Ukuphela Kwemfazwe

‘Sineminyaka eli-12 kuphela ubudala. Asinakwenza tshintsho kwezopolitiko nakwimfazwe, kodwa siyakufuna ukuphila! Silindele uxolo. Ngaba siya kuze silufumane?’—Iklasi yabantwana bakagrade 5

‘Sifuna ukuya esikolweni nokutyelela abahlobo neentsapho zethu ngaphandle kokoyika ukuqwe-qwediswa. Ndinethemba lokuba urhulumente uya kunikela ingqalelo koku. Sifuna ubomi obubhetele. Sifuna uxolo.’—uAlhaji, oneminyaka eli-14 ubudala

LA MAZWI achukumisayo abonisa ithemba abanalo abaselula abaye babandezeleka kangangeminyaka ngenxa yemfazwe yamakhaya. Ekuphela kwento abayifunayo kukuphila ubomi obuqhelekileyo. Noko ke, akuyonto ilula ukufezekisa ithemba libe yinto yokwenene. Ngaba siya kuze siphile kwihlabathi elingenazimfazwe?

Kwiminyaka yakutshanje, kwizizwe ngezizwe kuye kwenziwa amalinge okucombulula iimfazwe zamakhaya ngokuwaphathel’ imbengwane amaqela alwayo ukuze atyikitye izivumelwano zoxolo. Amanye amazwe ade athumela imikhosi yokugcina uxolo esenzela ukuphumeza ezo zivumelwano. Kodwa ambalwa amazwe anemali okanye umdla wokwakhela umkhanya oko kuqhubeka kumazwe akude, apho intiyo eyendeleyo nokungathembani kwenza singasebenzi nasiphi na isivumelwano. Yinto eqhelekileyo ukuba emva kweeveki okanye iinyanga ezimbalwa kutyikitywe eso sivumelwano iphinde iqale phantsi imfazwe. Njengokuba iStockholm International Peace Research Institute isitsho, “kunzima ukuphumeza uxolo xa abo balwayo besenomdla namandla okulwa.”

Kwangaxeshanye ezi ngxaki zigqugqisa iindawo ezininzi zomhlaba zikhumbuza amaKristu ngesiprofeto seBhayibhile. Incwadi yeSityhilelo ithetha ngexesha elinzima embalini apho indoda yokomfuziselo ekhwele ihashe yayiza ‘kususa uxolo emhlabeni.’ (ISityhilelo 6:4) Oku kugqugqisa kwemfazwe yinxalenye yomqondiso oyintlanganisela obonisa ukuba ngoku siphila kwixesha elichazwa eBhayibhileni ‘njengemihla yokugqibela.’a (2 Timoti 3:1) Noko ke, iLizwi likaThixo lisiqinisekisa ukuba emva kwale mihla yokugqibela kuza kubakho uxolo.

KwiNdumiso 46:9 iBhayibhile isichazela ukuba ukuze lubekho uxolo lokwenene kufuneka kuphele imfazwe, kungekhona kwingingqi ethile yomhlaba, kodwa emhlabeni wonke. Ukongezelela, le ndumiso ichaza ngokungqalileyo ukutshatyalaliswa kwezixhobo zemfazwe ezazisetyenziswa kumaxesha okubhalwa kweBhayibhile—isaphetha, nomkhonto. Ngokufanayo izixhobo ezandayo namhlanje zimele zitshatyalaliswe ukuze abantu bahlale ngoxolo.

Noko ke, ezona zinto ziphembelela imfazwe yintiyo nokubawa kunokuba ibe ziimbumbulu noombayimbayi. Ukubawa, okanye ukunyoluka, ngoyena nobangela wemfazwe yaye intiyo idla ngokukhokelela kugonyamelo. Ukuze bohlukane nezi mvakalelo zingakhiyo, abantu kufuneka batshintshe indlela yabo yokucinga. Kufuneka bafundiswe ukuhlala ngoxolo. Ngoko, wayechan’ ucwethe umprofeti wamandulo uIsaya xa wathi ekuphela kwento eya kuphelisa imfazwe kuxa abantu ‘bengafundi imfazwe kwakhona.’—Isaya 2:4.

Noko ke, namhlanje siphila kwihlabathi elifundisa abantu abadala nabantwana, kungekhona ukuthanda uxolo, kodwa ukuzukisa imfazwe. Okubuhlungu kukuba, nabantwana baqeqeshelwa ukubulala.

Bafunda Ukubulala

Eseneminyaka eli-14 ubudala, uAlhaji waba lijoni elingaphandle komkhosi. Wayeneminyaka elishumi kuphela xa wabanjwa yimikhosi yabavukeli yaza yamqeqeshela ukulwa ngombayimbayi wohlobo lweAK-47. Ekubeni wenziwa ijoni ngenkani, wayephanga ukutya aze atshise izindlu. Wayebulala yaye esenzakalisa abantu. Namhlanje, uAlhaji ukufumanisa kunzima ukuba azilibale izinto ezazisenzeka emfazweni aze aphile njengabanye abantu. Omnye umntwana olijoni uAbraham, wafunda ukubulala yaye kwakunzima ukunikezela ngezixhobo zakhe. Wayesithi: “Ukuba kuthiwa mandishiye umpu wam, ndingakwazi njani ukufumana into yokutya.”

Bangaphezu kwama-300 000 abantwana abangamajoni—amakhwenkwe namantombazana—abalwayo nabafayo kwiimfazwe zamakhaya ezingapheliyo ezigqugqise umhlaba. Icacisa oku enye inkokeli yabavukeli yathi: “Bathobela imiyalelo; abacingi ngabafazi okanye iintsapho; yaye abayazi le nto kuthiwa luloyiko.” Sekunjalo, aba bantwana bayakufuna yaye bakufanele ukuphila ubomi obubhetele.

Kumazwe afumileyo, basenokungakuqondi kakuhle oko kuthethwa kukuba lijoni komntwana. Sekunjalo, abantwana abaninzi kumazwe aseNtshona bafunda ukulwa imfazwe behleli kumakhaya abo. Njani?

Umzekelo woko nguJosé kumzantsi-mpuma eSpeyin. Wayekwiminyaka yeshumi elivisayo ethanda imidlalo yokuzikhusela. Kwizinto zexabiso awayenazo kwakukho ikrele elide awalithengelwa nguyise njengesipho seKrismesi. Wayethanda imidlalo yevidiyo, ngakumbi enogonyamelo. NgoApril 1, 2000 wakwenza ngokoqobo oko wayekubona kusenziwa ngamagorha emidlalo yevidiyo. Ezonwabisa ngogonyamelo wabulala uyise, unina nodadewabo esebenzisa kanye elo krele walinikwa nguyise. Echazela ipolisa wathi: “Ndandifuna ukuba ndedwa; ndandingafuni kunyanyekelwa ngabazali bam.”

Ethetha ngemiphumo yokuzonwabisa ngogonyamelo, umbhali negosa lomkhosi uDave Grossman wathi: “Abantu abasaziva, ngoku ukubona umntu egcuma ziintlungu sele kuyinto yokuzonwabisa: kuyasivuyisa kunokuba kusikhathaze. Sifunda ukubulala, yaye sifunda ukukuthanda.”

Bobabini uAlhaji noJosé bakufunda ukubulala. Akakho kubo owazalwa engumbulali, kodwa luqeqesho abalufumanayo olwatshintsha iingqondo zabo. Olo qeqesho—enoba kusebantwaneni okanye kubantu abadala—lubenza bathande ugonyamelo nemfazwe.

Ukufunda Ngoxolo Endaweni Yemfazwe

Uxolo lokwenene alunakuze lubekho logama abantu besafunda ukubulala. Kwiinkulungwane ezadlulayo, umprofeti uIsaya wabhala wathi: “Ukuba nje kuphela okunene ubunganikela ingqalelo kwimiyalelo [kaThixo]! Ngoko uxolo lwakho beluya kuba njengomlambo.” (Isaya 48:17, 18) Xa abantu befumana ulwazi oluchanileyo ngeLizwi likaThixo baze bafunde ukuthanda umthetho kaThixo, ugonyamelo nemfazwe ziba yinto eyenyanyekayo kubo. Nangoku, abazali banokuqinisekisa ukuba imidlalo yevidiyo edlalwa ngabantwana babo asiyiyo ekhuthaza ugonyamelo. Abantu abadala banokufunda nendlela yokoyisa intiyo nokubawa. AmaNgqina kaYehova aye afumanisa ngokuphindaphindiweyo ukuba iLizwi likaThixo linamandla okuguqula ubomi babantu.—Hebhere 4:12.

Khawucinge nje ngomzekelo kaHortêncio. Wayesengumfana xa wayesenziwa ijoni ngenkani. Uthi, uqeqesho lwasemkhosini lwalungiselelwa “ukusenza sikunqwenele ukubulala abanye abantu yaye singabi naloyiko.” Walwa kwenye imfazwe yamakhaya eyathabatha ixesha elide eAfrika. Uyavuma athi: “Imfazwe yabutshintsha ubuntu bam. Nanamhlanje ndisazikhumbula izinto endandizenza. Ndiba buhlungu gqitha xa ndicinga ngezinto endandinyanzelwa ukuba ndizenze.”

Xa elinye ijoni lathetha noHortêncio ngeBhayibhile, yachukumiseka intliziyo yakhe. Isithembiso sikaThixo esikwiNdumiso 46:9 sokuphelisa zonke iintlobo zemfazwe samchukumisa. Okukhona efunda iBhayibhile, kwaba kokukhona engafuni kulwa. Kungekudala, yena namaqabane akhe amabini bagxothwa emkhosini, yaye bahlulela ubomi babo kuYehova uThixo. UHortêncio uthi: “Inyaniso yeBhayibhile yandinceda ndakwazi ukuthanda iintshaba zam. Ndaqonda ukuba ngokulwa emfazweni ndandisona uYehova, kuba uThixo uthi asimele sibulale abamelwane bethu. Ukuze ndibonakalise olu thando, kwafuneka nditshintshe indlela yokucinga ndingajongi abantu njengeentshaba zam.”

Amava okwenene anjengala abonisa ukuba imfundiso yeBhayibhile ikhuthaza uxolo ngokwenene. Oku akumangalisi. Umprofeti uIsaya wabonisa ukuba kukho unxibelelwano olungqalileyo phakathi kwemfundiso yobuthixo noxolo. Waxela kwangaphambili wathi: “Bonke oonyana bakho baya kufundiswa nguYehova, lube lukhulu uxolo loonyana bakho.” (Isaya 54:13) Kwalo mprofeti wabona kusengaphambili ixesha apho zonke iintlanga ziya kuba ngumsinga ukuya kunqulo olunyulu lukaYehova uThixo ukuze zifunde ngeendlela zakhe. Uya kuba yintoni umphumo woko? ‘Ziya kuwakhanda amakrele azo abe ngamakhuba nemikhonto yazo ibe zizikere zokuthena imithi. Uhlanga aluyi kuphakamisela uhlanga ikrele, zingayi kuphinda zifunde nemfazwe kwakhona.’—Isaya 2:2-4.

Ngokuvisisana neso siprofeto, ehlabathini lonke amaNgqina kaYehova enza umsebenzi wokufundisa osele uncede izigidi zabantu zoyisa intiyo engunobangela weemfazwe eziliwa ngabantu.

Isiqinisekiso Sokubakho Koxolo Ehlabathini

Ngaphandle kokusilungiselela le mfundiso, uThixo uye wamisela urhulumente, okanye “ubukumkani,” obuza kukwazi ukuqinisekisa ukubakho koxolo ehlabathini. Ngendlela ephawulekayo, iBhayibhile ichaza uMlawuli okhethwe nguThixo, uYesu Kristu, ‘njengeNkosana yoXolo.’ Ihlabela mgama isiqinisekisa ngokuba le ‘nkosana ayiyi kuyeka ukuphatha, noxolo aluyi kuphela.’—Isaya 9:6, 7.

Sisiphi isiqinisekiso esinaso sokuba ulawulo lukaKristu luya kuphelisa naluphi na uhlobo lwemfazwe? Umprofeti uIsaya wongezelela athi: “Yona kanye inzondelelo kaYehova wemikhosi iya kukwenza oku.” (Isaya 9:7) UThixo unomnqweno namandla okuzisa uxolo oluhlala luhleli. UYesu uqinisekile ngesi sithembiso. Kungenxa yoko wafundisa abalandeli bakhe ukuba bathandazele uBukumkani bukaThixo ukuba bufike kuze kwenziwe ukuthanda kukaThixo emhlabeni. (Mateyu 6:9, 10) Xa side saphendulwa eso sicelo sokunyaniseka, imfazwe ayinakuze iphinde ibonwe emhlabeni.

[Umbhalo osemazantsi]

[Umfanekiso okwiphepha 7]

Imfundiso yeBhayibhile ikhuthaza uxolo lokwenene