Siyintoni Isicombululo?
IINGCALI zigwadla shushu iindlela zokucombulula isintsompothi sokunqatyelwa koluntu ngamanzi. IWorld Bank ifuna kusetyenziswe ii-R2,66 zamawaka ezigidi kwiinkqubo zogutyulo namanzi kwiminyaka elishumi ezayo. Ukungayisebenzisi le mali kunokubangela iindleko ezingakumbi. Ngokomzekelo, ePeru, ubhubhane wekholera othabatha iiveki ezilishumi, nobangelwa ngamanzi angcolileyo kutshanje uye waxabisa ii-R4430 zezigidi—mali leyo eyiphinda kathathu imali ebisetyenziselwa ukulungiselela amanzi kweli lizwe ebudeni beminyaka yee-1980.
Sekunjalo, phezu kwazo nje iinjongo ezintle zabo bawaxhasayo, amaphulo okucoca amanzi akasoloko ebanceda abo bangamahlwempu ngokugqithiseleyo. Abemi banda ngokukhawuleza okomlilo wedobo kwizixeko ezikhulu zamazwe asakhasayo. Amahlwempu ahlala kumatyotyombe axineneyo nakumgangatho ophantsi angenazo iimpompo zamanzi okanye inkqubo yogutyulo. Ekubeni engakwazi ukufumana amanzi alungiselelwe ngurhulumente, kuye kufuneke ahlawule imali eninzi kwabo bathengisa amanzi, ibe loo manzi asoloko emdaka.
Licacile elokuba ingxaki yamanzi esehlabathini lonke sisintsompothi yaye inabanye oothunywashe abahlobene nayo: ukunqaba kwamanzi, ungcoliso, ubuhlwempu, isifo neemfuno ezininzi ezibangelwa kukwanda kwabemi. Ngokufanayo licacile elokuba abantu abanakukwazi ukuzicombulula ezi ngxaki.
Isizathu Sokuba Nethemba
Noko ke, ikamva alikho mfiliba njengokuba abaninzi becinga. Ngoba? Kungenxa yokuba isicombululo kwingxaki yamanzi esehlabathini asixhomekekanga ebantwini; sixhomekeke kuThixo. Nguye yedwa onamandla okucombulula zonke iingxaki zamanzi.
Isibakala sokuba uYehova uThixo unokuzicombulula ezi ngxaki asinakuthandatyuzwa. AkangoMyili noMdali womhlaba nje kuphela kodwa nowamanzi akuwo. Yayinguye owahambisa umjikelo omangalisayo wamanzi kunye nayo yonke eminye imijikelo yemvelo ebangela ubomi emhlabeni. ISityhilelo 14:7 sichaza uYehova ‘njengaLowo wenza izulu nomhlaba nolwandle nemithombo yamanzi.’
UYehova unamandla okulawula amanzi asehlabathini. ‘Ungulonika imvula phezu kobuso bomhlaba, ase amanzi phezu kwamaphandle.’ (Yobhi 5:10) IBhayibhile ithi ngaye: “Uyenze intlango yaba lidike elinamanzi, ilizwe elingumqwebedu laba ngamathende amanzi.”—INdumiso 107:35.
Ngokuphindaphindiweyo uye wabonakalisa amandla akhe okulungiselela amanzi. Ngokomzekelo, walungiselela amaSirayeli amanzi ebudeni beminyaka yawo engama-40 yokuba sentlango, maxa wambi oko ekwenza ngokungummangaliso. IBhayibhile ithi: “Wavelisa imiqukuqela yamanzi engxondorheni, wahlisa amanzi njengemilambo. Yabona, walibetha iliwa, abaleka amanzi, yakhukula nemilanjana.”—INdumiso 78:16, 20.
Oko Kuya Kwenziwa NguThixo
UThixo akayi kuyivumela le ngxaki yamanzi iqhubeke ikho ngonaphakade. IBhayibhile ixela kusengaphambili ukuba kuseza ixesha laxa eya kuthabath’ isenzo ngenxa yabo bonke abasehlabathini abafuna ukuphila phantsi kolawulo olunothando lorhulumente wakhe wasezulwini, oya kulawula umhlaba kungekudala.—Mateyu 6:10.
Loo rhulumente, okanye uBukumkani, uya kuphelisa izigulo ezibangelwa ngamanzi, kunye nazo zonke ezinye izigulo. IBhayibhile ibaqinisekisa ngolu hlobo abanyanisekileyo bakaThixo: ‘[UThixo] asisikelele isonka sakho, namanzi akho; [uya] kusisusa isifo phakathi kwakho.’ (Eksodus 23:25) Ngaphezu koko, abo bangcolisa amanzi asemhlabeni baya kutshatyalaliswa xa ‘esonakalisa abo bawonakalisayo umhlaba.’—ISityhilelo 11:18.
Wonke umhlaba uya kuchuma phantsi kwenyameko kaThixo enothando. Abantu abasayi kuphinda babe kumzabalazo ongapheliyo wokufuna amanzi acocekileyo. UThixo uSomandla, osoloko ethetha inyaniso, waphefumlela umprofeti wakhe ukuba abhale oku ngokuphathelele ikamva: “Ngokuba kuya kugqobhoka amanzi entlango, nemilambo enkqantosini; isanga sibe lidike, neendawo ezinxaniweyo zimpompoze amanzi.”—Isaya 35:6, 7; Hebhere 6:18.
[Umfanekiso okwiphepha 30]
UThixo uthembisa ukuba: “Kuya kugqobhoka amanzi entlango, . . . neendawo ezinxaniweyo zimpompoze amanzi.”—Isaya 35:6, 7