Abantu Abaselula Bayabuza . . .

Ngaba Ndifanele Ndiye Kwiikonsathi Zomculo Werock?

Kuza kufika iqela lomculo elaziwayo kwidolophu yakowenu. Amatikiti sele eza kuphela, ngoko umele wenze isigqibo ngoku. Ngaba uza kuya?

UMCULO owakhayo kwimekobume efanelekileyo unokuba yinto enandiphekayo. Ngapha koko, uYehova uThixo wasidala ukuze sikwazi ukunandipha umculo, kwaye iintlobo ezahlukeneyo zomculo zamkelekile kuye.

Phakathi kolutsha namhlanje, umculo oluwukhethayo ngokuqhelekileyo iba luhlobo oluthile kwiintlobo ezahlukeneyo zomculo werock. Oluninzi luwuthanda kakhulu xa udlalwa ngokoqobo eqongeni. Sekunjalo, phakathi kwezinye izinto, iingxelo zembuqe nokuziphatha ndlongondlongo okuqhubeka kwiikonsathi zomculo werock ziphakamisa imibuzo enzulu kulutsha oloyika uThixo. Kanye kanye yintoni eyenzekayo kwiikonsathi zomculo werock? Ngaba kuya kuba yingcamango entle ukuya kwenye yazo?

Ukuwucikida Umculo

Okokuqala, makhe siqwalasele umculo ngokwawo. Umculo unokuvakalisa—uze uvuselele—iimvakalelo ezahlukahlukeneyo. Kumaxesha okubhalwa kweBhayibhile, abantu bakaThixo ngokufuthi babewusebenzisa umculo ukuze bavakalise uthando lwabo ngoThixo. (INdumiso 149:3; 150:4) Kwakhona umculo wawusetyenziselwa ukuvakalisa uvuyo, imihlali nosizi. (Genesis 31:27; ABagwebi 11:34; 1 Samuweli 18:6, 7; Mateyu 9:23, 24) Noko ke, okulusizi kukuba umculo wawungasoloko ungowakhayo kwanangamaxesha okubhalwa kweBhayibhile. Umculo ongalawulekiyo novuselela inkanuko yesini usenokuba wafak’ isandla ekuxhokonxeleni amaSirayeli athile esonweni xa olo hlanga lwalumise iintente zalo kwiNtaba yeSinayi.—Eksodus 32:1-6, 17, 18, 25.

Enyanisweni, ubukhulu becala nomculo werock ngokunjalo ukhuthaza izinto ezimbi—ukuziphatha okubi ngokwesini, iziyobisi, imvukelo nokusebenzelana nemimoya. Akunyanzelekanga ukuba oku kuthethe into yokuba umele uwuyeke ngokupheleleyo umculo, kodwa iBhayibhile iyawaxelela amaKristu ukuba ‘acikide ukuba yintoni na ekholekileyo kakuhle kwiNkosi.’ (Efese 5:10) Ngoko ufanele ube ngokhethayo nonokuqonda xa kufikelelwa emculweni.a

Ukuchaphazela njani umculo owukhethayo? Ngaba ukwenza uzive wonwabile, uzolile, okanye useluxolweni? Okanye ngaba ukwenza uzive unomsindo, unemvukelo, okanye udandathekile? Enye indoda engumKristu eDenmark ikhumbula iimini zaxa yayingumlandeli womculo onesingqi esinamandla, olunye uhlobo lomculo werock. Ithi: “Ndandiwuphulaphula ngoxa ndisebenza. Kwaye ukuba ndandenze impazamo, ndandiba ligeza kangangokuba ndandisaphula loo nto ndisebenza ngayo ndize ngomsindo ndiyiphose kude!” Omnye oselula uyavuma: “Ndandiwuphulaphula kakhulu umculo we-rap kunye nomculo onesingqi esinamandla owawuzukisa isini kunye nendlela yehlabathi yokuphila. Lo mculo wayondla ingqondo yam, kwaye wandenza ndanqwenela ezo zinto babecula ngazo.” Ukuba ke umculo orekhodiweyo unokuba nempembelelo enjalo, cinga ngendlela onokuba namandla ngayo xa udlalwa ngokoqobo eqongeni!

Kwakhona khawuqwalasele oku: Uya kungxola kangakanani lo mculo? Kuyavunywa ukuba abantu banokhetho olwahlukeneyo kulo mbandela. Kwaye neBhayibhile ayiwugatyi umculo ongxola ngendlela esengqiqweni. Kaloku, xa kwakunikezelwa itempile kaSolomon, bebodwa nje abavutheli bamaxilongo babeli-120! (2 Kronike 5:12) Umele ukuba wawungxola ngendlela echukumisayo! Noko ke, kukho umahluko omkhulu kakhulu phakathi kwentsholo yokudumisa uThixo nomculo werock otsho kube ngathi kuza kugqabhuka iindlebe. Kule meko yamva, ngokufuthi le ngxolo isetyenziselwa ukuvuselela isihlwele kumoya kavula-zibhuqe wobundlobongela. Kodwa iBhayibhile iyawagweba “amatheko angalawulekiyo.” (Galati 5:21; Byington) Kwaye ukuhlonela umzimba wakho kuya kukwenza ukuphephe ukuphulaphula umculo ongxola gqitha kangangokuba ube sesichengeni sokonakalelwa ziindlebe.—Roma 12:1.

Enye ingongoma esimele siyiqwalasele iveliswa kuYobhi 12:11. Apho iBhayibhile iyabuza: “Indlebe ayiyi kukucikida na ukuthetha, nekhuhlangubo likuve ukudla?” Ngokuhambisana noku, ufanele ‘uwacikide’ amazwi engoma! Omnye umKristu oselula uyavuma: “Ndaqalisa ukuphulaphula amazwi ezinye zeengoma endandizithanda, kwaye okwandimangalisayo kukuba zazingakufanelekelanga ukuphulaphulwa ngumKristu. Ndabona kuyimfuneko ukuba ndahlukane naloo mculo.” (1 Korinte 14:20; Efese 5:3, 4) Kwakhona, lumka kusengaphambili kuba ezinye iimvumi zisebenzisa iikonsathi ukuze zikhuthaze iingoma ezisandul’ ukuzikhulula—umculo osenokuba wahluke ngokuphawulekayo kumculo wazo omdala, mhlawumbi obusakha ngakumbi.

Ukongezelela, ufanele uqiniseke ukuba lo mculo awunanto yakwenza nobudemon—nto leyo exhaphake ngokukodwa kwiintlobo zomculo onesingqi esinamandla. Amaqela omculo onesingqi esinamandla adume kakubi ngokuzihombisa kwawo namacwecwe awo ngemifanekiso yobudemon nangezinto zobusathana. (Yakobi 3:15) Ukuya kwikonsathi yeqela elinjalo akunakuze kumkholise uThixo, osiyalela ukuba ‘simchase uMtyholi’!—Yakobi 4:7.

Ukungalawuleki

Yintoni esenokwenzeka ekonsathini? Enye intombazana ekwishumi elivisayo egama linguStacey yahamba nabahlobo bayo ukuya kubona iqela ababevakalelwa kukuba lidlala umculo obonakala ungowakhayo. Kodwa njengokuba ikonsathi yayiqhubeka, imvumi ephambili yeli qela yalinganisa umsitho wokuthetha nemimoya yaza yamema abaphulaphuli babe kunye nayo ekuzameni ukuqhagamshelana nelemimoya! Ngaba yayiyimfeketho nje leyo? Mhlawumbi kwakunjalo. Kodwa ekubeni iBhayibhile ikugatya ukusebenzelana nemimoya nangaluphi na uhlobo, uStacey nabahlobo bakhe baziva benyanzelekile ukuba baphume apho.—Levitikus 19:31; Duteronomi 18:10-13; ISityhilelo 22:15.

Olunye ulutsha olungamaKristu luye lwafumana amava afanayo akhwankqisayo, kuba nangona ukusebenzelana ngokuphandle nemimoya kusenokuba kunqabile ngokwentelekiso kwiikonsathi zomculo werock, ihambo engalawulekiyo ixhaphakile. Kwenye ikonsathi iqela lomculo lancedisa ekuphembeleleni uqhushululu olwaphumela ekwenzakaleni kwabantu abangama-60 kwanakumonakalo ongaphezu kwama-R725 000! Kwakhona kwenye ikonsathi, abaselula abathathu banyathelwa bada bafa. Liyinyaniso elokuba, inkoliso yeekonsathi zerock azipheleli kuqhushululu, ekwenzakaleni, okanye ekufeni. Kodwa ngokucacileyo kukho imfuneko yokulumka. IMizekeliso 22:3 ithi: “Onobuqili ubona into embi, azifihle; ke zona iziyatha ziya kugqitha kuyo, zihlawuliswe.”

Ngoko ukuba ucinga ngokuya ekonsathini, fumana inkcazelo ebalulekileyo. Ngaba eli qela lomculo lidume ngokuphembelela ihambo engalawulekiyo? Lithandwa luhlobo olunjani lwabaphulaphuli eli qela? (1 Korinte 15:33) Busetyenziswa ukusa kuwuphi umkhamo utywala neziyobisi? Kwaye kuthekani ngeholo yekonsathi? Ngaba iye yaneengxaki zokhuseleko kwixesha elidlulileyo? Kulungiselelwe ukuba kuhlalwe njani? Xa nabani na ehlala apho athanda ukuhlala khona, amathuba okuba kubekho umntu owenzakalayo ayanda kakhulu.

Ukusetyenziswa kakubi kweziyobisi notywala kungubhubhani kwiikonsathi zomculo werock. Enye indoda engumKristu eyayiphoxekile neyathi xa yayiselula yaya kwikonsathi yeqela lomculo oqhelekileyo werock yathi: “Abantu abezi ukuze baphulaphule umculo. Beza ukuze banxile.” Yenza isigqibo sokuba yayigqibelisile ukuya kwiikonsathi zomculo werock. Ngokufanayo enye intombazana ekwishumi elivisayo engumKristu inikela le ngxelo: “Ndikhumbula ndisiya kwikonsathi apho kwakudlala iqela lomculo ‘elisele lihambele phambili.’ Yayingamasikizi odwa awayelapho! Abantu babetshaya umya. Kwakusetyenziswa intetho ebolileyo, yaye uninzi lwababelapho lwalukhangeleka njengabanquli bakaSathana ngenxa yendlela ababenxibe ngayo.” Kwanalapho iziyobisi notywala zalelwe khona ngamandla, akuyonto ingaqhelekanga ukuba uninzi lwabaphulaphuli lufike sele lunxilile kakade. Ngaba ukuya kwindawo enjalo kunokwenzeka ukuba kuvisisane nomyalelo weBhayibhile ‘wokuncama ukungahloneli Thixo nokukhanuka okukokwehlabathi nokuhlala ngokunesidima’?—Tito 2:12.

Amandla Emekobume

Noko ke, usenokuvakalelwa kukuba akukho mfuneko yokuzikhathaza ngendlela abaziphatha ngayo abo bakungqongileyo logama nje wena ungangeneleli kuloo mbuqe. Noko ke, imekobume okuyo iyakuchaphazela. Kwabase-Efese 2:2, iBhayibhile ithetha ‘ngegunya lesibhakabhaka, umoya lo usebenzayo ngoku kubo abangevayo.’ (Akekeliswe sithi.) Phawula ukuba eli hlabathi ‘linomoya,’ okanye isimo sengqondo esilawulayo. Sikho kuyo yonke indawo, kwaye sisasazeke kanye njengomoya. Kodwa phawula kwakhona ukuba lo moya, okanye isimo sengqondo, ‘unegunya’—amandla okuguqula iingcinga, iimvakalelo kunye nehambo yakho—ukuba uzichanaba kuwo! Ngokucacileyo akunakuze uphefumle lo moya unamandla uze ungachaphazeleki.

Kwezona meko zininzi iikonsathi zomculo werock ziba kukuzichanaba kakhulu kumoya wehlabathi. Ubani unokutsalelwa ngokulula kwimekobume enobundlongondlongo ethi ngokuqhelekileyo yesamele apho—okanye ekwenzeni isankxwe nasekuwangawangiseni okuphantse kufane nokunqula iimvumi. Ukuzukiswa ngokugqithisele ngolo hlobo kubhangisa ukunqulwa okulilungelo likaThixo. Kufana nqwa nokunqula izithixo, nto leyo egatywa ngokucacileyo eZibhalweni. (1 Korinte 10:14; 1 Yohane 5:21) Ngaba ufuna ukuzibeka esichengeni sokubandakanyeka kuko?

Alinakukhanyelwa elokuba iikonsathi ezininzi zomculo werock ziquka iingozi ezininzi ngaphezu kwazo naziphi na iingenelo ubani asenokuzifumana ngokuya kuzo. Kambe ke, ngabazali bakho abaya kwenza isigqibo sokugqibela enoba ukuya okanye ukungayi kwikonsathi ethile kuya kuvumeleka kusini na. Kodwa ukuba unenkululeko yokuzenzela isigqibo, khetha ngobulumko. Zininzi iindlela zokuzihlaziya ezakhayo nezingaquki iingozi zokuya kwiikonsathi zomculo werock.

[Umbhalo osemazantsi]

[Umfanekiso okwiphepha 16]

Utywala, iziyobisi nehambo engalawulekiyo ziqhelekile kwiikonsathi zomculo we“rock”