Abantu Abaselula Bayabuza . . .
Kutheni UThixo Evumela Izinto Ezimbi Ukuba Zenzeke?
ULIDIJA wayekwishumi nje elivisayo xa kwaqhambuka imfazwe kwilizwe lakowabo—ilizwe elalisakwaziwa njengeYugoslavia. Ukhumbula oku: “Ndachitha iintsuku ezininzi nobusuku bazo ndihleli kwindawo emnyama. Ngokufuthi ndandiye ndinqwenele ukubaleka phandle, enoba oko kwakuya kubangela ukuba ndibulawe! Ngaphambi kwemfazwe, wawunako konke owawukufuna, kodwa emva kwayo wawuvuyela nje ukuba uphila.”
Ngokukhawuleza ukuxinezeleka nobunzima okwabangelwa yimfazwe kwamenzakalisa uLidija ngokomoya. Uthi: “Kangangeeveki sasingakwazi ukuya kumsebenzi wokushumayela okanye kwiintlanganiso. Enyanisweni ndandicinga ukuba uYehova usilahlile. Ndandizibuza, ‘Kutheni engasincedi nje ngoku?’”
Iimfazwe, ulwaphulo-mthetho, ugonyamelo, izifo, iintlekele, iingozi—izinto ezimbi ngolu hlobo zinokwenzeka nakubantu abaselula. Yaye xa intlekele ihlasela umntu ngokobuqu, ngokuzenzekelayo umntu usenokuzibuza, ‘Kutheni uThixo evumela izinto ezimbi zenzeke?’
Amadoda oyik’ uThixo amaxesha akudala ayekhe ayibuza imibuzo enjengale. Ngokomzekelo, xa umprofeti uHabhakuki wabona imeko emasikizi kubantu bakaThixo, wakhalaza: “Kunini na, Yehova, ndizibika, ungeva; ndikhala kuwe ndisithi, ugonyamelo, ungasisindisi? Yini na ukuba undikhangelise ubutshinga, ukondele okubi?” (Habhakuki 1:2, 3) Lumbi ulutsha olungamaKristu ngokufanayo lujamelana neemvakalelo ezibuhlungu.
Khawucinge ngendlela omnye umKristu oselula awavakalelwa ngayo emva kokufa kukayise obekungalindelekanga. Uthi: “Ndaziva ndinomsindo, ndakhala ndisefestileni, ndikhwaza uYehova uThixo. . . . Ndamtyhola ngako konke okwakwenzekile. Kwakunokwenzeka njani oku? Utata wayendikhathalele kakhulu yaye engumyeni onothando, ngoku akasekho—ngaba uYehova uyakhathala?” Kwimeko efana nale, kuqhelekile ukuziva udidekile, ukhathazekile, okanye unomsindo. Khumbula ukuba umprofeti othembekileyo uHabhakuki naye wayephazamisekile kuba kwakuvunyelwa ubungendawo ukuba bubekho. Noko ke, ukuba umntu uqhubeka ekhulisa iimvakalelo zokusoloko ekhalaza, kungakho ingozi. Umntu angasuka “ajalele uYehova.”—IMizekeliso 19:3.
Ngoko, unokukuphepha njani ukuziva unomsindo? Okokuqala, umele uqonde apho buvela khona ububi.
Izinto Ezimbi Azibangelwa NguThixo
IBhayibhile yenza kucace ukuba uThixo akazange abe nomnqweno wokuba sitsale nzima ngolu hlobo. Wabeka isibini sokuqala kwikhaya eliyiparadesi elalingenantlungu nantlupheko. (Genesis 1:28) Akuthandabuzeki ukuba wazi kakuhle apho konakala khona: Isidalwa somoya esingabonakaliyo, esaba nguMtyholi noSathana salukuhla uAdam noEva ukuba bangamthobeli uThixo. (Genesis, isahluko 3; ISityhilelo 12:9) Ngokwenza oku, uAdam wayigwebela yonke inzala yakhe esonweni nakwimiphumo yaso etshabalalisayo.—Roma 5:12.
Kucacile ukuba yayingengoThixo owazisa ububi ebantwini, kodwa ngumntu ngokwakhe. (Duteronomi 32:5; INtshumayeli 7:29) Ngokwenene, zonke izinto ezmbi ezenzeka ebantwini namhlanje—ukugula, ukufa, iimfazwe, ukungabikho kokusesikweni—zingumphumo wokungathobeli kukaAdam ngabom. Ukongezelela, sonke sifikelwa koko iBhayibhile ikubiza ngokuba “lixesha nasisihlo.” (INtshumayeli 9:11) Abangendawo nabangamalungisa bahlelwa ziingozi ezimanyumnyezi neentlekele.
Ukuvumela KukaThixo Ubungendawo
Nangona kuthuthuzela ukwazi ukuba asingoThixo obangela ubungendawo, usenokubuza, ‘Kutheni evumela ubungendawo buqhubeke?’ Kwakhona, oku kusibuyisela kwiimbambano ezaphakanyiswa e-Eden. UThixo waxelela uAdam ukuba, ukuba wayengathobeli wayeya kufa. (Genesis 2:17) Noko ke, uMtyholi waxelela uEva ukuba xa wayenokutya kumthi owalelweyo, wayengayi kufa! (Genesis 3:1-5) Enyanisweni, uSathana wambiza uThixo ngokuthi lixoki. Ukongezelela, uSathana wema ngelithi, umntu wayenokuphila ubomi obubhetele ukuba wayezenzela ezakhe izigqibo yaye kungekho Thixo umxelela oko makakwenze!
UThixo wayengenakuzibetha ngoyaba ezi zityholo. Ngaba wakhe wambona umfundi evavanya igunya lomfundisi-ntsapho? Ukuba umfundisi-ntsapho akamohlwayi, abanye abafundi baqalisa ukumvukela baze bangalawuleki. Ngendlela efanayo, ngekwakuqhambuke isiphithiphithi kwindalo iphela ukuba uYehova wayengazange ajamelane noSathana ngokobuqu. UYehova wakwenza oko ngokuvumela umntu alandele indlela kaSathana yokwenza izinto. Ngaba umntu ukwazile ukunandipha inkululeko enjengekaThixo awayeyithenjiswe nguSathana? Hayi. Ulawulo lukaSathana luye lwazisa intshabalalo nentlupheko engathethekiyo, nto leyo emngqina elixoki elikhohlakeleyo!
Ngaba uThixo uya kubuvumela ubungendawo buqhubeke ngonaphakade? Hayi. Ukuzinzisa iimbambano ezaphakanyiswa nguSathana, kungekudala uThixo uya kuphelisa ubungendawo. (INdumiso 37:10) Kodwa singaphumelela njani okwangoku?
Imbambano Ebandakanya Wena
Okokuqala, qonda ukuba, le mbambano ephakathi kukaThixo noSathana ibandakanya wena! Njani njalo? Qwalasela incwadi yeBhayibhile eyathiywa ngendoda elilungisa uYobhi. Xa uThixo wamgqala uYobhi njengomzekelo womkhonzi othembekileyo uSathana waphendula ngelithi: “Ngaba uYobhi wayenokukukhonza ukuba wayengayi kufumana nto?” (Yobhi 1:9, Today’s English Version) Eneneni, uSathana wema ngelithi ukuba wayenikwe ithuba lokuvavanya abantu, wayenokubatyekisa nabaphi na abantu ekukhonzeni uThixo!—Yobhi 2:4, 5.
Ngoko ke uSathana uye wabahleba bonke abantu abahlonela uThixo. Uye wakuhleba nawe. Phofu ke, IMizekeliso 27:11 ithi: “Yiba nobulumko, nyana wam, uyivuyise intliziyo yam, ukuze ndimphendule ngezwi ondingcikivayo.” Ewe, xa ukhonza uThixo phezu kwazo nje iinzima ezibuhlungu, unceda ukungqina uSathana elixoki!
Kuyavunywa ukuba xa sijamelene nezinto ezimbi, akusoloko kulula ukucinga ngeembambano ezibandakanyekileyo. UDiane, owayeneminyaka elishumi kuphela xa kwafa unina, uthi: “Ndandisoyika ukuba ndandiza kuba buhlungu okanye ndibe nomsindo ngenxa yezilingo endandizifumana ebomini.” Noko ke, ukwazi isizathu sokuba uThixo evumele ubungendawo kuye kwamnceda wakwazi ukuba nembono efanelekileyo ngeengxaki ahlangabezana nazo. Ngoku uthi: “Nangona kukho izinto ekunzima ukuhlangabezana nazo ebomini bam, isandla sikaYehova sisoloko sinam.”
UDiane usikhumbuza ngesibakala esibaluleke kakhulu: UYehova akalindelanga ukuba soyise kwezi zilingo sisodwa. INdumiso 55:22 iyasiqinisekisa: “Umthwalo wakho wulahlele kuYehova; yena wokuzimasa; akayi kuliyekela ilungisa lishukunyiswe naphakade.” UKotoyo oselula wakufumanisa oku kuyinyaniso. Wajamelama nentlekeke ebuhlungu xa wafelwa ngabazali bakhe ngowe-1995 xa inyikima yahlasela iKobe, eJapan. Ethetha ngaye nabantwana bakowabo abaselula, uthi: “Ngenxa yokuba umama wasifundisa ukuthembela kuYehova, sinako ukunyamezela.”
Kuthekani ngoLidija, intombazana eselula ekuthethwe ngayo ekuqaleni? Ekuhambeni kwexesha, waye waqonda ukuba uYehova wayengazange amlahle konke-konke. Ngoku uthi: “UYehova wayesoloko enathi. Wayesikhokela aze asibonise indlela esimele sihambe ngayo.”
UYehova—UThixo Onothando Nenkathalo
Nawe ungalufumana uncedo oluvela kuThixo xa usehlelwa zizinto ezimbi. Ngoba? Ngenxa yokuba uYehova ukukhathalele! Yaye nangona ezivumela izinto ezimbi ukuba zenzeke kubantu abalungileyo, kwakhona unikela intuthuzelo yothando. (2 Korinte 1:3, 4) Enye indlela akwenza ngayo oko kungebandla lamaKristu. Apho ufumana ‘abahlobo abanamathelayo kunomzalwana,’ abanokukomeleza xa uhlaselwa yingxaki enzulu. (IMizekeliso 18:24) UKotoyo uyabalisa: “Ngosuku nje lokuqala emva kwenyikima, saya kwindawo apho abazalwana babehlanganisana khona, yaye safumana ukhuthazo nazo zonke izinto esasizifuna. Oko kwandenza ndaziva ndikhuselekile. Ekubeni uYehova nabazalwana besecaleni lethu, ndivakalelwa kukuba sinokunyamezela nantoni na.”
Ekubeni uYehova ekwazi wena buqu, angakunceda xa usehlelwa zizinto ezimbi. UDaniel ubalisa indlela aphumelele ngayo emva kokufa kukayise esithi: “UYehova uba ngubawo, yaye intlangano yakhe inamadoda akhulileyo ngokomoya aba yimizekelo yokuba uyilandele. UYehova usoloko enikela iimpendulo kwimibuzo endinayo engendandiyibuze kutata.” UDiane ngokufanayo naye uye wayibona inyameko kaYehova enothando nenkathalo emva kokufa kukanina. Uthi: “Ngoncedo lwabantu abadala, abakhulileyo ngokomoya abaye bandikhuthaza, bandibonisa indlela, bandiluleka uye wandikhokela waza wandinceda ndakwazi ukuhlangabezana nako nakuphi na ukudimazeka.”
Kakade ke, ukuhlangabezana nezinto ezimbi akuzange kwaba mnandi. Kodwa thuthuzeleka kukwazi isizathu sokuba uThixo ezivumela izinto ezinjalo. Qhubeka uzikhumbuza ukuba uThixo uya kuyicombulula ingxaki ngokukhawuleza. Kaloku, yonke imizila yezinto ezimbi esiye sahlangabezana nayo iya kususwa ngokupheleleyo! (Isaya 65:17; 1 Yohane 3:8) Ngokuxhamla onke amalungiselelo awenzileyo uThixo kusenza sikwazi ukoyisa, ungayenza indima yakho yokumngqina uSathana elixoki. Ngexesha lakhe, ‘uThixo uya kuzisula zonke iinyembezi emehlweni akho.’—ISityhilelo 21:3, 4.
[Imifanekiso ekwiphepha 17]
Kungekudala uYehova uya kuziphelisa zonke izinto ezimbi