Ukwenza Abafundi Bokwenyaniso Namhlanje

UYESU KRISTU wayalela oku: ‘Hambani ngoko niye kuzenza abafundi zonke iintlanga, nibabhaptize.’ (Mateyu 28:19) IEveryman’s Encyclopedia ithi olu thumo “beluphunyezwa ngamaKristu ukutyhubela iminyaka,” nangona yongezelela ithi, “maxa wambi ngehlombe nje elincinane.” Incwadi ethi The Missionary Myth iyabuza: “Ngaba ixesha lobuvangeli liphelile?”

NgoJanuwari kunyaka ophelileyo, iphephancwadi iNewsweek lanikela le ngxelo: “UPopu John Paul II usa ubuRoma Katolika ezitratweni.” Eli phephancwadi lacacisa: “Uthuma abavangeli abangama-350 abangengobefundisi ukuya kuzingela amaguquka kwiidisco zaseRome, kwiivenkile ezinkulu nakwizikhululo zikaloliwe ezingaphantsi komhlaba. Eli phulo lolingelo liqala ngoLwesithathu Olusuku Lokuqala Lokuzila (Feb. 16). Ukuba liyaphumelela, upopu uya kuthumela abavangeli emhlabeni wonke—isenzo esiya kubangela abavangeli bamaKatolika bankqonkqoze ezindlwini ukusuka eBuenos Aires ukuya eTokyo.”

Kwelinye icala, amaNgqina kaYehova kudala eyiqonda imbopheleleko yawo yokwenza umsebenzi wokuhambisa ivangeli. (2 Timoti 4:5) Kakade ke, asingawo onke ashumayela njengabavangeli kumazwe asemzini. Kodwa anako—yaye ashumayela nakweyiphi na indawo akuyo. Ngokwale ngqiqo, onke angabavangeli.

Isikolo Esikhethekileyo

Ebutsheni beminyaka yee-1940, iWatch Tower Society yaseka isikolo sokuqeqesha abalungiseleli abanamava ukuba bakhonze njengabavangeli kumazwe asemzini apho kwakufuneka uncedo ngokungxamisekileyo. Ukutyhubela iminyaka bekusenziwa uhlengahlengiso kwizifundo, kodwa asizange siphambuke kusukelo lwaso olusisiseko lokubalaselisa ufundisiso lweBhayibhile nokuphumeza umsebenzi obalulekileyo wokuhambisa ivangeli.

Igama elakhethelwa esi sikolo sitsha laliyiGiliyadi, ngesiHebhere elithetha “iMfumba Yobungqina.” Ngokunceda ekufumbeni imfumba yobungqina ukuze kuzukiswe uYehova, iGiliyadi iye yaphumeza indima ebaluleke gqitha ekuphumezeni umsebenzi wokushumayela kwihlabathi lonke uYesu awaxela kwangaphambili ukuba wawuya kwenziwa kumhla wethu.—Mateyu 24:14.

Ethetha neklasi yokuqala yeSikolo saseGiliyadi ngowe-1943, uNathan H. Knorr, owayengumongameli weWatch Tower Society ngelo xesha, wathi: “Nixhotyiselwa ngokungakumbi umsebenzi ofana nalowo wawusenziwa ngumpostile uPawulos, uMarko, uTimoti nabanye ababeyityhutyha yonke imimandla yoBukhosi baseRoma bevakalisa isigidimi soBukumkani. . . . Owona msebenzi wenu uyintloko kukushumayela ivangeli yoBukumkani kwindlu ngendlu njengoko uYesu nabapostile benzayo.”

Xa iklasi yokuqala yalugqibayo uqeqesho lwayo, abaphumelele kuyo bathunyelwa kumazwe asithoba akuMzantsi Merika. Ukuza kuthi ga ngoku, ngabafundi abangaphezu kwama-6 500 abavela kumazwe angaphezu kwe-110 abaye baqeqeshwa kwiSikolo saseGiliyadi nabaye bathunyelwa njengabavangeli kumazwe angaphezulu kuhle kuma-200 naseziqithini.

Abavangeli Abahlukileyo

Uninzi lwabavangeli beNgqobhoko kwixa elidluleyo, njengabo bathunyelwa eGreenland, lwaguqulela iBhayibhile okanye iinxalenye zayo kwiilwimi zomthonyama. Ukanti, abavangeli bokuqala abanjalo ngokufuthi babenezinye izilangazelelo ngaphandle kokufundisa abantu iBhayibhile.

Ngokomzekelo, abavangeli beNgqobhoko abathunyelwa eJapan, babandakanyeka “kumaziko emfundo nakwizikolo,” itsho njalo iKodansha Encyclopedia of Japan. Ithi: “Uninzi lwabavangeli luye lwazazisa ngemfundo yalo.” Baba ziingcali ngeelwimi okanye oonjingalwazi, behlohla izifundo ezinjengoncwadi, ulwimi, imbali, intanda-bulumko, iinkonzo zaseMpuma Asia nezithethe zamaJapan. Le ntyilalwazi yalek’ umsundulo isenjenje: “Amaziko okubonelela uluntu nawentlalo-ntle nawo ayeyinxalenye ebalulekileyo yomsebenzi wobuvangeli.”

Ukushumayela ivangeli akuzange kube yeyona nto ibalulekileyo kubavangeli ngokubanzi. Babesoloko begxininisa ekwaneliseni iintswelo zokwenyama kuneentswelo zokomoya. Ukusukela izilangazelelo zobuqu kwaba yeyona nto iphambili kubo. Ngaloo ndlela, umvangeli weCawa yaseTshetshi owathunyelwa eJapan ngowe-1889 namhlanje waziwa kakuhle ‘njengomseki womdlalo wokunyuka iintaba eJapan.’

Abavangeli abaqeqeshwe eGiliyadi bahluke kakhulu kwabo beNgqobhoko. Incwadi ethi AmaNgqina KaYehova—Abavakalisi BoBukumkani BukaThixo, isahluko 23, ithi: “Abavangeli basemazweni abaphumelele kwiSikolo saseGiliyadi bafundisa abantu iBhayibhile. Kunokuba bakhe iicawa baze balindele ukuba abantu beze kubo, baya kwindlu ngendlu . . . , kungekhona ukuba balungiselelwe, kodwa ukuze balungiselele.”

Sibe Yintoni Isiqhamo?

Emva kokufumana ixesha lokwenza abafundi abangamaKristu eYurophu kangangeenkulungwane, baye banempumelelo kangakanani abavangeli beNgqobhoko? Incwadi ethi A Global View of Christian Missions iyaphendula: “Abantu abaqikelelwa kwizigidi ezili-160 eYurophu abazibangi bengamalungu alo naluphi na unqulo. Phakathi kwabo basazibanga bezinikele kubuKristu libathwana eliluthabatha nzulu unqulo lwalo. . . . Akuyonyaniso kwaphela ukubiza iYurophu ngokuthi lilizwekazi lamaKristu.”

Kuthekani ngemeko yaseAsia? IKodansha Encyclopedia of Japan iyaphendula: “Abantu banembono yokuba ubuKristu busagqalwa njengokholo ‘lwasemzini,’ . . . olungabafanelanga abantu abaqhelekileyo baseJapan. . . . UbuKristu abungenanga ngokupheleleyo kwibutho labantu baseJapan.” Eneneni, eJapan bangaphantsi kwesine ekhulwini abantu abazibanga bengamaKristu, eIndiya bangaphantsi kwesithathu ekhulwini, ePakistan bangaphantsi kwesibini ekhulwini, baze eTshayina babe ngaphantsi kwesiqingatha ekhulwini.

Emva kweenkulungwane zokusebenza kwabavangeli beNgqobhoko eAfrika, injani imeko apho? Lithetha ngengxelo eyanikelwa ngentlanganiso yoobhishophu baseAfrika eyaqhutywa ngentlakohlaza eRome, iphephancwadi laseJamani iFocus lathi: “Iinkonzo zaseAfrika azisenakugxekwa njengonqulo-zithixo lwabahedeni. Uxwebhu lwasemthethweni, olungekapapashwa okwangoku, luzibeka ‘iinkonzo zezithethe zaseAfrika’ kumgangatho wezinye iinkonzo ezifanelekileyo nezibalulekileyo. Amalungu azo afanelwe yintlonelo. Ingqungquthela yaqonda ukuba iinkonzo ebezifudula zigxekwa njengezinemvelaphi yonqulo lwamakhubalo ziye ‘ngokufuthi zaphembelela ubomi boyena mKatolika weyisekileyo.’”a

Emva kokufumana ixesha lokwenza abafundi abangamaKristu eMerika kangangeenkulungwane, baye banempumelelo kangakanani abavangeli beNgqobhoko? Incwadi ethi Mission to the World iyaphendula: “‘UMzantsi Merika’ usalifanele igama elithi ‘ilizwekazi elityeshelweyo’ phezu kwako nje ukuhambela phambili okukhulu komsebenzi wobuvangeli kumashumi eminyaka akutshanje.” Ngokuphathelele iUnited States, iNewsweek ithi uhlolisiso lwakutshanje “lubonisa ukuba ngoxa unqulo lusasazeka kummandla waseMerika, ligcudwana kuphela eliluthabatha nzulu. . . . Isiqingatha sabantu abaxelela abaphandi ngezimbo zabantu ukuba bachitha iintsuku zangeCawa ecaweni abathethi nyaniso. . . . Phantse isithathu sabantu baseMerika abane-18 nabadala banembono engeyoyalunqulo . . . Kuphela bali-19 ekhulwini . . . abaluqhelisela rhoqo unqulo lwabo.”

Ngokufutshane, kwimigudu yabo yokudambisa iingxaki zobuhlwempu, impilo enkenenkene, nokunqongophala kwemfundo, njengeqela, abavangeli beNgqobhoko baye baxhasa amacebo abantu azisa isiqabu sokwexeshana nesincinane. Kwelinye icala, abavangeli bokwenene bamaKristu, balathisela abantu kuBukumkani bukaThixo obumiselweyo, obuya kuzisa isiqabu esiya kuhlala sihleli nesipheleleyo. Abuyi kuzidambisa nje kuphela iingxaki; buya kuzicombulula. Ewe, uBukumkani bukaThixo buya kuzisa impilo efezekileyo kuluntu, unqabiseko lokwenyaniso lwezoqoqosho, amathuba angapheliyo omsebenzi onemveliso kubo bonke, nobomi obungenasiphelo!—INdumiso 37:9-11, 29; Isaya 33:24; 35:5, 6; 65:21-23; ISityhilelo 21:3, 4.

Abavangeli beNgqobhoko basenokwalatha kwabo bazibiza ngokuba bangamaKristu abathi maxa wambi baye kwiinkonzo zonqulo njengobungqina bokuba baye bazenza ‘abafundi zonke iintlanga, bababhaptiza.’ Kodwa izibakala zibonisa ukuba aba bavangeli baye basilela ukufundisa aba bantu babhaptiziweyo ‘ukuzigcina zonke izinto uYesu abawisele umthetho ngazo.’—Mateyu 28:19, 20.

Noko ke, umsebenzi wokufundisa wamaKristu okwenyaniso uya kuqhubeka ukusa kwihlabathi elitsha likaThixo. Uya kufikelela nakwizigidi zabantu abavusiweyo ekuya kufuneka bafundiswe iindlela zikaThixo. Kwandule ke, ngaphandle kokungenelela kukaSathana, amaKristu abe nelungelo elonwabisayo lokuqhubeka esenza abafundi—njengokuba ebesenjenjalo kangangamashumi eminyaka.

[Umbhalo osemazantsi]

[Ibhokisi ekwiphepha 24]

Indlela Ababancede Ngayo Abantu

La magqabaza alandelayo ngawabantu abaye bangenelwa kuncedo lwabavangeli abaqeqeshwe eGiliyadi.

“Ndamangaliswa yinkalipho yabo, benyamezela izinto ezininzi ezahlukileyo kwilizwe labo lokuzalwa: imozulu, iilwimi, amasiko, ukudla, neenkonzo. Kodwa bahlala kwizabelo zabo, bambi kwade kwasekufeni. Imikhwa emihle yokufundisisa nenzondelelo yabo kubulungiseleli yandinceda ndahlakulela ezi zinto.”—J. A., Indiya.

“Ndachukunyiswa yindlela umvangeli awayeligcina ngayo ixesha ekufundisiseni nam. Wabonisa ukuzeyisa ngendlela ephawulekayo ekunyamezeleni ukuba nekhethe nokungazi kwam.”—P. T., Thailand.

“Mna nomkam sakuxabisa ukunyaniseka okwakuboniswa ngabavangeli abangamaNgqina. Umsebenzi wabo wasiphembelela ukuba sizenzele usukelo lwenkonzo yexesha elizeleyo, ibe nathi namhlanje sinovuyo lokuba ngabavangeli”—A. C., Mozambiki.

“Ndandiphila ubomi bokuzingca. Ukudibana nabavangeli kwandinika intshukumisa endandiyifuna ukuze ndibuguqule. Kubo ndabona ulonwabo lokwenene kungekhona inkwalambisa.”—J. K., Japan.

“Abavangeli beNgqobhoko babephila ubomi obutofotofo. Izicaka zazicoca indlu, zipheka, zihlamba iimpahla, zinyamekela isitiya, yaye ziqhuba inqwelo-mafutha. Ndamangaliswa kukubona abavangeli baseGiliyadi bezenzela umsebenzi wabo wekhaya kakuhle, ngoxa babekwanceda abantu basekuhlaleni bafunde ngoBukumkani bukaThixo.”—S. D., Thailand.

“Oodade abangabavangeli babekhwela iibhayisikile betyelela abantu naxa amaqondo obushushu ayenyuka aye kutsho ngaphezu kwe-115 ngokukaFahrenheit [46° C.]. Ububele babo nokungakhethi buso, nokunyamezela kwabo, kwandinceda ndayiqonda inyaniso.”—V. H., Indiya.

“Abavangeli babengavakalelwa kukuba bongamile. Ngokuthobeka bazivisisanisa nabantu basekuhlaleni neemeko zokuphila ezimaxongo. Beza kukhonza, ngoko abazange bakhalaze kodwa ngalo lonke ixesha babebonakala bevuya yaye banelisekile.”—C. P., Thailand.

“Babengayingxengi inyaniso yeBhayibhile. Ukanti, abazange babenze abantu basekuhlaleni bavakalelwe kukuba zonke izithethe zabo zaziphosakele okanye babemele bamkele iindlela zaseNtshona. Abazange babenze abanye bazive bephantsi okanye bengafanelekanga.”—A. D., Papua New Guinea.

“Ngokwahlukileyo kubavangeli beNgqobhoko, wayekulungele ukuhlala emgangathweni aze akhe isathanga, ngendlela yaseKorea, ngoxa sasiqhuba isifundo sethu seBhayibhile. Wayekulungele ukudla ukutya kwethu kwaseKorea. Indlela endandimthanda ngayo yandinceda ndenza inkqubela.”—S. K., Korea.

“Ndandineminyaka elishumi ubudala yaye ndandiphuma esikolweni emini emaqanda. Omnye umvangeli wandimema ukuba ndimpheleke ngeenjikalanga kubulungiseleli basentsimini. Wandifundisa imigaqo yeBhayibhile emininzi waza wabethelela kum ukuyixabisa ngokwenyaniso intlangano kaYehova.”—R. G., Colombia.

“Bandifundisa ukuhlala kwizabelo, ndisenza oko kufuneka kwenziwe ngaphandle kokukhalaza. Ndiyambulela uYehova noYesu Kristu ngokusuka emazantsi entliziyo yam ngokusithumelela abavangeli.”—K. S., Japan.

[Umfanekiso okwiphepha 23]

Abavangeli abaqeqeshwe eGiliyadi abavela kumazwe ali-16 bebalisa amava kwindibano yakutshanje