Indlela Endihlangabezana Ngayo Nokuthintitha

Ngokubaliswa nguSven Sievers

BENDISOLOKO ndithintitha ukususela ebuntwaneni. Xa ndikhangela emva, ndinombulelo ngendlela abazali bam abaye bahlangabezana ngayo nale ngxaki. Xa ndandithintitha, babesoloko bezama ukunikela ingqalelo ekuphulaphuleni koko ndandifuna ukukuthetha kunokulungisa indlela endithetha ngayo. Iingcali zokuthetha zithi, abazali abasoloko benikela ingqalelo engapheliyo ekuthintitheni komntwana wabo banokuyandisa le ngxaki.a

Umama waba ngomnye wamaNgqina kaYehova xa ndandineminyaka emithathu ubudala. Xa ndandikwishumi elivisayo ndagqiba kwelokuba ndilandele umzekelo wakhe yaye ndancedwa ukuba ndifundisise iBhayibhile ngokucokisekileyo. NgoJulayi 24, 1982, ndabhaptizwa njengomkhonzi ozahluleleyo kaThixo kwindibano eyayiseNeumünster, eJamani. Kamva, ndafudukela eMzantsi Afrika, apho ndaqhubeka ndinesabelo kumsebenzi wokushumayela ekuhleni, msebenzi lowo onke amaKristu okwenyaniso ayalelwa ukuba abe nesabelo kuwo. (Mateyu 28:19, 20) Usenokuzibuza, ndiphumelela njani njengethintitha?

Umvuzo Wokuba Nesimo Sengqondo Esihle

Ndimele ndivume ukuba maxa wambi kuba nzima ngam ukugcina isimo sengqondo esihle, kodwa ndifumanise ukuba ngokuba nesimo sengqondo esihle ngokwenene kuba luncedo kakhulu. Enyanisweni ngandlel’ ithile ndisoloko ndikwazi ukunxibelelana nabanye. Ukuba andithethi, ndinxibelelana ngokubhala phantsi isigidimi okanye ngokusuka nje ndibonise abanye uncwadi lweBhayibhile. Ukuba nesimo sengqondo esihle kundinceda ndiboyise ubunzima bokuqala incoko. Ndiyazama ukugcina intshayelelo yam ilula kakhulu. Ekuqaleni kwencoko, ndiyamvumela umninimzi athethe kangangoko kunokwenzeka. Abantu bayakuthanda ukuthetha, yaye oku kundinika ithuba lokwazi indlela abacinga ngayo. Ndandule ke ndiqhubeke nencoko ngezinto abanomdla kuzo, ndibalaselisa isigidimi seBhayibhile. Ukunikela ingqalelo koko bakuthethayo kundinceda ndilibale ngengxaki yam yokuthetha, ndize ndingathintithi kakhulu.

Ukuba nesimo sengqondo esihle kukwandinceda ndigqabaze kwiintlanganiso zamaKristu. Ndifumanise ukuba okukhona ndiba nenxaxheba kwiingxubusho zeBhayibhile, kokukhona abaphulaphuli kwanomqhubi wesifundo beqhelana nam yaye baphulaphule koko ndikuthethayo kunendlela endikuthetha ngayo.

Ukuze ndinandiphe uvuyo lokuphumelela, ndimele ndiqhubeke ndizama. Oku kundinceda ndingazisizeli ndize ndibe sisithuli. Ndisoloko ndisilwa nokuzisizela. Kuthiwa ukuba ubani uwiswe lihashe, kubalulekile ukuba alikhwele kwakhona ukuze angaphelelwa kukuzithemba. Ngoko ukuba kufuneka ndiyeke ukuthetha ngoxa ndisagqabaza kuba ndixinge ngokupheleleyo, ngokungathi kunjalo, ndiyazama ukulikhwela kwakhona ihashe, ngokugqabaza kwakhona kwithuba elilandelayo.

Indlela Abanokunceda Ngayo Abanye

Xa kufuneka nditsale umnxeba okanye ndibuze inkcazelo ethile kubantu endingabaziyo, ndiyaluxabisa uncedo olunikelwa ngobuchule. Kodwa abanye abantu bade bagabadele kwiminqweno yabo yokufuna ukundinceda, baze bandiphathe okomntwana ongakwaziyo ukuzenzela izigqibo.

Kwakhona ndiyaluxabisa uncedo lomfazi wam onothando, uTracy. Ngaphambi kokuba abe “ngumlomo” wam, siyayixubusha imeko leyo ngokweenkcukacha yaye uyazi oko ndifuna kwenziwe. (Thelekisa iEksodus 4:10, 14, 15.) Ngaloo ndlela, ubonakalisa intlonelo kum njengomyeni wakhe, yaye undenza ndivakalelwe kukuba ndisaziphilela.

Olunye uncedo olukhulu ibisiSikolo Sobulungiseleli Sobuthixo. Kule ntlanganiso yeeveki ngeeveki, abafundi baba nesabelo ekufundeni iBhayibhile esidlangalaleni nasekunikeleni iintetho ezimfutshane ngemixholo yeBhayibhile. Ndamangaliswa kukufumanisa ukuba ngokufuthi ndiyakwazi ukufunda kwanokuthetha kakuhle gqitha xa ndiphambi kwabaphulaphuli. Ukuba ndandingazange ndibhalise esikolweni, kusenokwenzeka ukuba bendingasoze ndazi ngobu buchule.

Xa bendinesabelo kwiSikolo Sobulungiseleli Sobuthixo, bekukhuthaza ngokwenene xa umqhubi wesikolo enikela ingqalelo koko ndikuthethileyo kungekhona ngendlela endikuthethe ngayo. Ndiye ndangenelwa kakhulu kwiNcwadi Yesikhokelo Yesikolo Sobulungiseleli Sobuthixo,b nangona iingongoma ezithile zale ncwadi zilucelomngeni olukhulu kwabo bathintithayo kunabo bakwaziyo ukuthetha kakuhle. Ngokomzekelo, maxa wambi, ngenxa yokuthintitha kakhulu, andikwazi ukuyigqiba intetho yam kwixesha endabelwe lona. Noko ke, kuyandikhuthaza kakhulu xa umqhubi wesikolo enikela ingqalelo kwiingongoma endikwaziyo ukuzisebenzela.

Amalungelo Angakumbi Enkonzo

Kwixesha elidlulileyo, bendinelungelo lokufunda esidlangalaleni kwimpapasho yamaKristu esiyifundayo kwiintlanganiso zethu. Kwakhona bendinelungelo lokuqhuba isifundo xa kungekho mlungiseleli ofanelekileyo, yaye namhlanje ndikwenza oku ngokuthe rhoqo. Nangona ekuqaleni bendisoyika, ndiye ndalubona uncedo lukaThixo ekusingatheni izabelo ezinjalo.

Noko ke, kangangeminyaka emininzi amathuba okuba ndifunde okanye ndifundise eqongeni aye andinqabela. Bendikuqonda oku, ekubeni bekukho amaxesha okuba ndithabathe ithuba elide kakhulu ukuze ndiviwe ngabantu. Ngoko ndiye ndasebenzisa amandla am kangangoko ndinako ekusingatheni ezinye izabelo. Ekuqaleni, ndandikhonza njengomncedisi ekunyamekeleni izixa zebandla zamaphephancwadi IMboniselo noVukani! Ndandula ke, emva kokuba ndimiselwe njengesicaka solungiselelo, ndanyamekela izixa zeeBhayibhile, iincwadi, kwanolunye uncwadi. Kamva, ndabelwa ukuba ndinyamekele amakhadi omhlaba asetyenziswa kumsebenzi wethu wokushumayela. Ukunikela ingqalelo kwezi zabelo, ndizama ukuzibhokoxa, kuye kwandizisela uvuyo olukhulu.

Kangangeminyaka esibhozo edluleyo, bendikwakhonza njengomhambisi wevangeli wexesha elizeleyo noTracy. Ngokuqinisekileyo uYehova undisikelele nakule nkalo. Enyanisweni, maxa wambi ndikhe ndizibuze enoba uYehova usebenzisa ubuthathaka bam bokuthintitha kusini na. Kubantu abahlanu endiye ndanelungelo lokubanceda ukuba babe ngamaKristu azahluleleyo, ababini kubo bangamathintitha.

Ndisalukhumbula ngovuyo usuku endamiselwa ngalo ukuba ndikhonze njengomdala webandla. Nangona ubuchule endinabo bokufundisa eqongeni bulinganiselwe, ndiyazama ukunikela ingqalelo ekuncedeni abantu. Ukuthintitha kwam akundisikeli mda kubuchule bam bokwenza uphando olungokweZibhalo ukuze ndincede amalungu ebandla ajamelane neengxaki ezinzulu.

Ebudeni beminyaka emihlanu edluleyo, ndiye ndacelwa ukuba ndisingathe izabelo ezingakumbi zokuthetha. Ngaphandle kokunikela iintetho kwiSikolo Sobulungiseleli Sobuthixo, ndiye ndakwazi ukusingatha izaziso ezimfutshane kwezinye iintlanganiso. Ngokuthe ngcembe ndiye ndaphucula ekuthetheni ngokutyibilikayo. Kodwa ndiye ndaphindela emva kwakhona. Ndinexhala, ndiye ndacinga, ‘Andisayi kuphinda ndinikwe esinye isabelo kwakhona,’ kodwa ndingalindelanga, igama lam lalifakwe kuludwe locwangciso oluzayo! Umveleli owongamelayo webandla lethu wathi ukuba nje ndiye ndaminxeka ekuthetheni kangangokuba ndingakwazi ukuqhubeka, ndinokusuka nje ndimjonge yaye uya kuza eqongeni athathise apho bendiphele khona. Ndiye ndalisebenzisa kanye okanye kabini eli lungiselelo linikelwa ngothando, kodwa bekungeyomfuneko ukwenjenjalo kwiinyanga zakutshanje. Njengoko ndiye ndaphucula ekuthetheni, ndiye ndabelwa iinxalenye ezinde, kuquka iintetho zesidlangalala. Ndiye ndayiqonda inkqubela endiyenzileyo kuphela xa ndiye ndacelwa ukuba ndibe nenxaxheba kwimiboniso emibini kwindibano yesiphaluka yamaNgqina kaYehova kutshanje.

Ngeliphandle, andisiqondi ngokupheleleyo isizathu sokuba ndiphucule ekuthetheni. Kwakhona, kusenokwenzeka ukuba kwixesha elizayo le ngxaki ihambele phambili. Enyanisweni, nangona ndibonakala ngokucacileyo ukuba ndenze inkqubela ekuthetheni eqongeni, ndiye ndibuyele umva xa ndithetha nabantu ngabanye. Ngoko eli ayilobali lempumelelo ngokwengqiqo yokuba ndiye ndakoyisa ukuthintitha. Xa ndifumanisa ukuba ndibuyela umva, ndizama ukuzikhumbuza ukuba kufuneka ndizamkele iintsilelo zam ndize ‘ndihambe noThixo wam ngokuthozamileyo.’—Mika 6:8.

Nokuba kunokwenzeka ntoni kwixesha elisondelayo, ndiza kuqhubeka ndizama, ndisazi ukuba kwihlabathi likaThixo elizayo, ukuthintitha kuza kupheliswa ngokupheleleyo. IBhayibhile ithi: “Ulwimi lwabathintithayo lungxamise ukuthetha ngokuthe tyhatyhasini.” Ndiqinisekile ukuba oku kuya kuba yinyaniso ngokoqobo nangengqiqo yokomoya yaye ‘luya kumemelela ulwimi lwesidenge.’—Isaya 32:4; 35:6.

[Imibhalo esemazantsi]

[Umfanekiso okwiphepha 18]

Ndinomfazi wam, uTracy