“Yimani Ngokuqinileyo, Nilubone Usindiso LukaYehova”
“UYehova usecaleni lam; andiyi koyika. Angandenza ntoni na umntu wasemhlabeni?”—INDUMISO 118:6.
1. Ziziphi iziganeko ezikhulu eziza kwehlela uluntu?
KUNGEKUDALA uluntu luza kujamelana neentlekele ezingazange zabonwa ngaphambili. Echaza kwangaphambili ezi ziganeko zomhla wethu, uYesu walumkisa abalandeli bakhe wathi: “Kuya kubakho imbandezelo enkulu ekungazange kubekho injengayo ukususela ekuqaleni kwehlabathi de kube ngoku, nekungasayi kubakho injengayo kwakhona. Enyanisweni, ngaphandle kokuba loo mihla inqunyulwe, bekungayi kubakho nyama isindayo; kodwa ngenxa yabanyuliweyo loo mihla iya kunqunyulwa.”—Mateyu 24:21, 22.
2. Yintoni ebambezele ukuqalisa kwembandezelo enkulu?
2 Nakuba zingabonakali ebantwini, kukho iingelosi ezibambe loo mbandezelo. Kwisityhilelo awasinikwa nguYesu, umpostile uYohane waba nelungelo lokubona isizathu sokuba loo mbandezelo ibanjwe. Lo mpostile walupheleyo usichaza athi: “Ndabona iingelosi ezine zimi kwiimbombo zone zomhlaba, zibambe ngokuqinileyo imimoya yomine yomhlaba . . . Ndabona enye ingelosi inyuka ivela empumalanga, inetywina loThixo ophilayo; yaza yadanduluka ngelizwi elikhulu kwiingelosi ezine . . . ‘Musani ukuwonakalisa umhlaba nolwandle nemithi, de kube semva kokuba siwatywinile amakhoboka oThixo wethu emabunzini awo.’”—ISityhilelo 7:1-3.
3. Yintoni eya kuqala yenzeke ukufika kwembandezelo enkulu?
3 Sele kuza kugqitywa ukutywinwa ‘kwamakhoboka oThixo wethu.’ Ezi ngelosi zine sezilungele ukukhulula loo mimoya yentshabalalo. Yintoni eya kuqala yenzeke ukuyikhulula kwazo? Ingelosi iphendula ithi: “Ngokugadlela okukhawulezileyo iBhabhiloni isixeko esikhulu iya kuphoselwa phantsi, ingabi safunyanwa kwakhona.” (ISityhilelo 18:21) Kuya kubakho uvuyo olukhulu emazulwini, xa kutshatyalaliswa ubukhosi behlabathi bonqulo lobuxoki.—ISityhilelo 19:1, 2.
4. Ziziphi izinto esilindele ukuba zenzeke?
4 Zonke iintlanga zomhlaba ziya kumanyana ukuze zilwe nabantu bakaYehova. Ngaba ziya kukwazi ukutshayela amaKristu athembekileyo? Kusenokubonakala njalo. Kodwa khangela! Imikhosi yasezulwini elandela uKristu Yesu iya kuqinisekisa ukuba loo mikhosi yeentlanga iyatshatyalaliswa. (ISityhilelo 19:19-21) Ekugqibeleni, uMtyholi neengelosi zakhe baya kuphoswa enzonzobileni apho kungekho kwanto banokuyenza. Abasayi kuba sakwazi ukulahlekisa abantu kuba baya kuvalelwa iminyaka eliwaka. Oko kuya kuzisa isiqabu esikhulu kwisihlwele esikhulu sabo basindileyo.—ISityhilelo 7:9, 10, 14; 20:1-3.
5. Ziziphi izinto ezivuyisayo eziza kufunyanwa ngabo bahlala bethembekile kuYehova?
5 Sekumbovu ukuba zenzeke ezi ziganeko zimangalisayo nezoyikekayo. Zonke zinokuthanani nokuthethelelwa kwelungelo likaYehova lokulawula indalo yakhe iphela. Khawucinge nje ngoku: Ukuba sihlala sithembekile kuYehova size silumele ngokuqinileyo ulongamo lwakhe, siya kubakho xa kungcwaliswa igama lakhe naxa kuzaliseka izithembiso zakhe. Kuya kuvuyisa ngokwenene oko.
6. Ngenxa yeziganeko ezisemnyango, yintoni esiza kuyiqwalasela?
6 Ngaba sikulungele ukufika kwezo ziganeko? Ngaba sinokholo kumandla kaYehova okusindisa? Ngaba sinentembelo yokuba uya kusihlangula ngexesha nangendlela efanelekileyo? Ukuphendula loo mibuzo, simele sikhumbule oko umpostile uPawulos wakuxelela amaKristu aseRoma esithi: “Zonke izinto ezabhalwa kwixesha langaphambili zabhalelwa ukuyalela thina, ukuze ngonyamezelo lwethu nangentuthuzelo yeZibhalo sibe nethemba.” (Roma 15:4) Phakathi kwezinto ezabhalelwa ukuyalela thina, nokusinika intuthuzelo nethemba, yingxelo yokuhlangulwa kwamaSirayeli nguYehova kwisandla esinamandla sabacinezeli baseYiputa. Ukuqwalasela ezo ziganeko zokusindisa kukaYehova oonyana bakaSirayeli kumele kusomeleze njengoko silindele imbandezelo enkulu esemnyango.
UYehova Uhlangula Abantu Bakhe
7. Ngowe-1513 B.C.E., yintoni ebambis’ amazinyo eyenzeka eYiputa?
7 Kungonyaka we-1513 B.C.E. UYehova sele ewathwaxe ngezibetho ezisithoba amaYiputa. Emva kwesibetho sethoba, uFaro ugxotha uMoses esithi: “Phum’ uphele apha! Kwaye lumka! Mandingaphindi ndikubone phambi kobuso bam, kuba mhla ndakubona nje phambi kobuso bam uya kuba ngofileyo.” NoMoses uphendula athi: “Ndokwenza njengoko uthethile. Akusayi kuphinda undibone phambi kobuso bakho kwakhona.”—Eksodus 10:28, 29.
8. Yiyiphi imiyalelo yokusinda enikwa amaSirayeli, yaye iba nayiphi imiphumo?
8 Ngoku uYehova uxelela uMoses ukuba kusekho isibetho sokugqibela aza kubetha ngaso uFaro nawo onke amaYiputa. Ngomhla we-14 kwinyanga enguAbhibhi (Nisan), kuza kufa onke amazibulo aseYiputa, awabantu nawezilwanyana. Kodwa wona amaSirayeli aza kusinda ukuba ayithobela ngenyameko imiyalelo kaThixo ayinike uMoses. Amele atshize igazi letakane eliliduna emigubasini yomibini nakumphezulu womnyango wendlu aze ahlale ezindlwini angaphumi phandle. Kwenzeka ntoni ngobo busuku? Makhe sive indlela uMoses akuchaza ngayo oku esithi: “Kwathi ke ezinzulwini zobusuku uYehova waxabela onke amazibulo ezweni laseYiputa.” NoFaro akaphozisi maseko uyasabela. Ubiza uMoses noAron aze athi kubo: “Sukani, niphume phakathi kwabantu bam, . . . nihambe, niye kukhonza uYehova, njengokutsho kwenu.” Nawo ke amaSirayeli angen’ endleleni, mhlawumbi ngaphezu kwezigidi ezithathu zawo kuquka “iqela elikhulu elingumxube” labangengomaSirayeli.—Eksodus 12:1-7, 29, 31, 37, 38.
9. Yiyiphi indlela uThixo akhokelela kuyo amaSirayeli ukuphuma kwawo eYiputa yaye kutheni ekhetha yona nje?
9 Indlela emfutshane anokuhamba ngayo amaSirayeli kukugudla uLwandle lweMeditera aye kunqumla kwilizwe lamaFilisti. Kodwa elo lilizwe lotshaba. Mhlawumbi efuna abantu bakhe baphephe imfazwe, uYehova ubakhokelela kwintlango yoLwandle Olubomvu. Nakuba izizigidi zabantu ezikolu hambo, akukho siphithiphithi senzekayo. Ingxelo yeBhayibhile ithi: “Babexhotyiselwe idabi oonyana bakaSirayeli ekunyukeni kwabo bephuma ezweni laseYiputa.”—Eksodus 13:17, 18.
‘Luboneni Usindiso LukaYehova’
10. Kutheni uThixo eyalela amaSirayeli ukuba amise inkampu phambi kwePihahiroti?
10 Kuthi kusenjalo kwenzeke imimangaliso. UYehova uthi kuMoses: “Thetha koonyana bakaSirayeli, ukuba bajike baze bamise inkampu phambi kwePihahiroti phakathi kweMigdoli nolwandle malunga neBhahali-tsefon.” Njengoko sithobela le miyalelo, esi sihlwele sizibona sivaleleke phakathi kweentaba noLwandle Olubomvu. Kubonakala kungekho ndlela yakuya phambili. Kodwa yena uYehova uyayazi into ayenzayo. Uthi kuMoses: “Ndoyiyeka ngokwenene ibe lukhuni intliziyo kaFaro, abasukele ngokuqinisekileyo ndize ndizukiseke ngoFaro nangomkhosi wakhe wamajoni wonke; azi ngokuqinisekileyo amaYiputa ukuba ndinguYehova.”—Eksodus 14:1-4.
11. (a) Liliphi inyathelo elithatyathwa nguFaro, ibe asabela njani amaSirayeli kulo? (b) UMoses usabela njani kwizikhalo zikaSirayeli?
11 Evakalelwa kukuba wenze impazamo ngokuvumela amaSirayeli emke eYiputa, uFaro uwasukela ngeenqwelo zokulwa ezikhethiweyo ezingama-600. Njengoko umkhosi wamaYiputa uvela, amaSirayeli ayoyika aze akhale kuMoses esithi: “Kungokuba kungekho mangcwaba na eYiputa le nto usithabathileyo ukuba sifele entlango apha?” Eqinisekile ngosindiso lukaYehova, uMoses uphendula athi: “Musani ukoyika. Yimani ngokuqinileyo, nilubone usindiso lukaYehova, aya kunenzela lona namhlanje. . . . UYehova uya kunilwela, ke nina niya kuthi cwaka.”—Eksodus 14:5-14.
12. UYehova ubahlangula njani abantu bakhe?
12 Njengoko uMoses ebesele ethe uYehova uza kuwalwela amaSirayeli, ngoku kungenelela amandla angaphaya kwawemvelo. Ngommangaliso ingelosi kaYehova ithumela intsika yelifu ebelikade likhokela amaSirayeli ukuba lihambe emva kwawo. Ngoxa lisenza kube mnyama phambi kwamaYiputa, litsho kube semini kumaSirayeli. (Eksodus 13:21, 22; 14:19, 20) Ethobela umyalelo kaThixo, ngoku uMoses wolula isandla sakhe. Le ngxelo iqhubeka ithi: “Walwenza uYehova lwabuyela umva ulwandle ngomoya onamandla wasempuma ubusuku bonke . . . Ethubeni bangena oonyana bakaSirayeli phakathi elwandle emhlabeni owomileyo, ngoxa amanzi ayeludonga ngasekunene kwabo nangasekhohlo kwabo.” AmaYiputa ayaqhubeka esukela kodwa uYehova unabantu bakhe. Ubangela isidubedube kumaYiputa, aze emva koko athi kuMoses: “Yolula isandla sakho phezu kolwandle, ukuze amanzi abuyele phezu kwamaYiputa, neenqwelo zawo zokulwa, namajoni awo akhwele emahasheni.” Eso iba sisiphelo semikhosi kaFaro de kungabikho nelinye ijoni elisindayo!—Eksodus 14:21-28; INdumiso 136:15.
Funda Kusindiso LwamaSirayeli
13. Yintoni abayenzayo oonyana bakaSirayeli emva kokuhlangulwa kwabo?
13 Le ntlangulo ingummangaliso ibachaphazela njani abo basindileyo? UMoses noonyana bakaSirayeli basuka badume bevumela uYehova ingoma! Bavuma besithi: “Mandimvumele uYehova, kuba uphakame kakhulu. . . . UYehova uya kulawula njengokumkani ixesha elingenammiselo, kude kube ngonaphakade.” (Eksodus 15:1, 18) Ewe, into eyathi qatha kubo kukuzukisa uThixo. Kweso siganeko, ulongamo lukaYehova lwabonakaliswa.
14. (a) Yintoni esinokuyifunda ngoYehova kwizinto ezenzeka kumaSirayeli? (b) Uthini umxholo wonyaka wama-2008?
14 Yintoni esiyifundayo, esithuthuzelayo nesinika ithemba kwezi ziganeko zibangel’ imincili? Sibona kakuhle ukuba uYehova akaxakwa nto, ulungele naluphi na uvavanyo neengxaki ezifikela abantu bakhe. ULwandle Olubomvu aluzange lube ngumqobo kumaSirayeli xa uYehova wavusa loo moya unamandla wasempuma. Kwangaxeshanye wenza olo lwandle lwaba lingcwaba lemikhosi kaFaro. Ukuba siyacamngca ngoku, siya kuvumelana namazwi omdumisi athi: “UYehova usecaleni lam; andiyi koyika. Angandenza ntoni na umntu wasemhlabeni?” (INdumiso 118:6) Sinokuthuthuzelwa nangamazwi kaPawulos akweyabaseRoma 8:31 athi: “Ukuba uThixo ungakuthi, ngubani na oya kuba nxamnye nathi?” La mazwi aphefumlelweyo asitsho sibe nentembelo engathethekiyo. Aphelisa naluphi na uloyiko namathandabuzo esisenokuba nawo aze asinike ithemba. Ngoko ufaneleka gqitha umxholo wethu wonyaka wama-2008 othi: “Yimani ngokuqinileyo, nilubone usindiso lukaYehova.”—Eksodus 14:13.
15. Kwakubaluleke kangakanani ukuthobela ekuhlangulweni kukaSirayeli eYiputa, ibe kubaluleke kangakanani namhlanje?
15 Yintoni enye esinokuyifunda kwiMfuduko kaSirayeli eYiputa? Kukuba simele simthobele uYehova kuyo nantoni na athi siyenze. Ethobela, amaSirayeli ayilungiselela ngokweenkcukacha iPasika. Ahlala ezindlwini kubusuku bangoNisan 14. Ekuphumeni kwawo eYiputa, ayemele ahambe ngokwabantu ‘abaxhobele idabi.’ (Eksodus 13:18) Namhlanje kubaluleke gqitha ukuba sithobele ulwalathiso esilufumana ‘ngekhoboka elithembekileyo neliyingqondi.’ (Mateyu 24:45) Simele siliphulaphule ngenyameko ilizwi likaThixo elisemva kwethu, elithi: “‘Nantsi indlela. Hambani ngayo,’ nokuba nisinga ekunene, nokuba nisinga ekhohlo.” (Isaya 30:21) Njengoko sikufuphi ekuqaliseni kwembandezelo enkulu, kungenzeka sifumane imiyalelo ethile eneenkcukacha. Ukuze siphumelele kuloo mihla inzima kuya kufuneka senze ngokuvisisana nabanye abakhonzi abathembekileyo bakaYehova.
16. Yintoni esinokuyifunda kwindlela uThixo awalungelelanisa ngayo imicimbi ukuze ahlangule amaSirayeli?
16 Khumbula ukuba, uYehova wakhokelela amaSirayeli kwindawo awazifumana esekoneni kuyo, phakathi kweentaba noLwandle Olubomvu. Oko kwabonakala kuyimpazamo. Kodwa yonke loo nto yayisezandleni zikaYehova, ibe imiphumo yabangela ukuba adunyiswe ngokusindisa abantu bakhe. Namhlanje, sisenokungasiqondi kakuhle isizathu sokuba imibandela ethile yentlangano isingathwe ngendlela ethile, kodwa simele sibe nentembelo epheleleyo yokuba uYehova uya kusalathisa ngejelo lakhe elithembekileyo lonxibelelwano. Maxa wambi, iintshaba zethu zisenokubonakala zisongamela. Ngenxa yembono yethu esikelwe umda, sisenokungakwazi ukuzibona kakuhle zonke izinto ezibandakanyekileyo. Noko ke, uYehova uyakwazi ukulungelelanisa imicimbi ngexesha elifanelekileyo, kanye njengokuba wenzayo koonyana bakaSirayeli.—IMizekeliso 3:5.
Yiba Nentembelo KuYehova
17. Kutheni sinokuba nentembelo epheleleyo kulwalathiso lukaThixo?
17 Ngaba unokuyicingela intembelo amele ukuba ayenayo amaSirayeli njengoko ekhumbula loo ntsika yayisiba lilifu emini ize ibe lilitha lomlilo ebusuku? Kwakucacile ukuba ayekhokelwa ‘yingelosi yoThixo oyinyaniso.’ (Eksodus 13:21, 22; 14:19) Namhlanje, sinokuqiniseka ukuba uYehova unabantu bakhe ukuba abalathise, abakhusele aze abahlangule. Simele sikhumbule esi sithembiso: “[UYehova] akayi kubashiya abanyanisekileyo bakhe. Ngokuqinisekileyo baya kulindwa ukusa kwixesha elingenammiselo.” (INdumiso 37:28) Singaze silibale ukuba loo mikhosi yeengelosi ezinamandla iyabanceda abakhonzi bakaThixo namhlanje. Ngokuxhaswa yiyo, sinako ‘ukuma ngokuqinileyo ukuze silubone usindiso lukaYehova.’—Eksodus 14:13.
18. Kutheni kufuneka ‘sithabathe sonke isikrweqe sikaThixo’?
18 Yintoni eya kusinceda sonke ukuba sikwazi ‘ukuma ngokuqinileyo’ kwindlela yenyaniso? Kukunxiba isikrweqe somoya esichazwa nguPawulos kwincwadi yakhe eya kwabase-Efese. Phawula ukuba lo mpostile ucebisa ukuba ‘sithabathe sonke isikrweqe sikaThixo.’ Ngaba sizambathe zonke iinxalenye zesi sikrweqe somoya? Ingantle into yokuba kulo nyaka uzayo ngamnye kuthi azihlolisise ukuze aqinisekise ukuba usinxibe sonke esi sikrweqe yaye sihleli kakuhle. Utshaba lwethu, uSathana uMtyholi, ubazi kakuhle ubuthathaka bethu, ibe uzama ukusibambisa singalindelanga okanye asihlasele kwezo ndawo sibuthathaka kuzo. “Sizamazamana” nemikhosi yoomoya abangendawo. Sekunjalo, ekubeni sisomelezwa nguYehova sinokuphumelela kulo mlo.—Efese 6:11-18; IMizekeliso 27:11.
19. Liliphi ilungelo esinokulifumana ukuba siyanyamezela?
19 UYesu wathi kubalandeli bakhe: “Ngokunyamezela kwenu niya kuyizuza imiphefumlo yenu.” (Luka 21:19) Kwanga singaphakathi kwabo banyamezela ngokuthembeka nabuphi na ubunzima esijamelana nabo ukuze sizuze ilungelo lobubele obungasifanelanga bukaThixo size ‘sime ngokuqinileyo sibone usindiso lukaYehova.’
Ungaphendula Njani?
• Ziziphi iziganeko ezibangel’ umdla esele ziza kwenzeka?
• UYehova wawabonakalisa njani amandla akhe okusindisa ngowe-1513 B.C.E.?
• Yintoni ozimisele ukuyenza?
[Amagama acatshulweyo akwiphepha 20]
Umxholo wonyaka wama-2008 uza kube usithi: “Yimani ngokuqinileyo, nilubone usindiso lukaYehova.”—Eksodus 14:13.
[Umfanekiso okwiphepha 17]
“Zonke izinto ezabhalwa kwixesha langaphambili zabhalelwa ukuyalela thina”
[Umfanekiso okwiphepha 18]
Inkani kaFaro yayizisela intlekele iYiputa
[Umfanekiso okwiphepha 19]
USirayeli wasinda xa wenza konke akuyalelwe nguYehova