Abantu Abaselula Bayabuza . . .

Ndinokubulungisa Njani Ubomi Bam?

“NDANDINGAKWAZI ukungena,” watsho njalo uJohn. Wazifumana emi ngaphandle kweHolo yoBukumkani yamaNgqina kaYehova. Xa wayekwishumi elivisayo wayeka ukuba ngumKristu waza waphila ubomi bolwaphulo-mthetho, bokusebenzisa iziyobisi, nobokuziphatha okubi ngokwesini. Emva kweminyaka ephila ngaloo ndlela, sekunjalo wayengakwazi ukuyikhupha iBhayibhile engqondweni yakhe, ngoko ke waya kwiHolo yoBukumkani—kodwa wayesoyika gqitha ukungena. “Akuqondi kakuhle,” watsho komnye owayemkhuthaza ukuba angene. “Sendone kakhulu. Andiqondi ukuba uYehova unokuze nangayiphi na indlela andixolele ngoko ndikwenzileyo.”

Ulutsha oluninzi luvukela imigaqo yabazali balo, yonqulo, neyokuziphatha. Kuyakhwankqisa yaye kulusizi ngokukodwa xa ulutsha olukhuliswe ngabazali aboyika uThixo lusenza oku. Nangona bengebaninzi kangako abaye balandela elo khondo, emva kwexesha elithile, bambi baqalisa ukuba nomvandedwa wokungabi nto yanto ongenakupheliswa kwanayindlela yokuphila ngobundlobongela. (IMizekeliso 14:13) Lumbi ulutsha, lwakuba luthwaxwe leli hlabathi lingendawo, lufuna ukulungisa ubomi balo luze lubuyele kwiinyaniso zeBhayibhile olwazifunda lusengabantwana. Kodwa ngaba ngenene lunokukwazi ukwenjenjalo?

Unyana Onemvukelo Ushiya Ikhaya

Umzekeliso kaYesu wonyana wolahleko, okanye onenkcitho, ofumaneka kuLuka 15:11-32 unikela ingqalelo engakumbi kulo mbandela. Le ngxelo ifundeka ngolu hlobo: “Umntu othile ube enoonyana ababini. Wathi omnci wabo kuyise, Bawo, ndinike isahlulo sempahla esilunge nam. Wababela imfuyo leyo. Kuthe kungekabi ntsuku zininzi, wahlanganisa into yonke unyana omnci wesuka kwelakowabo, waya ezweni elikude.”

Ngokuqinisekileyo lo usemtsha akazange avukele kuba uyise wayengqwabalala, emxhaphaza okanye engqongqo ngokugqith’ emgceni! Ngokutsho koMthetho kaMoses, unyana wayenelungelo lokufumana isabelo esikhulu kwimpahla kayise, nangona ngokuqhelekileyo wayesifumana akuba uyise efile. (Duteronomi 21:15-17) Enjani yona inkohlakalo awayenayo lo nyana ukufuna isabelo sakhe phambi kwexesha! Sekunjalo, uyise ngothando wamnika. (Thelekisa iGenesis 25:5, 6.) Ngoko, licacile elokuba, isimo sengqondo salo mfana—ingesiso esikayise—sasingesihle. Kunjengokuba umphengululi uAlfred Edersheim ekubeka oku, kusenokwenzeka ukuba walucekisa ‘ucwangco nengqeqesho yekhaya lakhe’ waza ngokuzingca “wanqwenela inkululeko nolonwabo.”

Njengoko inqaku elandulelayo kolu ngcelele livumile, asingabo bonke abazali abanobubele nolwazelelelo.a Phofu ke, xa umzali engqongqo okanye engenalwazelelelo, akunakwenzeka ukuba imvukelo ibe sisicombululo; ekugqibeleni iba kukuzibhubhisa. Kwakhona, khawuqwalasele umzekeliso kaYesu. Emva kokuba eye kude nekhaya, lo mfana “wayichitha impahla yakhe ngentlalo yokuzibhubhisa. Akubon’ ukuba udle konke, kwabakho indlala enzima kwelo zwe, waqala ukuswela naye.” Kwanoku akuzange kumbuyisele ezingqondweni. Sekunjalo ngokuzithemba, “waya wanamathela komnye kubemi belo zwe; wathi yena wamthumela emihlabeni yakhe, ukuba aye kwalusa iihagu. Ubenqwenela ke ukusizalisa isisu sakhe ngeengxam ezabe zidliwa ziihagu; bekungekho mntu umphayo.”

Umphengululi weBhayibhile uHerbert Lockyer uthi: “AmaYuda awayemphulaphule uYesu afanele ukuba ahlasimliswa ngala mazwi, ‘ukondla iihagu,’ kuba kumYuda, leyo yeyona nto ithoba isidima.” Ngokukwanjalo namhlanje, abo batyeshela iinyaniso zeBhayibhile ngokufuthi bazifumanisa bekwiimeko ezinzima, okanye ezithoba isidima. Enye intombazana engumKristu eyabaleka ikhaya iyavuma isithi: “Yonke imali yam yayiphelela kwiziyobisi, yaye ndandingenayo imali yezinye izinto. Ngoko ndaqalisa ukuba ezivenkileni nantoni na ephambi kwam ukuze ndixhase le mikhwa yam.”

“Wabuyela Ezingqondweni”

Noko ke, wasabela njani lo nyana wolahleko kwiimeko zakhe ezimandundu? UYesu uthi ekugqibeleni “wabuyela ezingqondweni.” (TE) Amagama esiGrike santlandlolo athetha ukuthi “akuziqonda ukuba ungubani.” Ngamanye amazwi, “ebengaziqondi ukuba ungubani” kwihlabathi eliphambeneyo lasemaphupheni, emfamekile engazi ukuba imeko yakhe ngenene yayimaxongo kangakanani.—Thelekisa eyesi-2 kuTimoti 2:24-26.

Namhlanje lumbi ulutsha olunemvukelo ngokufanayo luye lwajamelana ngokoqobo noku. Ukuvuna imiphumo eyoyikekayo yendlela yokuphila kavula-zibhuqe—intolongo, ukwenzakala kabuhlungu, izifo ezidluliselwa ngeentlobano zesini—eneneni inokuba ngamava akwenza ubuyele ezingqondweni. Amazwi eMizekeliso 1:32 ekugqibeleni aye angqineka engamava abuhlungu ayinyaniso: “Ukuphamba kweziyatha kuyazibulala.”

Khawucinge ngoElizabeth oselula, owashiya abazali bakhe waza wabandakanyeka kwiziyobisi. Uthi: “Ndandilibele ngoYehova.” Noko ke, ngoxa wayetyelele eNew York, wadlula ngakwikomkhulu lamaNgqina kaYehova. Waba yintoni umphumo? Ukhumbula oku: “Ndandikhathazeke kakhulu. Ndenze ntoni? Kwakutheni ukuze ndilahlele ubomi bam ngokukhawuleza kwintlekele enje?”

Ekugqibeleni xa unyana wolahleko wathi wajamelana nenyaniso, wenza isigqibo esasifuna inkalipho—ukugoduka aze alungise ubomi bakhe! Kodwa wayeya kusabela njani uyise emva kokuba enziwe buhlungu waza wahlazwa ngulo nyana wakhe? Le ngxelo inikel’ impendulo isithi: “Ke kaloku, akubon’ ukuba usekude lee, uyise wambona, wasikwa yimfesane, wagidima, wawa entanyeni yakhe, wamanga.” Ewe, phambi kokuba lo usemtsha ngobulumko alivume ityala lakhe, uyise wathabatha inyathelo lokuqala ngokuvakalisa uthando nokuxolela!

Ukulungisa Imicimbi NoThixo

Sekunjalo, lo nyana wolahleko wathi kuyise: “Ndonile kuwo amazulu, nasemehlweni akho.” (Akekeliswe sithi.) Sifunda ntoni koku? Ulutsha oluye lwaphambuka kwiindlela zikaThixo alunakubulungisa ubomi balo de “lulungise imicimbi” noThixo! (Isaya 1:18) Sinokuba nombulelo kuba uYehova enze uxolelaniso olunjalo lube nokwenzeka. Eneneni, ubawo okumzekeliso kaYesu ufuzisela uYehova uThixo. Yaye uThixo ubonakalisa isimo sengqondo esifanayo ngokuthi kuboni abaguqukayo: “Buyelani kum, ndibuyele kuni.” (Malaki 3:7; thelekisa INdumiso 103:13, 14.) Kodwa njengamaYuda awaphambukayo kumaxesha okubhalwa kweBhayibhile, abo banjalo bafanele benze esi sigqibo: “Masiziphengulule iindlela zethu, sizigocagoce, sibuyele kuYehova.”—IZililo 3:40.

Oku kuthetha ukunikela ingqalelo engakumbi kwihambo kabani esisono. Xa osemtsha ophambukayo ekwenza oku, ufanele ashukunyiselwe ukuba avume izono zakhe kuYehova uThixo. Umdumisi wathi: “Ndithi ndakuthi cwaka, aluphale amathambo am ngokubhonga kwam imihla yonke. . . . Ndikwazisile isono sam, ubugwenxa bam andabugquma; . . . Wabuxolela ke wena ubugwenxa besono sam.”—INdumiso 32:3-5.

Kuthekani ukuba osemtsha uye wabandakanyeka kwizenzo eziphosakele ngokunzulu—mhlawumbi ukuqhomfa, uhenyuzo, ukusebenzisa kakubi iziyobisi, okanye izenzo zolwaphulo-mthetho? Kuyaqondakala ukuba, ubani onjalo unokuvakalelwa engafanele kuxolelwa. UJohn, okhankanywe ekuqaleni, wavakalelwa ngaloo ndlela. Yiloo nto kanye eyamenza wema bhunxe ngaphandle kweHolo yoBukumkani de umdala othile webandla onobubele wamkhumbuza ukuba uKumkani uManase wakwaSirayeli mandulo naye wayenetyala lokwenza izono ezinzulu—kuquka nokubulala! Sekunjalo, uYehova wamxolela. (2 Kronike 33:1-13) UJohn uthi: “Loo mdala wabusindisa ubomi bam.” Ngenxa yokwazi ukuba wayenokuxolelwa, uJohn wafumana inkalipho yokungena kwiHolo yoBukumkani aze acele uncedo.b

Inkoliso yolutsha olukwingxaki enjalo ngokufanayo lufuna uncedo ukuze lulungise izinto noThixo, yaye abadala bebandla lasekuhlaleni banokuba luncedo kakhulu ngokuphathelele lo mbandela. Banokuphulaphula ngovelwano nangokuqonda njengoko osemtsha ‘ezivuma ngokuphandle izono zakhe.’ Kwakhona banokunikela isiluleko noncedo olusebenzisekayo. Ngokomzekelo, banokulungiselela ukuba lo usemtsha abe nomntu othile ‘wokumfundisa ukususela ekuqaleni iziqalelo’ zeLizwi likaThixo ngesifundo seBhayibhile sekhaya. Yaye ukuba lowo uphambukayo unengxaki yokuthandaza, umdala unokumthandazela. IBhayibhile iyasiqinisekisa: “Wothi umthandazo wokholo umsindise lowo uleleyo [ungaphilanga kakuhle, NW].”—Yakobi 5:14-16; Hebhere 5:12.

Iinyawo Zakho Zenzele Imizila Ethe Tye

Kakade ke, ukulungisa izinto noThixo sisiqalo nje kuphela. Kanye njengokuba unyana wolahleko wacela uxolo kuyise, ulutsha oluphambukileyo lufanele luzame ukulungisa izinto nabazali balo. Ukucel’ uxolo ngokunyanisekileyo, kunokuba luncedo kakhulu ekudambiseni enye yentlungu abaye bayiva nokuqinisekisa inkxaso yabo. Omnye oselula owabalek’ ikhaya owathi wabuyela kokwabo nosana olungumgqakhwe ukhumbula oku: “UMama noTata babonakalisa uthando olungathethekiyo kum.”

Umntu osemtsha ofuna ukukholisa uThixo kufuneka ‘aqhubeke ezenzela imizila ethe tye iinyawo zakhe.’ (Hebhere 12:13) Oku kunokuthetha ukuguqula kukabani indlela yakhe yokuphila, imikhwa, nezinxulumani zakhe. (INdumiso 25:9; IMizekeliso 9:6) Ukumisela isifundo sobuqu esithe rhoqo nako kubalulekile. Enye intombazana eyayikhe yavukela ithi: “Ndifunda iBhayibhile yonke imihla yaye ndifunda lonke uncwadi olusekelwe eBhayibhileni olupapashwe ngamaNgqina kaYehova. Ndiyambulela uThixo ngokundivulela elinye ithuba.”

UJohn uyishwankathela kakuhle imicimbi, ngokuthi: “Ndikhangel’ emva kwixesha endidlale ngalo. Ndicinga indlela izinto engeziyiyo, kodwa ayikho enye indlela endinokukuguqula ngayo okwenzekileyo.” Okuvuyisayo kukuba, sinqula uThixo onenceba obamema ngokufudumeleyo bonke abathe bamshiya ukuba babuyele kuye. Kutheni ungasamkeli isimemo sakhe?

[Imibhalo esemazantsi]

[Umfanekiso okwiphepha 29]

AmaKristu aqolileyo anokukunceda ukuba ulungise ubomi bakho