Oko Kunokwenziwa Zizibhengezo
PHAMBILI phayaa, bekudla ngokuthiwa xa kutshayelelwa isibhengezo sikamabonwakude, “E-e ngoku, siza kukhe siphos’ iintambo kubaxhasi bethu bakhe baphose nokuba mabini mathathu.” Aba baxhasi ke ziinkampani ezikhupha imali ukuze kubhengezwe izinto zazo. Nangona “kungasaphoswa amabini namamathathu” kuthethwa into engangengca, abaxhasi basaqhubeka bekhuph’ imali bexhasa iindaba neenkqubo zokuzonwabisa—umabonwakude, amaphephancwadi, amaphephandaba nonomathotholo. Loo nto ibangela ukuba, abaxhasi ibe ngabo abakhomb’ iminwe kumaziko eendaba besithi makuboniswe le kuyekwe leya.
Ngokomzekelo: Ngowe-1993 enye inkampani evelisa omnye woobaqa beenqwelo-mafutha zaseJamani yabhalela kumaphephancwadi angama-30 ikhuph’ umgqala wokuba izibhengezo zenqwelo-mafutha yayo zifanele zifakwe “kuphela kwindawo eza kubonakala kakuhle.” Le leta yathi iinkupho zamaphephancwadi ezinezibhengezo zayo zifanele zichwethel’ ecaleni nantoni na eza kugxibha le nqwelo-mafutha yayo, ithethe kakubi ngezinto zaseJamani, okanye ngeJamani ngokwayo. Kakade ke, inkampani ekwaziyo ukuxhasa izibhengezo ezikumaphephancwadi ngee-R74,6 zezigidi ikufanele ngokwenene ukuba izibhengezo zayo zifakwe “kuphela kwindawo eza kubonakala kakuhle.”
Kwakhona akubi ngomnqa xa amaphephancwadi abhengeza iilokhwe ezintsha zomtshato engazamkeli izibhengezo zeelokhwe zomtshato ezisele zisetyenzisiwe okanye xa amaphephandaba adwelisa iinkampani ezithengisa izindlu nemihlaba engakubonisi indlela yokuthenga indlu ungenayo. Ngokufanayo ke, akufanele kube ngumnqa ukuba ijelo leendaba elibhengeza imidiza okanye ilottery lingakuhlab’ amadlala ukutshaya okanye ukungcakaza.
Indlela Abayiyo Abathengi
Ngoko ke, ukubhengeza akupheleli nje ekuthengiseni izinto. Kunento okuyenzayo kwindlela abaphila ngayo abathengi, indlela nje yokuphila esehlabathini lonke nesekelwe ekuthandeni izinto eziphathekayo.
Yintoni ephosakeleyo kuloo nto? Kuyaxhomekeka ukuba uwubuza kubani loo mbuzo. Ababhengezi baqiqa ngelokuba abantu bayathanda ukuthenga nokuba nezinto, ngoko ukubhengeza kuzalisekisa iminqweno yabo. Ngaphezu koko bathi, ukubhengeza kuvelisa imisebenzi, kuxhasa ngemali ezemidlalo nemisebenzi yobugcisa, kunceda ekuveliseni ijelo leendaba elinokufikelelwa ngumntu wonke, kukhuthaza ukhuphiswano, kuphucula izinto ezithengwayo, kugcina amaxabiso ephantsi kuze kuncede abantu bazazi kakuhle izinto abazithengayo.
Abanye bema ngelithi ukubhengeza kwenza abantu bangazinzi baze banganeliseki zizinto abanazo, bafune yonke into le. Kaloku eny’ inqeberhu engumphandi uAlan Durning ithi xa ibhala: “Izibhengezo zeli xesha lethu, zitshintsha ngokukhawuleza, zikhuthaza ukuziyolisa, zizele ziindlela abantu abaphila ngazo yaye ziphenjelelwa zifashoni eziphambili ngelo xesha; zidumisa abantu abathile, zikhuthaza ukusetyenziswa kakubi kwemveliso ukuze umntu aziyolise, zincomela inkqubela kwezenzululwazi nezobugcisa njengendlela eyenza umntu abe namathamsanqa ebomini.”
Indlela Okunokukuchaphazela Ngayo
Ngaba izibhengezo zentengiso ziluncedo ekutshintsheni ubuntu bethu nezinto esizinqwenelayo? Mhlawumbi kunjalo. Kodwa ke, umkhamo okusichaphazela ngawo uxhomekeke nakwezinye izinto.
Ukuba sikhokelwa yimigaqo nemilinganiselo yeBhayibhile, siyazi kakuhle into yokuba akukho nto iphosakeleyo ekubeni nezinto eziphathekayo. Ngapha koko, uThixo wasikelela uAbraham, uYobhi, uSolomon nabanye, ngobutyebi obuninzi.
Kwelinye icala, ukuba sisebenzisa imigaqo yeZibhalo, siya kukuphepha ukunganeliseki njengabo bazama ukuziyolisa nokonwaba nabangayekiyo ukuleqeka emva kwezinto eziphathekayo. IBhayibhile ayikhuthazi ukuba “Sithenge sishiye esingayibonanga.” Kunoko, isixelela oku:
Thembela kuThixo. “Nika imiyalelo kwabo bazizityebi kwinkqubo yezinto yangoku ukuba bangabi ngabangqondo ziphakamileyo, yaye babeke ithemba labo, kungekhona kubutyebi obungaqinisekanga, kodwa kuThixo, osinika zonke izinto ngokobutyebi ukuze siyoliswe.”—1 Timoti 6:17.
Yaneliseka. “Kuba asingenanga nanto ehlabathini, kwaye asinakuphuma nanto. Ngoko, sinesixhaso nesambatho, siya kwaneliswa zezi zinto.”—1 Timoti 6:7, 8.
Yiba ngothozamileyo. “Ndinqwenela ukuba abafazi bazihombise ngesinxibo esilungiswe kakuhle, ngokuthozama nangengqondo ephilileyo, kungekhona ngezimbo zokulukwa kweenwele negolide okanye iiperile okanye isambatho seendleko ezinkulu, kodwa ngendlela efanele abafazi abazibanga behlonela uThixo, oko kukuthi, ngemisebenzi elungileyo.”—1 Timoti 2:9, 10.
Yazi ukuba ubulumko bukaThixo bungaphezu kobutyebi. “Hayi uyolo lomntu ofumene ubulumko, lomntu ozuze ingqondo! Kuba lulungile urhwebo lwabo ngaphezu korhwebo lwesilivere, nongeniselo lwabo ngaphezu kwegolide embiweyo. Bunqabile bona ngaphezu kwekorale. Nezinto zakho zonke ezinqwenelekayo azilingani nabo. Imihla emide isesandleni sabo sokunene, kwesokhohlo sabo bubutyebi nozuko. Iindlela zabo ziindlela ezimnandi, wonke umendo wabo uluxolo. Bungumthi wobomi kwababambelela kubo, unoyolo obubambayo.”—IMizekeliso 3:13-18.
Yipha. “Kunoyolo ngakumbi ukupha kunokwamkela.”—IZenzo 20:35.
Omnye umntu usenokuthi sisibhengezo kwale yolu ngcelele lwamanqaku kuba “ludlulisela” ingcamango yokuba izinto zokomoya azifanele zityhalelwe bucala zizinto eziphathekayo. Asiyithandabuzi into yokuba ubuya kuvumela phezulu xa kuthethwa ngolo hlobo.
[Ibhokisi ekwiphepha 27]
Ukubhengeza UBukumkani BukaThixo
Yiyiphi enye yezona ndlela ziphumelelayo zokufikelela abantu ngesigidimi esiguqulayo? Incwadi ethi Advertising: Principles and Practice ithi: “Kwihlabathi eligqibeleleyo umvelisi ngamnye uya kukwazi ukuthetha nomthengi wakhe aza kumthengisela izinto okanye aza kumnika inkonzo ethile ehlawulelwayo.” AmaKristu okwenyaniso ebesoloko evakalisa uBukumkani bukaThixo ngokuzithandela ngolu hlobo kangangeminyaka emalunga nama-2 000. (Mateyu 24:14; IZenzo 20:20) Kutheni amashishini amaninzi engasebenzisi le ndlela yokufikelela abantu? Le ncwadi ithi: “Kuxabisa imali eninzi gqitha. Amatyelelo awenziwa ngabantu abathengisayo anokuthi kratya kwii-$150 [R745] lulunye.” Kakade ke, amaKristu “abhengeza” uBukumkani bukaThixo ngokuzithandela. Kuyinxalenye yonqulo lwawo.
[Imifanekiso ekwiphepha 26]
IBhayibhile ayikhuthazi ukuba “Sithenge sishiye esingayibonanga”