Abantu Abaselula Bayabuza . . .

Kutheni Ndimele Ndiphile Ngaphandle Kwabazali Bam?

“Babunjani ubomi ngaphandle kwabazali bam? Ndingatsho ukuba babulusizi ngenxa yezizathu ezininzi. Kunzima kakhulu ukukhula ngaphandle kothando lwabazali bakho.”—UJoaquín.

“Olona celomngeni endandijamelene nalo kuxa abazali babefanele beze esikolweni batyobele ingxelo yesikolo. Ndandiziva ndilusizi yaye ndililolo. Ndisaziva ngendlela efanayo ngamanye amaxesha.”—UAbelina oneminyaka eli-16 ubudala.

LISHWANGUSHA lemihla esiphila kuyo—izigidi zabantu abaselula zikhula ngaphandle kwabazali. KwiMpuma Yurophu amawaka aye aziinkedama ngenxa yemfazwe. EAfrika uGawulayo uye wabangela imbuqe efanayo. Abanye abantwana basuke nje balahlwa ngabazali babo. Iintsapho ziye zohlukana ngenxa yemfazwe okanye intlekele yokwemvelo.

Iimeko ezinjengezi zaziqhelekile nakumaxesha okubhalwa kweBhayibhile. Ngokomzekelo, iinkedama zikhankanywa ngokuphindaphindiweyo eZibhalweni. (INdumiso 94:6; Malaki 3:5) Iimfazwe nezinye iimeko ezilusizi zazikwazahlukanisa iintsapho ngelo xesha. Ngoko iBhayibhile ithetha ngentombazana eselula eyohluthwa kubazali bayo xa yathatyathwa ngamatutu angama-Aram.—2 Kumkani 5:2.

Mhlawumbi ungomnye wezigidi zolutsha ngokufanayo oluzifumanisa lungenabazali. Ukuba kunjalo, uyayazi indlela enokunxunguphalisa ngayo imeko enjalo. Kutheni oku kufanele kwenzeke kuwe?

Asilotyala Lakho

Ngaba ukhe uzifumanise ungaqinisekanga enoba uThixo ngandlel’ ithile uyakohlwaya? Okanye mhlawumbi uziva uligqabi ngumsindo ngabazali bakho ngenxa yokufa—ngokungathi benze ngabom. Okokuqala, qiniseka ukuba akumcaphukisanga uThixo ngenxa yoko. Yaye abazali bakho abenzanga ngabom ukuba bakushiye. Ukufa lishwangusha loluntu olungafezekanga, yaye maxa wambi kusuba abazali ngoxa abantwana besebancinane. (Roma 5:12; 6:23) Kuyabonakala ukuba, noYesu Kristu wafelwa nguyise awayemthanda nowayemkhulisa, uYosefu.a Ngokuqinisekileyo oku akuzange kwenzeke ngenxa yesono esithile uYesu awayesenzile.

Kwakhona, khumbula ukuba siphila ‘kumaxesha amanqam ekunzima ukuqhubana nawo.’ (2 Timoti 3:1-5) Ugonyamelo, imfazwe nolwaphulo-mthetho lungakhethi luye lwabulala izigidi zabantu kule nkulungwane. Abanye baye bangamaxhoba ‘exesha nesihlo,’ esifikela wonke ubani. (INtshumayeli 9:11) Enoba kungabuhlungu kangakanani na ukufa kwabazali bakho, bekungelotyala lakho. Kunokuzisola okanye ube buhlungu ngokugqith’ emngceni, isithembiso sikaThixo sovuko masibe yintuthuzelo kuwe.b UYesu waxela kwangaphambili esithi: “Musani ukumangaliswa koku, ngenxa yokuba liyeza ilixa ekuya kuthi ngalo bonke abo bakumangcwaba enkumbulo balive ilizwi lakhe baze baphume.” (Yohane 5:28, 29) UAbelina, okhankanywe ngaphambilana, uthi: “Kundincede kakhulu ukuba nothando ngoYehova nethemba lovuko.”

Noko ke, kuthekani ukuba abazali bakho basaphila kodwa bakulahlile? UThixo ufuna ukuba abazali babakhulise baze babanyamekele abantwana babo. (Efese 6:4; 1 Timoti 5:8) Noko ke, okubuhlungu kukuba abanye abazali baye abawubonisa “umsa wemvelo” kwinzala yabo. (2 Timoti 3:3) Kwabanye, ukulahlwa kubangela ubuhlwempu obugqithiseleyo, ukukhotyokiswa ziziyobisi, ukuvalelwa entolongweni okanye ukukhotyokiswa butywala. Liyinyaniso elokuba, kukwakho nabazali abalahla abantwana babo ngenxa nje yokuzingca. Enoba siyintoni na isizathu, kuyanxunguphalisa ukwahlukana nabazali bakabani. Kodwa oku akuthethi ukuba kukho into ephosakeleyo ngawe okanye ufanele uzithuthumbise ngokuzibek’ ityala. Eneneni, ngabazali bakho abafanele baziphendulele kuThixo ngendlela obuphethwe ngayo. (Roma 14:12) Kakade ke, ukuba abazali bakho baye banyanzeleka ukuba bahlukane nawe ngenxa yeemeko abangenakuzilawula, njengentlekele yokwemvelo okanye ukugula, ngoko akukho namnye obekek’ ityala! Lisoloko likho ithemba lokuphinda nimanyane kwakhona, kwanokuba ngamanye amaxesha elo themba libonakala lilincinane.—Thelekisa iGenesis 46:29-31.

Amava Abuhlungu

Okwangoku, usenokujamelana neengxaki ezinzulu eziliqela. Uhlolisiso olwenziwe yiUnited Nations Children’s Fund, olubizwa ngokuba yiChildren in War, lutyhila oku: “Abantwana abangenabazali ngabona bantwana abasengozini—abo . . . bajamelana neyona miqobo inzima ukuze baphile, abafumani nkxaso ekukhuleni kwaye bayaxhatshazwa. Ukwahlukana nabazali kusenokuba yeyona lahleko emntwaneni.” Mhlawumbi uzifumanisa usilwa neemvakalelo zokudandatheka nezonxunguphalo.

Khumbula uJoaquín, okhankanywe ngaphambilana. Abazali bakhe bahlukana baza bamlahla yena nabantakwabo. Wayenonyaka kuphela ubudala ngelo xesha waza wakhuliswa ngoodade wabo abadadlana. Ucacisa esithi: “Ndandisoloko ndibuza isizathu sokungabi nabazali njengokuba abahlobo bam babenabo. Yaye xa ndandibona ubawo edlala nonyana wakhe, ndandinqwena ukunga angangowam.”

Ukufumana Uncedo

Enoba kunganzima kangakanani na ukukhula ngaphandle kwabazali, oku akuthethi ukuthi ukatyile. Ngoncedo nangenkxaso, usenokungaqhubeki nje nobomi kodwa usenokuphumelela. Kusenokuba nzima ukuba ukukholelwe oku, ingakumbi ukuba ulusizi gqitha yaye usentlungwini. Noko ke, qonda ukuba iimvakalelo ezinjalo ziqhelekile yaye aziyi kukungcungcuthekisa ngonaphakade. KwiNtshumayeli 7:2, 3, sifunda oku: “Kulungile ukuya endlwini yesijwili kunokuya endlwini yemigidi . . . Kulungile ukuba nosizi ngaphezu kokuhleka; ngokuba intliziyo iyalunga bububi bobuso.” Ewe, kuyinto eqhelekileyo yaye kusempilweni ukukhala nokuba sentlungwini xa kukho into ebuhlungu eyenzekileyo. Kwakhona usenokukufumanisa kuluncedo ukuzityand’ igila kumhlobo oqondayo okanye kwilungu eliqolileyo ebandleni uze uthethe ngento ekutyayo ngaphakathi.

Liyinyaniso elokuba, usenokulingeka ekubeni yinkom’ edla yodwa. Kodwa IMizekeliso 18:1 ilumkisa ngelithi: “Ozahlulayo ufuna umnqweno wakhe; into yonke ezimasayo uyayivungamela.” Kungabhetele ukufuna uncedo lomntu onobubele noqondayo. IMizekeliso 12:25 ithi: “Isithukuthezi esisentliziyweni yendoda siyenza igobe; liyayivuyisa ilizwi elihle.” Unokulifumana elo “lizwi elihle” ukuba uxelela othile ‘ngesithukuthezi esisentliziyweni’ yakho.

Unokuthetha nabani? Funa inkxaso phakathi kwebandla lamaKristu. UYesu uthembisa ukuba unokufumana ‘abantakwenu noodade noomama’ abaya kukuthanda nabaya kuba nenyameko ngawe. (Marko 10:30) UJoaquín ukhumbula oku: “Ukunxulumana nabazalwana abangamaKristu kwandenza ndabubona ngokwahlukileyo ubomi. Ukuya rhoqo ezintlanganisweni kwandikhokelela ekuthandeni uYehova ngakumbi nokufuna ukumkhonza. Abazalwana abaqolileyo banikela uncedo nesiluleko sokomoya entsatsheni yasekhaya. Namhlanje, abanye babantakwethu bangabalungiseleli bexesha elizeleyo.”

Kwakhona, khumbula ukuba uYehova ‘unguyise weenkedama.’ (INdumiso 68:5, 6) Emva phayaa kumaxesha okubhalwa kweBhayibhile, uThixo wakhuthaza abantu bakhe ukuba babonakalise inceba nokusesikweni kwiinkedama. (Duteronomi 24:19; IMizekeliso 23:10, 11) Yaye usenenkxalabo efanayo namhlanje ngolutsha olungenabazali. Ngoko yiya kuThixo ngomthandazo, uqinisekile ukuba uyakukhathalela yaye uya kukuphendula. UKumkani uDavide wabhala: “Ngokuba ubawo noma bandishiyile, wesuka uYehova wandichola. Thembela kuYehova; yomelela, ikhaliphe intliziyo yakho.”—INdumiso 27:10, 14.

Nokuba kunjalo, oselula ongenabazali ujamelana nocelomngeni lwemihla ngemihla. Uza kuhlala phi? Uza kuthini ngemeko yezoqoqosho? Inqaku elilandelayo liza kuxubusha ngendlela yokulusingatha ngokuphumelelayo olu celomngeni.

[Imibhalo esemazantsi]

[Amagama acatshulweyo akwiphepha 19]

“Kundincede kakhulu ukuba nothando ngoYehova nethemba lovuko”

[Umfanekiso okwiphepha 19]

Maxa wambi usenokuziva ulilolo kakhulu

[Imifanekiso ekwiphepha 20]

Ebandleni kukho abahlobo abanokukunceda baze bakukhuthaze