Ukutya Okwaneleyo Kubantu Bonke!
NGUMBHALELI KAVUKANI! EBRAZIL
KUYINTO enokwenzeka ukuba unandiphe intabalala yokutya okulungileyo, uze sekunjalo ungonwabi. Ukuze ufumane ulonwabo lokwenyaniso noluhlala luhleli, kukho enye into efunekayo—ukutya kokomoya. UYesu wathi: “Akaphili ngasonka sodwa umntu, uphila ngamazwi onke aphuma emlonyeni kaThixo.”—Mateyu 4:4.
Kwelinye icala, ukuchasa iLizwi likaThixo kukhokelela kwindlala yokomoya, njengoko kwaxelwa kwangaphambili kuAmosi 8:11: “Ndiya kuthumela ukulamba kulo, kungabi kuko ukulambela isonka, kungabi kuko ukunxanelwa amanzi; kube kukulambela ukuva amazwi kaYehova.” Noko ke, ukungondleki ngokomoya kunokuphetshwa. UYesu wavakalisa oku: “Banoyolo abangamahlwempu ngomoya . . . Banoyolo abalambela banxanelwe ubulungisa; ngokuba baya kuhluthiswa bona.” (Mateyu 5:3, 6) Njengoko ukutya okwaneleyo okunesondlo kusanelisa imizimba yethu, ukutya okunik’ impilo kokomoya komeleza ukholo nethemba lethu ngekamva. Lihlabathi elinjani esinokulilindela?
Intabalala Yokutya Kubantu Bonke
Khawube nomfanekiso-ngqondweni wehlabathi elinokutya okuninzi okunencasa nokunik’ impilo. Ihlabathi elingenazimfazwe, iintlekele, okanye amashwangusha abangela indlala nokungondleki, zinto ezo ezibenza buthathaka okanye zibadandathekise abantu. Akusayi kubakho bantu bangenamakhaya okanye abangenamsebenzi abaxhomekeke kumalungiselelo okondla abasweleyo, yaye kungasayi kuthi ngenxa yokuntinga kwamaxabiso abantu banyanzeleke ukuba batye nantoni na ukuba nje bazalise izisu zabo. “Kubekho intabalala yengqolowa ezweni, ise encotsheni yeentaba.” (INdumiso 72:16) Kodwa iza kwenzeka njani loo nto? Ngubani oya kucombulula ingxaki yokungondleki?
UMdali wethu uya kunikela ingqalelo enothando kwiintswelo zabantu zokutya okwaneleyo. Imozulu nayo iya kulawuleka, ngaloo ndlela isiqinisekisa ukuba akuyi kubakho zimbalela. “UYehova uya kusinika okulungileyo, ilizwe lethu lisinike indyebo yalo.” (INdumiso 85:12) Ukongezelela, nangona umhlaba ukwazi ukuvelisa ukutya okwaneleyo, buBukumkani bukaThixo kuphela obuya kuphelisa ukubawa nengcinezelo, zinto ezo ezikhokelela ekubeni ukutya kungabiwa kakuhle, kukungondleki, nosizi.
Ewe, urhulumente kaYehova wasezulwini uya kuqinisekisa ukuba naziphi na iinkqubo zolimo nezokuthutha ukutya ezikhoyo ziya kuthumela ukutya okunik’ impilo kwiindawo ekufuneka kuzo. Abasemagunyeni kuBukumkani abayi kulungiselela igcuntswana elithile labantu baze bashiye uninzi lwabantu luzibonela ukuba luzixhasa ngantoni ukuze luphile. Kunosizi nokuphelelwa lithemba, iintsikelelo zoBukumkani ziya kuzisa uvuyo olubonakaliswe kwisidlo sezinto ezimnandi esaxelwa kwangaphambili kuIsaya 25:6: “UYehova wemikhosi uya kuzenzela zonke izizwe isidlo sezinto ezityebileyo kule ntaba, isidlo sewayini egcinwe ngeentsipho, sezinto ezityebileyo ezinomongo.”
Ngoku ke, khawube nombono wendlela yokuphila yanamhlanje enokhuphiswano, ecinezelayo, nenenkohlakalo ingasekho naphakade. Akukho mntu uya kuba engondlekanga okanye egula. Ngoko ke, ukuba ngokwenene ufuna ukunandipha ubomi kwelo hlabathi litsha, thobela amazwi kaYesu athi: “Musani ukusebenzela ukudla okutshabalalayo; sebenzelani ukudla okuhlala kuse ebomini obungunaphakade.”—Yohane 6:27.
Ukuba ungathanda ukufumana inkcazelo eyongezelelekileyo okanye unqwenela kubekho ubani okuqhubela isifundo seBhayibhile sekhaya sesisa, nceda ubhalele kwiWatch Tower, Private Bag X2067, Krugersdorp, 1740, okanye kwikhelingi efanelekileyo kwezidweliswe kwiphepha 5.