Lutsha—Abazali Benu Bayachaphazeleka Zizinto Enizenzayo
UMPOSTILE uYohane owalupheleyo wabhala wenjenje: “Andinaluvuyo lungaphezu kolu lokuba ndive ukuba abantwana bam bahamba enyanisweni.” (3 Yohane 4) Nangona abantwana ekuthethwa ngabo kule ndinyana yeBhayibhile ingabafundi abangamaKristu, umzali owoyika uThixo uyiqonda kakuhle indlela awayevakalelwa ngayo uYohane. Kanye njengokuba abazali benegalelo elihle kwimpilo-ntle yabantwana babo, nendlela abaphila ngayo abantwana iyabachaphazela abazali babo.
UKumkani uSolomon wakwaSirayeli waphawula indlela abanokuchatshazelwa ngokunzulu ngayo abazali zizinto ezenziwa ngabantwana babo. Wabhala wenjenje: “Unyana olumkileyo umenza abe nemihlali uyise, unyana osisiyatha uyintlungu kanina.” (IMizekeliso 10:1) Ngoko ke, bonke abantwana—kwanabo sele bekhulile—bamele bacingisise ngendlela izinto abazenzayo eziya kubachaphazela ngayo ooyise noonina. Kutheni kufanelekile nje oku?
Khawucinge nje ngenyameko eye yabonakaliswa ngabazali bakho aboyika uThixo xa bekukhulisa! Baqala ukuba nenkxalabo ngawe nokukuthandazela ungekazalwa nokuzalwa. Emva kokuba uzelwe, bakha ulwalamano olusenyongweni kunye nawe yaye bambulela uThixo ngelungelo elimangalisayo nembopheleleko enzulu abanayo yokukukhulisa. Bafumana imbopheleleko yokukhulisa usana oluncinane olungakwazi kuzenzela nto yaye njengabakhonzi bakaYehova, bayithabatha nzulu le mbopheleleko.
Ekubeni abazali bakho bengamaKristu okwenyaniso, bafuna ulwalathiso olunokuthenjwa eBhayibhileni nakwiincwadi ezisekelwe eBhayibhileni, baza bacela namacebiso kubantu abanabantwana abasele bekhulile. Baqhubeka bethandaza kuThixo bevakalisa inkxalabo abanayo. (ABagwebi 13:8) Njengoko wawusiya ukhula, abazali bakho bazibona iimpawu zakho ezintle kanti babezibona neempazamo zakho. (Yobhi 1:5) Xa ufikelela kwiminyaka yeshumi elivisayo kwaqalisa ezinye iingxaki. Kusenokwenzeka ukuba ngamanye amaxesha wawubonakalisa umoya wemvukelo yaye abazali bakho baqinisa ukuthandaza, bafunda ngakumbi besebenzisa namathambo engqondo ukuze babone iindlela abanokukunceda ngazo ukuze uqhubeke ukhonza uYihlo osemazulwini, uYehova.
Abazali bakho abasokuze bayeke ukuba nenkxalabo ngawe. Nasemva kokuba ukhulile baya kuhlala benenkxalabo ngempilo-ntle yakho yokwenyama, yengqondo, yeemvakalelo neyokomoya. Noko ke, abazali bakho bayayazi into yokuba unenkululeko yokuzikhethela, abanakuqiniseka ngento oya kuba yiyo. Ekugqibeleni, nguwe omele wenze isigqibo ngoko ufuna ukukwenza.
Ngoko ke, ukuba abazali ‘baba novuyo olukhulu xa besiva ukuba abantwana babo bahamba enyanisweni’ kuthetha ukuthi baba buhlungu ngendlela engathethekiyo xa abantwana babo beshiya indlela yenyaniso. Ewe, abantwana abenza izinto zobuyatha babangela intlungu engathethekiyo kubazali babo. USolomon wathi: “Unyana osisiyatha yingqumbo kuyise nobukrakra komzeleyo.” (IMizekeliso 17:25) Hayi indlela ababa buhlungu ngayo abazali xa umntwana wabo eyeka ukunqula uThixo oyinyaniso!
Ngokucacileyo, unegalelo kwimpilo-ntle yentsapho yakowenu nakwabanye abantu abangaphandle. Indlela oziphethe ngayo ibachaphazela ngokunzulu abazali bakho. Xa ulahla uThixo nemigaqo yakhe, baya kuba buhlungu kakhulu abazali bakho. Noko ke, ukuba uqhubeka uthembekile kuYehova yaye umthobela, abazali bakho baya kuvuya. Zimisele ukuvuyisa iintliziyo zabazali bakho! Sisiphi esinye isipho esixabisekileyo onokusinika abantu abakukhulisayo, abakukhuselayo nababonakalisa uthando kuwe?