Amanzi Nempilo Yakho

“AKUNAKULINDELA ukuba ude unxanwe ukuze uqonde ukuba umzimba wakho ufuna amanzi,” latsho njalo iphephancwadi iHealth. Sekunjalo, ukusela amanzi amaninzi kubalulekile kwimpilo-ntle yethu yasemzimbeni nengokweemvakalelo, kwanakwinkangeleko yethu. Ngokuqhubekayo imizimba yethu iphulukana namanzi xa sibila, silila, sichama kwanaxa siphefumla. La manzi siphulukene nawo amele abuyiselwe. Kufuneka abe ngakanani? Abaphengululi abaninzi bacebisa ukuba sisele ubuncinane iiglasi ezisibhozo zamanzi—iilitha ezimbini—imihla ngemihla.

Ngoba? Amanzi abalulekile ekuhambiseni izondlo kwanasekugutyuleni ubumdaka emizimbeni yethu. Ayafuneka ekulungelelaniseni iqondo lethu lobushushu kwanokugcina amalungu ethu enolwelo. Iphephancwadi iHealth lithi: “Kwanaxa eshokoxeke nje kancinane anokukubangela ukuba udinwe . . . okanye ugule. Ngokuqhelekileyo ukuphelelwa ngamanzi emzimbeni ngomnye unobangela wokudinwa ongasiwa so kangako ngabantu.” Eli phephancwadi licebisa ngelithi: “Ungaqhathwa kukuba ikofu neti zilulwelo, iziselo ezine-caffeine kwanotywala; ngokwenene zinegalelo ekupheleni kwamanzi emzimbeni.” Icaffeine notywala zandisa umchamo yaye zibangela umzimba uphulukane namanzi.

Ngokuphathelele inkangeleko, “Ulusu lwakho lufuna amanzi ukuze luhlale luthambile yaye lugudile.” Ekuncedisaneni noku, izithambisi-lusu nazo zisenokusetyenziswa kulusu. Kodwa azongezeleli ukufuma. Kunoko, zishiya umaleko okhuselayo onceda ukugcina ukufuma okusele kukho kulusu. Ukugcina oku kufuma kubaluleke ngakumbi njengoko sikhula, ekubeni ulusu lwethu luphulukana namandla okugcina amanzi njengoko sikhula.

Okulusizi kukuba, kwiindawo ezininzi zehlabathi, kufuneka umgudu ongakumbi ukuze kufunyanwe amanzi awaneleyo, acwengileyo nacocekileyo. Kodwa oku akuyonkcitha xesha. Kangangoko unako, sela amanzi amaninzi, uze usebenzise le ndlela ilula ukuze ukhangeleke yaye ube mhle!