Imbono YeBhayibhile

Ngaba Kufanelekile Ukunqula UYesu?

UKUTYHUBELA iinkulungwane, abantu abaninzi kwiNgqobhoko baye banqula uYesu Kristu ngokungathi nguThixo uSomandla. Noko ke, kwauYesu, wanikela ingqalelo nonqulo kuYehova uThixo kuphela. Ngokomzekelo, xa wayehendelwa ukuba enze isenzo sokunqula uMtyholi, uYesu wathi: “NguYehova uThixo wakho omele umnqule, yaye kukuye yedwa omele unikele inkonzo engcwele.” (Mateyu 4:10) Kamva uYesu wabafundisa oku abafundi bakhe: “Ningabizi nabani na ngokuthi nguyihlo emhlabeni, kuba mnye uYihlo, Lowo wasezulwini.”—Mateyu 23:9.

Xa wayethetha nebhinqa elingumSamariya, uYesu wachaza uhlobo lonqulo abantu abamele balubhekise kuThixo. Unqulo lwabo lumele lusekelwe kumoya nenyaniso. Eneneni, “uBawo ufuna abanjalo ukumnqula.” (Yohane 4:23, 24) Ewe, unqulo olupheleleyo lufanele luboniswe kuThixo kuphela. Ukunqula omnye mntu okanye enye into bekuya kuba luhlobo oluthile lokunqula izithixo, nto leyo egxekwayo ziZibhalo zesiHebhere nezesiGrike.—Eksodus 20:4, 5; Galati 5:19, 20.

Abanye basenokubuza ukuba, ‘Kodwa ngaba iBhayibhile ayithi sifanele sinqule noYesu? Ngaba uPawulos akazange athi kumaHebhere 1:6: “Mazinqule yena [uYesu] zonke izithunywa zikaThixo.” (King James Version) Sinokusiqonda njani esi sibhalo ngokuphathelele oko iBhayibhile ikutshoyo ngonqulo-zithixo?

Unqulo Ekuthethwa Ngalo EBhayibhileni

Okokuqala, simele siqonde oko kwakuthethwa nguPawulos ngonqulo. Wasebenzisa igama lesiGrike elithi pro·sky·neʹo. IUnger’s Bible Dictionary ithi ngokoqobo eli gama lithetha ‘ukuphuza isandla somntu njengomqondiso wokumhlonela okanye ukumnika imbeko.’ IAn Expository Dictionary of New Testament Words, kaW. E. Vine, ithi eli gama “libonisa isenzo sokubonisa intlonelo, enoba senziwa emntwini. . . okanye kuThixo.” Ngamaxesha okubhalwa kweBhayibhile ipro·sky·neʹo yayidla ngokuquka ukuguqa ngokoqobo phambi komntu obekekileyo.

Khawucinge ngomzekelo owenziwa nguYesu wekhoboka elalingakwazi ukubuyisa imali eninzi yenkosi yalo. Eli gama lesiGrike liyavela kulo mzekeliso, yaye xa iliguqulela, iKing James Version ithi “ngoko isicaka sawa phantsi, saza samnqula [uhlobo oluthile lwepro·sky·neʹo] [ukumkani], sisithi, Nkosi, yiba nomonde kum, yaye ndiya kuyihlawula yonke.” (Mateyu 18:26; Akekeliswe sithi.) Ngaba ngandlela ithile le ndoda yayinqula izithixo? Akunjalo konke konke! Yayibonisa intlonelo nembeko kukumkani, inkosi nomphathi wayo.

Izenzo ezinjalo zokuqubuda, okanye iindlela zokubonisa intlonelo, zaziqhelekile eMpuma ngamaxesha okubhalwa kweBhayibhile. UYakobi waqubuda izihlandlo ezisixhenxe ekudibaneni kwakhe nomntakwabo, uEsawu. (Genesis 33:3) Abantakwabo Yosefu bawa ngobuso, okanye baqubuda kuye bebonisa imbeko ngenxa yesikhundla sakhe kwinkundla yaseYiputa. (Genesis 42:6) Ngenxa yezi zibakala sinokukuqonda kakuhle oko kwenzekayo xa abavumisi ngeenkwenkwezi bafumana uYesu ongumntwana, abamchaza ‘njengalowo uzelweyo ukumkani wamaYuda.’ Ngokwendlela eguqulelwe ngayo kwiKing James Version, le ngxelo isixelela ukuba “bawa phantsi, baza bamnqula [pro·sky·neʹo].”—Mateyu 2:2, 11.

Ngoko, kucacile ukuba igama elithi pro·sky·neʹo, eliguqulelwe ngokuthi “unqulo” kwezinye iinguqulelo zeBhayibhile, alisetyenziselwa kuphela uhlobo lonqulo olufanele uYehova uThixo. Lisenokubhekisela nakwintlonelo nembeko enikwa omnye umntu. Bezama ukuba kungabikho nakuphi na ukungaqondakali, abanye abaguquleli beBhayibhile baguqulela igama elithi pro·sky·neʹo kumaHebhere 1:6 “njengokumnika imbeko” (New Jerusalem Bible), “mbeke” (The Complete Bible in Modern English), “ukuwa ngobuso phambi kwakhe” (Twentieth Century New Testament), okanye ‘ukuqubuda kuye’ (INguqulelo Yehlabathi Elitsha).

Kufanele Kuqubudwe KuYesu

Ngaba kufanele kuqubudwe kuYesu? Ngokuqinisekileyo, kunjalo! Kwileta yakhe eya kumaHebhere, umpostile uPawulos uthi “njengendlalifa yezinto zonke,” uYesu uye “wahlala phantsi kwisandla sasekunene sobuNgangamsha kwiindawo eziphakamileyo.” (Hebhere 1:2-4) Ngenxa yoko, amele “egameni likaYesu agobe onke amadolo abo basezulwini nawabo basemhlabeni nawabo baphantsi komhlaba, zize zonke iilwimi zivume ekuhleni ukuba uYesu Kristu uyiNkosi nto leyo eluzuko kuThixo uYise.”—Filipi 2:10,11.

Ngokuphawulekayo, kungekudala uKristu uya kusebenzisa isikhundla sakhe esiphakamileyo namandla akhe awongezelelekileyo ahambisana naso ukuze atshintshe lo mhlaba wonke ube yiparadesi. Phantsi kolwalathiso lukaThixo, nangenxa yedini lentlawulelo likaYesu, uya kususa konke ukudana, intlungu neentsizi ehlabathini ukuze kungenelwe abo baluthobelayo ulawulo lwakhe lobulungisa. Ngenxa yoko ngaba akakufanelekeli ukwamkela imbeko, intlonelo nokuthotyelwa sithi?—INdumiso 2:12; Isaya 9:6; Luka 23:43; ISityhilelo 21:3, 4.

“UThixo Ofuna Uzinikelo Olupheleleyo”

Noko ke, iBhayibhile ikwenza kucace ukuba unqulo lwethu—ngokwengqiqo yentlonelo nozinikelo olungokonqulo—lumele lubhekiswe kuThixo kuphela. UMoses wamchaza ‘njengoThixo ofuna uzinikelo olupheleleyo.’ Yaye iBhayibhile ikhuthaza ukuba ‘sinqule Lowo wenza izulu nomhlaba nolwandle nemithombo yamanzi.’—Duteronomi 4:24; ISityhilelo 14:7.

Ngokuqinisekileyo uYesu unendima ebalulekileyo kunqulo lokwenyaniso, ndima leyo efanelwe yimbeko nentlonelo. (2 Korinte 1:20, 21; 1 Timoti 2:5) Ukuphela kwendlela esinokusondela ngayo kuYehova uThixo. (Yohane 14:6) Ngokufanelekileyo, amaKristu okwenyaniso enza kakuhle ukubhekisa unqulo lwawo kuYehova uThixo, onguSomandla kuphela.