Imbono YeBhayibhile

Ukukrexeza—Ngaba Kufanele Kuxolelwe Okanye Akufanele?

“UKUBA ninendawo ngakothile, mxoleleni, ukuze noYihlo osemazulwini anixolele iziphoso zenu.” (Marko 11:25) Loo mazwi kaYesu aphakamisa imibuzo enzima xa umtshato uphazanyiswa kukukrexeza: Ngaba umKristu omsulwa umele alixolele iqabane lakhe aze awugcine loo mtshato uqhubeka?a Ukuba ugqiba kwelokuba awuqhawule umtshato, ngaba ulubeka esichengeni ulwalamano lwakhe noThixo? Makhe sibone indlela iBhayibhile esinceda ngayo ekuphenduleni le mibuzo.

Ngaba Umele Uxolele Ngalo Lonke Ixesha?

Ngaba amazwi kaYesu athi, “ukuba ninendawo ngakothile, mxoleleni,” athetha ukuba phantsi kwazo zonke iimeko—kuquka xa iqabane likrexeza—umKristu unyanzelekile ukuba axolele? Amazwi kaYesu simele siwaqonde sicinga nangamanye amagqabaza awawenzayo ngokuphathelele ukuxolela.

Ngokomzekelo, sifunda umgaqo obalulekileyo ongokuxolela kumazwi kaYesu abhalwe kuLuka 17:3, 4: “Ukuba ke umzalwana wakho uthe wakona, mkhalimele; ukuba uthe waguquka, mxolele. Nokuba uthe wakona kasixhenxe ngemini, esithi, Ndiyaguquka, wothi umxolele.” (Akekeliswe sithi.) Ngokuqinisekileyo xa kubandakanyeke isono esinzulu, lowo woniweyo ukhuthazwa ukuba azame ukuxolela ukuba ngokunyanisekileyo loo mntu uyaguquka. UYehova uzijonga ngolu hlobo naye izinto; ukuze sifumane ukuxolelwa nguThixo, simele siguquke ngokunyanisekileyo.—Luka 3:3; IZenzo 2:38; 8:22.

Noko ke, oku kubonisa ukuba, ukuba iqabane elikrexezileyo aliguquki, alivumi ukwamkela ityala ngesono salo, kuyaqondakala ukuba iqabane elimsulwa lisenokukhetha ukungalixoleli.—Thelekisa eyoku-1 kaYohane 1:8, 9.

Ukuxolela—Kuthekani Ngemiphumo?

Noko ke, kuthekani ukuba lowo ukrexezileyo uyaguquka? Xa kukho inguquko, kukho isiseko sokuxolela. Kodwa ngaba ukuxolela kuthetha ukuba umoni akayi kujamelana nayo yonke imiphumo yekhondo lakhe eliphosakeleyo? Khawuqwalasele eminye yemizekelo kaYehova yokuxolela.

Xa amaSirayeli avukelayo ngemva kokuphulaphula ingxelo embi eyanikelwa ziintlola ezilishumi ngelizwe lakwaKanan, uMoses wacenga uYehova esithi: “Buxolele, ndiyakukhunga, ubugwenxa baba bantu.” UYehova waphendula: “Ndibaxolele ngokwelizwi lakho.” Ngaba oku kwakuthetha ukuba aba boni babengayi kujamelana nayo nayiphi na imiphumo yezenzo zabo? UYehova wahlabela mgama esithi: ‘Amadoda onke angaliphulaphulanga izwi lam, wona akasayi kulibona ilizwe endalifungela ooyise.’ (Numeri 14:19-23) UYehova wenza njengoko wayethethile; eso sizukulwana sidala—ngaphandle kukaYoshuwa noKhalebhi—asizange silibone iLizwe Ledinga.—Numeri 26:64, 65.

Ngokufanayo, xa umprofeti uNatan wakhalimela uKumkani uDavide ngesono sakhe noBhatshebha, uDavide oguqukileyo wavuma esithi: “Ndonile kuYehova.” Wandula ke uNatan wamxelela oku uDavide: “Naye uYehova usikhwelelisile isono sakho.” (2 Samuweli 12:13) Noko ke, ubomi bakhe bonke uDavide wathwaxwa yimiphumo yesono sakhe, nangona uYehova wayemxolele.—2 Samuweli 12:9-14; bona neyesi-2 kaSamuweli, isahluko 24.

Le mizekelo yokuxolela kukaThixo ibalaselisa isifundo esibalulekileyo: Asinakona size singohlwaywa. (Galati 6:7, 8) Umoni oguqukayo, nangona esenokuxolelwa, akuthethi kuthi akasayi kujamelana nemiphumo yekhondo lakhe eliphosakeleyo. Ngaba oku kuthetha ukuba iqabane elimsulwa lisenokulixolela elo likrexezileyo—ubuncinane ngengqiqo yokungabonakalisi ngqumbo ikrakra—lize sekunjalo ligqibe kwelokuba liwuqhawule umtshato kunye nalo?

Ukuxolela Noqhawulo-mtshato

Ebudeni bobulungiseleli bakhe, uYesu wathetha kangangezihlandlo ezithathu ngoqhawulo-mtshato. (Mateyu 5:32; 19:3-9; Luka 16:18) Okubangel’ umdla kukuba akukho nanye kwezi ngxubusho awathi uYesu wakhankanya kuyo ukuxolela. Ngokomzekelo, njengoko sifunda kuMateyu 19:9, (NW), wathi: “Nabani na othe wamala umfazi wakhe, ngaphandle kwesizathu sohenyuzo, waza watshata nomnye uyakrexeza.” Xa wayesithi “ngaphandle kwesizathu sohenyuzo,” uYesu wayevuma ukuba ukuziphatha okubi ngokwesini kwakuya kulinika iqabane elimsulwa ilungelo, okanye “isizathu” esingokweZibhalo sokuqhawula umtshato. Sekunjalo, uYesu akazange athi lowo umsulwa ufanele aqhawule umtshato. Noko ke, wayecacisa ukuba unako ukwenjenjalo.

Umtshato liqhina elimanyanisa abantu ababini. (Roma 7:2) Kodwa xa omnye wabo engathembekanga, eli qhina linokuqhawulwa. Kwimeko elolo hlobo iqabane elimsulwa ngokwenene lijongene nezigqibo ezibini elimele lizenze. Okokuqala, ngaba lifanele lixolele? Njengoko sesibonile, uthunywashe oyintloko apha kukuba lowo ukrexezileyo uguquka ngokunyanisekileyo okanye akunjalo kusini na. Xa eguquka, ethubeni iqabane elimsulwa lisenokumxolela—ubuncinane ngengqiqo yokungabonakalisi ingqumbo.

Isigqibo sesibini sesi, ngaba lifanele lifune ukuqhawula umtshato? Unokuphakama njani lo mbuzo ukuba limxolele?b Kaloku, kuthekani ukuba linenkxalabo esengqiqweni ngokukhuseleka kwalo nabantwana balo, ngokukodwa ukuba umyeni walo ebelixhaphaza ngaphambili? Okanye kuthekani ukuba linoloyiko lokwasulelwa sisifo esidluliselwa ngeentlobano zesini? Okanye kuthekani ukuba livakalelwa ngokunzulu kukuba ngenxa yokunganyaniseki kwakhe, alinakuze limthembe kulwalamano lwabo njengendoda nomfazi? Kwiimeko ezilolo hlobo kuyinto eqondakalayo ukuba iqabane elimsulwa linokulixolela iqabane lalo elonileyo (ngengqiqo yokungabonakalisi ingqumbo) lize sekunjalo ligqibe kwelokuba liqhawule umtshato kunye nalo kuba linganqweneli ukuqhubeka lihlala nalo. Ukungabonakalisi ingqumbo kusenokulinceda liqhubeke nobomi balo. Kwakhona kusenokulinceda ukuze ligcine kukho ukuhlonelana kuzo naziphi na iinkqubano eziyimfuneko zexesha elizayo nalowo ukrexezileyo.

Enoba ubani umele aqhawule umtshato neqabane elingathembekanga eso sisigqibo sobuqu, esifanele senziwe liqabane elimsulwa ngemva kokuba liye laqwalasela oothunywashe ababandakanyekileyo ngenyameko nangomthandazo. (INdumiso 55:22) Abanye abantu abanalo ilungelo lokuzama ukuyalela okanye ukunyanzela iqabane elimsulwa ukuba lenze nasiphi na isigqibo. (Thelekisa amaGalati 6:5.) Khumbula ukuba uYesu akazange achaze ukuba iqabane elimsulwa lifanele lenze ntoni na. Ngoko ke, kucacile ukuba uYehova akabachasanga abo bakhetha ukuqhawula umtshato phantsi kwezizathu ezifanelekileyo ezingokweZibhalo.

[Imibhalo esemazantsi]

[Inkcazelo Ngomfanekiso okwiphepha 11]

Life