Iindlela Ezintlanu Zokuphucula Umgangatho Wobomi Bakho
NGUMBHALELI KAVUKANI! ECENTRAL AFRICAN REPUBLIC
UKUNYUKA kwamaxabiso ezinto, ukugula, ukungondleki, ubuhlwempu—ezi ngxaki zandile kumazwe asakhasayo. Yaye akukho sicombululo sikhawulezileyo sibonakalayo, ubuncinane ngokwembono yomntu. Ukuba uhlala kwilizwe elisakhasayo, ngaba ikho into onokuyenza ukuphucula umgangatho wobomi bakho? Ewe, ikho! La macebiso alandelayo mahlanu unokuwafumanisa eluncedo yaye esebenza.
Okoku-1: Tyala Isitiya
IBhayibhile kwiMizekeliso 28:19 ithi: “Owusebenzayo umhlaba wakhe uya kuhlutha sisonka.” Eneneni, kusenokukumangalisa ukubona oko unokukuvelisa kwisiqwenga nje esincinane somhlaba. Kwincwadi yakhe ethi Le jardin potager sous les tropiques (Isitiya Semifuno Kweleenjiko), umbhali uHenk Waayenberg uthi isiqwenga somhlaba esimalunga neeskwemitha ezingama-50 ukusa kwezili-100 sisenokuvelisa imifuno eyaneleyo enokondla intsapho enabantu abathandathu!
Kutheni uchitha imali kwizinto onokuzilima ngokwakho? Ngokuxhomekeke emhlabeni nakwimozulu, kusenokwenzeka ukuba unokulima izinto ezinjengeokra, ipepile, isipinishi, ipasli, ilemongrass, amatswele aluhlaza, icassava, amathanga, iibhatata, ummoba, iitumato, iikomkomere, umbona kanye ecaleni kwendlu yakho. Ubuncinane, isitiya esinjalo sisenokongezelela kukutya kwentsapho yakho, yaye usenokuvelisa okuninzi kakhulu ukuze ukwazi nokuthengisa.
Ukuba unomhlaba owaneleyo, kwakhona usenokucinga ngokulima imithi yeziqhamo ezahlukahlukeneyo. Kwezinye iimeko, umthi nje omnye unokuvelisa iziqhamo ezingaphezulu kunoko wena nentsapho yakho ninokuzitya. Ukufunda ukusebenzisa umgquba—indlela yokusebenzisa kwakhona izinto ezibolileyo njengesichumiso—kuya kukunceda uphucule imveliso yokutya kwakho. Imithi inokwenza okungakumbi kunokuvelisa ukutya kwanengeniso engakumbi yentsapho yakho. Imithi elinywe kwindawo efanelekileyo kwakhona isenokwenza umthunzi, icoce umoya, ize ibangele indawo yakho ibe ntle ize ibukeke ngakumbi.
Ngoko, kuthekani ukuba akunalwazi lungako ngokulima? Ngaba unabahlobo, abamelwane, okanye abantu obaziyo abanamava kulo mba? Ngoko kutheni ungabaceli bakuncede okanye bakucebise? Kusenokwenzeka ukuba unokukwazi ukuthenga okanye uboleke iincwadi zokulima.—Bona inqaku elithi “Kutheni Ungalimi Isitiya?” kwinkupho kaVukani! kaNovemba 8, 1974.
Okwesi-2: Thenga Ngokwezixa Ezikhulu
Ngaba uthenga amathsuphelele okutya okuqhelekileyo okunjengomgubo, irayisi, kwaneoli? Ukuba kunjalo, kusenokwenzeka ukuba uchitha imali yakho eninzi. Kunoko, ukuba kunokwenzeka, zama ukuthenga ukutya okunjalo ngokwezixa ezikhulu, wabelane ngeendleko neentsapho ezimbini, ezintathu okanye ezingakumbi. Kwakhona ukuthenga ngokwezixa ezikhulu kusenokukongela imali xa iziqhamo okanye imifuno ethile ifumaneka kwixesha lonyaka. Kwezinye iimeko, usenokukwazi nokuthenga izinto ukuze ukwazi ukuzithengisa kwakhona.
Okwesi-3: Funda Ubuchule Bokulondolozwa Kokutya
Ukuthenga ngokwezixa ezikhulu kuphakamisa umbuzo ngendlela ezinokulondolozwa ngayo izinto ezibolayo. Ukuqwayita ukutya yenye indlela exhaphakileyo nesebenzayo. Uninzi lwamabhinqa eAfrika luphila ngokuqwayita iziqhamo, iokra, iimbotyi, usenza, iintanga, kwanezinongo. Ukuqwayita akufuni zixhobo zikhethekileyo. Usenokuyibeka loo nto kwindawo ecocekileyo okanye uyixhome, mhlawumbi uyigqume ngelaphu elicekethekileyo ukuze ingafunyanwa ziimpukane. Umoya nelanga nazo ziya kukunceda.—Bona inqaku elithi “Ngaba Unokuqhubeka Ngezinto Ezincinane?” kwinkupho kaVukani! (wesiNgesi) ka-Agasti 8, 1975.
Okwesi-4: Zama Ukufuya
Ngaba ungakwazi ukufuya iinkuku, iibhokhwe, amahobe, okanye ezinye izilwanyana? Kwiindawo ezininzi inyama iye yaba yinto ebiza imali eninzi. Kodwa ngoncedo lwabanye, unokufunda ukufuya umhlambi omncinane wezilwanyana. Ngaba uyayithanda intlanzi? Ngoko, usenokuzama ukufunda ngendlela yokwenza ichibi elincinane leentlanzi. Inyama, amaqanda, kwanentlanzi zineiron, icalcium, iivithamini, izimbiwa, neeprotini—nto ezo zibalulekileyo kwimpilo yentsapho yakho.
Okwesi-5: Makucoceke
Ucoceko nalo lubalulekile kwimpilo yentsapho yakho. Ubumdaka bubiza amabuzi, iimpukane, kwanamaphela—zinto ezo ezingunobangela wako konke ukugula. Ukucoca kuya kukutyela ixesha yaye kukusebenzise. Kodwa ukucoca kubiza kancinane kuneendleko zamayeza namatyala kagqirha. Imilinganiselo yococeko yabantu neyamazwe ayifani. Noko ke, kukho imigaqo embalwa eqhelekileyo esebenza kuyo yonke indawo.
Ngokomzekelo, khawucinge ngezindlu zangasese. Emaphandleni ngokuqhelekileyo ziyekwa zimdaka yaye zingamabhodlo yaye ziba ngunobangela omkhulu wokugula nezifo. Abasebenzi bezempilo basekuhlaleni basenokukwazi ukukunika imiyalelo yendlela yokwakha indlu yangasese ngexabiso nje eliphantsi.
Kuthekani ngekhaya lakho? Ngaba licocekile yaye liyanyanyekelwa? Ngaba libeth’ umoya? Kuthekani ke ngekhitshi lakho? Ngaba liqoqoshiwe yaye licocekile? Ukutya kumele kucoceke yaye kuphekwe kakuhle ukuze kunike impilo. Iintsholongwane zininzi kumanzi amdaka. Ngoko wahluze okanye uwabilise amanzi ngaphambi kokuba uwasebenzise. Ziyalaze izinto zokutya ngamanzi abilayo, uze uzihlambisise izandla zakho ngaphambi kokuphatha ukutya. Wagcine amanzi kwiiemela ezicocekileyo nezivalwayo.
Izinja, iikati, iinkuku, kwaneebhokhwe azifanele zivunyelwe ukuba zidakase ekhitshini—ukuba ufuna ukugcina kucocekile. Amabuzi neempuku azifanele zivunyelwe ukuba zihambe phezu kweembiza neepani, zingcolisa ukutya kwakho. Isigu sokubamba iimpuku esiqhelekileyo sisenokuyiphelisa le ngxaki.—Bona inqaku elithi “Ukuhlangabezana Nocelomngeni Lococeko,” kwinkupho kaVukani! kaOktobha 8, 1988.
Ekugqibeleni, buBukumkani bukaThixo kuphela obuya kuzicombulula ngokupheleleyo zonke iingxaki zoluntu. (Mateyu 6:9, 10) Noko ke, okwangoku, la macebiso alula asenokukunceda ukuba uphucule umgangatho wobomi bakho.
[Imifanekiso ekwiphepha 18]
Tyala isitiya
[Imifanekiso ekwiphepha 19]
Thenga ngokwezixa ezikhulu
[Imifanekiso ekwiphepha 19]
Funda ubuchule bokulondolozwa kokutya
[Imifanekiso ekwiphepha 20]
Zama ukufuya
[Imifanekiso ekwiphepha 20]
Makucoceke