Abavangeli—Bafanele Babe Yintoni?

IGAMA elithi “mvangeli” linokwenza kuthi qatha okuthile okubalulekileyo. Abanye abantu, libenza babe nentlonelo, libakhumbuza abantu abanjengoMother Teresa okanye umfi uAlbert Schweitzer.

Ngokwahlukileyo koko, xa kukhankanywa umbandela wabavangeli abanye ababi namdla, bayakruquka, okanye bade bacaphuke. Kubo eli gama libenza bacinge ngokukhohliswa yaye libakhumbuza ngeziganeko zexesha lamathanga.

Ngokuphathelele abavangeli, umbuzo ofanelekileyo ngulo, Ngaba baye bangabathunywa bokukhanya okanye abathunywa bobumnyama?

Yintoni Umvangeli?

Umvangeli uchazwa ‘njengomntu okuthumo oluthile,’ oko kukuthi, owenza “ubulungiseleli ngokuyalelwa yintlangano yonqulo ukuze asasaze inkolelo yayo okanye enze umsebenzi ofak’ isandla kwintlalo-ntle yabantu.”

Isiseko somsebenzi wobuvangeli wamaKristu sandlalwa nguYesu Kristu xa waxelela abalandeli bakhe oku: “Hambani ngoko niye kuzenza abafundi zonke iintlanga.” Oku kufuna ukuba kushunyayelwe isigidimi samaKristu ehlabathini lonke.—Mateyu 28:19.

UYesu wayengumvangeli, owayethunywe nguYise, uYehova, esuka ezulwini waya kwisabelo sasemzini, emhlabeni. (Filipi 2:5-8) Ngokusengqiqweni, umvangeli ongumKristu ufanele awulandele ngokusondeleyo umzekelo owamiselwa nguYesu Kristu. Umvangeli wenkulungwane yokuqala owenza kanye oko yayingumpostile uPawulos, owaba ngumzekelo kubavangeli bamaKristu abamxelisayo.—1 Korinte 11:1.

Nangona wayenovelwano ngeengxaki zasentlalweni ezazithwaxa uluntu, uYesu akazange akugqale njengeyona nto iphambili ukuzicombulula ngoxa wayesemhlabeni. Ukwenjenjalo ngekwakuzise isiqabu sokwexeshana kuphela. (Yohane 6:26, 27; 12:8) Kwakukho nto ithile eyayibaluleke ngakumbi. UYesu waxelela uPilato oku: “Mna ndizalelwe oku; ndizele oku ehlabathini, ukuze ndiyingqinele inyaniso.” Indlela ekubaluleke ngayo ukuba nolwazi ngaloo nyaniso ifanele ibalaseliswe kakhulu, njengoko uYesu wayetshilo ngaphambilana emthandazweni: “Bubo ke obu ubomi obungunaphakade, ukuba mabakwazi, wena ukuphela koThixo oyinyaniso, naye uYesu Kristu omthumileyo.”—Yohane 17:3; 18:37.

Ngaba abavangeli beNgqobhoko bawulandele ngokusondeleyo umzekelo owamiselwa nguYesu? Ngaba bangqineke bengabathunywa bokukhanya njengokuba wayenguye yena, bedlulisela ukukhanya kweLizwi likaThixo, ulwazi olukhokelela kubomi obungunaphakade? Okanye ngaba babashiye ebumnyameni abantu? Sonke sifanele sibe nomdla kwimpendulo yale mibuzo kuba isiqhamo esiveliswe ngabo bazibanga bengabavangeli abangamaKristu ukutyhubela iinkulungwane siyasinceda siqonde unqulo lokwenyaniso, nonqulo lobuxoki.

Baqhube Njani Abavangeli?

Abavangeli baye banegalelo elibalulekileyo ekusasazeni isigidimi sikaKristu. Ngokomzekelo, bambi baguqulele iBhayibhile kwiilwimi zasekuhlaleni, ngaloo ndlela besenza ukuba abantu bakwazi ukuzifundela.

Noko ke, kwimihla esiphila kuyo, kubonakala ngathi abanye abavangeli bavakalelwa kukuba iintswelo zasentlalweni zifanele zigqalwe njengezibaluleke ngakumbi kunemigudu yokushumayela okanye yokuguqulela. Inqaku elikwiphephancwadi iTime elinomxholo othi “Umvangeli Omtsha” lathi: “Phakathi kwamaProtestanti, abavangeli baye bazixakekisa ngakumbi ngokuzama ukucombulula iingxaki zabantu ezisisiseko zoqoqosho nezasentlalweni.” Mayela namaKatolika, intloko yabavangeli bamaJesuit ababethunyelwe besuka eUnited States yathi ukwabelana ngeenkolelo zamaKristu “kugqalwa njengento engabalulekanga kangako kunokunceda abantu.” Yaye usosiba wabavangeli bamaKatolika wathi: “Kwixa elidluleyo, sasinentshukumisa eyayifane ibizwe ngokuba yeyokusindisa imiphefumlo. . . . Ngoku, ngenxa kaThixo, sikholelwa ukuba bonke abantu nazo zonke iinkonzo seziphila ngemfobe nangothando lukaThixo yaye ziya kusindiswa yinceba kaThixo.”

Ngaba oku kuthetha ukuba akusekho mfuneko yakufundisa iLizwi likaThixo njengoko uYesu wayesenza?

Ngaba Isekho Imfuneko?

Ngowe-1985 iintsapho ezili-18 000 eHamburg, eJamani, zatsalelwa umnxeba ngabasebenzi bokuzithandela abangamakhulu aliqela ebudeni boko elinye iphephandaba lakubiza ngokuthi “ngumsebenzi omkhulu wobuvangeli owenziwa ngomnxeba.” Kubonakala ukuba awuzange ube nasiqhamo singako. KuDisemba ophelileyo iThe European yabhala oku: “Kwicawa yamaProtestanti eJamani . . . ngabantu abangaphezu kwama-500 000 abangeziyo kuyo ukususela ngowe-1991.”

Asizocawa zaseJamani kuphela eziphelelwa ngumhlambi. Ehlabathini lonke izigidi zabantu ziye zalushiya unqulo, azisalugqali njengoluyimfuneko ebomini kwiminyaka yee-1990 yezinto zokwenene ebomini. Kodwa ulwazi ngobuKristu lubalulekile ukuba siza kuhlangabezana ngokunempumelelo nobumnyama behlabathi lanamhlanje size somelezwe lithemba lehlabathi elilunge ngakumbi kwikamva. Umyalelo kaYesu wokwenza abantu bazo zonke iintlanga yindlela ephumelelayo yokwanelisa le ntswelo ingxamisekileyo.

UYesu Kristu wayefuna abavangeli abangamaKristu babe ngabathunywa bokukhanya, kungekhona abathunywa bobumnyama. Abavangeli beNgqobhoko baqhube njani? Balandele wuphi umzekelo?

[Inkcazelo Ngomfanekiso okwiphepha 19]

Culver Pictures