Mthandi Welanga—Khusela Isikhumba Sakho!

NGUMBHALELI KAVUKANI! EBRAZIL

NGABA uyakuthanda ukuchitha ikhefu elunxwemeni? Kuthekani ngokunyuka ezintabeni? Ngoko ungomnye wezigidi ezinandipha ukwenza izinto ngaphandle. Noko ke, nasi isilumkiso: Ngokufuthi oku kuthetha ukuchitha ixesha elingakumbi elangeni. Ngaba kukho ingozi ekwenzeni oko? Ukuba kunjalo, unokuzikhusela njani?

UGqr. W. Mitchell Sams ubhala esithi: “Isikhumba sakho lelona lungu lomzimba likhulu nelona libonakalayo.” Isikhumba sakho sinceda ukukhusela umzimba wakho ekuphelelweni ngamanzi size sikugcine ufudumele. Sikunceda uve ingqele, ubushushu, intlungu nokungcangcazela, kwanokuva izinto ezirhabaxa okanye ezigudileyo. Kwakhona isikhumba sakho sinendima ebalulekileyo ekuveliseni uvithamin D, obalulekileyo ekwakheni amathambo. Ukuze kuyileke uvithamin D kufuneka kubekho ukukhanya kwelanga.

Noko ke, kukho ingozi eyongezelelekileyo xa isikhumba sichanabeka ixesha elide ekukhanyeni kwelanga. Imitha yelanga efikelela emhlabeni iyilwa kukukhanya okubomvu nokubonakalayo, kwakunye nokukhanya kwemitha eyiultraviolet kuluhlu luka-A no-B (iUVA neUVB). Ngethamsanqa, imeko-bume iyayifunxa imitha ekuthiwa ziicosmic, iigamma neeX rays ezikhutshwa lilanga. Iozone layer yemeko-bume ithintela ngokuphumelelayo iultraviolet C radiation (UVC) ize ihluze inkoliso yeUVA neUVB. Ngelishwa, le ozone layer iyonakala kwiindawo ezithile. Izazinzulu ezininzi zibeka ityala kwizinto ezisetyenziswa kwisikhenkcisi neeaerosol propellants ngale ngxaki. Enoba siyintoni na isizathu, ukuba selangeni kuya kusiba yingozi ngakumbi kwimpilo yakho.

Ngaphandle nje kokukutshisa, imitha yeultraviolet inokubangela amabala amnyama nokuqina nokoma kwesikhumba sakho okubhekele phambili. Kwakhona imitha iultraviolet ingasenza siqine isikhumba sakho, nto leyo ebangela ukwaluphala msinya, kuquka imibimbi. Okona kubi nangakumbi, ukuchanabeka kakhulu kwimitha iultraviolet kunokuphazamisa inkqubo yokuzikhusela komzimba yaye oku kunokubangela izilonda nomhlaza wesikhumba. Ukongezelela koku, isikhumba esonakeleyo nesigulayo sichaphazela inkangeleko yakho kwaye, kwezinye iimeko, sikwenza uzive ungazithembanga yaye unokude udandatheke.

Yintoni Onokuyenza?

Isikhumba sakho sifuna ukukhuselwa suku ngalunye elangeni kwanjengokuba kunjalo naxa uchanabeke kulo kakhulu izihlandlo nje ezifutshane. Yintoni enokwenziwa? Phezu kwakho nje ukunxiba impahla enokukukhusela nokunciphisa ixesha ochanabeke ngalo elangeni, unokulandela icebiso leengcali ezincomela ukusetyenziswa kwezithambiso zokukukhusela kwilanga. Unokusikhetha njani isithambiso sokukukhusela kwilanga esisebenzayo? Jonga amandla aso okukhusela elangeni [sun protection factor (SPF)] aboniswe ngumenzi waso. Okukhona inani lilikhulu, okukhona sinamandla okukukhusela. Abantu abanesikhumba esikhanyayo bafuna isithambiso esine-SPF engakumbi kunokuba kufuneka kwabo banesikhumba esimnyama. Nasi isilumkiso: I-SPF ibhekisela kuphela kumandla esithambiso okukukhusela kwimitha yelanga iUVB. Ngoko ke, khetha izithambiso ezinamandla okukukhusela kwizinto ezininzi, kwakhona ezikukhusela ngomlinganiselo othile nakwimitha eyiUVA.

Abantwana, ingakumbi abanesikhumba esikhanyayo, ngokukhethekileyo batshiswa ngokukhawuleza lilanga. Ngaphezu koko, impapasho ethi Fotoproteção (Ukukhusela Ilanga), ithi ngokufuthi abantwana bachanabeka ngakumbi elangeni kunabantu abadala. Ukuthabatha amanyathelo okukhusela isikhumba somntwana wakho elangeni ebudeni beminyaka yakhe yokuqala eli-18 yobomi bakhe kunokuwanciphisa kakhulu amathuba akhe okuba nomhlaza wesikhumba, itsho iFotoproteção.

Yonke into esemhlabeni ayinakuphila ngaphandle kwelanga Yaye ngubani ongayinandiphiyo imozulu entle enelanga elifudumeleyo? Kodwa musa ukukhohliswa yimifanekiso edumileyo yezikhumba ezigwangqa njengezifuzisela ubuhle nobutsha! Khusela impilo yakho—khusela isikhumba sakho ekuchanabekeni ngokugqithiseleyo elangeni.

[Ibhokisi ekwiphepha 17]

Khusela Isikhumba Sakho!

1. Zikhusele elangeni ingakumbi phakathi kwentsimbi ye-10 kusasa neye-4 emva kwemini, xa imitha yelanga inamandla kakhulu.

2. Kwanangeentsuku ezisibekeleyo, sebenzisa izithambiso zokukukhusela kwimitha yelanga iUVA neUVB nenenani lokukhusela elangeni elili-15 nelingakumbi.

3. Sithambise kwakhona isithambiso sokukukhusela kwilanga emva kweeyure ezimbini xa ungaphandle, ingakumbi xa udada okanye ubila.

4. Nxiba iimpahla ezinokukukhusela neziphothwe ngokucikizekileyo. Iimpahla ezinemibala engakhanyiyo zinokukukhusela ngakumbi.

5. Thwala umnqwazi ubuncinane onomphetho oziisentimitha ezilishumi neendondo zelanga ezinesilanga esinokukukhusela kwiultraviolet.

6. Nanini na kunokwenzeka hlala phantsi komthunzi.

7. Ziphephe izinto ezidlulisa ukukhanya, njengamanzi, intlabathi nekhephu, ezidlulisa inkoliso yemitha yelanga eyingozi.

[Inkcazelo]

(Isekelwe kwiSkin Savvy, epapashwe yiAmerican Academy of Dermatology)

[Imifanekiso ekwiphepha 17]

Khusela impilo nenkangeleko yakho—sigqume isikhumba sakho

Kufuneka inyameko eyongezelelekileyo kwiindawo apho kubengezela khona imitha yelanga