Abantu Abaselula Bayabuza . . .

Ndinokuba Nguye Njani Umhlobo KaThixo?

“UKUNYANISEKA.” “Ukuzinikela ngokobuqu.” La ngamazwi adla ngokusetyenziswa ngabantu ekuchazeni ulwalamano lwabo nabahlobo babo abasenyongweni. Ngaba ubusazi ukuba la mabinzana anokuchaza ulwalamano noMdali Ozukileyo wale ndalo imangalisayo—ukuba uThixo angangumhlobo wakho? Ewe, iBhayibhile ithetha ngokuba nozinikelo lobuthixo, yaye elo binzana alithethi ngentobelo kuphela kodwa likwathetha ulwalamano olusenyongweni noThixo, ubuhlobo obuphuma kwintliziyo enoxabiso.

Amanqaku adlulileyo kolu ngcelele aye abonisa ukuba ulwalamano olunjalo lunokwenzeka yaye luyingenelo.a Kodwa obu buhlobo noThixo ubufumana njani? Abuyonto ozalwe unayo okanye oyizuze njengelifa kubazali abahlonel’ uThixo. Kunoko, yinto eyenzeka kuphela ngomgudu wokwenene. Umpostile uPawulos waxelela ityendyana lomfana uTimoti ukuba ‘liziqeqeshe ngozinikelo lobuthixo njengoxunelo lwakhe.’ Ewe, lalimele lenze umgudu owenziwa yimbaleki xa iziqeqesha! (1 Timoti 4:7, 8, 10) Nawe umele wenjenjalo ukuze uThixo abe ngumhlobo wakho. Kodwa ungaluqala njani uqeqesho kulo mbandela?

Ukumazi Ngokobuqu UThixo

Ekubeni uzinikelo lobuthixo luphuma entliziyweni, umele uzalise intliziyo yakho ngolwazi olungoThixo. Kulusizi ukuthi, xa abaselula abangaphezu kwama-500 babuzwayo ukuba “Uyifunda ngokufuthi kangakanani iBhayibhile xa uwedwa?” abangama-87 ekhulwini bathi “ngamathub’ athile,” “andifane ndiyenze loo nto,” okanye bathi “andizange ndiqalise.” Kuyabonakala ukuba inkoliso yolutsha icinga ukuba ukufunda iBhayibhile kuyindinisa yaye kuyakruqula. Kodwa akufanele kube njalo! Khawucinge nje ngoku: Kutheni olunye ulutsha luyazi ngentloko yonke ingcombolo yezemidlalo okanye lufunda amazwi eengoma oluzithandayo? Kungenxa yokuba lunomdla kwezo zinto. Ngokufanayo, ukufundisisa iBhayibhile kubangel’ umdla ukuba ingqondo yakho uyinikela kuko. (1 Timoti 4:15) Umpostile uPetros wabongoza esithi: “Yakhani ulangazelelo lobisi olungangxengwanga lwelizwi.” (1 Petros 2:2) Ewe, umele wakhe, okanye ukhulise, umdla onjalo ngeZibhalo. Oku kunokufuna umgudu, kodwa imivuzo ayinganganto.b

Phakathi kwezinye izinto, ukufunda nokufundisisa iLizwi likaThixo neempapasho ezisekelwe eBhayibhileni kuya kukubonisa “ubuhle bukaYehova.” (INdumiso 27:4) Omnye umKristu oselula ogama linguAmber wazibekela usukelo lokufunda iBhayibhile yonke. Oku wakwenza kwithutyana nje elingaphantsi konyaka. “Andiqondi ukuba zikho izinto ebomini bam ezifuna ixesha nomgudu omkhulu kodwa ezibangela intaphane yemivuzo,” watsho njalo uAmber. “Xa ndandiyifunda, ndandisuke ndizive ngathi uYehova wayendisingathile njengobawo yaye endifundisa. Zininzi izinto endazifunda ngoYehova—izinto ezandisondeza ngakumbi kuye nezandenza ndafuna ukumoyika ubomi bam bonke.”

Xa ufunda iBhayibhile, ufunda ngeziganeko ezininzi zaxa uThixo wayebaxhasa ngokunyaniseka abahlobo bakhe. (INdumiso 18:25; 27:10) Ufumanisa ukuba imilinganiselo yakhe isoloko isemagqabini yaye yeyengenelo ehlala ihleli kuthi. (Isaya 48:17) Ukufunda ngeempawu zikaThixo ezingenakuthelekiswa nanto, ezinjengothando nobulumko bakhe, kukwenza ufune ukumxelisa. (Efese 5:1) Kodwa ukuze inkcazelo enjalo iphembelele intliziyo yakho, ukwamele ucamngce. Njengoko ufunda, zibuze: ‘Oku kundixelela ntoni ngoYehova? Ndingakusebenzisa njani oku kwindlela endicinga nendenza ngayo? Oku kubonisa njani ukuba uThixo ukuphela koyena mhlobo usenyongweni endinokuba naye?’

Ulwazi olufumana ngoThixo ngofundisiso lobuqu nesifundo sebandla luya kukunceda usondele ngakumbi kuye nangenye indlela. Iqhalo lamaFrentshi lithi: “Abahlobo bokwenene ngabo bacinga ngokufanayo.” Kodwa ‘unokucinga ngokufanayo’ njani noThixo? UDenise oselula uthi: “Okukhona ufundisisa uze uphande ngombandela othile, kokukhona uya kufumana uluvo lukaYehova ngawo. Kuyanceda ukwazi indlela avakalelwa ngayo ngento ethile.”

Ihambo Ethe Tye Ibalulekile

UThixo ukhetha kuphela abo bayihlonelayo imilinganiselo yakhe yokuziphatha ukuba babe ngabahlobo bakhe. “Lunabathe tye ucweyo [ubuhlobo, NW] lwakhe,” itsho njalo IMizekeliso 3:32. Oselula ozabalazela ukuba ngothe tye uya ‘kuhamba ngomyalelo kaYehova.’ (2 Kumkani 10:31) Intobelo enjalo iya kumsondeza njani umntu kuThixo? UYesu Kristu wathi: “UBawo uya kumthanda, ibe siya kuza kuye size senze indawo yethu yokuhlala kunye naye.” (Yohane 14:21-24) Enjani yona ukuvuyisa ingcinga! Khawufan’ ucinge, abona bantu babini babalaseleyo kwindalo iphela basoloko becinga ngabantu! Oko kuya kwenzeka nakuwe ukuba uzimisele ukuhamba ngomyalelo kaYehova.

Ngaba ukuba ngothe tye kuthetha ukuthi ufanele ufezeke? Nakanye! Ukwenza nje impazamo ngenxa yobuthathaka akuthethi kuthi uyilahlile ‘indlela yemithetho kaThixo.’ (INdumiso 119:35) Khawufan’ ucinge ngoko sikuxelelwa yiBhayibhile ngoKumkani uDavide. Nangona wayengumhlobo kaThixo onyanisekileyo, wenza iimpazamo ezinzulu ngenxa yobuthathaka. Nakuba kunjalo, uYehova wathi ngaye wahamba ‘ngentliziyo egqibeleleyo nangokuthe tye.’ (1 Kumkani 9:4) UKumkani uDavide wayesoloko ebonakalisa inguquko esuk’ entliziyweni ngaso nasiphi na isenzo esiphosakeleyo yaye wayezama ngamandla ukwenza okumkholisayo uThixo.—INdumiso 51:1-4.

Nangona uDavide wayemthanda uThixo, wayeyazi indlela ekunokuba nzima ngayo ngamaxesha athile ukwenza okulungileyo. Kungeso sizathu le nto wabongoza uThixo esithi: “Ndinyathelise enyanisweni yakho.” Ewe, wayenoloyiko olungazenzisiyo lokona uThixo. Ngaloo ndlela uDavide wayenokuthi: “Ukucweya [ubuhlobo, NW] kukaYehova kunabamoyikayo.” (INdumiso 25:5, 14) Olu asiloloyiko olungcangcazelisayo kodwa yintlonelo enzulu ngoMdali noloyiko olufanelekileyo lokungamkholisi. Ihambo efanelekileyo isekelwe kolu loyiko lobuthixo. Ngokomzekelo, khawuqwalasele umzekelo womKristu oselula ogama linguJoshua.

UJoshua wafumana iphetshana elalivela komnye afunda naye esithi uyamthanda yaye ufuna ukuba ‘bathandane.’ Nangona noJoshua wayethabathekile yile ntwazana, waqonda ukuba ukunxulumana nongakholwayo kunokukhokelela ekuziphatheni okubi kuze kubuqhawule ubuhlobo bakhe noYehova. Ngoko walikhupha latsola elokuba wayengenamdla kuloo nto! Xa wathi kamva waxelela unina ngendlela aye wayisingatha ngayo le nyewe, wadanduluka engaziva wathi: “Kwowu! Joshua, mhlawumbi umkhathazile!” UJoshua waphendula wathi: “Kodwa, Mama. Ndixolele ukukhathaza yena kunokuba ndikhathaze uYehova.” Ukoyika kwakhe uthixo, ukoyika ukungamkholisi uMhlobo wakhe wasezulwini, kwamshukumisela ekubeni alondoloze ihambo ethe tye.

Funa Izinxulumani Ezilungileyo

Noko ke, oselula ogama linguLynn, wayengena ngokungena enkathazweni. Yayiyintoni ingxaki? Wayethene nca negquba elingoongantweni. (Eksodus 23:2; 1 Korinte 15:33) Saba yintoni isicombululo? Yaba kukufumana abahlobo abatsha! ULynn uqukumbela athi: “Ukuba phakathi kwabahlobo abamthandayo uYehova, kufak’ isandla ekubeni nesazela esibukhali nokuba kude enkathazweni. Xa bebonakalisa ukukwenyanya ukwenza okubi, nawe uvakalelwa ngaloo ndlela.”

Eneneni, ukukhetha abahlobo abangalunganga kunokuba ngumqobo omkhulu ekubeni nobuhlobo noThixo. UAnn oneminyaka eli-18 ubudala wavuma ukuba: “Izinxulumani zakho zinempembelelo engathethekiyo. Kungekudala uza kufana nazo. Zikwenza ucinge ngendlela yazo. Incoko engesini isenokuba sisonka semihla ngemihla. Isenokukwenza ube nomdla. Uyazibuza ukuba inokuba sinjani.” UAnn wakufunda kabuhlungu oku. Uthi: “Ndiyazi ukuba oku kuyinyaniso. Ndangena ndaphelela ekuziphatheni okubi ndaza ndakhulelwa ndineminyaka eli-15 ubudala.”

Ekugqibeleni uAnn wabuqonda ubunyaniso bamazwi eBhayibhile athi: “Nabani na, ke ngoko, ofuna ukuba ngumhlobo wehlabathi uzimisa njengotshaba lukaThixo.” (Yakobi 4:4) Ewe, uAnn wayefuna—kwaye ezimisele—ukuba ngumhlobo wehlabathi. Kodwa wahlala enentliziyo ebuhlungu. Ngethamsanqa, uAnn wabuyela ezingqondweni. Wazisola gqitha ngekhondo lakhe waza wafuna uncedo kubazali nakubadala bebandla lakhe. Kwakhona wazifunela abahlobo abatsha. (INdumiso 111:1) Ngenxa yomzamo awawenzayo, uAnn wakwazi ukuphinda abe ngumhlobo kaThixo. Ngoku, kwiminyaka eliqela kamva, uthi: “Ulwalamano lwam noYehova lusondelelene ngakumbi.”

Ngofundisiso lobuqu lweBhayibhile, ukucamngca, ihambo ethe tye nonxulumano olufanelekileyo, nawe unokuhlakulela ubuhlobo obusenyongweni noThixo. Phofu ke, ukulondoloza obo buhlobo ngomnye umbandela. Ungakwazi njani ukwenjenjalo phezu kwazo nje iinzima nobuthathaka bakho? Inqaku elizayo kolu ngcelele liza kuxubusha ngalo mbandela.

[Imibhalo esemazantsi]

[Umfanekiso okwiphepha 24]

Ngaba izinxulumani zam ziza kundinceda ndibe ngumhlobo kaThixo?