Imbono YeBhayibhile
Ukuxoka—Ngaba Kukhe Kuthetheleleke?
“UCHATHA NJE WAMAMENEMENE MAXA WAMBI UKUKHULULA EKWENZENI INKCAZELO ENDE.”
NGOKUSUKA kula magqabaza unokuyibona nje indlela abantu abaninzi abakujonga ngayo ukuxoka. Bathi noko ungaxoka ukuba akukho mntu uza kwenzakala yiloo nto. Kude kwakho negama laloo ndlela yokucinga—ukuhamba ngoyibonayo, nto leyo ethetha ukuba mnye nje umthetho ofanele uwuthobele, lowo kuthiwa ngowothando. Uthi umbhali uDiane Komp, ngamanye amazwi, “ukuba uneenjongo ezintle nentliziyo yakho ithe tye (ngoko ke) nokuba uxokile . . . akukho nto iyonayo loo nto.”
Naphi na ehlabathini uya kufika abantu bezibona ngolo hlobo izinto. Abantu basala bethe xhungu bebamb’ ongezantsi zizixingaxi ezibandakanya ukuxoka kwabezobupolitika abadumileyo nezinye iinkokeli zehlabathi. Ngenxa yale mpembelelo, abantu abaninzi sele bethande ukuyilibala into yokuba bafanele bathethe inyaniso. Kwezinye iindawo ukuxoka sele kude kwamkeleka ngokusemthethweni. Omnye umthengisi ukhalaza ngelithi: “Ndileliya lihlawulwayo ixoki. Ndiyaphumelela kukhuphiswano lokuthengisa ndize ndinconywe kakhulu xa ndixokile. . . . Kuyabonakala ukuba leyo yinto efundiswa abantu abathengisayo naphi na.” Abanye bavakalelwa kukuba abuyongozi kangako ubuxoki obungephi. Ngaba banyanisile? Ngaba akho amaxesha anokuthetheleleka ngawo amaKristu xa exoka?
Imilinganiselo Ephakamileyo YeBhayibhile
Ngeliphandle nje iBhayibhile iyazigatya zonke iintlobo zokuxoka. Umdumisi uthi: “[UThixo] uyabatshabalalisa abathetha amanga.” (INdumiso 5:6; bona ISityhilelo 22:15.) KwiMizekeliso 6:16-19, iBhayibhile idwelisa izinto ezisixhenxe azithiyileyo uYehova. ‘Ulwimi oluxokayo nengqina elixokayo, elifutha amanga’ zezona zinto zibalaseleyo kolu ludwe. Ngoba? Ngenxa yokuba uYehova uyawucaphukela umonakalo owenziwa bubuxoki. Sesinye sezizathu esabangela ukuba uYesu athi uSathana lixoki nesibulala-mntu. Ubuxoki bakhe bufake uluntu ebugxwayibeni nasekufeni.—Genesis 3:4, 5; Yohane 8:44; Roma 5:12.
Indlela uYehova akugqala kunzulu ngayo ukuxoka ibalaseliswa koko kwenzeka kuAnaniyas noSafira. Aba babini baxokisa abapostile ngabom ekubonakala ukuba babezama ukubonakala benesisa kunokuba kunjalo ngokwenene. Yonke loo nto babeyenze ngabom yaye babeyicebe kwangaphambili. Wathi ke umpostile uPetros: “Uxokise, kungekhona abantu, kodwa uThixo.” Ngenxa yoko, uThixo wababulala bobabini.—IZenzo 5:1-10.
Kwiminyaka eliqela emva koko umpostile uPawulos wawaluleka ngelithi amaKristu: “Musani ukuxokisana.” (Kolose 3:9) Esi siluleko sibaluleke kakhulu kwibandla lamaKristu. UYesu wathi uthando olunomgaqo luya kuba luphawu lwabalandeli bakhe bokwenyaniso. (Yohane 13:34, 35) Uthando olunjalo ukungahanahanisi lunokukhula kuphela kwimeko-bume yokunyaniseka nokuthembana okupheleleyo. Kunzima ukuthanda umntu ukuba asiqinisekanga ukuba uya kusoloko esixelela inyaniso.
Ngoxa konke ukuxoka kungathetheleleki, ukuxoka kuyashiyana ngobunzulu. Ngokomzekelo, omnye umntu angaxoka ngenxa yokuziva ephoxekile okanye esoyika. Ngolunya, omnye usenokukwenza umkhwa ukuxoka kuba efuna ukwenzakalisa. Ngenxa yeenjongo zakhe zenkohlakalo, lo mntu uxoka ngabom uyingozi kwabanye uya kususwa kubudlelane bebandla ukuba akaguquki. Ekubeni ingekuko konke ukuxoka okubangelwa yinkohlakalo, simele silumke singagwebi ngokungeyomfuneko kodwa siqiniseke ukuba siyayazi yonke into ebandakanyekileyo xa umntu eye waxoka. Sifanele sicinge nangenjongo neemeko ezingaphephekiyo.—Yakobi 2:13.
‘Ukulumka Njengeenyoka’
Kambe ke, ukuthetha inyaniso akuthethi ukuba sinyanzelekile ukuba sityhile yonke nje inkcazelo nakubani na osibuzayo. KuMateyu 7:6, uYesu walumkisa ngelithi: “Musani ukunika izinja oko kungcwele, ningaphosi neeperile zenu phambi kweehagu, ukuze zingaze . . . ziphethuke ziniqwenge.” Ngokomzekelo, abantu abakhohlakeleyo basenokungabi nalungelo lakwazi izinto ezithile. AmaKristu ayazi ukuba ahlala kwihlabathi elinobundlobongela. Ngenxa yoko, uYesu wacebisa abafundi bakhe ukuba ‘balumke njengeenyoka’ ngoxa behlala ‘bemsulwa njengamahobe.’ (Mateyu 10:16; Yohane 15:19) UYesu akazange ayityhile ngokupheleleyo inyaniso ngalo lonke ixesha, ngakumbi xa ukutyhila yonke inyaniso kwakunokwenzakalisa ngokungeyomfuneko yena okanye abafundi bakhe. Sekunjalo, nangaloo maxesha, akazange axoke. Kunoko, wayekhetha ukuthi cwaka okanye atshintshe incoko.—Mateyu 15:1-6; 21:23-27; Yohane 7:3-10.
Amadoda namabhinqa akhankanywe eBhayibhileni, njengoAbraham, uIsake, uRahabhi noDavide aba ziingqondi aza alumka xa ayeqhubana nabo babesenokuba ziintshaba. (Genesis 20:11-13; 26:9; Yoshuwa 2:1-6; 1 Samuweli 21:10-14) IBhayibhile idwelisa la madoda namabhinqa phakathi kwabanquli abathembekileyo ababenentobelo kubo bonke ubomi babo. Loo nto ibenza bakufanele ukuxeliswa.—Roma 15:4; Hebhere 11:8-10, 20, 31, 32-39.
Kusenokubakho amaxesha axa kubonakala ngathi ukuxoka yeyona ndlela yokuzikhulula. Kodwa amaKristu namhlanje enza kakuhle ukulandela emanyathelweni kaYesu aze alandele izazela zawo eziqeqeshwe ngeBhayibhile xa ejamelene nobunzima.—Hebhere 5:14.
IBhayibhile isikhuthaza ukuba sibe nenyaniso size sithembeke. Ukuxoka kuphosakele, yaye sifanele silandele esi siluleko seBhayibhile: “Thethani inyaniso ngamnye kuni nommelwane wakhe.” (Efese 4:25) Ngokwenza njalo, siya kuba nesazela esicocekileyo, sikhuthaze uxolo nothando ebandleni, size siqhubeke sihlonela ‘uThixo wenyaniso.’—INdumiso 31:5; Hebhere 13:18.
[Umfanekiso okwiphepha 28]
UAnaniyas noSafira baphulukana nobomi babo ngenxa yokuxoka