Abantu Abaselula Bayabuza . . .

Kutheni Kunzima Kangaka Ukuyeka Ukucinga Ngabesini Esahlukileyo?

ULorraine oselula wathi: “Ukufuna kwakho ukwazi ngesini kuyinto enkulu xa uselula. Ingqondo yakho ixakeka ngakumbi nangakumbi yimibandela engokwesini.”

NGABA uchitha iiyure ezininzi—mhlawumbi ezona zininzi—ohleliyo ngazo ucinga, uthetha, okanye wondele kwabo besini esahlukileyo? Ngaba uye ulungiselele ukugqibezela umsebenzi wakho wesikolo owenziwa ekhaya, isuke ingqondo ibhadule ucinge ngenkwenkwe ekhangeleka kakuhle okanye intombazana entle oyibone ngaloo mva-kwemini? Ngaba iincoko zakho ziye ziphazanyiswe kukukrwaqula abantu abanomtsalane abadlulayo? Ngaba ukufumanisa kunzima ukufunda, ukufundisisa, okanye ukunikela ingqalelo kwiintlanganiso zamaKristu nakwiindibano—kuba nje ungenako ukuyeka ukucinga ngabesini esahlukileyo?

Ukuba kunjalo, usenokuba noloyiko lokuba ushiywa ziingqondo! Omnye oselula wathi: “Ndicinga ukuba ndisenokuba ndithe phithi sisini okanye into enjalo. Ndithetha ukuba, ndisoloko ndicinga ngamantombazana, ndizenzela imibono engqondweni . . . Ngaba ucinga ukuba ndiphilile?” Njengoko umbhali uLynda Madaras esitsho, xa uselula, “iimvakalelo zothando okanye zesini zinokuba namandla kakhulu. Maxa wambi, kusenokubonakala ngathi ekuphela kwento ocinga ngayo luthando nesini!”a

Iimvakalelo zesini ngokunokwazo azinto imbi. UThixo wayidala indoda nomfazi banomtsalane onamandla omnye komnye. Oku kwakuvisisana nenjongo yakhe yokuba batshate baze ‘bazalise umhlaba’ ngenzala engamalungisa. (Genesis 1:28) NeBhayibhile ibonisa ngokuphandle ukuba iintlobano zesini zinokuba ngumthombo wolonwabo olukhulu kwizibini ezitshatileyo.—IMizekeliso 5:19.

Ingxaki kukuba, njengabantu abangafezekanga ngokufuthi siba nobunzima ekulawuleni iimvakalelo zethu. (Thelekisa iGenesis 6:5.) “Inkanuko yenyama” inokubonakala inamandla ngokugqithiseleyo! (1 Yohane 2:16) Yaye kuba uselula, kusenokuba nzima ngakumbi ngawe ukuyeka ukucinga ngabesini esahlukileyo. Kutheni kunjalo nje?

Iingcinezelo Zokufikisa Ebuntwini Obukhulu

Esinye isizathu kukuba ufikelela “entlahleni”—ixesha laxa inkanuko yesini inamandla kakhulu. (1 Korinte 7:36) UGqr. Bettie B. Youngs uthi: “Ebudeni bokufikisa ebuntwini obukhulu, umlinganiselo weencindi zamadlala omzimba wanda ngokuphawulekayo. Ezi zingunobangela wokuqalisa kwazo zonke iinguqulelo zomzimba ezithi ziguqule umzimba womntwana ube ngowomntu omkhulu. Ukwanda komlinganiselo weencindi zamadlala omzimba okuhambisana nokufikisa ebuntwini obukhulu kubangela iinguqulelo ezininzi zeemvakalelo nezokuziphatha.”

Luhlobo olunjani lweenguqulelo? Ezona nguqulelo zinkulu ngokufuthi ziye ziquke indlela ubani avakalelwa ngayo ngabesini esahlukileyo. Umbhali uRuth Bell uthi: “Ukuguquka komzimba ngexesha lokufikisa ngokufuthi kubangela iimvakalelo ezinamandla ezingokwesini. Unokuzifumanisa ucinga ngakumbi ngesini, uvuseleleka ngokulula ngakumbi ngokwesini, kwanangamaxesha athile ekuphela kwento oyicingayo ibe sisini. Iqela labakwishumi elivisayo [esiye sadlan’ iindlebe nalo] labalisa ngokuvakalelwa ngokungathi umzimba walo uphela wawuvutha ngenxa yamandla angokwesini nokuvuseleleka xa lwaluhamba esitratweni okanye luhleli kuduladula.” Iingcinga ezinjalo ngabesini esahlukileyo zezinye ‘zeenkanuko zobutsha’ ezininzi ekufuneka abantu abaselula bajamelane nazo.—2 Timoti 2:22.

Impembelelo Yamajelo Eendaba Neyabahlobo

Noko ke, amandla ale nkanuko, ngokufuthi akhuliswa ziimpembelelo zangaphandle. Siphila kwibutho loluntu elibonakala lityekele ekukhuthazeni iintlobano zesini ngokusebenzisa iinkqubo zikamabonwakude, ezentengiso, iincwadi, amaphephancwadi, umculo, nemifanekiso-bhanyabhanya. Omnye umKristu oselula owawela ekuziphatheni okubi ngokwesini wathi: “Izinto ezibonisa amanyala ziqheleke kakhulu esikolweni, yaye oku kubangela umnqweno wesini onamandla. Ndandikwazi okwakufanelekile, kodwa iimvakalelo zam zesini zazinamandla.”

Ngoko ke incwadi ebhalelwe abazali ithi: “Amajelo eendaba [aye] anempembelelo egqithiseleyo. Abantwana bethu abakwishumi elivisayo babona abaselula ababonisa ngeempahla abakubudala babo beziphatha ngendlela ekhuthaza isini yaye bethengisa iimpahla ezikwanjalo; babona kukhuthazwa isini kwabafikisa ebuntwini obukhulu kwimifanekiso-bhanyabhanya nakumabonwakude.” Enyanisweni, izikhululo zikamabonwakude orhunyelwayo noomatshini bevideo baye benza kwalula ngolutsha oluninzi ukubona izinto ezibonisa amanyala ngokumanyumnyezi. Omnye oselula uthi: “Amajelo eendaba akhuthaza ukufuna ukwazi neenkanuko zomntu oselula.”

Phofu ke, akuyomfuneko ukuba incwadi ibe namanyala kwiphepha ngalinye ukuze ibe yengafanelekanga. Khawucinge ngamava enye intombazana engumKristu. Ikhumbula oku: “Ndafunda incwadi emnandi eyayinesiqendu esinye okanye ezibini kuphela ezazithetha ngesini. Ndaqalisa ukuzitsiba ezo ziqendu, kodwa nto ithile yandenza ndabuyela kuzo ndaze ndazifunda. Enjani yona impazamo endayenzayo! Oku kwabangela ukuba ndiphuphe kakubi gqitha.”

Abahlobo nezinxulumani zakho nabo banokuba nempembelelo enkulu kwindlela ocinga ngayo. Enye incwadi ethetha ngokukhulela ebuntwini obukhulu ithi: “Ukujonga amantombazana namakhwenkwe kuyindlela eqhelekileyo yokuchitha ixesha ekudibaneni kwezitrato, kwiiholo zezikolo, kwiindawo zokutyela, nakwiindawo ezineevenkile ezininzi.” Yaye xa abantu abaselula bengondelanga kwabesini esahlukileyo, ngokufuthi bathetha ngabo. URobert oneminyaka eli-18 ubudala uyavuma esithi: “Xa ndandiselula ngakumbi, ingcinezelo yokuba neentlobano zesini yayinkulu gqitha . . . Kwigumbi lokutshintsha, kuphela kwento ekwakuthethwa ngayo.” Omnye oselula uyavuma esithi: “Isini sasingowona mxholo wencoko uthandwayo ngabo ndandifunda nabo, ngoko ngokufuthi wawukhunjuzwa ukuba ucinge ngaso.”

Kunzima ukuba ngowahlukileyo. Xa oontanga bakho besoloko bethetha ngabesini esahlukileyo—mhlawumbi ngendlela ethob’ isidima, nengakhiyo—unokulingelwa ekubeni ubathelele. Kodwa iBhayibhile ilumkisa isithi: “Ohamba nezilumko uba sisilumko naye; ke olikholwane lesidenge uya konakaliswa.”—IMizekeliso 13:20.

Imfuneko Yokulungelelana

Ngaba konke oku kuthetha ukuba kuphosakele ukuphawula okanye ukufuna ukuthetha ngabesini esahlukileyo? Akunjalo, kwanababhali beBhayibhile basiphawula isibakala sokuba wambi amadoda namabhinqa ayenomtsalane ngokomzimba. (Thelekisa eyoku-1 kaSamuweli 9:2; Estere 2:7.) Ngoko ke, uYesu, akazange amgwebe ubani ngokuphawula ukuba ibhinqa elithile linomtsalane. Kodwa wawayala amaKristu ukuba ‘angaqhubeki emkhangele umntu oyinkazana ukuba amkhanuke.’ (Mateyu 5:28, NW) Ngendlela efanayo, akunako ukuzivumela ukuba uqhutywe luthando oluvutha ngokungalawulekiyo. Kweyoku-1 kwabaseTesalonika 4:4, 5 sixelelwa oku: “Ngamnye kuni kufuneka afunde ukuwulawula owakhe umzimba ngendlela yobungcwele nebekekileyo, angathabatheki yinkanuko njengabahedeni, abangamaziyo uThixo.”—New International Version.

Ngoxa ingqondo yakho inokufikelwa ziingcinga ezivuselela inkanuko ngamaxesha athile, ukucamngca ngazo kusenokubangela ukuba uthi phithi siso, kwandule ukuqalisa iingxaki ezinzulu. INtshumayeli 5:3 ithi: “Ngokuba ukuphupha kuza ngobuninzi bemicimbi.” Ewe, ubani osoloko ecinga ngeenkanuko zobuqu ngokufuthi uqalisa ukuhlakulela imibono engafanelekanga nokubhadula kwengqondo.b

Ngoxa kungokwemvelo ukuba neengcinga ezivuselela inkanuko ngamaxesha athile, ukucamngca ngazo ngomnye umbandela. Umbhali uRuth Bell uthi “maxa wambi umntu uzifumana echitha phantse imini nobusuku bonke ephupha. Loo maphupha asenokufikelela ekubeni abonakale eyinto yokoqobo ngokungakholelekiyo.” Khawucinge ngenye intombazana eselula eye yabanjiswa yintabatheko. Ithi: “Ndineminyaka eli-12 nesiqingatha ubudala, yaye ndiyithanda ngokunzulu enye inkwenkwe ebakho kwiHolo yethu yoBukumkani. Ndiyazi ukuba andikakhuli ngokwaneleyo ukuba ndenze amadinga, kodwa ndikufumanisa kunzima gqitha ukulawula iimvakalelo zam ngayo.” Ngokufanayo, lumbi ulutsha lukufumanisa kunzima ukufunda, ukufundisisa, ukunikela ingqalelo kwigumbi lokufundela, okanye ukulungiselela iintlanganiso zamaKristu xa iingqondo zalo zizaliswe ziingcinga zothando okanye ezivuselela isini.

Kwakhona kunokubakho iingxaki ezinzulu xa oselula ezama ukudambisa ukuvuseleleka okunjalo ngokuphulula amaphambili. IBhayibhile ikhuthaza amaKristu: “Bhubhisani ngoko amalungu enu asemhlabeni: umbulo, ukungcola, ukuthabatheka okuhlazisayo, inkanuko embi, nokubawa.” (Kolose 3:5) Ukuphulula amaphambili ngumkhwa ongacocekanga ofanele uphetshwe ngamaKristu yaye kusisichasi ‘sokubhubhisa ukuthabatheka okuhlazisayo.’ Ngokwahlukileyo koko, kuyakuvuselela kuze kukukhulise. Izihlandlo ezininzi, inkanuko enjalo iba yinto yokwenene. Umbhali weBhayibhile uYakobi uthi: “Elowo ke uhendwa akutsalwa, abanjiswe, yeyakhe inkanuko. Ithi inkanuko, yakuba ithabathile, izale isono.”—Yakobi 1:14, 15.

Ngoko, yintoni onokuyenza ukuze uyeke ukucinga ngabesini esahlukileyo? Nceda ufunde inqaku elilandelayo kolu ngcelele.

[Imibhalo esemazantsi]

[Amagama acatshulweyo akwiphepha 23]

“Iimvakalelo zothando okanye zesini zinokuba namandla kakhulu”

[Umfanekiso okwiphepha 24]

Imiboniso kamabonwakude neentengiso ezikumaphephancwadi ngokufuthi zikhuthaza umdla oyingozi kwabesini esahlukileyo