Ukondela Ingwenya
NGUMBHALELI KAVUKANI! EKENYA
UMKHENKETHI waseMerika ngomdla wayethabatha imifanekiso yeemvubu ngakuMlambo iMara xa watyibilika ematyeni waza wawela ngaphakathi. Oku kwatsala ingqalelo yerhamncwa elinesikhumba esomeleleyo elaligcakamele ilanga ngelo xesha, ingwenya. Ngoxa esi sirhubuluzi ngokuqhelekileyo siphila ngokutya iintlanzi, ukubona kwaso esi sidlo sinencasa kwakusivuzis’ izinkcwe. Ngokukhawuleza sathi nyubululu ukungena emanzini ukuze sihlole. Ngethamsanqa, lo mkhenkethi wayibona ingwenya isiza waza waphuma ngokukhawuleza kuloo mlambo—kangangokuba wayengathi uhamba phezu kwamanzi!
Iindwendwe ngokufuthi ziyazibona iingwenya kwimilambo, kumachibi, nakwimigxobhozo yaseAfrika, nangona kulo mkhenkethi woyikayo uchazwe ngasentla, kwaphantse kwamdak’ iisali. IKenya likhaya lengwenya yomNayile. Kulwimi lwasekuhlaleni lwesiSwahili, yaziwa ngokuba yimamba. Iingwenya zizirhubuluzi ezifikelela kubude obuziimitha ezisixhenxe, ibe ziyakwazi ukuhamba ngokukhawuleza emhlabeni nasemanzini. Emanzini zinako ukubaleka ngesantya esiphezulu ngenxa yemisila yazo esicaba, nemile njengephini lokubhexa iphenyane. Zinokudada ngesantya esiphakeme ukuya kutsho kuma-40 eekhilomitha ngeyure! Ibe akunto ingaqhelekanga kuzo ukuhlala ngaphantsi kwamanzi kangangeeyure ezimbini, kanti nezintathu. Emhlabeni zibaleka umganyana omfutshane, ngokukhawuleza okugqithiseleyo.
Akumangalisi ngoko ukuba iBhayibhile ibonakala ibhekisela kwingwenya njengomzekelo wesidalwa esoyikekayo sikaThixo ekuthiwa yiLeviyatan. UYobhi 41:8, 10 uthi: “Beka isandla sakho kuyo [iLeviyatan]; khumbula imfazwe, ungaphindi. . . . Akukho sijorha sokuyixhokonxa.” Lawo ngamacebiso obulumko! Ngokutsho kwencwadi ethi The Fascination of Reptiles, ebhalwe nguMaurice Richardson, iingwenya ziye zaduma nangokuhlasela amaphenyane ahamba ngenjini! UYobhi 41:25 ngokufanelekileyo uthi: “Ekuphakameni kwayo, ziyanxunguphala iinjengele, zithi makatha ngokuqhiphuka umbilini.”
Kutheni abantu bebaleka ngenxa yokoyika xa bebona eli rhamncwa linomzimba onamaxolo? Indinyana 14 icacisa esinye isizathu isithi: “Iingcango zobuso bayo, ngubani na onokuzivula? Ngeenxa zonke emazinyweni ayo sisothuso.” Mhlathi ngamnye wengwenya, ongentla nongezantsi, unamazinyo anokuba ngama-24 anobukhulu obahlukahlukeneyo, onke ahlaziywa ngokuqhubekayo ebudeni bokuphila kwayo. Okubangel’ umdla kukuba, izinyo lesine lomhlathi ongezantsi wengwenya lifika lingene kwimfanta engaphandle kumhlathi ongentla ibe linokubonwa lula xa imihlathi ivalekile. Oku kunceda ekuyahluleni kumza wayo, ialligator. Ingxaki kukuba, xa usondela kakhulu ukuze wenze uhlolisiso oluncinane lwamazinyo ayo, usenokuzifumana sewuhlolisisa onke amazinyo engwenya ungaphakathi kuyo!
Kungoko usenokukhetha ukondela ingwenya ukwindawo efanelekileyo nekhuselekileyo, ibe kukho iindawo ezininzi eKenya apho unokukwenza oko. Ngokomzekelo, iMamba Village, yindawo eseMombasa apho iingwenya zikhuliswa zivalelwe.
Usenokubuza, ‘Bekuqale kwathini kakade ukuze abantu bafune ukufuya iingwenya?’ Phakathi kwezinye izinto, kukuzilondoloza ukuze zingatshabalali. Phaya endle, iingwenya zifa ngomlinganiselo wama-99 ekhulwini kumnyaka wazo wokuqala ziphila. Kubonakala ngathi ooxam, iingwamza, kwanabanye abantu bayakuthanda ukutya amaqanda kunye namathole amancinane eengwenya asandul’ ukuqanduselwa. Noko ke, umlinganiselo wokufa weengwenya ezinyanyekelwa ngokufanelekileyo kwifama yazo uhla uye kutsho ngaphantsi kwe-10 ekhulwini. Kwisithuba nje sonyaka, amathole engwenya afikelela kubude beemitha ezisisi-1,5—ngokuqinisekileyo akhule ngokwaneleyo ukuba akwazi ukuzikhusela kwinkoliso yezisongelo. Amathole eengwenya zasendle asenokuthabatha iminyaka emithathu ukuze afikelele ubude obufanayo.
Iifama zeengwenya zikwazikhulisa ezi zidalwa ngeenjongo zezorhwebo. Kurhwebo lwezizwe ngezizwe, unokufumana izihlangu, iibhanti, iingxowa eziphathwayo nezinye izinto ezisefashonini ezenziwe ngofele oluthambileyo lwesisu sengwenya. Iimfele ezinokuba ngama-2 000 ezisuka eMamba Village kurhwetywa ngazo nyaka ngamnye kwamanye amazwe, anjengeItali neFransi, ukuze zisukwe. Kwenzeka ntoni kwinyama eseleyo yesi silwanyana? EKenya, inyama yengwenya isetyenziswa kwishishini lezokhenketho njengesidlo esingaqhelekanga.
Ukususela ngo-Oktobha ukusa kuAprili lixesha lokuzala kweengwenya. Phaya endle imazi izalela amaqanda asusela kuma-20 ukusa kuma-80. Ebudeni belo xesha, iimazi ezivalelweyo zizalela amaqanda anokuba ngama-36 kwiindawo zokuzalela ezikumachibi ahlukahlukeneyo. Andule ke amaqanda aqokelelwe aze afakwe kwizifukamisi ukuze aqanduselwe. Oku kuthabatha iinyanga ezinokude zibe ntathu.
IMamba Village inikela ithuba elihle lokubuka ezi zidalwa zinomtsalane ngendlela ekhuselekileyo. Imi kwikwari eziihektare ezisibhozo esandul’ ukuphuculwa ukuze ibe yifama yeengwenya, isitiya sezityalo, ichibi lezityalo nezilwanyana zaselwandle, neendawo ezininzi zokuzonwabisa. Kukho iingwenya ezingaphezu kwe-10 000 ezihlala apha. Kakade ke, akunakuzibona zonke. Kodwa kwiindawo zokuzalela ezimbini, unokubona ezingaphezu kwekhulu ezikhule ngokwaneleyo, ibe kwezinye iindawo, kukho amathole eengwenya angamakhulu akubudala obahlukahlukeneyo.
Ngexesha lokutya iingwenya zenza umbono obangela umdla. Ezinye zide zitsibe zisuka emanzini zitsibela inyama ejingiswa phezu kwechibi. Apha unokubona ingwenya edume kakubi ekuthiwa nguBig Daddy eyagrogrisa abantu kummandla woMlambo iTana, ibulala ubuncinane abahlanu ngaphambi kokuba ibanjwe iziswe kule fama. Ukuba uyaphakuzela xa ubona iingwenya ubuso ngobuso, usenokuzibona kakuhle kakhulu kwiholo yomboniso wevideo.
Ukondela kwakho ingwenya kusenokukonwabisa okanye mhlawumbi kukoyikise. Kodwa uya kusiqonda kakuhle isizathu sokuba iBhayibhile kuYobhi 41:34 isithi ngengwenya: “Ingukumkani yona kwizilo zonke ezinyalasayo.”
[Umfanekiso okwiphepha 17]
Ekunene: Umfanekiso phantse wayo yonke iMamba Village
[Umfanekiso okwiphepha 17]
Ekugqibeleni ngasekunene: Ingwenya ngexesha lokutya itsiba isuka emanzini itsibela inyama