Abantu Abaselula Bayabuza . . . 

Ngaba Kuya Kundinceda Ukuba Ngumhlobo KaThixo?

ABANTU abaninzi abaselula namhlanje baye bakhulela phantsi kweengcinezelo ezazingenakukholeleka kwisizukulwana esidluleyo. Abathile abenza uhlolisiso lwelizwe kulutsha oluli-160 000 bacacisa besithi: “Abakwishumi elivisayo basixelela ukuba umbhodamo abakuwo ungumphumo weengcinezelo abaziva bengenakujamelana nazo; ubangelwa kukudimazeka nakukudana okuye kwabangela baphelelwa yintembelo; kwanangabazali abangaziphapheliyo iingxaki zabo.” Ngokufanayo, usenokuvakalelwa kukuba abanye abayiqondi indlela ubomi obusenokuba buhlungu ngayo maxa wambi koselula.

Kambe ke, usenokuba nomhlobo osenyongweni nonokuya kuye ukuze akuxhase kwindlela ovakalelwa ngayo, kwaye oku kunokukupha isiqabu. Kodwa ngaba aliyonyaniso elokuba kukho iinzima ezibuhlungu omele ujamelane nazo uwedwa? Hayi indlela eliyinyaniso ngayo elokuba maxa wambi ‘yintliziyo yakho kuphela eyaziyo ngobukrakra bakho.’ (IMizekeliso 14:10) Kodwa kukho uThile okuqonda ngokupheleleyo, kwaye unokuba ngumhlobo wakho. Abaninzi abaselula babufumanise ubuhlobo naye buluncedo kakhulu kwanangawona mathuba abuhlungu.

Ubuhlobo NoThixo

Omnye oselula wabuzwa ngeyona nto wayembulela ngayo uYehova uThixo. Waphendula wathi: “Kuba sinokumazi size sibe ngabahlobo bakhe abasenyongweni.” Ewe, kuyinto enokwenzeka ukuba nobona buhlobo bulungileyo kwindalo iphela! Umdumisi wabhala: “Ubuhlobo obusondeleyo noYehova bunabamoyikayo.”—INdumiso 25:14, NW.

“Ubuhlobo obusondeleyo noYehova”—elinjani ukuxabiseka ilungelo! Igama lantlandlolo lesiHebhere lidlulisela ingcamango yokuthetha ngokukhululekileyo, izinto eziyimfihlo nothile ongumhlobo okhethekileyo. Ngaloo ndlela, olu lulwalamano olusondeleyo olusekelwe eluthandweni, ubuhlobo obusondeleyo obulilungelo obusuka ekuthembaneni. Njengomhlobo kaThixo, unokubona ukuba ukuxabiseka kwakho kokwenene njengomntu kuyaxatyiswa ngulowo ukuqonda ngokwenene. Kodwa ziziphi iingenelo zobu buhlobo?

“Inkoloseko Yam Kwasebuncinaneni Bam”

Phezu kwayo nje indlela olubonakala luqine isibindi ngayo, ulutsha oluninzi aluzithembanga. UJudy oneminyaka eli-13 ubudala wakhalaza esithi: “Ndivelisa izimvo zam aze omnye umntu eze nezakhe kwaye uzitshintsha ngokupheleleyo ezam. Andiqinisekanga ngokupheleleyo ngesiqu sam.” Noko ke, uMhlobo wethu wasezulwini, eLizwini lakhe elibhaliweyo, iBhayibhile, ulungiselele ulwalathiso olungqalileyo ukuze siphile ngendlela ephumelelayo. Enyanisweni, icebiso elinikelwe kwincwadi yeBhayibhile yeMizekeliso lilungiselelwe ukuze linike ‘ulutsha ukwazi nokunkqangiyela’ ukuze lukwazi ukulungelelanisa umendo walo. (IMizekeliso 1:1-4; 3:1-6) Oku kunokukunika intembelo! Unokuyazi eyona ndlela ifanelekileyo yokuphila.

IBhayibhile, kuquka amancedo okufundisisa iBhayibhile anjengeli phephancwadi, inikela icebiso phantse kuzo zonke iinkalo zobomi—ukususela kwindlela yokukhetha abahlobo ukusa kwisimo sengqondo esifanelekileyo ngakubazali bakho. (IMizekeliso 1:8, 9; 13:20) Ngaloo ndlela abo baluthobelayo ulwalathiso olunjalo ‘banokusuka ezirhintyelweni zokufa.’ (IMizekeliso 14:27) Ngokomzekelo, intombazana egama linguMae yabona umsakwayo edelela imigaqo yeBhayibhile. Okuyintlekele kukuba umsakwayo wafa ngaphambi kwexesha ngenxa yendlela awayephila ngayo kavula-zibhuqe. UMae wachaza indlela awakwazi ngayo ukukuxhathisa ukuziphatha okubi okulolo hlobo esithi: “Ndiyikhumbula ngokucacileyo imigaqo kaYehova engokuziphatha, kwaye oku kuyandomeleza. Le migaqo indinceda ndibone indlela uYehova angumntu wokwenene ngayo nokuba indlela yakhe yeyona ifanelekileyo.”

Noko ke, ukuba ngumhlobo kaYehova akupheleli nje ekufundeni imilinganiselo yakhe. Unokubona indlela anomdla wobuqu ngayo kubomi bakho. IBhayibhile isixelela ngoKumkani uDavide, owafundiswa nguThixo kwasebutsheni bakhe. UDavide waba ngumhlobo kaThixo, kwaye nangona wahlangabezana “neembandezelo ezininzi,” wakubona ukusebenza kukaThixo ebomini bakhe. UDavide wathetha ‘ngemisebenzi ebalulekileyo’ kaThixo awamenzela yona kunye ‘nengalo’ okanye amandla kaYehova awamncedayo ebomini bakhe. Ngenxa yamava akhe obuqu alolo hlobo, uDavide wabhala: “Ulithemba lam, Nkosi yam, Yehova, inkoloseko yam kwasebuncinaneni bam.” (INdumiso 71:5, 17, 18, 20; akekeliswe sithi.) Unokuba nentembelo efanayo njengoko unandipha intsikelelo kaYehova ebomini bakho. Njengoko uzama ukulandela ulwalathiso lwakhe—phezu kwalo nje ucelomngeni—ngokwenene uya kuba uhamba noThixo unolwalamano oluxabisekileyo naye.—Thelekisa iGenesis 6:9.

UThixo Uyasinceda Silandele Indlela Efanelekileyo

Ngenxa yazo zonke izilingo neengcinezelo ezikhoyo ebomini, akulula ukulandela ukhokelo lukaThixo. Oku kwaba yinyaniso ngokukodwa ngoPeggy, owathi xa wayeselula waba likhoboka leziyobisi nonongogo. Wakwazi ukoyisa ukukhotyokiswa kwakhe waza wenza iinguqulelo kwindlela yakhe yokuziphatha ngokuthi afundisise iBhayibhile, kwaye wakhulisa ubuhlobo bakhe noThixo. Kodwa uPeggy waqhubeka ejamelana neengcinezelo ezifanayo nezambangela ukuba abhenele kwiziyobisi ukuze aphephe ukujamelana nazo. Xa wabuzwayo ukuba wayeqhubeka njani ezixhathisa, waphendula wathi: “Ndingathi nje kuphela kungenxa yomoya kaYehova.”

UPeggy wayesazi ukuba uThixo ubanika umoya wakhe oyingcwele, okanye amandla asebenzayo, abahlobo bakhe kwanokuba oku kunokubomelezela ukuphila ngokwemilinganiselo yakhe. (IZenzo 5:32; 1 Korinte 6:9-11) UPeggy uthi: “Nangoku kukho amaxesha axa zibuya ezo mvakalelo zindala, ingakumbi xa ndindedwa, kodwa ngokukhawuleza nje ndiqalisa ukuthandaza. Eyona nto indivuyisa ngaphezu kwayo nantoni na endakha ndayifeza ebomini bam kukuba namandla okoyisa ezi ngxaki.” Hayi indlela okukhuthaza ngayo ukwazi ukuba njengomhlobo, uThixo unokusinceda ‘ngokungaphezu kweento zonke ngokugqithiseleyo kakhulu, ngaphezu kwesikucelayo nesinokukuqiqa, ngokokwamandla asebenzayo ngaphakathi kwethu.’—Efese 3:20.

Umoya kaThixo usinceda sikhulise iimpawu ezinjengokuzeka kade umsindo, ubulali, nokuzeyisa. (Galati 5:22, 23) Kwakhona, kumabandla amaNgqina kaYehova, abadala, okanye abalusi, abamiselwe ngomoya oyingcwele, balungiselelwe nguThixo ukuze banikele uncedo olusebenzisekayo. UPeggy wongezelela athi: “Ndandixhaswa kakhulu ebandleni, ingakumbi ngabadala. Ndancedwa ngokugqithiseleyo.”

“Iliwa Lentliziyo Yam”

“Umhlobo uthanda ngamaxesha onke, kwaye uba ngumzalwana ngamaxesha enkathazo.” Itsho njalo iMizekeliso 17:17 kwiThe Basic Bible. Umhlobo uyafuneka ingakumbi “ngamaxesha enkathazo.” Umdumisi uAsafu waphazamiseka ngokuqatha ngokweemvakalelo, kodwa wayesondele kuThixo njengomhlobo. Ngaloo ndlela, nangona ‘intliziyo yakhe yayibindekile’ ngenxa yentlungu awayenayo ngaphakathi, wathi: “Iliwa lentliziyo yam . . . nguThixo.” (INdumiso 73:21, 26, 28) UYehova, owayeyiqonda ngokwenene indlela uAsafu awayevakalelwa ngayo, wamxhasa ngokweemvakalelo. UYehova wayeyimpembelelo eyomelezayo kuAsafu ukuze angaphelelwa lithemba nayinkalipho.

Ngokufanayo uMhlobo wethu osemazulwini unokuba sisiseko esifana neliwa kuwe ngexesha lenkxwaleko. Omnye okwishumi elivisayo wakufumanisa oku ngamava akhe obuqu. Xa uBonnie wayeneminyaka eli-13 ubudala, amantombazana athile akwisikolo awayefunda kuso esincinane sasemaphandleni ngenkohlakalo aqalisa amarhe obuqhophololo ngaye. KuBonnie kwabonakala ngathi wonk’ ubani wayebukholelwa obu buxoki. Uninzi lwabo wayefunda nabo lwalumamkela ngendlela engenabuntu, lumbiza ngamagama amthobayo. UBonnie wacacisa: “Amaxesha amaninzi ebusuku ndandifika ekhaya ndize ndilile. Kwaye ndandifuna ukuzibulala kuba ndandikhathazeka gqitha.” Waya kwabanye babahlobo bakhe efuna bamxhase. “Ndazama ukuthetha nabantu, kodwa abazange babonakale beqonda. Ingxaki yam bayenza yaba yinto engenamsebenzi. Maxa wambi ndandiziva ndililolo gqitha.” Yintoni eyamgcinayo ukuze angalahli ithemba ngethuba lalo mbhodamo? Uhlabela mgama esithi: “Ukuba bekungengenxa kaYehova, ngendizibulele. Ndimthanda gqitha. Ungoyena mhlobo wam usenyongweni.” Ngoku uyazi ukuba yaba bubuhlobo bakhe noThixo obamncedayo ukuze anyamezele intlungu enjalo ngokweemvakalelo.

Ukwazi ukuba uYehova uyaziqonda iimeko zethu yaye ukwazi kakuhle okwenzekileyo kuba yintuthuzelo kakhulu xa abanye bengabonakalisi lwazelelelo ebesilulindele. Kwakhona, ukwazi ukuba uMhlobo wethu ‘unguSozimfefe’ kusinceda kakhulu xa siphathwa ngendlela engeyoyabubele okanye sixhatshazwa. Maxa wambi intliziyo yethu isenokusigweba, kodwa “uThixo mkhulu kunentliziyo yethu, ezazi izinto zonke.” (2 Korinte 1:3, 4; 1 Yohane 3:20) Ukuba nembono kaYehova ngombandela kunokuba yintuthuzelo ngokwenene. Ngokomzekelo, enye inkwenkwe eneminyaka eli-13 ubudala yaxhatshazwa ngokumasikizi ngamadoda amathathu. Yavuma yathi: “Kamva, ndandineentloni gqitha kwaye ndandizibek’ ityala ngokwakwenzekile kum. Ndandidandatheke gqitha.” Ngoko yaqalisa ukwenza uphando kwiimpapasho ezisekelwe eBhayibhileni zeWatch Tower Society kumbandela ongokudlwengulwa. “Xa ndafunda le nkcazelo, ndasuka ndalila. Ndaziva ngathi kususwe umthwalo onzima emagxeni am. Ndandixhatshaziwe. Ngokuthembela kuYehova, ngentsapho yam, nangabahlobo bam, ndakwazi ukuphumelela kweli xesha linzima.” Enjani inkxaso eyanikelwa ngaloo mazwi asekelwe eBhayibhileni!

Ubuhlobo noThixo bunokuba luncedo ngeendlela ezininzi! Sinokuba nentembelo epheleleyo ebomini, sakhe amandla angaphakathi ukuze silandele indlela kaThixo, size sifumane inkxaso eyomeleleyo ngexesha lenkxwaleko. Kodwa sinokubakha njani ubuhlobo obunjalo? Inqaku elilandelayo kolu ngcelele liza kucacisa.

[Umfanekiso okwiphepha 13]

UThixo unokuba ‘liliwa lentliziyo yakho’