko zekamva kubomi bomntu.