Ukudinwa Engqondweni Nasemzimbeni—Ngaba Ulixhoba Elilandelayo?
NGUMBHALELI KAVUKANI! EJAPAN
“Amanenekazi aququzela kwiindawo zokutyela eSweden, abafundisi-ntsapho eJapan, abasebenzi baseposini eMerika, abaqhubi booduladula eYurophu nabasebenzi kwimizi-mveliso eyenza oomatshini kuzo zonke iindawo bonke babonakalisa imiqondiso eyandayo yokuxinezeleka emsebenzini.”—IMAINICHI DAILY NEWS.
UNOBUAKI wayedinwe eyimfe. Esebenza imini nobusuku, wayeqeshe abasebenzi abali-130 kwiinyanga ezine. Wayengumphathi wezentengiso kwisebe elitsha leevenkile ezinkulu eJapan, yaye kwimigudu yakhe phantsi kwengcinezelo, wayeqeshe abantu ababengasebenzi ngendlela afuna ngayo. Babesilwa yaye bekhalaza. Ukongezelela koko, umqeshwa oyindoda wagcagca nebhinqa eliqeshwe apho. UNobuaki wayeqaqanjelwa yintloko umhla nezolo. Kungekudala wayengasakwazi ukuya emsebenzini, yaye ngeentsuku awayezinyanzela ngazo, wayedla ngokukhawuleza abuyele ekhaya. Wayedinwe engqondweni nasemzimbeni, njengomcinga wematshisi otshe waphela.
Amakhosikazi angaphangeliyo nawo ayadinwa engqondweni nasemzimbeni (burnout). Emva kweminyaka emibini esekhaya nabantwana bakhe abathathu, uSarah wayesele edikwe kakhulu ngabo. Wathi: “Ndandivakalelwa ngokungathi kwakungumsina-ndozele ongaphele ndawo ukubenzela izinto.” Xa umama ephangela yaye ekhulisa abantwana, amathuba okudinwa engqondweni nasemzimbeni ayanda. UBetty, kwiminyaka yakhe yama-40, wazifumanisa ekwimeko yokulungelelanisa umsebenzi wokuba ngumama wekhaya nowempangelo, ezama ukuphumeza ezi ndima ngokugqibeleleyo. Wayezama ukukholisa wonke umntu—umyeni wakhe, abantwana bakhe, umqeshi wakhe nabo wayesebenza nabo. Uxinezeleko lwakhe lwegazi lwanyuka, yaye wayecatshukiswa zizinto ezingenamsebenzi. Wayedinwa engqondweni nasemzimbeni.
Ukudinwa engqondweni nasemzimbeni kufikela namaxhoba angalindelekanga ukuba anganako. UShinzo, umlungiseleli okhutheleyo ongumKristu, wayenamandla yaye enosukelo. Waya kunceda kummandla apho kwakukho imfuneko enkulu yabafundisi abangamaKristu. Noko ke, kwiinyanga ezimbalwa waphelelwa ngamandla, ibe wayelala imini yonke. Wayeziva ngathi usetoneleni elingaphumeliyo. Kwakunzima nokuba azenzele izigqibo, nkqu noko amakakutye ngesidlo sakhe sasemini. Wayeziva engafuni kwenza nto. Ngokupheleleyo wayedinwe engqondweni nasemzimbeni.
Yintoni Ukudinwa Engqondweni Nasemzimbeni?
Ngoko ke yintoni ukudinwa engqondweni nasemzimbeni? UHerbert Freudenberger nabanye abaphengululi baqalisa ukusebenzisa eli binzana phakathi kwiminyaka yee-1970, yaye lachaza “imeko yokuphelelwa ngamandla ebangelwe kukusebenzisa ingqondo kakhulu xa usebenzisana nabantu.” Kwakhona, “kukuphelelwa ngamandla emzimbeni okanye engqondweni, ngokukodwa okubangelwe kukuxinezeleka kangangexesha elide okanye kukuzifica kwinto ethile.” (American Heritage Dictionary) Noko ke, abaphandi abalicacisi ngendlela efanayo eli binzana.
Nangona ukudinwa engqondweni nasemzimbeni kungenayo ingcaciso ekhethekileyo yezonyango, amaxhoba ako abonwa ngemiqondiso efana nokutyhafa, ukudangala, ukungabi nakuzinceda, ukuphelelwa lithemba nokungemi kakuhle engqondweni. Ixhoba liziva lidinwe kakhulu yaye licatshukiswa zizinto ezingenamsebenzi. Akukho nto iliqhubela esenzweni. Yonke into ibonakala ingaphaya kwamandla alo, yaye lisenokufuna uncedo kuye nabani na elidibana naye. Yonke imigudu eliyenza kwindawo yempangelo nasekhaya isenokubonakala ingenanjongo. Eyona nto yesameleyo yimvakalelo yokuphelelwa lithemba. Ukuba unale miqondiso iphelekwa kukungemi kakuhle engqondweni, ukudikwa yinto yonke, ngoko kusenokwenzeka ukuba udiniwe engqondweni nasemzimbeni.
Ukudinwa engqondweni nasemzimbeni kunokuchaphazela umsebenzi nobomi bentsapho. Kufuneka ukuphephe. Kodwa njani? Ukuze ukwazi, makhe sibone ukuba ngoobani abasesichengeni sokudinwa engqondweni nasemzimbeni yaye ngoba.
[Ibhokisi ekwiphepha 4]
Imiqondiso Yokudinwa Engqondweni Nasemzimbeni
“Ukudinwa ngumsebenzi engqondweni nasemzimbeni kubhekisela kwimeko egqiba amandla ebangelwa luxinezeleko lomsebenzi olungaphungulwayo, oluphumela koku:
1. Ukudubeka
2. Ukungakwazi ukuxhathisa kwizigulo
3. Ukunganeliseki okwandileyo nokubona izinto ezimbi ngalo lonke ixesha
4. Ukungabikho rhoqo emsebenzini nokungawenzi kakuhle umsebenzi.
“Le meko igqiba amandla ngoba inamandla okwenza buthathaka, kwanokutshabalalisa, kubantu abasempilweni, abadlamkileyo nabakhutheleyo. Unobangela wako oyintloko luxinezeleko olungaphungulwayo, uhlobo oluqhubeka umhla nezolo, inyanga nenyanga, unyaka nonyaka.”—The Work/Stress Connection: How to Cope With Job Burnout, nguRobert L. Veninga noJames P. Spradley.