AmaKristu Okwenyaniso Nemfazwe
UYESU waxelela abafundi bakhe oku: “Ndiniwisela umthetho omtsha, wokuba nithandane, njengoko ndinithandileyo nina, ukuze nani nithandane.” (Yohane 13:34) Ngaba amaKristu okwenyaniso angabonisa ukuthandana okunjalo aze kwangaxeshanye aye emfazweni aze abulalane?
Kwakhona khawucinge ngombuzo owabuzwa ngumpostile uPawulos: “Ngaba wahlulelene uKristu?” (1 Korinte 1:13, Revised Standard Version, Catholic Edition) Zibuze oku: ‘Ngaba kungakho ukwahlulelana okukhulu okunokuphumela ekubeni amalungu onqulo olunye abulalane?’
Ngokwenene, asifanele simangaliswe kukwazi ukuba amaKristu okuqala akazange aye emfazweni. IEncyclopædia of Religion and Ethics edumileyo kaHastings yathi: “Ngokubanzi kwakusasazeke imbono yokuba kwiCawa yokuqala imfazwe yayibubungendawo nokuba iCawa nabalandeli bakaKristu bamele bangabi nanto yakwenza nayo.”
AmaKristu okuqala ayephila ngokuvisisana nomyalelo kaYesu wokuthandana. Umfundi wezakwalizwi waseJamani uPeter Meinhold wathi: “Ngoxa iTestamente Entsha ingawuxubushi umbandela wokuba amaKristu angangamajoni okanye angabi ngawo kusini na nowokuba ayemele ayeke kusini na emkhosini xa esiba ngamaKristu, icawa yamandulo yenza isigqibo ngaloo mbandela. Ukuba ngumKristu nokuba lijoni kwakugqalwa kungahambelani.” Ngaba namhlanje ukho nabani na onokuma okufana noko ‘kwecawa yamandulo’?
Ngaba Akho AmaKristu Okwenyaniso Namhlanje?
IEncyclopedia Canadiana ithi: “Umsebenzi wamaNgqina kaYehova ukukuhlaziywa nokumiselwa kwakhona kobuKristu bamandulo obabuqheliselwa nguYesu nabafundi bakhe ebudeni benkulungwane yokuqala neyesibini kwixesha lethu. . . . Onke angabazalwana.”
Akwenza njani oku? IAustralian Encyclopædia ithi: “AmaNgqina kaYehova alondoloza ubundilele obungqongqo ngexesha lemfazwe.” Ngoxa ngokobuqu esenokukhetha oku kuma, akaphazamisani nemicimbi karhulumente aphila phantsi kwakhe. Ngaloo ndlela akazange ayixhase imfazwe kaHitler, yaye akukho namnye kuwo owamangalelwa njengesaphuli-mthetho semfazwe ebudeni betyala laseNuremberg.
Omnye umJamani owafunyaniswa enetyala waza wabulawa yayinguAlfred Rosenberg, usomaqhuzu weSebe Lemicimbi Yezangaphandle Yombutho WamaNazi. Ekhusela umgaqo wamaNazi wokuvalela amaNgqina kaYehova kwiikampu zoxinaniso, lo kaRosenberg wanikela obu bungqina ebudeni betyala lakhe: “Umfundisi wasemkhosini waseMerika ngobubele obukhulu uye wandinika iphephancwadi lecawa laseColumbus [eOhio] ndikwisisele sam. Ndifumanisa kuloo nto ukuba neUnited States, ibambe amaNgqina kaYehova ebudeni bemfazwe nokuba de kube nguDisemba 1945, ali-11 000 awo ayesavalelwe kwiikampu zoxinaniso.” Liyinyaniso elokuba amaNgqina kaYehova ebengoondilele ngokungqongqo, engathabathi cala kwiingxwabangxwaba zobupolitika. Akakhange aphalaze gazi, kwiMfazwe Yehlabathi II okanye nakweyiphi na imfazwe.
EHungary, omnye umbhali kwiphephancwadi iRing likaNovemba 4, 1992, wathetha oku ngamaNgqina kaYehova: “Ebeya kukhetha ukufa kunokuba abulale umntu. Ngenxa yoko, ndiqinisekile ukuba ukuba ibingamaNgqina kaYehova kuphela ebephila emhlabeni ngoko bekungasayi kuqhambuka zimfazwe naphina na.” UReo M. Christenson, unjingalwazi kwinzululwazi yezobupolitika, kwiThe Christian Century wathetha ngento yokuba umKristu wokwenyaniso anganenxaxheba emfazweni kusini na, yaye wagqiba ngelithi:
“Ngaba nabani na anganombono kaYesu etshukutshela isiqhushumbisi esiphoswa ngesandla kwiintshaba zakhe, esebenzisa umbayi-mbayi, ephosa imijukujelwa yomlilo, etyala iibhombu zenyukliya okanye ejula ii-ICBM ebezinokubulala okanye zingxwelerhe amawaka oomama nabantwana? Lo mbuzo awukho ngqiqweni ngeyona ndlela kangangokuba awufuni mpendulo. Ukuba uYesu wayengenakukwenza oku aze athembeke koko kwakulindelekile kuye, ngoko singakwenza njani size sithembeke kuye?” Lo ngumbuzo ohlokoz’ iingcinga.
Sekunjalo, iicawa zehlabathi ziqhubeka zithabatha icala emfazweni. AmaKatolika aqhubeka ebulala amaKatolika, yaye nabo bezinye iicawa babulala abantu beecawa zabo okanye amalungu ezinye iicawa. Ukulandela iimfundiso zikaYesu Kristu kufuna ukholo nenkalipho eyomeleleyo, njengokuba ibali lokwenene elilandelayo libonisa.
[Umfanekiso okwiphepha 25]
Ngaba nabani na anganombono kaYesu esebenzisa umbayi-mbayi emfazweni?
[Inkcazelo]
U.S. National Archives photo