AmaNgqina KaYehova Abe Negalelo Kwinkqubela Yotyando Lwentliziyo
IDAILY NEWS ka-Agasti 27, 1995, yaseNew York yayinalo mxholo uthi, “Utyando Olwenziwa Ngaphandle Kwegazi.” Yathi iNew York Hospital-Cornell Medical Center yayiza “kudiza indlela entsha yokutyanda intliziyo—tyando olo olufana nqwa nobelufunwe kutshanje ngowayefudula enguSibonda Wedolophu uDavid Dinkins—olwenziwa kungakhange kuphalale nethontsi eli legazi.”
Eli phepha lahambisa lathi: “Lo mmangaliso wale ndlela intsha obangelwe zizinto ezixhalabise amaNgqina kaYehova . . . uza kubonakala kwindlela oza konga ngayo amakhulu amawaka eedola kwizibhedlele nakwindlela oza kuzinciphisa kanobom ngayo iingozi zokosulelwa kwabaguli ngegazi.” UGqr. Todd Rosengart, oyingqwayingqwayi kule nkqubo yesibhedlele yotyando olwenziwa ngaphandle kwegazi, wathi: “Kungoku nje siyakwazi ukunciphisa igazi ekufuneka litofelwe ebudeni bolu tyando ukususela kwizixa eziqhelekileyo ezimbini ukusa kwezine zegazi kumguli ngamnye kude kuse ekubeni lingafuneki.”
Kanti ke yena uGqr. Karl Krieger, ongugqirha otyanda intliziyo kwesi sibhedlele, nowafak’ igxalaba ekusunguleni le nkqubo, wathetha wenjenje: “Ngokuphelisa imfuneko yegazi elinikelwayo kunye nezinto ezenziwe ngegazi, sikwacutha nengozi yokuvela kwemikhuhlane ethile ebakho emva kotyando nezifo ezasulelayo ezidla ngokuzalwa lutofelo-gazi.”
Ezinye iingcaphephe zona zithi “ukutyanda kungasetyenziswa gazi kucutha ixesha elichithwa kuphithizelwa kuhlangatyezwana nemeko emaxongo yomguli emva kotyando—elisusela kwiiyure ezingama-24 okanye ngaphezu koko libe ziiyure nje ezintandathu. Abaguli abathi benziwa olu tyando bavuka bengabikwa nowempumlo baza baphuma esibhedlele kwiiyure nje ezingama-48 okanye ngaphambi koko.” Loo nto ke ithetha ukuthi izibhedlele, urhulumente neenkampani zeinshorensi zonga kakhulu. UGqr. Rosengart uqikelela ukuba “olu tyando lunokonga ubuncinane iidola ezili-1600 [R5800] ezichithwa ngomguli ngamnye.”
Le ngxelo yeDaily News yahlabela mgama yathi:
“Into ehlekisayo kukuba olu tyando lutsha aluzange lusungulwe ngenxa yoqoqosho kwanezonyango, kodwa luphenjelelwe lifuthe lonqulo. AmaNgqina kaYehova—aneenkolelo ezilwalelayo utofelo-gazi—ayefuna kuncedwe amalungu akhulileyo ahlaselwe sisifo sentliziyo. . . .
“Ngenxa yesibongozo sala maNgqina kaYehova, oogqirha badibanisa ubugcisa abanabo bokugcina igazi lijikeleza kumatshini kunye namayeza amatsha. Kwakhona bafumene indlela entsha yokusebenzisa umatshini wentliziyo nemiphunga osetyenziswayo ukuze ugcine abaguli bephilile ebudeni botyando lwentliziyo.
“Ukongezelela kuma-40 abaguli abangamaNgqina kaYehova olwaqala ukusebenza kubo olu phengululo lonyango, kwiinyanga ezintandathu ezidluleyo iqela leNew York-Cornell liye lalwenza olu tyando kubaguli ngokubanzi. ‘Ukususela ngoko, liye lenza utyando lingasebenzisi gazi izihlandlo ezili-100 ezilandelelanayo kungakhange kufe nomntu lo,’ watsho okaKrieger. Kanti ke umlinganiselo wokufa kwabo benziwa utyando oluqhelekileyo umalunga ne-2,3 ekhulwini.”
Kwihlabathi lonke i-102 lezibhedlele ziye zaqalisa ukusebenzisa le nkqubo yokutyanda ngaphandle kwegazi, zisenza ezi nkqubo zotyando zikhuselekileyo zifumaneke kubo bonke abaguli abakumhlaba wonke.