Chapter 21
Ukwamkelwa Ngokufudumeleyo Kwabo Babuyileyo
1. Luhlobo luni lwabantu ekuxutyushwa ngalo kwesi sahluko?
KUKHO abantu abaninzi abathe ngaxa lithile banxibelelana ngokwaneleyo nenyaniso yeBhayibhile ukuze bazi ukuba uYehova unguThixo oyinyaniso nokuze baqonde into ethile ngeenjongo zakhe. Nangona bengengomaNgqina kaYehova, kusenokuba babeyifundisisile iBhayibhile namaNgqina. Okanye mhlawumbi abazali babo babengamaNgqina. Uninzi lwaba bantu luye lwabakho kwezinye iintlanganiso kwiHolo yoBukumkani. Kusenokwenzeka ukuba bade baba nenxaxheba ethile ekwabelaneni nabanye ngesigidimi soBukumkani. Kodwa ababunikelanga ubomi babo ekwenzeni ukuthanda kukaThixo. Kutheni kunjalo nje?
2. (a) Kutheni bemkayo nje kwintlangano kaYehova? (b) Kutheni benqwenela ukuba ngebebuyele?
2 Ihlabathi linezinto ezinomtsalane bona abacinga ukuba bayazifuna, izinto abanoluvo lokuba ziya kubangela babunandiphe ngakumbi ubomi, yaye ekufuneni kwabo izinto ezinjalo bayayishiya intlangano kaYehova. Noko ke, ekuhambeni kwexesha, abanye baba bantu bayaqonda ukuba abalufumananga uhlobo lobomi ababelulindele. Bayasiqonda isibakala sokuba, ukuba bayaqhubeka ngokwendlela abenza ngayo, baza kutshabalala nehlabathi. Abalulibalanga unqabiseko nokutya kokomoya okuyintabalala ‘okusendlwini’ kaYehova, yaye bafuna ukuba lapho kwakhona. Kodwa ngaba uYehova uza kubamkela?
UNYANA WOLAHLEKO UYABUYA
3. (a) Emzekelisweni wonyana wolahleko, yiyiphi ingcaciso uYesu awayinikelayo efana nale meko? (b) Ufanekisela bani ubawo?
3 Impendulo iboniswe kumzekeliso kaYesu owaziwa kakuhle wonyana wolahleko. Njengomzekeliso, uYesu wabalisa ngendoda eyayinoonyana ababini. Unyana oselula wacela uyise ukuba amnike isabelo sakhe sempahla. Akuba esifumene, waya kwilizwe elikude, apho wathi ngokungakhathaliyo wachitha yonk’ into ngobomi bokuzibhubhisa. Ngaloo ndlela waba ngolahlekileyo. Xa indlala yantlitha elo lizwe, lo mfana, eswele ngokukhethekileyo, wanyanzeleka ukuba aluse umhlambi weehagu, kodwa wayengavunyelwanga nokuba adle ukudla kwazo. Eshukunyiswe ziingxaki ezazimcinezele, wabuyela ezingqondweni. Wakhumbula indlela obabumnandi ngayo ubomi nakubantu abaqeshiweyo kwindlu kayise, yaye wagqiba ngokubuya. Walivuma ikhondo lakhe lesono waza wacela ukuba aphinde amkelwe, kungekhona njengonyana, kodwa njengomkhonzi oqeshiweyo. (Luka 15:11-19) Kodwa emva kwazo zonke izinto awayezenzile, ngaba uyise wayeza kumamkela? UYehova owayemelwa ngubawo kulo mzekeliso, wayeza kukujonga njani ukubuya komntu onjalo?
4. Lo bawo wamamkela njani unyana wakhe ekubuyeni kwakhe?
4 Ezichaza ngokucacileyo iimvakalelo zikaYehova kulo mbandela, uYesu wahambisa wathi: “Wesuka [lo nyana uselula] weza kuyise. Ke kaloku, akubon’ ukuba usekude lee, uyise wambona, wasikwa yimfesane, wagidima, wawa entanyeni yakhe, wamanga. Wathi ke unyana kuye, Bawo, ndonile kuwo amazulu, nasemehlweni akho; andisafanele kubizwa ngonyana wakho. Uthe ke uyise kubakhonzi bakhe, Rholani ingubo ende, eyona intle, nimambathise, nifake umsesane esandleni sakhe, neembadada ezinyaweni zakhe. Nizise ithole, eliya lityetyisiweyo, nixhele; sidle, sibe nemihlali. Ngokuba lo nyana wam ubefile, wabuya waphila; ubelahlekile, wafunyanwa. Baqala ke ukuba nemihlali.”—Luka 15:20-24.
USEBENZA NJANI LO MZEKELISO NAMHLANJE?
5. (a) Ngoobani abafanekiselwa ngunyana omkhulu emzekelisweni kaYesu? (b) Ngoko, ngoobani abamelwa ngunyana omncinane, ongowolahleko?
5 Kulo mzekeliso oyena nyana mkhulu, olizibulo, ngokufanelekileyo ufana ‘nebandla lamazibulo abhaliweyo emazulwini.’ (Hebhere 12:23) Kuthekani ngonyana omncinane? Umele abe ngomela iqela elingenguwo ‘umhlambi omncinane’ onethemba lasezulwini. Asizizo zonke “ezinye izimvu” zeNkosi eziyifanelekelayo le ngcaciso yonyana omncinane, kodwa ezinye ziyawufanelekela. Kwanangaphambi kokuba ukuhlanganiswa ‘kwezinye izimvu’ kube yinto ephawuleka ngokukhethekileyo, ukususela ngowe-1935, kwakukho abantu ababesazi ukuba uYehova ukuphela koThixo oyinyaniso. Babesazi ngethemba lobomi basemhlabeni phantsi koBukumkani bakhe, ibe babengenayo nayiphi na ingcamango yokuba ‘libandla lamazibulo’ elinethemba lasezulwini. Kodwa kunokuba bazinikele kwinkonzo kaYehova, bazifaka kwizinto zehlabathi. Izinto ababezinikwe nguThixo, ixesha nobomi awayebavumele ukuba babe nazo, bazithabatha ezi zinto baza bazisebenzisela ukwanelisa bona ngokuzingca. Kodwa ngowe-1935 xa abakhonzi bakaYehova bathi okokuqala baliqonda ngokucacileyo igama elithi “isihlwele esikhulu,” abaninzi ababefana nalo nyana mncinane bathi ngeentliziyo ezipheleleyo bazinikela enkonzweni kwindlu kaBawo. Kwakulixesha lokuvuya elinjengelo lachazwa nguYesu kumzekeliso wakhe.
6. Kwinzaliseko, abanye abantu basibonisa njani isimo sengqondo sonyana omkhulu, kodwa ngaba oko kwakunjalo kuyo yonke intsalela?
6 Kuyinyaniso ukuba, ngelo xesha, asingabo bonke abantu abavuyayo ngenxa yokufika kodidi olwalumelwa ngunyana omncinane. Emzekelisweni wakhe uYesu wabonisa ukuba oku kwakuya kuba njalo. Kodwa asingabo bonke abaseleyo ‘bomhlambi omncinane’ ababonakalisa isimo sengqondo esinjalo, ibe emzekelisweni wakhe uYesu indlela wayishiya ivulekile kwanakwabo ekuqaleni babengakholiswa kukuba nesabelo eluvuyweni uYehova analo xa aboni abanjalo beguquka ngokwenyaniso.—Luka 15:7, 10, 25-32.
7, 8. (a) Kwiminyaka yakutshanje, yintoni ebangele abanye ukuba bayishiye indlu kaYehova? (b) Kungaziphi iindlela abaye abathile bavakalelwa njengokuba wavakalelwayo unyana wolahleko? (c) Kutheni le nto bemele babuye?
7 Noko ke, ukususela ngezo ziganeko zeminyaka ephakathi yee-1930, abanye baqondile ukuba nabo, ngokweenkalo ezithile bafana naloo nyana wolahleko. Baqhelene kakuhle nendlu kaYehova yokomoya, intlangano yakhe ebonakalayo, kodwa indlela yabo yobomi iye yabasusa kuyo, ngokungathi ‘kukwilizwe elikude.’ Ababachasanga abakhonzi bakaYehova, kodwa indlela yabo yobomi iye ayavisisana nemilinganiselo yeLizwi likaThixo. Kusenokwenzeka ukuba ubomi babo bonke baye babakhela kumsebenzi wabo wempangelo nakwiziqu zabo kodwa basilela ukuzihlolisisa ngokufanelekileyo iimfanelo zabo phambi kukaThixo nokubaluleka kwamaxesha esiphila kuwo. Bambi bacatshukiswa kukungafezeki kwabanye ababenxulumana nabo ngoko ebandleni yaye abazange bathi ngomonde balindele kuYehova ukuba alungise imicimbi. Kodwa aba xa bebonke baye bangena kuziphi iimeko xa beye bazahlula kwindlu yokholo?
8 Ekuhambeni kwexesha, bambi baqondile ukuba baye baba ngamahlwempu ngokomoya. Banokubona ukuba naziphi na izihlandlo ezifutshane zoyolo abanazo azibaziseli uxolo oluhlala luhleli. Kwakhona basenokufumanisa ukuba indlela yabo yobomi iyabenzakalisa ngokwenyama, ngokwemvakalelo nangokomoya. Ngaphakathi baziva bengento yanto, njengokuba kunjalo kubo bonke abangenaThixo nabangenathemba. (Efese 2:12) Bayaqonda ukuba ekuphela kwexesha ababonwabe ngokwenene ngalo kwakuxa ‘babesendlwini’ kaYehova. Bafuna ukubuya. Ngaba bamele benjenjalo? Yiyiphi ingenelo esenokubakho ngokuqhubeka kwimeko yabo yobuhlwempu? Ukuba bayalibazisa basenokutshabalala. Ukuba baqhubeka bebambelela ehlabathini, baza kuphulukana nobomi babo xa litshatyalaliswa.
9. (a) Kutheni uYehova efuna abantu abanjalo babuye nje? (Hezekile 18:23) (b) Yintoni efunekayo kubo?
9 Kodwa ngaba abantu abanjalo banokubuya? UYehova ubamema ngokufudumeleyo ukuba babuye, ibe intlangano yakhe ebonakalayo ibanceda ngothando abo benjenjalo. (Zekariya 1:3, 4) Yintoni efunekayo? Njengokuba kuboniswe kumzekeliso kaYesu, bamele babuyele ezingqondweni, bathabath’ inyathelo lokuqala ukuze babuye baze bavume ukuba bamonile uThixo. Ukuba baye babandakanyeka kwihambo enzulu engeyoyabukristu, bamele banikele ubungqina obeyisayo kubadala bokuba ngoku bayilahlile loo ndlela yobomi yaye baguquke ngokwenyaniso. Umnqweno wabo onyanisekileyo ngoku umele ube kukukhonza uYehova njengenxalenye yentlangano yakhe ebonakalayo. (Luka 15:18-21; IMizekeliso 28:13) Ukuba ngokwenyaniso oko koko kusezintliziyweni zabo, banokuqiniseka ukuba ukushiya kwabo iindlela neengcamango ezimbi baze babuyele kuYehova kuya kuzisa uvuyo olukhulu. (Isaya 55:7) Noko ke, ukuze uvuyo lwabo lube ngaphaya koyolo lokwamkelwa ngokufudumeleyo kwakhona kwiHolo yoBukumkani, kufuneka bakhiwe kwakhona ngokomoya nangendlela ephilileyo.
UKWAKHELA KWISISEKO ESIPHILILEYO
10. (a) Sisiphi isimo sengqondo ngezinto ezifunwa nguYehova abaguqukileyo abamele babenaso? (b) Banokuluhlakulela njani ulwalamano olusondeleyo noYehova?
10 Into ebaluleke ngokukhethekileyo kuye nabani na obuyela kwindlu kaYehova kukuba aqhelane kakuhle neembalasane ezahlukahlukeneyo zobuntu bukaYehova aze ahlakulele ulwalamano lobuqu olusondeleyo naye. Kufuneka baqonde ukuba konke oko kufunwa nguYehova kuthi ngokwenene kokwengenelo yethu. Imiyalelo yakhe ayisibangeli singabi naluvuyo ebomini kodwa, kunoko, iyasilondoloza ukuze singenzi zinto ezinokuzisa uvuyo lomzuzwana kodwa zikhokelele ekuvuneni izinto ezibuhlungu. (Isaya 48:17; Galati 6:7, 8) Xa esiqeqesha, kungenxa yokuba uyasithanda. (IMizekeliso 3:11, 12) Ufundisiso lobuqu olulandelwa kukucamngca ngoko sikufundayo, umthandazo onyanisekileyo nokuya ngokuthe rhoqo ezintlanganisweni kuya kusinceda sifunde ukukholosa ngokupheleleyo ngoYehova, sikhangele kuye ukuze sifumane ulwalathiso kuzo zonke izinto esizenzayo.—IMizekeliso 3:5, 6.
11. Baya kuncedwa njani abo baphambukileyo (a) ngokuthiya okubi? (b) ngokufuna ukuqonda? (c) ngokuzingisa ekusebenziseni imilinganiselo yokuhlonel’ uThixo? (d) ngokufunda ukuqwalasela umphumo wayo nayiphi na into abaceba ukuyenza? (e) ngokubonisa inkxalabo enothando ngabanye?
11 Abo baphambukileyo kusenokwenzeka ukuba bebekwazi okufanelekileyo nokuphosakeleyo. Kodwa ngoku kwakhona bamele bakhulise ukukuthiya okubi yaye bamele baqhubeke besenjenjalo lo gama busabangqongile. (INdumiso 97:10) Baya kuncedwa koku ukuba bafuna, kungekuphela nje ulwazi, kodwa kwanokuqonda. Okokuqala, oku kuquka ukubona izinto ngokwendlela kaThixo. Kufuneka sizigqale iindlela ezahlukahlukeneyo asifundisa ngazo nendlela intsabelo yethu kwisiluleko sakhe eluchaphazela ngayo ulwalamano lwethu naye. (IMizekeliso 4:7; 9:10) Simele sikuxabise ukubaluleka kokuba ngabangaguquguqukiyo, ukusebenzisa imilinganiselo kaYehova ngalo lonke ixesha, kuzo zonke izinto esizenzayo. (Tito 2:11, 12; 1 Tesalonika 4:7) Kwakhona simele silumke ekuqwalaseleni, kungekhona nje uyolo lokwethutyana, kodwa siqwalasele oko umphumo wezigqibo zethu usenokungqineka ukuko. (Thelekisa IMizekeliso 20:21; 23:17, 18; Hebhere 11:24-26.) Kwakhona ngendlela yothando simele siwuxhalabele umphumo oya kubakho kwabanye ngezinto esizithethayo nesizenzayo.—Roma 15:1, 2.
12. (a) Yiyiphi into esimele siyiqonde ngokubhekisele kuSathana neendlela zakhe eya kusinceda sizikhusele? (b) Yintoni efunekayo ukuze siphumelele kulo mlo?
12 NjengamaKristu siya komelezwa kakhulu kukuqonda ukuba sikwimfazwe yokomoya. Utshaba lwethu olukhulu nguSathana uMtyholi, needemon zakhe. Ngokusebenzisa zonke iindlela azicingayo ufuna ukusishenxisa kumsebenzi obalulekileyo woBukumkani uYehova asinike ukuba siwenze. Injongo yakhe kukusitsalela ekubeni siyibekele bucala imilinganiselo kaYehova, sibe yinxalenye yehlabathi angumlawuli walo. Imigibe yakhe idla ngokuyitsala iminqweno eqhelekileyo (ukufun’ ulonwabo, ukuphila kamnandi ngokwenyama, uthando nobubele), yaye usibongozela ukuba iminqweno enjalo siyibalaselise ukuze ijike injongo yayo okanye siyanelise ngeendlela ezingafanelekanga. Kweli dabi lokulwela ubomi bethu bokomoya sinokuphumelela kuphela ngokusisebenzisa ngokupheleleyo isikrweqe sokomoya esilungiselelwa nguThixo.—Efese 6:11-18.
13. (a) Sinokuyifumanela njani ukuphumla imiphefumlo yethu? (b) Kutheni ukukhonza uYehova ngokuxelisa uKristu ngokwenene kusizisela ulonwabo?
13 UYesu wathi ukuba sinokuza kuye size sithabathe “idyokhwe” yakhe, soyifumanela ukuphumla imiphefumlo yethu. (Mateyu 11:29, 30) Ukuzithabathela kukabani “idyokhwe” kuthetha ukukhonza. Kodwa ukukhonza uYehova ngokuxelisa uNyana wakhe kuhlaziya ngokwenyaniso. Njani njalo? Kungenxa yokuba kuzisa inkululeko yokwenene. Asisengomakhoboka esono, asibotshwanga siso, sisenza izinto esizaziyo ukuba asimele sizenze yaye mhlawumbi sinqwenela ukuba ngesingazenzi. (Yohane 8:32, 34-36) Ukuba ubuntu bethu bobuKristu bakhelwe kuYesu Kristu njengesiseko, siya kuyixabisa indima yakhe kwinjongo kaYehova, siya kumphulaphula size sifunde kuye. Wavuyiswa kukwenza ukuthanda kukaYise. Nathi siya kufunda ukwenjenjalo. (Yohane 4:34; INdumiso 40:8) Ngenxa yokunamathela kwimilinganiselo kaThixo yokuziphatha siya kukwazi ukunandipha isazela esicocekileyo. Kunokuziphilela, siya kuzuza ulonwabo olufumaneka ngokupha. (IZenzo 20:35) Ubomi buya kuba nenjongo yokwenene kuthi. Ngaphezu kwako konke, siya kuba novuyo lokwazi ukuba sikholisekile kuYehova, uYise wabo bonke abathi babe ngoonyana bakhe.—IMizekeliso 10:22.