Ukutyelela Iziko Lamalungu Omzimba Angengowamvelo — IWatchtower LAYBRARI EKWI-INTANETHI

Ukutyelela Iziko Lamalungu Omzimba Angengowamvelo

NGUMBHALI KAVUKANI! ENEW ZEALAND

NDANDINEZIZATHU ezibini zokuya kwiZiko Lamalungu Omzimba Angengowamvelo laseWellington, eNew Zealand. Okokuqala, umlenze wam nawo ongengowamvelo wawufuna ukulungiswa. Okwesibini, ndandifuna ukulibona lonke eli ziko ukuze ndifunde okungakumbi ngoko kubandakanyekileyo ekwenzeni amalungu angengowamvelo.

Ingcali yala malungu iye yavuma ukundikhenkethisa eli ziko. Kuthe kanti ndiza kuzuza lukhulu kolu khenketho. Kuye kwalwandisa uxabiso lwam ngobuchule nokuzinikela kwabo benza amalungu angengowamvelo.

Wenziwa Njani Umlenze Ongengowamvelo?

Uninzi lwabantu abatyelela eli ziko ngabantu abaze kufakelwa imilenze. Elokuqala inyathelo kukufaka intlama kulo mlenze ushunquliweyo. Kwenziwa isamente phezu kwalo mlenze ushunquliweyo ukuze kwakheke indlela omile ngayo. Lo mfanekiso wenzelwa indawo oya kungena kuwo umlenze oshunquliweyo. Iqala ngolu hlobo indlela yokufumana umlenze oya kuthabathel’ indawo lowo ushunquliweyo. Indlela entsha neyona ifanelekileyo yokufakelwa umlenze owenziweyo yinkqubo ebizwa ngokuba yi-CAD/CAM elinganisa umlenze oshunquliweyo. Umatshini uyila kanye inxalenye eseleyo yomlenze oshunquliweyo.

Emva kokubukela indlela ubugcisa obusetyenziswa ngayo kweli ziko, ndiye ndaboniswa asele egqityiwe ukwenziwa kunye namalungu angengowamvelo asuka kwamanye amazwe. Enye yezona zinto zibangel’ umdla lidolo elisebenza ngehydraulic elisenokulungelelaniswa ukuze lifanele umntu olisebenzisayo. Amaphephancwadi abonisa iindidi ezininzi zala malungu afumaneka kumazwe awahlukahlukeneyo.

Kwinqanaba lokugqibela lokwenziwa komlenze ongengowamvelo, kwenziwa inguqu zokugqibela ezincinane ukuze kulungelelaniswe umngxuma ekungena kuwo umlenze oshunquliweyo, idolo, ulusu kunye namalungu onyawo, ukuze lowo ufakele umlenze ahambe ngendlela eqhelekileyo. Emva koko, kulungiselelwa isiponji esigquma lo mlenze. Oku kwenzelwe ukuze kukhuselwe “amathambo” alo mlenze ufakelweyo. Kwenziwa nje izinto ezincinane ukuze umlenze ufane kangangoko kunokwenzeka nalowo wokwemvelo.

Emva kokuba lowo ushunqulwe ilungu ezithemba ngendlela ahamba ngayo, kwenziwa amalungiselelo okudibana nengcali yamalungu afakelwayo kweli ziko. Ngaloo ndlela, kuhlolwa zonke izinto okokugqibela ukuze kuqinisekiswe ukuba eli lungu lifakelelweyo lisebenza kakuhle.

Abantwana Kunye Neembaleki Ezinamalungu Angengowamvelo

Ebudeni botyelelo kweli ziko, kukho intwazana eyathimba ingqalelo yam. Yayingekho mathidala ukubonisa ngomlenze wayo oshunquliweyo nofakelweyo. Kamva, ndayibona ixhumaxhuma ngokungathi ayisosiqhwala.

Ndandinomdla wokwazi ukuba le ngcali yamalungu yayiza kuthini ngabantwana abanelungu elingekhoyo. Yandibonisa isandla esincinane yaza yandicacisela ukuba singasetyenziswa kumntwana onokuba neenyanga ezintandathu. Ngoba? Kulungiselelwa ukuba aqhele ukusebenzisa ingalo okanye umlenze ofakelweyo. Ngaphandle kolo qeqesho, uthi abantwana bakhula bexhomekeke kwingalo enye ibe bakufumanisa kunzima ukuqhela iingalo ezimbini kamva ebomini.

Ndiye ndafumanisa kuba mva nje inkampani yaseYurophu yathumela amalungu angengowamvelo ngoxa kwakukho imidlalo yeOlimpiki Yabantu Abaneziphene eSydney, eOstreliya. La malungu anikwa abadlali mahala, ibe iingcali zala malungu zabakho ukuze zincedise ebudeni bemidlalo.

Amanye amalungu alungiselelwe ngokukhethekileyo iimbaleki yaye ndaboniswa elinye ilungu. Yayililungu leqatha nonyawo elilungiselelwe kanye ukuxhuma ngendlela eqhelekileyo yomntu oneenyawo zombini.

Impucuko Yobugcisa Namhlanje

Sinokulindela ntoni kumalungu angengowamvelo kwixesha elizayo? Ingcali yala malungu indixelele ngomlenze olawulwa ngekhompyutha osetyenziswa ubuncinane ngumntu omnye eNew Zealand. Usebenzisa isensor eyakhelwe ngaphakathi kuwo. Oku kubangela ukuba ahambe ngendlela ebeya kuhamba ngayo ukuba ebenomlenze wemvelo.

Kwamanye amazwe kusetyenziswa ubugcisa obubizwa ngokuba yiosteointegration, yaye iingcali zamalungu afakelwayo zimaxhaphetshu zilinga le ndlela. Kukho icingo elifakwa kumlenze oshunquliweyo emva kotyando, nelilungiselela ukuba kubekho isiseko esihle sokufakela ilungu elenziweyo. Kule nkqubo akukho mfuneko yesamente nendawo yokufaka umlenze.

Lusenziwa uphando oluya kwenza ukuba imithambo-luvo inxityelelaniswe nelungu elifakelweyo ukuze lilawulwe ngokucinga kuphela. EUnited States kuye kwenziwa utyando nokufakelwa kwezandla kubantu abathile, kodwa le nkqubo isengumbandela oshukuxwa ngokushushu ekubeni abenze le nkqubo kufuneka basebenzise amayeza okubenza bamkele amalungu amatsha ubomi babo bonke.

Kumalungu afakelwayo kukho inkqubo esetyenziswayo ngoku ebizwa ngokuba yimyoelectronics. Iielectrodes zisebenzisa ukushukuma okusuka kwizihlunu zengalo, ezisoloko zikho kwilungu elishunquliweyo. Ezi ntshukumo zinikwa amandla angakumbi yibhetri ukuze zilawule amalungu afakelweyo. Kubugcisa bala maxesha bamalungu afakelwayo kusetyenziswa ikhompyutha ukuze kulungiselelwe ngokukhethekileyo umntu onelungu elingelolamvelo.

Ndimangaliswe yinkqubela yobugcisa yala malungu, ndabuza le ngcali ukuba ibinokuyithelekisa njani indlela amalungu emvelo namalungu angengowamvelo asebenza ngayo. Kakade, akaphozisanga maseko ukuvuma ukuba amalungu emvelo asebenza bhetele kunamalungu afakelwayo. Oku kundenze ndacinga ngamazwi omdumisi, xa wathandaza kuMdali wakhe wathi: “Ndiya kukubonga ngenxa yokuba ngendlela eyoyikekayo ndenziwe ngokumangalisayo.”—INdumiso 139:14.

[Umzobo/Imifanekiso ekwiphepha 23]

(Ukuba ufuna inkcazelo ehlahlelwe kakuhle, yiya kwimpapasho)

[Imifanekiso]

I-“myoelectric” elawula isantya kunye nokubamba kwezihlunu zesandla

[Inkcazelo]

Izandla: © Otto Bock HealthCare

[Imifanekiso]

Phakathi kweli dolo lobugcisa bezi mini, kukho isuntswana lekhompyutha kunye nezinto zemagneti ezenza umntu ofakele unyawo abonakale ehamba ngendlela eqhelekileyo

[Inkcazelo]

Idolo: Photos courtesy of Ossur

[Umfanekiso]

Lo mfanekiso wonyawo ubonisa isiponji sawo sokugquma

[Inkcazelo]

[Umfanekiso okwiphepha 21]

Ukulungisa umlenze ongengowamvelo

[Umfanekiso okwiphepha 22]

Ukufakela ilungu elingelolamvelo

[Umfanekiso okwiphepha 23]

Isandla somntwana esifakelwayo, esisetyenziselwa ukuqeqeshwa abantwana abanamalungu angekhoyo

[Umfanekiso okwiphepha 23]

Ngowama-2004 intshatsheli yeOlimpiki yabaneziphene yathabatha imizuzwana eli-10,97 kugqatso olungumgama oziimitha ezili-100 isebenzisa unyawo olufakelwayo olwenziwe nge-“carbon fiber.”

[Inkcazelo]

Photo courtesy of Ossur/Photographer: David Biene

[Inkcazelo Ngomfanekiso okwiphepha 21]