Singabahlobo Abangumtya Nethunga

UTRACY yinja yam endikhokelayo, uneminyaka elishumi umnyama yaye uluhlobo lweLabrador. Ngenxa yakhe ndiyakwazi ukuhamba-hamba kakuhle. Kwakhona usoloko enam yaye uyandithuthuzela. Ngoko akumangalisi ukuba ndiye ndamthanda kangaka kwaye singabahlobo abangumtya nethunga.

Maxa wambi, abantu bengaqondanga, baye benza iimpazamo angenakuze azenze uTracy. Ngokomzekelo, ngenye imini ndandimshiye ekhaya uTracy yaye ndihamba nomhlobo wam. Sasithetha yaye sonwabile xa ndathi ngequbuliso ndawa. Umhlobo wam wayelibele ukuba andiboni, yaye akazange andilumkise ngongqameko lwendlela. Oku ngekungazange kwenzeke ukuba ndandihamba noTracy.

Ngenye imini, uTracy ngokwenene wabusindisa ubomi bam. Ndandisehla ngendlela xa ngequbuliso iveni ethile ingalawuleki yaphambukela ngakum. Kakade ke, ndayiva igquma kodwa ndandingenakulibona icala eya ngakulo. UTracy wayibona waza eyiqonda le ngozi ngokukhawuleza wanditsalela ecaleni.

Ndiyimfama, Kodwa Ndiyabona

Ndazalwa ngowe-1944 kumzantsi weSweden, yaye bendiyimfama ukususela ekuzalweni. Ndathunyelwa kwisikolo ekuhlala kuso abantwana abangaboniyo, apho ndafunda ukufunda nokubhala ngeBraille. Umculo waba yeyona nto ndiyithandayo ebomini bam, ngokukodwa ukudlala ipiyano. Emva kokuphumelela kwisikolo samabanga aphakamileyo, ndaqhubeka ndifunda iilwimi nomculo kwiYunivesithi yaseGöteborg.

Noko ke, ubomi bam batshintsha ngokupheleleyo xa amaNgqina kaYehova amabini ankqonkqoza kwigumbi lam laseyunivesithi. Kungekudala ndaqalisa ukuya kwiintlanganiso zamaNgqina yaye ndabelana nabanye ngoko ndandikufunda. Ngowe-1977, ndazahlulela kuYehova uThixo ngokubhaptizwa emanzini. Nangona ndiyimfama, ngokufundisisa iLizwi likaThixo, ndiye ndafumana into eyincamisa—ukubona ngokomoya.

Namhlanje ndizibona ndibhetele ngakumbi kunabo babona ngeliso lokwenyama kodwa beziimfama ngokomoya. (Thelekisa uYohane 9:39-41.) Kuyandivuyisa ukuba nomfanekiso-ngqondweni wehlabathi elitsha likaThixo apho, ngokwesithembiso sakhe, amehlo eemfama eya kubona—ewe, apho kuya kuphiliswa bonke ubulwelwe kwanalapho kuya kuvuswa abafileyo!—INdumiso 146:8; Isaya 35:5, 6; IZenzo 24:15.

Nangona ndingatshatanga yaye ndiyimfama, ndiqhuba kakuhle kakhulu, noTracy njengomhlobo wam onyanisekileyo. Makhe ndinichazele indlela andinceda ngayo ndiqhubeke nomsebenzi wam wokuziphilisa nokuba nesabelo kubulungiseleli njengomnye wamaNgqina kaYehova. (Mateyu 24:14; IZenzo 20:20; Hebhere 10:25) Kodwa kuqala, makhe ndithi gqaba gqaba ngoTracy.

Ukukhethelwa Uqeqesho Olukhethekileyo

Xa uTracy wayeneenyanga ezisibhozo kuphela ubudala, wavavanywa ukuze kubonwe enoba wayeya kuphumelela na njengenja ekhokela iimfama. Wangqineka eyinja ezolileyo, kwakulula ukumfundisa, engoyiki ngokukhawuleza xa esiva ingxolo eyothusayo. Ngoko ke, wasiwa kwikhaya lenye intsapho kangangexesha elithile ukuze afunde indlela obuyiyo ubomi bentsapho. Emva koko, xa wayekhule ngokwaneleyo, wathunyelwa kwisikolo esiqeqesha izinja ezikhokela iimfama.

Kwesi sikolo uTracy wafunda ukwenza oko kwakumele kwenziwe yinja ekhokela iimfama, ngokomzekelo ukunceda lowo uza kuba yinkosi yakhe afumane iingcango, izinyuko, amasango neendledlana. Kwakhona wafunda indlela yokuhamba kwiindlela ezixakekileyo ezisecaleni kwesitrato nokuwela izitrato. Kwakhona wafundiswa ukuma elungqamekweni lwendlela, ukuthobela imithetho yendlela, nokuziphepha iindawo ezinokuba neengozi. Emva kweenyanga ezinokuba ntlanu zoqeqesho, wayekulungele ukusebenza. Kungelo xesha awathi uTracy waziswa kum.

Oko Andenzela Kona UTracy

Ntsasa nganye uTracy uyandivusa ukuze ndimenzele ukutya. Emva koko silungiselela ukuya emsebenzini. Ukusuka endlwini yethu sihamba imizuzu engama-20 ukuya eofisini. Kakade ke, ndiyayazi indlela, kodwa umsebenzi kaTracy kukundinceda ndifike ndingakhange ndigileke kwiinqwelo-mafutha, ebantwini, ezibaneni okanye enoba kukwintoni na. Xa sifika, uhlala ngaphantsi kwedesika yam. Yaye, ebudeni besidlo sam sasemini, ngokuqhelekileyo siye sihamba-hambe.

Ngokuhlwa, emva kokufika ekhaya sivela emsebenzini, eyona nxalenye ibalulekileyo yosuku lwethu iyaqalisa. Oku kuxa uTracy endikhokela ukuya kumsebenzi wokushumayela kwindlu ngendlu nakumakhaya endiqhuba kuwo izifundo zeBhayibhile. Abantu abaninzi banobubele kuye, bayamphulula baze bamange yaye maxa wambi baye bandinike iintwana ntwana zakhe ezimnandi. Kwakhona veki nganye sibakho kwiintlanganiso zamaKristu. Emva kwezi ntlanganiso abantwana bayathanda ukumbulisa baze bamange uTracy, nto leyo ayithanda gqitha.

Ndiyaqonda ukuba uTracy uyinja nje kuphela yaye uya kufa ngenye imini. Oko kuthetha ukuba ekugqibeleni kuya kufuneka ndifune enye inja eza kundikhokela. Kodwa, okwangoku, sisebenza kunye yaye omnye uxhomekeke komnye. Xa uTracy engekho, ndiye ndingaqiniseki ngesiqu sam, yaye uye aphazamiseke aze angazinzi xa engakwazi ukundikhokela.

Imfuneko Yokuqonda

Okumangalisayo kukuba, maxa wambi abantu bayazama ukusahlula. Bamgqala uTracy njengenja nje eqhelekileyo okanye isilwanyana esiliqabane yaye abaluqondi ulwalamano lwethu olunzulu. Aba bantu bamele baqonde ukuba uTracy ufana nesitulo esinamavili sabaguli kumntu ofe umzimba. Ukusahlula kufana nje nokundikhupha amehlo.

Okukhona abanye beluqonda ulwalamano oluphakathi kwam noTracy, kokukhona iingxaki ziya kuncipha. Ngokomzekelo, isitulo esinamavili sabaguli sisoloko sisamkeleka kodwa, ngelishwa, akusoloko kunjalo ngenja ekhokela iimfama. Bambi abantu bayazoyika izinja, okanye abazithandi nje.

Inkcazelo efumaneka kwincwadana enemifanekiso engezinja ezikhokela iimfama, epapashwe yiSwedish Association for the Visually Handicapped, iluncedo kakhulu. Ithi: “Inja ekhokela iimfama ibanceda bakwazi ukuhamba abantu abayimilwelwe. Ewe, inokwenza okungaphezulu kunoko. Iluncedo lokwenene. . . . Ngumhlobo ongasokuze akudanise.”

Eneneni, uTracy ungamehlo am ebumnyameni, yaye uyandinceda ngoku ndiphile ubomi obuqhelekileyo kangangoko ndinako. Sekunjalo, ndeyisekile kukuba kungekudala, kwihlabathi elitsha elithenjiswe nguThixo, ndiya kukwazi ukubona zonke izinto ezimangalisayo zendalo. Ngenxa yoko, ngoku ndizimisele ukulondoloza umbono wam ongokomoya.

Ngoko, uTracy ebeke intloko yakhe ethangeni lam, silungele ukuphulaphula inkupho yakutshanje yephephancwadi IMboniselo (ngesiNgesi).—Ngokubaliswa nguAnne-Marie Evaldsson.