Ukuphulukana Nelungu Lomzimba—Ngaba Oko Kunokwenzeka Kuwe?
UBenjamin wayehambahamba evuyela ukutshisa okumnandi kwelanga okwakufudumeze isixeko saseSarajevo xa wanyathela isiqhushumbisi. Umlenze wakhe wasekhohlo wavuthuluka. Wakhumbula oku: “Ndazama ukuphakama. Ndandingakwazi.” UBenjamin ngomnye nje wabantu abangama-20 000 nyaka ngamnye ababulawa okanye ababa ziingxwelerha ngenxa yeziqhushumbisi.
IANGOLA izele ziziqhushumbisi ezizizigidi ezili-15—ngaphezu kwesinye kwindoda, kwibhinqa nakumntwana ngamnye kwelo lizwe. Ngoku iAngola inabantu abangama-70 000 abaphulukana namalungu omzimba. Ineziqhushumbisi zayo ezizizigidi ezisibhozo ukusa kwezilishumi ezingaphantsi komhlaba, iKhambodiya inelona nani liphezulu ehlabathini labantu abaphulukana namalungu omzimba—umlinganiselo wom-1 kwabangama-236. IBosnia neHerzegovina kuthiwa zineziqhushumbisi ezingaphezu kwezigidi ezithathu—ezingama-59 kwiskwekhilomitha ngasinye.
Kodwa abantu baphulukana namalungu omzimba kungekuphela kwiindawo ezidlavulwe yimfazwe. Ngokomzekelo, kukho malunga nabantu abangama-400 000 eUnited States abaphulukana namalungu omzimba. Phakathi kwenkoliso yabantu abadala kwelo nani, iphulukana namalungu omzimba ngenxa yokugula okunzulu okubizwa ngokuba yi-“peripheral vascular disease,” okanye iPVD. Eli libinzana elibanzi elicacisa izigulo eziliqela. ITaber’s Cyclopedic Medical Dictionary ichaza ibinzana elithi iPVD ngokuthi ligama elingangqalanga elichaza “izifo ezinzulu zoonothumela noonobuyisa ezandleni nasezinyaweni, ingakumbi iimeko eziphazamisa ukungahambi kwegazi ngokwaneleyo ukuya nokubuya ezandleni nasezinyaweni.” Unobangela omkhulu wePVD sisifo seswekile. Ngokutsho kweThe World Health Report 1998, “inani labantu abadala abanesifo seswekile liya kwanda ngokuphindwe kabini ukususela kwizigidi ezili-143 ngowe-1997 ukusa kwizigidi ezingama-300 ngowe-2025 emhlabeni wonke.”
EUnited States, ukwenzakala—kuquka iingozi ezibandakanya iinqwelo-mafutha, oomatshini, izixhobo zombane, imipu—ngunobangela wesibini ophambili wokuphulukana kwabantu namalungu omzimba, nto leyo ekhokelela ekubeni abantu abangama-20 ukusa kwabangama-30 ekhulwini banqunyulwe amalungu athile omzimba. Omnye unobangela wokuphulukana namalungu omzimba uquka amathumba (malunga ne-6 ekhulwini) nokuzalwa kwabantwana beneziphako (malunga nesi-4 ekhulwini).
Noko ke kubuhlungu ukuphulukana nelungu lomzimba elixabisekileyo. Ngaba ikho indlela yokunciphisa iingozi? Yaye ukuba sele uphulukene nelungu lomzimba, unokubunandipha njani ubomi obanelisayo? Amanqaku alandelayo aza kuxubusha le mibuzo kwaneminye.