Imbono YeBhayibhile

Imbono Elungeleleneyo Ngezithethe Ezithandwayo

“AKUKHO NDLELA YOKWENZA IZINTO INGAKHANGE NGAXA LITHILE OKANYE NDAWENI ITHILE IGXEKWE, NENGAZANGE NGAXA LITHILE OKANYE NDAWENI ITHILE IMISELWE NJENGOMTHETHO.”

NGALA mazwi, umbhali-mbali waseIreland, uWilliam Lecky ushwankathela indlela abantu abaguquguquka ngayo. Amagqabaza akhe anokubhekisela kumasiko nezithethe ebezisenziwa ukutyhubela iinkulungwane. Eneneni, izenzo ezininzi ezakha zajongwa njengenxalenye ebalulekileyo yobomi bemihla ngemihla mvanje ziyagxekwa. Oko akumangalisi, kuba ngokutsho kompostile ongumKristu uPawulos, “imeko yeli hlabathi iyatshintsha.”—1 Korinte 7:31.

Ewe, ibutho labantu litshintsha ngokuqhubekayo. Oku kubonakala kwindlela izimo zengqondo nendlela yokwenza izinto ezitshintsha ngayo ngokuphawulekayo. AmaKristu amele ‘angabi yonxalenye yehlabathi’—okuthetha ukuba, ahlala ahlukile kwibutho labantu elingenanto yakwenza noThixo. Sekunjalo, iBhayibhile iyachaza ukuba amaKristu ‘asehlabathini,’ yaye ayiwayaleli ukuba abe ngoonkom’ idla yodwa. Ngenxa yoko, kufuneka sibe nembono elungeleleneyo ngezithethe.—Yohane 17:11, 14-16; 2 Korinte 6:14-17; Efese 4:17-19; 2 Petros 2:20.

Ziyintoni Izithethe?

Izithethe zizinto ezenziwa kubomi obuqhelekileyo neziqheleke kwindawo ethile okanye kubantu bodidi oluthile. Ezinye izithethe, ezinjengesimilo sasetafileni, kusenokwenzeka ukuba zivela ngenjongo yokuqoqosha izimilo zabantu xa bephakathi kweqela ukuze benze izinto ngendlela echubekileyo nebonisa ukubacingela abanye. Kwiimeko ezinjalo, ukwenzelana imbeko kunokufaniswa neoli, kuba kuthambisa ulwalamano lwabantu.

Izithethe ziphenjelelwa lunqulo ubukhulu becala. Eneneni, uninzi lwazo luvela kwiinkolelo zamandulo nakwiingcamango zamandulo ezingasekelwanga eBhayibhileni. Ngokomzekelo, ukunika abafelweyo iintyatyambo kusenokwenzeka ukuba kwahluma kwiinkolelo zonqulo.a Ukongezelela, umbala oluhlaza—odla ngokunxityiswa iintsana ezingamakhwenkwe—kwakucingelwa ukuba uyazigxotha iidemon. Imascara yayikhusela kwiliso lenkohlakalo, ngoxa ilipstick yayisetyenziselwa ukudimaza iidemon zingangeni emlonyeni webhinqa zize zihlale kulo. Kwanesithethe esingenabubi esifana nokubeka isandla emlonyeni xa uzamla kusenokwenzeka ukuba sasusela kwingcamango yokuba umphefumlo womntu unokuphuma xa ekhamisile. Noko ke, ukutyhubela iminyaka ezi zinto zayeka ukuba nento yokwenza nonqulo, yaye namhlanje ezi zithethe azinanto yakwenza nonqulo.

Izinto Ezifanele Zixhalatyelwe NgamaKristu

Xa umKristu efanele axhalabe enoba ufanele alandele isithethe esithile okanye angasilandeli, eyona nto afanele ayixhalabele kukuba, Iyintoni imbono kaThixo njengoko ichazwe eBhayibhileni? Mandulo uThixo wazigweba izenzo ezithile ekusenokwenzeka ukuba zazinyanyezelwa ngabanye abantu. Ezi zenzo zaziquka ukubingelela ngabantwana, ukusetyenziswa kakubi kwegazi, nezinye izenzo ezahlukeneyo eziphathelele isini. (Levitikus 17:13, 14; 18:1-30; Duteronomi 18:10) Ngokufanayo, ezinye izithethe ezixhaphakileyo namhlanje ngokucacileyo azivisisani nemigaqo yeBhayibhile. Phakathi kwazo zezo zingekhoyo eBhayibhileni ezinxulumene neeholide zonqulo njengeKrismesi neIsta okanye iinkolelo ezinxulumene nokusebenzelana nemimoya.

Kodwa kuthekani ngezithethe ezakha zanxulunyaniswa nezinto ezithandabuzekayo kodwa ngoku ezigqalwa njengezamkelekileyo ekuhlaleni? Ngokomzekelo, izithethe ezininzi ezithandwayo zinxulumene nomtshato—ziquka ukunikana imisesane, nokutya ikeyiki—kunokwenzeka ukuba zinemvelaphi yobuhedeni. Ngaba oku kuthetha ukuba amaKristu ayakwalelwa ukwenza ezi zithethe? Ngaba amaKristu kufuneka ahlolisise ngenyameko sithethe ngasinye sasekuhlaleni ukuze abone enoba ngandlela ithile okanye ngaphambili sakha asamkeleka?

UPawulos uthi “apho ukhoyo umoya kaYehova, kukho inkululeko.” (2 Korinte 3:17; Yakobi 1:25) UThixo ufuna siyisebenzise le nkululeko, hayi ngenjongo yokuyisebenzisela iimfuno zokuzingca, kodwa ukuqeqesha amandla ethu okuqonda ukuze abalule okulungileyo kokubi. (Galati 5:13; Hebhere 5:14; 1 Petros 2:16) Ngenxa yoko, apho kungekho migaqo icacileyo yeBhayibhile yaphulwayo, amaNgqina kaYehova akamiseli mithetho ingqongqo. Kunoko, mKristu ngamnye umele ahlolisise imeko ajamelene nayo aze azenzele isigqibo sobuqu.

Ukufuna Ukulungelwa Kwabanye

Ngaba oku kuthetha ukuba kusoloko kufanelekile ukuba nenxaxheba kwizithethe ezithile kuba nje zingangqubani ngokungqalileyo neemfundiso zeBhayibhile? Akunjalo. (Galati 5:13) UPawulos wathi umKristu akafanele afune okwakhe ukulungelwa kuphela “kodwa oko kwabona baninzi.” Ufanele ‘azenzele uzuko lukaThixo zonke izinto’ aze angabi ngunobangela wesikhubekiso. (1 Korinte 10:31-33) Ngoko umntu ofuna inkoliseko kaThixo ufanele azibuze lo mbuzo: “Abanye basijonga njani esi sithethe? Ngaba abantu ngokubanzi bayasigxeka? Ngaba ukuba nenxaxheba kwam kuso kubonisa ukuba ndivumelana nezenzo okanye iingcamango ezingamkholisiyo uThixo?’—1 Korinte 9:19, 23; 10:23, 24.

Nangona ngokuqhelekileyo kusenokungabikho nto iphosakeleyo ngazo, ezinye izithethe zisenokwenziwa ekuhlaleni ngendlela engavisisaniyo nemigaqo yeBhayibhile. Ngokomzekelo, ngezinye izihlandlo ukupha umntu iintyatyambo kunokuba nenye intsingiselo engavisisaniyo neemfundiso zeBhayibhile. Ngoko yintoni eyona nto umKristu afanele ayixhalabele? Nangona sisenokubakho isizathu sokuhlolisisa isithethe esithile, kwezinye iimeko kubaluleke gqitha ukuqwalasela ukuba esi sithethe sinayiphi intsingiselo kubantu ngelo xesha nakwindawo umntu ahlala kuyo. Ukuba isithethe eso asikho ngokwezibhalo okanye sigqalwa njengesingafanelekanga ngamaxesha athile onyaka okanye phantsi kweemeko ezithile, ngobulumko amaKristu anokugqiba ekubeni asiyeke ngokwelo xesha.

UPawulos wathandazela ukuba amaKristu aqhubeke evumela ukuba uthando lwawo luphuphume lulwazi oluchanileyo nokuqonda okuzeleyo. Ngokuqhubeka enembono elungeleleneyo ngezithethe ezithandwayo, amaKristu ‘ayaqiniseka ngezinto ezibaluleke ngakumbi, khon’ ukuze angabi nasiphako yaye angakhubekisi abanye.’ (Filipi 1:9, 10) Kwangaxeshanye, aya kwenza ‘ukuba nengqiqo kwawo kwazeke kubantu bonke.’—Filipi 4:5.

[Umbhalo osemazantsi]

[Imifanekiso ekwiphepha 15]

Ezinye izithethe zamandulo ezifana nokubeka isandla emlonyeni xa uzamla nokunika abafelweyo iintyatyambo, azisenayo laa ntsingiselo yazo yangaphambili