Ikamva Eliqaqambileyo Labantwana Bethu
UKUSUSELA ekupheleni kweMfazwe Yehlabathi II, oorhulumente behlabathi bebequlunkqa baze batyikitye izivumelwano ngezivumelwano zokukhusela abahlali emfazweni. Phakathi kwezo zivumelwano kukho ezo zivumela ukuba abantwana bawafumane amayeza nokutya. Izivumelwano zezizwe ngezizwe zithembisa ukukhusela abantwana ekuxhatshazweni ngokwesini, ekuthuthunjisweni nakugonyamelo. Kwakhona ezi zivumelwano ziyikhaba ngaw’ omane into yokufakwa kwabantwana abangaphantsi kweminyaka eli-15 emikhosini exhobileyo.
IThe State of the World’s Children 1996, ingxelo evela kwiUnited Nations Children’s Fund, iyiqhwabel’ izandla le mithetho isithi “isemagqabini ngokwenene” ize yongezelele isithi: “Xa abezobupolitika besazi ukuba kukho imigaqo abanokungena engxakini xa beyophule badla ngokuyiphonononga loo migaqo xa beceba.”
Kambe ke, abezobupolitika bayaliphonononga nelokuba abantu bezizwe ngezizwe badla ngokoyiswa yaye ngamavila xa kufikwa kumba wokunyanzelisa imithetho. Ngenxa yoko le ngxelo iyalivuma elokuba “ngenxa yokungakhathalelwa kwale migaqo, kulula ukuyiphosa kwelokulibala le mithetho yezizwe ngezizwe.”
Kukho nomcimbi wemali. Ngowe-1993, idabi lalishushu phakathi kwamazwe angama-79. Angama-65 kuwo ayehlwempuzekile. La mazwe ahlwempuzekileyo ayezifumana phi izixhobo zokulwa? Ubukhulu becala ayezifumana kumazwe ami kakuhle. Ibe ngawaphi amazwe amahlanu atshotsh’ entla ngokuthumela izixhobo kumazwe asakhasayo? Ngamalungu asisigxina amahlanu eUnited Nations Security Council!
Abo Banenkathalo
Kakade ke, bakho abo banenkathalo ngokwenene ngale mbuqe iqhubeka ebantwaneni ebudeni bemfazwe. Abantu ngabanye nemibutho iqhutywa luthando iye incede ezi ntsizana zingamaxhoba emfazwe. Ngokomzekelo, amaNgqina kaYehova, angazifakiyo kwaphela kwimfazwe, aye akwenza oko. Kodwa ukuze kupheliswe le nto yokwenziwa kwabantwana amaxhoba emfazwe kufuneka kupheliswe imfazwe, nto leyo abanye abathi inkom’ ingazal’ umntu ukuba inokwenzeka. Ekubeni kukudala abantu bexhwithana yaye bekruthakruthana, abaninzi bazixelele ukuba abantu abanakuze bazise uxolo oluhlala luhleli emhlabeni wonke. Kuloo mbono yabo, bachan’ ucwethe.
Kwakhona abantu bazixelele ukuba uThixo akanakuze azifake kwimicimbi yeentlanga okanye azise uxolo oluhlala luhleli kwesi sijikelezi-langa. Kuloo mbono yabo, babeth’ ecaleni.
UMdali wethu, uYehova uThixo, uzikhathalele ngokunzulu izinto ezenzeka emhlabeni. KwiLizwi lakhe, iBhayibhile, uYehova ubuza oku: “Kumnandi na kanene kum ukufa kongendawo . . . asikuko na ukuthi abuye ezindleleni zakhe, aphile?” UThixo uphendula egxininisa athi: “Akumnandi kum ukufa kofayo.”—Hezekile 18:23, 32.
Khawukucingisise oku: Ukuba uMdali wethu onovelwano unqwenela ukuba nabantu abadala abangendawo baguquke baze banandiphe ubomi, ngokuqinisekileyo ufuna abantwana baphile baze nabo banandiphe ubomi! Ukanti, uThixo wethu oluthando akayi kubunyamezela ngonaphakade ubungendawo. “Abenzi bobubi baya kunqunyulwa,” lithembisa oko iLizwi likaThixo. “Kusaya kuba mzuzwana, angabikho ongendawo.”—INdumiso 37:9, 10.
UYesu Kristu, oweyengumceph’ ucandiwe noYise osemazulwini, wayebathanda abantwana waza wathi “ubukumkani bamazulu bobabo banjalo.” (Mateyu 19:14) Ukwenziwa kwamadini ngabantwana koothixo bemfazwe kuthiyekile kuYehova uThixo noNyana wakhe, uYesu Kristu.—Thelekisa iDuteronomi 18:10, 12.
Isithembiso SikaThixo Sekamva Eliqaqambileyo
UThixo uye wazivumela iimfazwe nokubandezeleka kangangeenkulungwane ukuze inyaniso eyachazwa ngumprofeti uYeremiya ihlale imi ngonaphakade: “Ndiyazi, Yehova, ukuba ayikhona emntwini indlela yakhe; akukhona endodeni ehambayo ukuqinisela ukunyathela kwayo.” (Yeremiya 10:23) Kungekudala, iBhayibhile ithembisa ukuba, uYehova uya kuthethelela ulongamo lwakhe lwendalo iphela ‘ngokuphelisa iimfazwe kude kuse eziphelweni zehlabathi.’ (INdumiso 46:9) Kwakhona okunye okuxelwe kwangaphambili eBhayibhileni lixesha apho ‘[abantu] beya kuwakhanda amakrele abo abe ngamakhuba, nezikhali zabo zibe zizitshetshe zeediliya; uhlanga lungaphakamiseli uhlanga ikrele, nezizwe zingaphindi zifunde ukulwa.’—Isaya 2:4.
Kuza kwenzeka ntoni kwabo baye baphulukana nobomi babo ngenxa yemfazwe? Ngaba likho ithemba ngabo? UYesu wathembisa ngovuko lwabafileyo kumhlaba ongenamfazwe, xa wathi: “Kuza ilixa abaya kuthi ngalo bonke abasemangcwabeni . . . baphume.” (Yohane 5:28, 29) Ngokufanayo, umpostile uPawulos ngentembelo wathi: “Kuza kubakho uvuko lwabafileyo, lwamalungisa kwanolwabangemalungisa.”—IZenzo 24:15.
Isithembiso sikaThixo siya kuzaliseka ngokwenene. Unegunya yaye uzimisele ukuphumeza oko anenjongo yokukwenza. (Isaya 55:11) Xa uYehova esithi uza kuphelisa imfazwe, akaphazami. Xa ethembisa ukuvusa abafileyo, uya kukwenza oko. Njengokuba ingelosi uGabriyeli yatshoyo, “kuThixo akukho luvakaliso luya kuba yinto engenakwenzeka.”—Luka 1:37.
[Umfanekiso okwiphepha 10]
Xa imfazwe ingasekho, bonke abantwana baya kunandipha ubomi obuyolisayo