Imbono YeBhayibhile

Lukhokelo Lukabani Onokuluthemba?

“LIXESHA lokuba sihambe!” utsho njalo utata kunyana wakhe oneminyaka emihlanu ubudala. Utata wolula isandla, yaye ngaphandle kwamathandabuzo unyana uyasibamba aze afake eso sandla sakhe sincinane kwesikayise. Nokuba olu hambo lungabakhokelela phi, umntwana uthembela kukhokelo lomzali wakhe aze alandele ngentembelo. Enoba yintoni eyenzekayo, umntwana uqhubeka ebambelele ngokuqinileyo.

Ekubeni siphila kule mihla yokungaqiniseki kwezoqoqosho, kwezopolitiko, nangokobuqu, ngaba ubungayi kusamkela isandla esinokukukhokela esivela kumthombo onokukholosa ngawo ngokupheleleyo? Kanti, siphila kwixesha laxa abantu abangenazazela beqhatha abo bangenamava. Ngaloo ndlela, sinesizathu esivakalayo sokuqiniseka ngalowo sifanele sikholose ngaye. Mhlawumbi uye wadana kakhulu kwixesha elidluleyo xa uthile obuthembele kuye ngokhokelo eye wakuphoxa.

Sekunjalo, iBhayibhile isikhuthaza ukuba sikholose ngoThixo. “Ngokuba mna, Yehova Thixo wakho, ndiya kusibamba isandla sakho sokunene; ndingothi kuwe, Musa ukoyika, ndiya kukunceda mna,” wabhala njalo umprofeti uIsaya. (Isaya 41:13) Yaye umpostile uPetros wacebisa wathi: “Zithobeni, ke ngoko, phantsi kwesandla esinamandla sikaThixo, ukuze aniphakamise ngexesha elililo; ngoxa niphosa lonke ixhala lenu kuye, ngenxa yokuba unikhathalele.”—1 Petros 5:6, 7.

Sekunjalo, kusenokuba kuhle ukuzibuza, ‘Sisiphi isizathu endinaso sokuba ndikholose ngoThixo ngokhokelo?’ Ezi zizathu zivakalayo zilandelayo zifunyanwa kwingxelo yamaSirayeli amandulo.

Isandla SikaThixo Salathisa Abantu Bakhe

Uthotho lweziganeko olwaphelela kubusuku bukaNisan 14, 1513 B.C.E., lwayikatyisa indoda eyayingqwabalala nenguzwilakhe uFaro namaYiputa, ukuze babakhulule abantu bakaThixo, amaSirayeli, ebukhobokeni. (Eksodus 1:11-13; 12:29-32) NgoNisan 15, uhlanga lwamaSirayeli oluchwayitileyo lwathabatha uhambo lwasentlango kwindlela yalo esinge kwiLizwe Ledinga. Eyona ndlela ingqalileyo yayiyileyo iphumela kumntla weMemphis, igudla unxweme lweMeditera, kufutshane nelizwe elalimiwe ngamaFilisti awayesoyikwa, ize ingene kwiLizwe Ledinga. Noko ke, uThixo wayecinga ngenye indlela.—Eksodus 13:17, 18; Numeri 33:1-6.

UThixo walungiselela ukhokelo olubonakalayo esenzela uhlanga lwamaSirayeli lwamandulo, ngomqulu welifu ebudeni bemini nomqulu womlilo ebusuku. (Eksodus 13:21, 22) Kwakunye nala mandla angaphezu kwawemvelo, uYehova wasebenzisa indoda eyayithembekile uMoses njengommeli wakhe wasemhlabeni. (Eksodus 4:28-31) Ngoko ke, kwakukho ubungqina obungenakuphikiswa bokuba isandla sikaThixo sasiwakhokela amaSirayeli.

Kwindawo yesibini amisa iintente kuyo, e-Etam, “enyeleni yentlango,” uYehova wayalela uMoses ukuba aphethuke aze amise iintente kunxweme loLwandle Olubomvu, ePi-hahiroti. (Eksodus 13:20) Esi senzo sasibonakala singenakucaciswa sakhokelela uFaro ekubeni agqibe ngelithi amaSirayeli “ayedidekile ezweni.” UFaro enobuganga, watshintsha. Ngoku ezimisele ukuphinda awabuyisele ebukhobokeni amaSirayeli, wahlanganisa umkhosi wakhe waza waphuma wawasukela.—Eksodus 14:1-9.

Ngokuthi uMoses athabathe uhlanga aluse kwicala elahlukileyo, kwindawo eyayibonakala ilithafa elikhokelela ezantsi kuLwandle Olubomvu, kwabonakala ngathi oku kwakuwabeka amaSirayeli emgibeni kuba inkampu yawo ePi-hahiroti yayiphakathi kweentaba, uLwandle Olubomvu kunye nomkhosi kaFaro owawusondela. Kwakubonakala ngathi amaSirayeli ayesisisulu sokoyiswa nokutshatyalaliswa.

Oku kwaba nawuphi umphumo kuwo? Ngaba ayeza kubonakalisa ukukholosa ngokhokelo lukaYehova? Kwakubonakala ngokuphandle ukuba, imeko yayinganiki themba. Ngoko ke, abanye baqalisa ukuxhalaba. Sekunjalo abanye baqalisa ukumkhalazela uMoses. Bambi babekulungele ukunikezela baze babuyele ebukhobokeni eYiputa!—Eksodus 14:10-12.

Bambelela Ngokuqinileyo Kwisandla SikaThixo!

Kule meko amaSirayeli kwafuneka abonakalise ukukholosa okufana nokomntwana kuSomandla. Nangona lonke olo hlanga lwalungazi, uYehova wayenesizathu esivakalayo ngokuyalela uMoses ukuba anqumle uLwandle Olubomvu ePi-hahiroti. Ngokuvulela amaSirayeli indlela engena kwiLizwe Ledinga ngezantsi kwelizwe lamaFilisti, uYehova wabonakalisa ukuqonda okunothando. Emva kweminyaka engama-215 eseYiputa, kwakungekho mathandabuzo ngokuba amaSirayeli ayengakulungelanga ukulwa nohlanga lwabaphumi-mkhosi abakhohlakeleyo. Ngoko ke, uYehova wanyula indlela eyayiza kuluphepha ungquzulwano olunjalo.a—Eksodus 13:17, 18.

Ukuhlangulwa kohlanga nokoyiswa kukaFaro nomkhosi wakhe kuLwandle Olubomvu kunikela ubungqina obumangalisayo bamandla kaThixo okusindisa. Ukongezelela, hayi indlela abonakalisa umbulelo ngayo amaSirayeli, nangona ayengasiqondi isizathu sokuba uThixo awakhokele ngenye indlela, akazange asiyeke isandla sikaThixo! Abambelela ngokuqinileyo aza abona ummangaliso wokwahlukana koLwandle Olubomvu kwakunye nokutshatyalaliswa kweentshaba zawo. Ukukholosa kwawo ngokhokelo lukaYehova kwavuzwa.—Eksodus 14:19-31.

Kwakhona, masiqwalasele umzekelo womntwana obambe isandla somzali. Xa umntwana eqalisa ukuxhalaba, usabela njani? Kunokuba asiyeke okanye angasiqinisi eso sandla, umntwana uya kusiqinisa eso sandla sakhe sincinane eminweni yomzali wakhe. Ngokwenza ngolu hlobo, ubonakalisa ukukholosa okungaxengaxengiyo kukhokelo olungasileliyo umzali aya kulunikela ngamaxesha obunzima.

Ngokufanayo, xa sinxunguphala ebomini bethu, kufuneka sibambelele nkqi, sikholose ngakumbi ngokhokelo lukaThixo! ILizwi Lakhe, iBhayibhile, linokuba kukukhanya okusikhokelayo. (INdumiso 119:105) Kwakhona, khumbula ukuba ukukholosa kuhambisana nomonde. Ngoko ke, simele simnike ithuba uYehova lokuba alungise izinto, kwanokuba okwethuba elithile sisenokungasiqondi ngokuzeleyo isizathu sokuba esikhokela ngendlela ethile. Ewe, sinokukholosa ngokhokelo lukaThixo.—Eksodus 15:2, 6; Duteronomi 13:4; Isaya 41:13.

[Umbhalo osemazantsi]