Imbono YeBhayibhile

Ukunqula Ngokumanyeneyo Emtshatweni—Isizathu Sokuba Kubaluleke

INTSAPHO ihlala phantsi ukuze ifumane isidlo sangokuhlwa. Njengoko utata ethandaza, ecaleni umama uthandazela ngaphakathi komnye uthixo. Kwenye intsapho umfazi unqula ecaweni, kodwa umyeni wakhe uya kwindlu yesikhungu. Kwezinye iintsapho omnye umzali ufundisa abantwana ngoSanta Claus, ngoxa omnye ebaxelela ngeHanukkah.

Ngokutsho kohlolisiso lwakutshanje, iimeko ezinjalo ziye zaqheleka njengoko abantu abaninzi ngakumbi betshata nabantu abangekho kunqulo lwabo. Olunye uhlolisiso lubonisa ukuba eUnited States, amaKatolika angama-21 ekhulwini ngoku atshata nabantu abangekho kunqulo lwawo; phakathi kweeMormons bangama-30 ekhulwini; kumaSilamsi, bangama-40 ekhulwini; yaye kumaYuda, bangaphezu kwama-50 ekhulwini. Ngenxa yobutshaba obusoloko bukho kunqulo kangangeenkulungwane, abanye bakugqala ukutshata nomntu ongekho kunqulo lwabo njengendlela yokoyisa ukunganyamezeli iimbono zabanye. Umbhali wemihlathi yephephandaba wabhala esithi: “Imitshato yabantu abahluleleneyo phantse yalo naluphi na uhlobo ifanele yothulelw’ umnqwazi.” Ngaba le yimbono yeBhayibhile?

Ifanele iqondwe into yokuba iBhayibhile ayilixhasi ikhethe lobuhlanga. ILizwi likaThixo alikukhuthazi ukukhetha ubuso. Umpostile uPetros wathetha ngokucacileyo ngalo mbandela esithi: “Ngokuqinisekileyo ndiyaqonda ukuba uThixo akakhethi buso, kodwa kwiintlanga zonke umntu omoyikayo aze asebenze ubulungisa wamkelekile kuye.” (IZenzo 10:34, 35) Kwangaxeshanye, iBhayibhile ifundisa ukuba abakhonzi bokwenyaniso bakaYehova bafanele batshate “kuphela eNkosini.” (1 Korinte 7:39) Ngoba?

Injongo Yomtshato

UThixo wayecebe ukuba umtshato ube liqhina lomanyano olukhethekileyo. (Genesis 2:24) Ekumiseleni ilungiselelo lomtshato, uThixo wayecinga ngokungakumbi kunobuqabane nje. Xa uYehova wabela isibini sokuqala umsebenzi wokukhulisa abantwana nokunyamekela ikhaya lasemhlabeni, wabonisa ukuba babefanele basebenze kunye ngokumanyeneyo ekufezeni ukuthanda kwakhe. (Genesis 1:28) Ngokusebenzisana ekukhonzeni uThixo kule nkalo, indoda nomfazi babeya kunandipha, kungekuphela nje ubuqabane, kodwa ubuqabane obumanyeneyo nobuya kuhlala buhleli.—Thelekisa uMalaki 2:14.

UYesu wabhekisela kobu buqabane xa wathi kumazwi aziwa kakhulu: “Abasebabini, kodwa banyama-nye. Ngoko ke, oko uThixo akubophelele ngedyokhwe ndawonye makungabikho mntu ukwahlukanisayo.” (Mateyu 19:6) UYesu wasebenzisa ulwimi olufuziselayo xa efanisa umanyano lomtshato nedyokhwe ebophelele izilwanyana ezibini ezitsala kunye okanye ezithwele umthwalo omnye. Khawube nomfanekiso-ngqondweni wezilwanyana ezibini ezisedyokhweni iseso sitsalela kwelaso icala! Ngokufanayo, abo batshata nabantu abangekho kunqulo lokwenyaniso basenokuzifumanisa betsala nzima ekuphileni ngokwemigaqo yeBhayibhile ngoxa elinye iqabane lixhathisa. Ngokufanelekileyo, iBhayibhile ithi: “Musani ukubotshwa edyokhweni ngokungalinganiyo kunye nabangakholwayo.”—2 Korinte 6:14.

Umtshato Obhetele

Umanyano kunqulo lokwenyaniso lunokuwomeleza kakhulu umtshato. Omnye umbhali wathi: “Ukukhonza kunye ngomnye woothunywashe ababalulekileyo kwiintsapho ezintle nezonwabileyo.” INtshumayeli 4:9, 10 ithi: “Kulungile ukuba babe ngababini kunokuba abe mnye, kuba banomvuzo olungileyo ngemigudu yabo. Ngokuba xa bathe bawa, omnye unokumphakamisa uwabo.”

Xa sisekela ubomi baso kunqulo lwaso, isibini esingamaKristu siyamanyana kungekuphela nje ngokwenyama kodwa nangokomoya. Njengoko sithandaza kunye, sifundisisa iLizwi likaThixo kunye, sihlanganisana namaKristu esikhonza nawo, yaye sisabelana nabanye ngoko sikukholelwayo, sizabalazela umanyano lokomoya olukhulisa kakhulu ukusondelelana kwaso emtshatweni. Elinye ibhinqa elingumKristu lathi: “Unqulo lokwenyaniso luyindlela yobomi. Andiziboni ndikhetha ukutshata nomntu ongenaso isiseko soko ndikuko.”—Thelekisa uMarko 3:35.

Abo batshata “eNkosini” bangalindela ukuba amaqabane abo axelise ihambo kaYesu. Amadoda angamaKristu amele abaphathe abafazi bawo njengokuba uYesu waliphatha ngothando ibandla. Abafazi abangamaKristu bafanele bawaphathe amadoda abo ngentlonelo. (1 Korinte 11:3; Efese 5:25, 29, 33) AmaKristu akwenza oku kungengomnqweno wokukholisa amaqabane awo kuphela kodwa nokukholisa uThixo, kuba izibini ziya kuphendula ngendlela eziphathana ngayo.—Malaki 2:13, 14; 1 Petros 3:1-7.

Ukukholelwa kwizinto ezifanayo kwakhona kunceda izibini ezingamaKristu ukucombulula iingxaki ngoxolo. IBhayibhile icebisa amaKristu ukuba anikele ingqalelo, “kungekhona kwizilangazelelo zobuqu kwimibandela nje [yenu], kodwa nakwizilangazelelo zobuqu kuleyo yabanye.” (Filipi 2:4) Phezu kwako nje ukungafani, amaqabane amanyeneyo elukholweni akhangela kwiLizwi likaThixo njengegunya ekulamleni xa engavisisani. (2 Timoti 3:16, 17) Ngale ndlela alandela umgaqo weBhayibhile wokuba amaKristu abe ‘sengqondweni enye.’—1 Korinte 1:10; 2 Korinte 13:11; Filipi 4:2.

Ukutsaleleka Nemilinganiselo Efanayo

Liyinyaniso elokuba, kukho okungakumbi kulwalamano kunokuba nibe kunqulo olunye. Ukutsaleleka kwenu nobabini ngomnye uthunywashe. (INgoma yazo iiNgoma 3:5; 4: 7, 9; 5: 10) Kodwa ukuze umtshato uphumelele, kubalulekile ukuba nemilinganiselo efanayo. Ngokutsho kwencwadi ethi Are You the One for Me? “izibini ezinemilinganiselo efanayo zinethuba elingakumbi lokuba nolwalamano olonwabisayo, oluvisisanayo noluhlala luhleli.”

Ngelishwa, abantu abatsalelekileyo omnye komnye basenokungathethi ngezinto ezinzulu abahlukana ngazo de kube semva kokuba betshatile. Ngokomzekelo, khawube nomfanekiso-ngqondweni uthenga indlu ngenxa nje yokuba uthanda inkangeleko yayo. Noko ke, emva kokufudukela kuyo ufumanisa ukuba isiseko asizinzanga. Ukuba isiseko asizinzanga, zonke izinto ezintle kuloo ndlu azithethi nto ingako. Ngokufanayo, umntu unokutsaleleka komnye okunqulo olwahlukileyo kolwakhe obonakala emfanela—kodwa emva komtshato ulwalamano lunokuba neengxaki ezinkulu.

Khawucinge ngeminye imibandela enzulu enokuvela kamva kwimitshato yabantu abangekho kunqulo olunye: Iza kunqula phi intsapho? Luluphi uqeqesho lonqulo abantwana abaza kulufumana? Luluphi unqulo intsapho eza kuluxhasa ngokwemali? Ngaba elinye iqabane liya kunyanzelisa ekwenzeni amasiko neeholide zonqulo oluthile ngoxa elinye iqabane likujonga njengobuhedeni oko? (Isaya 52:11) Mtshato ngamnye ufuna ukuba qabane ngalinye lenze uhlengahlengiso olusengqiqweni; noko ke, ukulalanisa imigaqo yeBhayibhile—kwanokuba kulondolozwa umtshato—akwamkelekanga kuThixo.—Thelekisa iDuteronomi 7:3, 4; Nehemiya 13:26, 27.

Ukuze zilondoloze uxolo emtshatweni, ezinye izibini kwimitshato eyahluleleneyo ngonqulo zinqula zodwa. Noko ke, okubuhlungu kukuba, ukunqula wedwa kubangela umsantsa wokomoya emtshatweni. Elinye ibhinqa elingumKristu elatshata nendoda eyayingekho kunqulo olunye nolwalo labalisa lisithi: “Nangona sasitshate iminyaka engama-40, eneneni umyeni wam wayengandazi.” Enyanisweni, umtshato apho omabini amaqabane akhonza “ngomoya nenyaniso” unoThixo phakathi kwawo. Njengokuba iBhayibhile ngendlela ebumbongo isitsho, “umsonto ontluntathu awuhle uqhawulwe.”—Yohane 4:23, 24; INtshumayeli 4:12.

Kuthekani Ngabantwana?

Abanye abacinga ngokutshata nomntu abangakhonzi naye basenokuvakalelwa kukuba bangababonisa abantwana babo zombini iinkonzo baze babavumele ukuba bazikhethele. Liyinyaniso elokuba, bobabini abazali banelungelo ngokomthetho elisekelwe kwisazela sabo ukubaqeqesha ngonqulo, baze ekugqibeleni, abantwana benze isigqibo sabo.a

IBhayibhile iyalela abantwana ukuba babathobele bobabini abazali “ngokumanyene neNkosi.” (Efese 6:1) IMizekeliso 6:20 ikubeka ngale ndlela oku: “Nyana wam, bamba umthetho kayihlo, ungasilahli isiyalo sikanyoko.” Kunokufundiswa iimfundiso ezisisiseko ezahlukahlukeneyo, abantwana abakhuliswe ngabazali ababini abakholelwa into efanayo bamanyene koko iBhayibhile ikubiza ngokuthi “inye iNkosi, lunye ukholo, lunye ubhaptizo.”—Efese 4:5; Duteronomi 11:19.

Ngokwenene “ENkosini”

Ukuba ukuba nemilinganiselo efanayo kungundoqo kumtshato ophumelelayo, ngaba kungaba bubulumko ukutshata nabani na ozibiza ngokuba ngumKristu? IBhayibhile iyaphendula isithi: “Lowo uthi uhleli emanyene [noYesu] ubophelelekile ukuba naye ngokwakhe aqhubeke ehamba kanye njengoko yena lowo wahambayo.” (1 Yohane 2:6) Ngaloo ndlela, umKristu ocinga ngomtshato uya kufuna umKristu ozabalazela ngokwenene ukulandela uYesu. Lowo uza kuba liqabane ufanele abe ubahlulele ubomi bakhe kuThixo waza wabhaptizwa. Uya kuxelisa ubuntu bukaYesu obunothando aze ashumayele uBukumkani bukaThixo ngenzondelelo. Njengoko kwakunjalo ngoYesu, uya kusekela ubomi bakhe ekwenzeni ukuthanda kukaThixo.—Mateyu 6:33; 16:24; Luka 8:1; Yohane 18:37.

Ngokulindela iqabane elifanelekileyo ngomonde phakathi kwentsapho yabakhonzi bakaThixo, abo bacinga ngomtshato bazibekela usukelo lokufuna ukwenza ukuthanda kukaThixo kuqala ebomini babo. Ubomi obunjalo ekugqibeleni buya kufak’ isandla kumtshato owonwabisayo nowanelisayo.—INtshumayeli 7:8; Isaya 48:17, 18.

[Umbhalo osemazantsi]

[Ibhokisi ekwiphepha 16]

Uncedo Ngeentsapho Ezahluleleneyo Ngonqulo

Ngenxa yezizathu ezahlukahlukeneyo izibini ezininzi ezitshatileyo namhlanje zahlulelene ngonqulo. Abanye abantu basenokuba baye bakhetha iqabane elikunqulo olwahlukileyo. Kodwa izibini ezininzi ziqale zikunqulo olunye yaye kamva zahlulelana ngonqulo xa elinye iqabane likhetha olunye unqulo. Zisenokubakho nezinye iimeko ezenza iintsapho zahlulelane ngonqulo. Noko ke, enoba siyintoni na isizathu, izifungo zomtshato akumele zaphulwe okanye zigqalwe njengento engenamsebenzi kuba nje amaqabane engavisisani ngokhetho lonqulo. IBhayibhile ifuna umtshato ube ngcwele uze uhlale uhleli, kwanokuba amaqabane akakho kunqulo olunye. (1 Petros 3:1, 2) Umpostile uPawulos wabhala: “Ukuba nawuphi na umzalwana unomfazi ongakholwayo, ukanti yena evumelana nokuhlala naye, makangamshiyi.” (1 Korinte 7:12) Ukuba iyasetyenziswa, imigaqo efumaneka eBhayibhileni inokunceda nasiphi na isibini esitshatileyo ukuba sinandiphe uxolo kulwalamano olunothando nolunentlonelo.—Efese 5:28-33; Kolose 3:12-14; Tito 2:4, 5; 1 Petros 3:7-9.