Ngaba Ukruqukile Ngumsebenzi Wakho?

MHLAWUMBI usebenza iiyure ezisibhozo ngosuku. Elo lixesha elininzi kakhulu kwanexesha elide lobomi bakho olichitha unesithukuthezi! Kanti, kule nkulungwane yama-20 imisebenzi emininzi isisizungu yaye ayimniki ithuba lokuba neqhayiya ngesiqu sakhe lowo usebenzayo.

Ngoko unokuzuza okukhulu ngokwenza umsebenzi wakho ubangele umdla. Ufumana uvuyo olukhulu ekusebenzeni, yaye ufunda imfihlelo yokwenza nawuphi na umsebenzi oza kuwenza kwixesha elizayo ubangele umdla. Ngoko ke, makhe sihlole ezinye iindlela zokuphumeza oku.

Zenze Onehlombe

Ezinye iingcali zicebisa ukuba usebenze ngokungathi uyawunandipha loo msebenzi. Ukuba wenjenjalo, ekugqibeleni uya kuwunandipha.

‘Kodwa andisoze ndibe nehlombe ngomsebenzi wam!’ usenokutsho. Umsebenzi wakho usenokuba ngumsina ndozele, njengomsebenzi osuka kulo uye kulowaa. Okanye kusenokuba usebenze emsebenzini wakho kangangeminyaka emininzi kangangokuba uziva ungenakukwazi ukuvuselela umdla wakho kuwo. Noko ke, ubuchule obulula obunjengokuncuma nokuma nkqo busenokukunceda uzive unehlombe ngakumbi ngomsebenzi wakho.

Kwakhona kusenokukunceda ukunikela ingqalelo ngokupheleleyo koko ukwenzayo. Ngokungathi kunjalo, musa ukuzenza irobhothi, yaye ungawenzi umsebenzi wakho ucinga ngesidlo sasemini, ngempela-veki, okanye ngomnye umsebenzi omele wenziwe. Kudla ngokuba bubulumko ukunikela ingqalelo epheleleyo kumsebenzi owenzayo. Uba yintoni umphumo? Usenokuwunandipha umsebenzi yaye nexesha lisenokubonakala likhawuleza.

Ngokuqhelekileyo oku koko kwenzekayo xa uzifumanisa uqondele kumsebenzi owuthanda ngokwenene. Usenokuba nemiphumo efanayo naxa uzinyanzele ukuba unikele ingqalelo epheleleyo kumsebenzi ongaqhelanga ukuwunandipha.

Yenza Konke Okusemandleni Akho

Ukwenza konke okusemandleni akho kunokukunceda uzuze ulwaneliseko emsebenzini. Kakade ke, icebiso elinjalo liyaphikisana nengcamango eqhelekileyo yokuba xa ufumanisa ukuba umsebenzi awuniki mdla, umele uwugqwagqwe. Kodwa ukungakhathali, ukuzibekela amangomso izinto, kwanokuwugqwagqwa kusenokwenzeka ukuba kuya kukuqoba kuze kukwenze uxhalabe ngakumbi yaye udinwe. Kwezinye iimeko umntu osoloko efika ekhaya exinezelekile, exhalabile, yaye ediniwe xa evela emsebenzini, kusenokwenzeka ukuba ukuloo ngxaki kuba engakhange asebenze ngenzondelelo.

Ngokutsho kweBhayibhile, ukuzibhokoxa kumsebenzi othile kusenokuwenza amaxesha okuphumla anandipheke ngakumbi. “Akukho nto ilungileyo ebantwini kunokuba badle, basele, bawubonise umphefumlo wabo okulungileyo emigudwini yabo.” (INtshumayeli 2:24) Kwabathile, oku kusenokuvakala kuphelelwe lixesha, kodwa abanye basebenzisa lo mgaqo ungaphelelwa lixesha. Bayavuma ukuba, ngokuqinisekileyo, “akukho nto ilungileyo” kunokuba banandiphe iziqhamo zokuzibhokoxa kwabo. Incwadi ethi The Joy of Working iyavuma isithi: “Umsebenzi owenziwe kakuhle ubangela ulwaneliseko olukhulu ngaphakathi.”

Ngoko, wenze umsebenzi wakho ngamandla akho onke, yaye mhlawumbi uya kuziva uhlaziyekile. Musa ukwenza nje uphela sonwabe yaye uya kuziva wonwabe ngakumbi. Yenza imisebenzi ebalulekileyo kuqala, yaye uya kuwanandipha amaxesha esidlo sasemini kwaneempela-veki ngaphezu komntu ozidinisa ngokuzibekela amangomso izinto.—Thelekisa uEstere 10:2; Roma 12:11; 2 Timoti 2:15.

Kunokuba ukhuphisane nabanye, zabalazela ukuzibhokoxa. (Galati 6:4) Zibekele imilinganiselo nosukelo olutsha. Zama ukuphucula. Elinye ibhinqa, elenza umsebenzi oquka ukuthunga izinto ezifanayo abanye abanokuwujonga njengosisizungu, lenza umdlalo wokuzibekela ixesha. Lalisoloko libala oko likuthungileyo yure nganye, laza lazama ukulandisa elo nani. Liyawunandipha ngokwenene umsebenzi walo kuba lilwela ukwenza okusemandleni alo.—IMizekeliso 31:31.

“Wuhombise” Umsebenzi Wakho

Ugqirha Dennis T. Jaffe noCynthia D. Scott bacebisa ngelithi: “Cinga ngomsebenzi wakho njengendlu engenanto. Ufudukela kuyo uze ujonge imo yayo nendlela eyakhiwe ngayo. Uqalisa ukusebenzisa ubugcisa bakho bokuhombisa. Uceba indlela izinto eziza kuma ngayo, uhombise, wandule wenze le ndlu ibe likhaya lakho. Uyenza yahluke kwezinye ngokuyenza ibe yile nto ifunwa nguwe.”

Inkoliso yemisebenzi ifumaneka inemithetho nokhokelo. Ukwenza oko kulindelekileyo kunjengokufudukela kwindlu engenanto. Akukho zimpawu zabuntu. Kodwa ukuba uwenza ube yile nto uyifunayo, umsebenzi wakho unokubangela umdla ongakumbi. Akukho bantu babini “abanokuhombisa” umsebenzi ngendlela efanayo. Enye iweyitala inokucengceleza iiodolo zabathengi abathe rhoqo. Enye ngokukhethekileyo inokuba nobubele ize ibonakalise intlonipho. Zombini ziyawunandipha umsebenzi wazo kuba zinendlela yazo yokwenza loo msebenzi.

Qhubeka Ufunda

Enye indlela yokufumana uvuyo emsebenzini kukufunda. Incwadi ethi Tension Turnaround icacisa ukuba njengokuba sikhula, amandla engqondo yethu ayongezeleleka ukuze yamkele inkcazelo. Oku kubonisa isizathu sokuba izinto ebezisivuyisa kwixesha elidluleyo zisenokusikruqula ngoku. Isicombululo kukwanelisa ulangazelelo lwengqondo lokufumana inkcazelo entsha ngokufunda izinto ezintsha.

Ukufunda okungakumbi ngomsebenzi wakho kusenokukhokelela ekubeni unikwe umsebenzi onomtsalane ngakumbi ekuhambeni kwexesha. Kodwa nokuba oku akwenzeki, inkqubo yokufunda ngokwayo iya kwenza umsebenzi wakho ube ngobangela umdla nowanelisayo. Umbhali uCharles Cameron noSuzanne Elusorr baveza le ngongoma: “Ukufunda akwandisi ukuzimisela kwakho nje kuphela ngokwandisa ubuchule bakho, kukwachaphazela nesimo sengqondo sakho ngobomi: ukuba iingxaki zinokuconjululwa, ubunzima bunokoyiswa, uloyiko lunokuncitshiswa, kwaye zininzi izinto onokuzenza kunokuba ubucinga.”

Usenokukhaba ngawo omane usithi: ‘Kodwa ndafunda ngako konke endimele ndikwazi ngomsebenzi wam kudala kakhulu!’ Kuloo meko, ngaba unokufunda izinto ezingenanto yakwenza ngokungqalileyo nomsebenzi wakho? Ngokomzekelo, unokugqiba kwelokuba ufunde okungakumbi ngendlela yokuqhubana nabantu okanye ngezixhobo ozisebenzisayo. Mhlawumbi unokufunda indlela onokuzibhala ngayo iingongoma zaseofisini okanye indlela entle yokuqhuba intlanganiso. Unokufunda ngezona ndlela zisebenzayo zokuqhubana nabo baphetheyo.

Unokuzifunda njani ezi zinto? Kusenokwenzeka ukuba inkampani osebenza kuyo inikela uludwe lwezifundo ekunokwenzeka ukuba unamathuba okuwaxhakamfula loo malungelo. Okanye umzi wogcino zincwadi usenokuba neencwadi kanye ozifunayo. Kodwa musa ukuyidela imithombo eqhelekileyo yenkcazelo. Ukubukela abantu emsebenzini uze uphawule izinto abazenza kakuhle nezo babuthathaka kuzo kusenokuba sisifundo. Unokufunda kwiimpazamo zakho, yaye unokufunda nakwimpumelelo yakho, ngokuhlolisisa oko ukwenze kakuhle. Oko ukufunda kumava akho noko ukuphawule kwabanye kunokukufundisa oko ubungenakukufunda ezincwadini okanye ukuve eklasini.

Amanye Amacebiso Okugqibela

Kukho enye indlela onokuwujonga ngayo umsebenzi wakho. Usenokugqiba kwelokuba ufanelwe kokungakumbi—ukuba abanye bafumana onke amathuba angakumbi yaye wena akuzange ulifumane ithuba lokwenza umsebenzi ofuna ukuwenza ngokwenene. Unokuthetha wophele nabanye abavumelana nawe, yaye unokuqiniseka ukuba konke oku kuyinyaniso.

Kodwa oko kusenokwenzeka ukuba akuyonyaniso. Abantu abaninzi abawunandiphayo umsebenzi wabo baye bafunda ukwenjenjalo. Umntu okunandiphayo ukuyila izindlu usenokukunandipha kwanokuqhuba uduladula. Ngoba? Ngenxa yokuba indlela abujonga ngayo ubugcisa bakhe bokuhombisa emsebenzini imnika uvuyo nolwaneliseko.

Ngoko yisuse ingcinga ephosakeleyo eyenza iveki yomsebenzi ibe yedakumbisayo ngokwahlukileyo kwimpela-veki. Musa ukuchitha ixesha ucinga ngeempazamo zakho zangaphambili, ucinga ngento ephosakeleyo eza kwenzeka yaye uzikhathaza ngoko abanye bakucingayo ngawe. Jonga umsebenzi ophambi kwakho. Nikela ingqalelo epheleleyo kuwo. Zama ukuqondela kuwo njengokuba usenza kumsetyenzana wokuzonwabisa owuthandayo. Yenza owona mgudu mkhulu, uze ufumane uvuyo kumsebenzi owenziwe kakuhle.

[Ibhokisi/Umfanekiso okwiphepha 11]

Musa Ukungawukhathaleli Umsebenzi Wakho

IBhayibhile kwiMizekeliso 27:23, 24 ithi: “Khuthalela ukubazi ubume bempahla yakho emfutshane, yibhekise intliziyo yakho emihlambini yakho. Ngokuba ayingonaphakade ingqwebo; nesithsaba [asiyi kuba kuzo zonke izizukulwana, NW].”

Kuthetha ntoni oku? Kuthetha ukuba ubutyebi (ingqwebo) kwanesigxina esibalulekileyo (isithsaba), ukuba siyafumaneka, ngokufuthi zizinto zokwexeshana. Ngoko ke, umalusi kumaxesha okubhalwa kweBhayibhile wayebonakalisa ubulumko xa wayenikela ingqalelo enyanisekileyo xa enyamekela izimvu zakhe, ‘ebhekise intliziyo yakhe emihlambini yakhe.’ Njengoko iindinyana ezintathu ezilandelayo zibonisa, umphumo uya kuba lunqabiseko lwezinto eziphathekayo kulowo usebenzayo nakwintsapho yakhe.—IMizekeliso 27:25-27.

Kuthekani namhlanje? Ngokufuthi abantu bajolisa iintliziyo zabo ekufumaneni imali eninzi okanye isigxina esibalulekileyo, nto leyo ebanika ithemba lokuba baya kukwazi ukushiya umsebenzi abawenzayo ngoku. Abanye banosukelo olusengqiqweni; abanye bayaphupha nje. Enoba imeko injani na asibobulumko ukuwujongela phantsi okanye ukungawukhathaleli umsebenzi okuwo wengqesho. Ungowona, yaye usenokuqhubeka ungowona mthombo uxhomekeke kuwo ngomvuzo. Kububulumko kakhulu ukuba umntu ubhekisa intliziyo yakhe “emihlambini” yakhe, enikela ingqalelo epheleleyo kumsebenzi axhomekeke kuwo. Kusenokwenzeka ukuba ukwenjenjalo kwakhe kuya kuphumela kunqabiseko lwezinto eziphathekayo ngoku nakwixesha elizayo.