Ukukhusela Impilo Yabantwana

INGXELO yakutshanje evela kwiUnited Nations Children’s Fund (UNICEF), iThe Progress of Nations, ibonisa inkqubela ephawulekayo kwimeko yempilo yabantwana kumazwe amaninzi. Ngenxa yamatile-tile oorhulumente nawemibutho yezizwe ngezizwe, bambalwa abantwana abangaphantsi kweminyaka emihlanu ubudala abaye bafa kumazwe amaninzi. Noko ke, iThe Progress of Nations ikwabonisa ukuba nyaka ngamnye kunokuhlangulwa izigidi ezingakumbi zabantwana kusetyenziswa iindlela ezilula nezingabizi mali, ingakumbi kumazwe asakhasayo. Abazali abahlala kula mazwe nakwamanye banokuwafumanisa eluncedo la macebiso alandelayo afumaneka kule ngxelo.

Ukuncancisa. Le ngxelo inikela eli cebiso: “Ukuncancisa kusesona siqalo sihle sokuba sempilweni nokondleka.” Ngokutsho kweWorld Health Organization (WHO), “bekunokusindiswa ngaphezu kwesigidi seentsana ngonyaka ukuba zonke bezinokuncanciswa ngokukhethekileyo kangangeenyanga ezintandathu zokuqala.” Ekubeni izibhedlele neendawo zokubelekisa zinikela amacebiso amahle, iUNICEF neWHO zikhuthaza izibhedlele ukuba zithabathe “inyathelo lothando ekukhuseleni iintsana.” Injongo yazo kukukhuthaza izibhedlele ukuba zixhase oomama abancancisayo zize zibanike amacebiso afanelekileyo ngokuphathelele ukuncancisa.

Ucoceko namanzi acocekileyo. Le ngxelo ithi: “Umonakalo obangelwa zizifo unokuncitshiswa gqitha kukusetyenziswa kwamanzi acocekileyo, kukusetyenziswa kwezindlu zangasese, kukuhlamba izandla ngaphambi kokuphatha ukutya nakukulungiselela kakuhle ukutya kuze kugcinwe kwindawo ekhuselekileyo.” Nangona kwiindawo ezininzi kungumgudu ukufumana amanzi acocekileyo awaneleyo, ayafuneka ukuze abantwana nentsapho bahlale besempilweni.

Intswane. Ngokutsho kwale ngxelo, ukongezelela ivithamin A kunokuhlangula abantwana abazizigidi ezithathu emlonyeni wengcwaba nyaka ngamnye. Ithi, kukho indlela efikelelekayo yokucombulula le ntsumantsumane, yaye loo ndlela kukuphucula indlela yokutya, ukwenza ukutya kube nesondlo, okanye ukunika abantwana iipilisi ezinevithamin A. Ukunika abantwana abaselula iipilisi ezinevithamin A nezixabisa iisenti ezisithoba ngamaxesha athile kutsho kwacac’ icala noko kumazwe anqatyelweyo yivithamin A. Kwakhona kunconyelwa ukuba batye ukutya okunjengeepapaya, iimango, iminqathe, imifuno enamagqabi aluhlaza namaqanda.

I-Oral Rehydration Therapy. I-UNICEF ithi isiqingatha sokufa kwabantwana nyaka ngamnye bebulawa sisifo sorhudo kunokuthintelwa ngoncedo lwemixube engabizi mali ininzi nekulula ukuyenza ngamanzi acocekileyo, ityuwa neswekile okanye irayisi engumgubo.a Kwakhona abazali kufuneka bamnike rhoqo umntwana ukutya. Abaqikelelwa kwisigidi sele bencediwe ngala macebiso.

[Umbhalo osemazantsi]

[Inkcazelo Ngomfanekiso okwiphepha 25]

WHO