Ukutya Okukhuselekileyo Kwabantu Bonke
UKUTYA ukutya okufanelekileyo kuyinto echwayitisayo. Kodwa njengoko sibonile, akusoloko kulula ukufumana ukutya okulolo hlobo. Eyona nto imbi yeyokuba, kukho izigidi zabantu ezingenalo ukhetho lokubona enoba ukutya ezikutyayo kukhuseleke ngokwaneleyo okanye kusempilweni kusini na. Eyona nto ingamandla kuzo kukufumana ukutya okwaneleyo ukuze ziqhubeke ziphila. Ngaba kungenzeka ukuba uThixo wayefuna izinto zibe lolo hlobo?
Khawukhe ucinge nje. Xa uThixo wabeka indoda nomfazi emhlabeni, ngaba yayikho imfuneko yokuxhalabela ukutya? Akunjalo, konke konke! Ingxelo ekwincwadi yeGenesis ithi: “UYehova uThixo wantshulisa emhlabeni yonke imithi enqwenelekayo emehlweni nelungele ukudliwa.” (Genesis 2:9) Ngoko uAdam noEva babenokutya okumnandi okwahlukahlukeneyo nentabalala engapheliyo. UThixo owabadalayo wayezazi kakuhle izondlo ababezifuna; wayeyazi nento enokubavuyisa. Kambe ke, asikho kumyezo wase-Eden namhlanje. Kodwa ngaba uThixo uyitshintshile injongo yakhe ngoluntu nomhlaba?
Sinezizathu ezivakalayo zokukholelwa ukuba kungekudala bonke abantu abasemhlabeni baya kunandipha ukutya okuyintabalala okunempilo nokufanelekileyo! Ukukholelwa oku kunokusinceda kakhulu sigcine imbono elungeleleneyo kumbandela wokutya okukhuselekileyo namhlanje. Elo themba, ukuba liqinisekile yaye linokuthenjwa, linokusinceda siphephe iimbono ezibaxiweyo.
Kutheni sinokuqiniseka ukuba kungekudala ubomi buya kwahluka? Abafundi abazimiseleyo beLizwi likaThixo bayazi ukuba kungokunje siphila ‘kwimihla yokugqibela’ yale nkqubo yezinto. Le nkqubo ikhoyo ilawulwa ngobulumko babantu, obungaqinisekiyo ngeenkalo ezininzi zobomi nobuthembele ekuzameni buze benze iimpazamo. Xa kufikelelwa kubugcisa bokuvelisa ukutya, kukho ukungaqiniseki okuphawulekayo ngokuba kukhuselekile okanye kuyingozi kusini na. Ukungaqiniseki okulolo hlobo kubangela ukoyika, imbambano nokungamanyani.—2 Timoti 3:1-5.
UMdali woluntu uye wathembisa ukuzisa inkqubo yezinto entsha ngokupheleleyo endaweni yale nkqubo ikhoyo yezinto. Injongo yakhe yantlandlolo—yokuba umhlaba wonke ufane nentsimi yase-Eden, unabemi abonwabileyo nabasempilweni—iya kuzaliseka. Amandla amanyanisayo obulumko obugqibeleleyo bukaThixo ngelo xesha aya kulizalisa ihlabathi. (Isaya 11:9) Ubulumko babantu abangaqinisekanga abusayi kuphinda bubekho. Inkqubo entsha eyenziwe nguThixo iya kuphelisa onke amathandabuzo ngokutya esikutyayo. Ngaba akukho sengqiqweni ukugqiba kwelokuba uThixo owadala abantu unokuziqonda nezondlo esizifunayo?
Ukutya Okugqibeleleyo Okuvela KuMdali
IBhayibhile iqulethe iziprofeto ezicacileyo ngokuphathelele iimeko zokuphila kwinkqubo ezayo yezinto. Umprofeti uIsaya wabhala wathi: “Ngokuqinisekileyo [uThixo] uya kuyinika imvula imbewu yakho oyihlwayeleyo emhlabeni, nesonka njengemveliso yomhlaba, otyebileyo noneoli. Imfuyo yakho iya kudla ngaloo mini kwidlelo eliphangaleleyo. Kwaye iinkomo namaesile akhule ngokupheleleyo alima umhlaba aya kutya ukutya kwezilwanyana okunongwe ngomuncwane, okweliweyo ngomhlakulo nefolokhwe.”
Kwakhona isiprofeto sikaIsaya sithi: “Ngokuqinisekileyo uYehova wemikhosi uya kwenzela zonke izizwana, kule ntaba, isidlo sokutya okuneoli eninzi, isidlo sewayini egcinwe ngeentsipho, sokutya okuneoli eninzi okuzaliswe ngumongo, sewayini egcinwe ngeentsipho, yahluzwa.”—Isaya 25:6; 30:23, 24.
Ngaba oku kuvakala kubangela umdla kuwe? Isiprofeto sikaIsaya siyasiqinisekisa ukuba wonke umntu ophila kwinkqubo entsha kaThixo uya kuba nentabalala yokutya. Ngaba kuya kube kukhuselekile ukukutya? Ngaphandle kwamathandabuzo kuya kube kunjalo. Esinye isiprofeto sisiqinisekisa ukuba abantu bakaThixo “okunene baya kuhlala, ngamnye phantsi komdiliya wakhe naphantsi komkhiwane wakhe, yaye akuyi kubakho bani ubangcangcazelisayo.” (Mika 4:4) Olo khuseleko luqinisekisiweyo luya kuza noBukumkani bukaThixo obungoMesiya, obuya kulawula wonke umhlaba kwixesha elingekude. Akusayi kuphinda kungaqinisekwa ngokukhuseleka kokutya.—Isaya 9:6, 7.
[Amagama acatshulweyo akwiphepha 22]
Kungekudala wonke umntu osemhlabeni uya kunandipha ukutya okusempilweni nokufanelekileyo ngokuyintabalala
[Umfanekiso okwiphepha 20]
UThixo uthembisa ukunika wonke umntu ukutya okukhuselekileyo nokufanelekileyo