Ukutsheva

NGUMBHALELI KAVUKANI! EOSTRELIYA

UKUBA indoda ichitha imizuzu emihlanu ngemini itsheva ize iyenze loo nto mihla le kangangeminyaka engama-50, iya kuba ichithe nje ngaphezu kweentsuku ezingama-63 zobomi bayo iguya iindevu zayo! Amadoda aziva njani ngale nto ayenza imihla ngemihla?

Uhlolisiso oluye lwenziwa kutshanje luye lwabonisa la magqabaza acacisa ngokutsheva: “Andikuthandi.” “Ndikuthiyile.” “Kuyenye yezinto eziyingozi ebomini.” “Kuyinto onokuyiphepha ukuba kunokwenzeka.” Ukuba amanye amadoda akakuthandi ngolu hlobo ukuguya iindevu zawo, kutheni ekwenza ke? Okokuqala makhe sifunde kancinane ngokutsheva. Mhlawumbi siza kuyifumana impendulo.

Ukusuka Kumaqokobhe Eembaza Ukusa Kwiincakuba

Ngaba unganomfanekiso-ngqondweni wakho utsheva ngeqokobhe lembaza? Ngezinyo likakrebe? Mhlawumbi ngeceba elibukhali lenyengane? Abantu baye babonisa ubuchule obumangalisayo ekukhetheni izinto zokutsheva! Mandulo eYiputa amadoda ayetsheva ngesitshetshe sobhedu esasifana nezembe elincinane. Kutshanje, kwinkulungwane ye-18 neye-19, kwenziwa izitshetshe eziletshezayo ukuba bukhali oku, ingakumbi eSheffield, eNgilani. Njengoko zihonjiswe zayokoyoko, ezi zitshetshe zaziyintsimbi yaye zinokugotywa xa zingasebenzi. Ezi zixhobo kwakufuneka ziphathwe ngobunono obukhulu, yaye xa ungekaziqheli kakuhle zazikuthi tsem kutak’ igazi. Kwabo bangenabuchule kakuhle, ukuqala ukuzisebenzisa kwakungemnandi. Noko ke, kwinkulungwane yama-20 kwabonakala ngathi kuza kubakho isiqabu.

Ngowe-1901 enye indoda yaseUnited States egama linguKing Camp Gillette yeza nencakuba ephela ngokukhawuleza endaweni yesitshetshe. Ihlabathi lathi swi-i yile mveliso yakhe yaye ekugqibeleni kwavela iindidi ezahlukeneyo, kuquka iincakuba ezinemiphini yesilivere okanye eyegolide. Inkqubela yakutshanje iquka iincakuba eziphela ngokukhawuleza, izinto zokutsheva ezineencakuba ezimbini okanye ezintathu, neencakuba ezibhetyebhetye ezineentloko ezijikajikayo.

Kambe ke, enye into esingafuni kuyilibala, ziincakuba zombane, ezaqala ukuthengiswa ngowe-1931. Ziye zaqhubeka zisebenza kakuhle yaye zithandwa, kodwa abaninzi abafuna ukutsheva kakuhle basalithanda icala elibukhali lale ncakuba.

Imbali Yokuthandwa Nokungathandwa Kweendevu

Ukususela kwamhlamnene abantu bebemana ukuzithanda baphinde bangazithandi iindevu. Incwadi ethi Everyday Life in Ancient Egypt ithi, amaYiputa amandulo “ayesaziwa ngokungabi xhonti yaye ayezigasa ngokutsheva kakuhle, esebenzisa izitshetshe ezenziwe kakuhle awayezigcina kwizingxobo zofele.” Esi sithethe sisinceda sibone isizathu sokuba ibanjwa elingumHebhere uYosefu litsheve ngaphambi kokuba livele phambi koFaro.—Genesis 41:14.

Ama-Asiriya yayiluhlanga olunamadoda aneendevu ezintle. Ngendlela awayeyithanda ngayo ihombo, ayezinyamekela ngokugqithiseleyo iindevu zawo, ezijija kakhulu, aziphothe aze azilungise.

Amadoda angamaSirayeli ayeneendevu ezinde ngendlela elungeleleneyo, yaye ayesebenzisa izitshetshe ukuze zihlale zichetywe kakuhle. Ngoko wawuthetha ukuthini uMthetho kaThixo xa wayalela amadoda angamaSirayeli ukuba ‘angazichebi azizungeleze iintlontlo zeentloko zawo’ okanye ‘angaloni udini’ lweendevu zawo? Lo myalelo wawungathi mazingachetywa iinwele okanye iindevu. Kunoko, wawungawakhuthazi amadoda amaSirayeli ukuba alinganise izithethe ezigabadeleyo zonqulo zeentlanga ezingabamelwane nezingabahedeni.a— Levitikus 19:27; Yeremiya 9:25, 26; 25:23; 49:32.

Kwibutho lamandulo lamaGrike, ngokuqhelekileyo wonke umntu wayeneendevu ngaphandle kwabantu abakudidi oluphezulu, ababesoloko betsheve bampuluswa. ERoma kuyabonakala ukuba lo mkhwa wokutsheva waqala ngenkulungwane yesibini ngaphambi kweXesha Eliqhelekileyo, yaye emva kweenkulungwane eziliqela emva koko, ukutsheva mihla le kwaqhubeka kusisithethe.

Noko ke, kuthe kusakuwa uBukhosi bamaRoma, zaphinda zathandwa iindevu, kwathabatha iminyaka eli-1000 de kwayinxalenye yesibini yenkulungwane ye-17, apho kwaphinda kwathandwa ukutsheva. Ukutsheva ube mpuluswa kwaqhubeka ukutyhubela inkulungwane ye-18. Kodwa ke, phakathi ukuya ngasekupheleni kwenkulungwane ye-19, guququ izinto zaphinda zatshintsha. Yiloo nto, imifanekiso kaC. T. Russell, umongameli wokuqala weWatch Tower Society, nogxa wakhe ongumKristu uW. E. Van Amburgh ibonisa la madoda enentshebe entle, echetywe kakuhle eyayinesidima yaye ifanelekile ngaloo maxesha. Noko ke, ebutsheni benkulungwane yama-20 ukutsheva kuye kwaphinda kwaduma, kwaqhubeka kunjalo ke kumazwe amaninzi de kwanamhlanje.

Ngaba uphakathi kwezo zigidi zamadoda zisebenzisa incakuba ukwenza eso sithethe samihla le saphambi kwesipili? Ukuba kunjalo, ngaphandle kwamathandabuzo ufuna ukungeva zintlungu, ungophi yaye usenze kakuhle. Ukuze ukwazi ukwenza loo nto, usenokuthanda ukuhlolisisa amacebiso akwibhokisi ethi “Amacebiso Ngendlela Yokutsheva Ngencakuba.” Kusenokwenzeka ukuba sele uwasebenzisa amanye aloo macebiso. Enoba kutheni ke—nandipha ukutsheva okucocekileyo!

[Umbhalo osemazantsi]

[Ibhokisi/Imifanekiso ekwiphepha 23]

Amacebiso Ngendlela Yokutsheva Ngencakuba

Incwadi ethi Men’s Hair inikela la macebiso alandelayo ngendlela yokutsheva kakuhle ngencakuba.b

1. Wathambise amabhovu akho: Ekuphela kwendlela yokuzithambisa kakuhle iindevu zakho kukuzihlamba ngamanzi ashushu. Ukuba kunokwenzeka, tsheva emva kokuba uhlambile, kuba oku kunokunika ithuba elininzi lokuba amanzi athambise amabhovu.

2. Qaba izinto ezifakwa ngaphambi kokutsheva: Zonke iindidi ngeendidi zeesepha, ugwebu, amafutha okuthambisa neejeli zinezinto ezintathu ezizenzayo. (1) Zivalela ukufuma kula mabhovu, (2) ziwagcina emile, zize (3) zithambise ulusu ukuze incakuba ihambe ngokulula. Khetha into eza kukunceda. Kanene ukhe wawazama amafutha eenwele? Nawo enzelwe ukuthambisa iinwele.

3. Ukusebenzisa isitshetshe esifanelekileyo ngendlela eyiyo: Incakuba efanelekileyo yebukhali. Iincakuba ezibuthuntu zinokulonakalisa ulusu lwakho. Tshevela kwicala ezikhulela ngakulo iindevu zakho. Ukutsheva ngakweli cala zingakhuleli kulo iindevu kunokuzisusa kakuhle, kodwa kunokukhuthula ulusu kuze kuzibangele zikhulele kwizicwili ezikufuphi kunokuba zikhulele kwimingxuma yazo eluswini. Ezinye iincwadi zithi, ukutsheva ngokungakhathali—kwamadoda namabhinqa—kunokubangela ukwasulelwa ziintsholongwane ezinokubangela iintsumpa.

4. Ukukhusela ulusu lwakho emva kokutsheva: Sihlandlo ngasinye utsheva, ususa umcu wolusu lwakho ongabonakaliyo, ushiya ulusu lwakho lusesichengeni. Noko ke, kubalulekile ukuhlamba zonke izinto ezisalele ebusweni bakho ngamanzi acocekileyo—uqale ngashushu uze ngapholileyo ukuze uvale imingxuma uze ufake ukufuma. Ukuba uyathanda, ungasebenzisa ulwelo oluthanjiswa emva kokutsheva ukuze ukhusele uze uhlaziye ulusu lwakho.

[Umbhalo osemazantsi]

[Ibhokisi/Umfanekiso okwiphepha 24]

Yintoni Amabhovu?

Amabhovu buboya obuba lapha ebusweni. Abangelwa yikeratin nezinye iiprotini. Ikeratin yiprotini eqinileyo enesulfur eyenziwa ngumzimba womntu nowesilwanyana yaye yiyo eyenza iinwele, iinzipho, iimfele, iimpuphu namaphondo. Kubo bonke uboya obusemzimbeni womntu, amabhovu aphakathi kobona bomeleleyo nobubhetyebhetye, kunjalo nje kunzima ukuwacheba kanye njengocingo lobhedu olulingana nawo. Kukho angama-25 000 ebusweni bendoda eqhelekileyo, yaye akhula ngomlinganiselo wesiqingatha semilimitha kwiiyure ezingama-24.

[Inkcazelo]

Men: A Pictorial Archive from Nineteenth-Century Sources/Dover Publications, Inc.

[Imifanekiso ekwiphepha 24]

Ukutsheva kunembali yokuthandwa kuphinde kungathandwa

UmYiputa

UmSiriya

UmRoma

[Inkcazelo]

Museo Egizio di Torino

Photographs taken by courtesy of the British Museum