Zithini IZibhalo ‘Ngokuba NguThixo KukaKristu’?

UYESU KRISTU uye wanempembelelo enzulu yonqulo eluntwini. Oku kunjalo kuba izigidi zabantu zizibanga zingabalandeli bakhe. Noko ke, azivumelani zonke ngokufaniswa kwakhe.

Bambi abathi bayazamkela iimfundiso zikaYesu bamgqala njengoNyana kaThixo, ingenguye uMdali ngokwakhe. Abanye bakholelwa ukuba ‘uKristu nguThixo’ yaye bacinga ukuba unguThixo ngokwenene. Bakholelwa ukuba uYesu ebesoloko ephila yaye wayengengomntu nje oqhelekileyo xa wayelapha emhlabeni. Ngaba bachanile ngako oku? Zithini iZibhalo?

Ubukho BukaYesu Ngaphambi Kokuba Abe Ngumntu

UYesu wanikela ubungqina bokuba wayephila ngaphambi kokuba abe ngumntu. Wathi: “Akukho namnye unyukileyo waya emazulwini, ngulowo yedwa wehla ephuma emazulwini, uNyana woMntu.” (Yohane 3:13) Kwakhona uYesu wathi: “Ndim isonka esiphilileyo, esi sehlayo emazulwini. Ukuba ubani uthe wasidla esi sonka, wodla ubomi ngonaphakade; ke isonka endiya kumnika sona mna, siyinyama yam, endiya kuyinikela ubomi behlabathi.”—Yohane 6:51.

Isibakala sokuba uYesu wayephila ngaphambi kokuba eze emhlabeni sicaciswe kumazwi akhe: “Engekabikho uAbraham, mna ndikho kade.” (Yohane 8:58) UAbraham waphila ukususela ngowama-2018 ukusa kowe-1843 B.C.E., ngoxa ubomi bukaYesu bobuntu babususela kowe-2 B.C.E. ukusa kowama-33 C.E. Kanye nje ngaphambi kokufa kwakhe, uYesu wathandaza esithi: “Ndizukise ke ngoku, wena Bawo, kuwe ngokwakho, ngozuko ebendinalo kuwe, lingekabikho ihlabathi.”—Yohane 17:5.

Abalandeli bakaYesu banikela ubungqina obufanayo. Umpostile uYohane wabhala oku: “Ekuqalekeni ube ekho uLizwi, waye uLizwi ekuye uThixo, waye uLizwi [enguthixo, NW]. Izinto zonke zabakho ngaye; engekho yena, akubangakho nanye into ethe yabakho. . . . ULizwi waba yinyama, wahlala phakathi kwethu, sabubona ubuqaqawuli bakhe, ubuqaqawuli kanye bokuphela kwamzeleyo uYise, ezele lubabalo nayinyaniso.” (Yohane 1:1, 3, 14) Ewe, “uLizwi waba yinyama” njengomntu onguYesu Kristu.

Ebhekisela kubukho bukaYesu ngaphambi kokuba abe ngumntu, umpostile uPawulos wabhala oku: “Yibani nale ngcinga kuni, wayenayo kuye uKristu Yesu: yena wathi, esebumeni bukaThixo, akathi ukulingana kwakhe oku noThixo kulixhoba; usuke wazihluba, wathabatha ubume bomkhonzi, enziwe wafana nabantu.” (Filipi 2:5-7) UPawulos umbiza uYesu ngokuthi “owamazibulo kwindalo yonke. Ngokuba zadalelwa kuye zonke izinto.”—Kolose 1:13-16.

WayengengoThixo Emhlabeni

IZibhalo zenza kucace ukuba uYesu wayengumntu ngokupheleleyo ukususela ekuzalweni ukusa ekufeni kwakhe. UYohane akazange athi uLizwi wambathiswa nje inyama. “Waba yinyama” yaye yayingeyonxalenye yakhe eyaba yinyama yaza enye yaba nguThixo. Ukuba uYesu wayengumntu yaye kwangaxeshanye enguThixo, bekungenakuthiwa ‘wancitshiswa kancinane kunezithunywa zezulu.’—Hebhere 2:9; INdumiso 8:4, 5.

Ukuba uYesu wayenguThixo yaye engumntu xa wayesemhlabeni, kwakutheni ukuze athandaze ngokuphindaphindiweyo kuYehova? UPawulos wabhala oku: “Owathi ngemihla yenyama yakhe, xa wayesondeze izikhungo kwanezibongozo kulowo unako ukumsindisa ekufeni, kunye nodanduluko olunamandla, neenyembezi, waviwa ngenxa yokumhlonela kwakhe uThixo.”—Hebhere 5:7.

Into yokuba uYesu wayengengomoya ngokuyinxenye xa wayesemhlabeni ingqinwa yingxelo kaPetros yokuba uKristu ‘wabulawa okunene esenyameni, kodwa wadliswa ubomi ekuwo umoya.’ (1 Petros 3:18) Kuphela kungenxa yokuba uYesu wayengumntu ngokupheleleyo awayenokuthi eve oko abantu abangafezekanga bathubeleza phantsi kwako aze ngaloo ndlela abe ngumbingeleli omkhulu onovelwano. UPawulos wabhala: “Kuba asinambingeleli mkhulu ungenako ukuvelana nezilwelwe zethu; ke, sinowahendwayo ngeento zonke, ngokokufana nathi, engenasono.”—Hebhere 4:15.

‘NjengeMvana kaThixo ethwala isuse isono sehlabathi,’ uYesu ‘wazinikela ukuba abe yintlawulelo yokukhulula abantu bonke.’ (Yohane 1:29; 1 Timoti 2:6) Ngaloo ndlela, uYesu wabuya wathenga kanye oko uAdam waphulukana nako—ubomi bomntu obufezekileyo nobungunaphakade. Ekubeni okusesikweni kukaThixo kwakufuna ‘umphefumlo ngomphefumlo,’ ngaloo ndlela uYesu wayefanele abe koko uAdam wayekuko ntlandlolo—umntu ofezekileyo, ingenguye umntu onguThixo.—Duteronomi 19:21; 1 Korinte 15:22.

Musa Ukuzuza Intsingiselo Engeyiyo Kwizicatshulwa ZeBhayibhile

Abo bathi uYesu wayenguThixo ongumntu basebenzisa izibhalo ezahlukahlukeneyo ukuzama ukungqina ukuba ulilungu likaBathathu Emnye weNgqobhoko, elilingana noThixo ngobume, ngamandla, ngozuko nangexesha abaliphilayo. Kodwa xa sizihlolisisa ngenyameko ezi zicatshulwa, sifumanisa ukuba abo bamela “ukuba uKristu nguThixo” bazigqala ezi ndinyana njengezithetha okungaphaya koko zikuthethayo ngokwenene.

Bambi bathi izicatshulwa zeBhayibhile apho uThixo asebenzisa isivumelanisi sentloko esikwisininzi u-“si” zenza uYesu [uLizwi] owayephila ngaphambi kokuba abe ngumntu alingane noYehova. Kodwa ukusetyenziswa kwesi sivumelanisi sentloko akuthethi ukuba uThixo wayethetha nomntu olingana naye. Ubukhulu becala kubonisa ukuba phakathi kwezidalwa zasemazulwini, othile ukwisikhundla esikhethekileyo esisondeleyo kuThixo. Enyanisweni, uYesu ngaphambi kokuba abe ngumntu wayesisinxulumani esisondeleyo, iNgcibi neSithethi sikaThixo.—Genesis 1:26; 11:7; IMizekeliso 8:30, 31; Yohane 1:3.

Iimeko ezinxulumene nokubhaptizwa kukaYesu azibonisi ukuba uThixo, uKristu nomoya oyingcwele bayalingana. Njengomntu, uYesu wabhaptizwa efuzisela ukuzinikela kwakhe kuYise wasemazulwini. Ngeso sihlandlo, “asuka amazulu avuleka,” waza umoya kaThixo wehla, usehlela phezu koYesu njengehobe. Kwakhona, kwavakala ilizwi likaYehova “liphuma ezulwini,” lisithi: “Lo nguNyana wam oyintanda, endikholisiweyo nguye.”—Mateyu 3:13-17.

Ngoko ke, wayethetha ukuthini uYesu xa waxelela abalandeli bakhe ukuba babhaptize abafundi “egameni loYise, loNyana, loMoya Oyingcwele”? (Mateyu 28:19, 20) UYesu wayengathethi ukuba yena, uYise nomoya oyingcwele babelingana. Kunoko, abo babhaptiziweyo bamgqala uYehova njengoMniki-Bomi noThixo onguSomandla, ababohlulela kuye ubomi babo. Bamkela uYesu njengoMesiya nalowo uThixo amlungiselele njengentlawulelo yoluntu olukholwayo. Yaye bayaqonda ukuba umoya oyingcwele ungamandla kaThixo asebenzayo, abamele bawathobele. Noko ke, amalungu anjalo obhaptizo awafanele agqale uYehova, uYesu nomoya oyingcwele njengothixo onguBathathu Emnye.

Kodwa ngaba imimangaliso kaYesu ayingqini ukuba wayenguThixo ongumntu? Akunjalo, kuba uMoses, uEliya, uElisha, umpostile uPetros noPawulos nabanye benza imimangaliso ngaphandle kokuba babe ngooThixo abangabantu. (Eksodus 14:15-31; 1 Kumkani 18:18-40; 2 Kumkani 4:17-37; IZenzo 9:36-42; 19:11, 12) Njengabo, uYesu wayengumntu owenza imimangaliso ngamandla awaphiwe nguThixo.—Luka 11:14-19.

Ngesiprofeto uIsaya wabhekisela kuYesu onguMesiya ‘njengoThixo oligorha.’ (Isaya 9:6) KuIsaya 10:21, kwalo mprofeti wathetha ngoYehova ‘njengoThixo oligorha.’ Bambi bazama ukusebenzisa oku kufana kwamagama ukungqina ukuba uYesu unguThixo. Kodwa sifanele silumkele ukuzuza intsingiselo engeyiyo kwezi ndinyana. Ibinzana lesiHebhere eliguqulelwe ngokuthi “uThixo oligorha” alipheleliselwanga kuYehova njengokuba linjalo ibinzana elithi ‘uThixo uSomandla.’ (Genesis 17:1) Kuyavunywa ukuba, kukho umahluko phakathi kokuba ligorha nokuba ngusomandla, ekungekho mntu umkhulu kunaye.

Ngokutsho kukaIsaya 43:10, uYehova wathi: “Phambi kwam akubunjwanga thixo, nasemva kwam akuyi kubakho namnye.” Kodwa loo mazwi awangqini ukuba uYesu unguThixo. Ingongoma ikukuba uYehova wayengenamanduleli, akukho thixo wakhe waphila ngaphambi kwakhe, kuba ungunaphakade. Akusayi kubakho thixo emva koYehova ngenxa yokuba uya kusoloko ephila yaye akuyi kubakho oya kungena ezihlangwini zakhe njengoMongami onguSomandla. Sekunjalo, uYehova wavelisa abanye yena ngokwakhe ababiza ngokuba ngoothixo, njengokuba iZibhalo zibonisa ngokuphathelele abantu abathile: “Ndithe mna, Ningoothixo, ningoonyana bOsenyangweni nonke niphela. Noko niya kufa njengomntu, niwe njengomnye kubathetheli!” (INdumiso 82:6, 7) Ngokufanayo, uLizwi wayenguthixo owadalwa nguYehova, kodwa oko akuzange kumenze uYesu alingane noSomandla uThixo ngalo naliphi na ixesha.

Isikhundla Sokwenyaniso SikaYesu

Abo bathi uThixo wathabatha ubume bomntu ukuze abe nguThixo ongumntu bafanele baphawule ukuba iBhayibhile ayiyikhankanyi kwaukuyikhankanya into yokuba uYesu wazijonga ngolo hlobo. Kunoko, ngokungqinelanayo ibonisa ukuba uYesu ebesoloko engaphantsi koYise. Xa wayesemhlabeni, kuphela uYesu wathi unguNyana kaThixo. Ngaphezu koko, uKristu wathi: “UBawo mkhulu kunam.”—Yohane 14:28.

UPawulos wenza umahluko phakathi koYehova noYesu ngokuthi: “Kuthi thina mnye uThixo, uYise, eziphuma kuye izinto zonke; nathi sikholo yena. Inye iNkosi, uYesu Kristu, ezingayo zonke izinto; nathi singaye.” (1 Korinte 8:6) Kwakhona uPawulos wathi: “Nina ningabakaKristu, uKristu ke ngokaThixo.” (1 Korinte 3:23) Enyanisweni, kwanjengokuba amaKristu engaweNkosi yawo, uYesu Kristu, ngoko yena ungoweNtloko yakhe, uYehova uThixo.

Evelisa ingongoma efanayo, uPawulos wabhala: “Intloko yomntu wonke oyindoda nguKristu, intloko ke yomfazi yindoda, intloko ke kaKristu nguThixo.” (1 Korinte 11:3) Ulwalamano oluphakathi koThixo noKristu luya kuhlala lukho, kuba emva koLawulo lukaYesu Lweminyaka Eliwaka, ‘uya kubunikela uBukumkani kuye uThixo uYise’ yaye “uya kwandula noNyana ngokwakhe athotyelwe phantsi kwalowo wazithobela phantsi kwakhe zonke izinto, ukuze uThixo abe zizinto zonke kubo bonke.”—1 Korinte 15:24, 28; ISityhilelo 20:6.

Ukukhangela Kwezinye Izicatshulwa

Ngokuphathelele ukuzalwa kukaYesu, uMateyu wabhala: “Ke kaloku oku konke kwenzeke, ukuze kuzaliseke okwathethwayo yiNkosi ngomprofeti [kuIsaya 7:14], isithi, Yabonani, intombi le iya kumitha izale unyana, bambize ngegama elinguImanuweli, oko kukuthi ngentetho evakalayo, uThixo unathi.” (Mateyu 1:22, 23) UYesu akazange anikwe igama lobuqu elinguImanuweli, kodwa indima yakhe njengomntu yayizalisekisa intsingiselo yalo. Ubukho bukaYesu emhlabeni njengeMbewu enguMesiya neNdlalifa kwitrone kaDavide bangqina kubanquli bakaYehova ukuba uThixo wayenabo, ekwicala labo, ebaxhasa koko bakwenzayo.—Genesis 28:15; Eksodus 3:11, 12; Yoshuwa 1:5, 9; INdumiso 46:5-7; Yeremiya 1:19.

Ebhekisa kuYesu ovusiweyo, umpostile uTomas wadanduluka esithi: “Nkosi yam, Thixo wam!” (Yohane 20:28) Le ngxelo nezinye “ibhalelwe ukuze [sikholwe] ukuba uYesu unguye uKristu, uNyana kaThixo.” Yaye uTomas wayengaphikisani noYesu, owathumela kubafundi Bakhe esi sigidimi: “Ndiyenyuka, ndiya . . . kuThixo wam, kuThixo wenu.” (Yohane 20:17, 30, 31) Ngoko uTomas wayengacingi ukuba uYesu wayenguSomandla uThixo. UTomas usenokuba wambiza uYesu ‘njengoThixo wam’ ngengqiqo yokuba uKristu “enguthixo,” nangona wayengenguye ‘okuphela koThixo oyinyaniso.’ (Yohane 1:1, NW; Yohane 17:1-3) Okanye ngokuthi “Thixo wam,” kusenokwenzeka ukuba uTomas wayemvuma uYesu njengeSithethi noMmeli kaThixo, kwananjengokuba abanye basibiza isigidimi esisisithunywa sezulu ngokungathi sasinguYehova.—Thelekisa iGenesis 18:1-5, 22-33; 31:11-13; 32:24-30; ABagwebi 2:1-5; 6:11-15; 13:20-22.

Ngoko, ngokutsho kweBhayibhile, uYesu wayekhe waphila njengoLizwi ngaphambi kokuba abe ngumntu. Xa wayesemhlabeni, wayengenguye uThixo ongumntu. Wayengumntu ngokupheleleyo, nangona wayefezekile, njengoko uAdam wayenjalo ntlandlolo. Ukususela ekuvusweni kukaYesu, uye waba ngumoya ongafiyo ophakanyisiweyo nosoloko ungaphantsi koThixo. Ngoko ke, kucace mhlophe ukuba, iZibhalo aziyixhasi ingcamango ‘yokuba uKristu nguThixo.’

[Ibhokisi ekwiphepha 23]

Ngaba Izithunywa Zezulu Ziyamnqula UYesu?

ZIMBI iinguqulelo zamaHebhere 1:6 zithi: “Mazinqule yena [uYesu] zonke izithunywa zikaThixo.” (King James Version; The Jerusalem Bible) Kuyabonakala ukuba umpostile uPawulos wacaphula iSeptuagint, ethi kwiNdumiso 97:7: “Nqulani Yena [uThixo] nonke nina zithunywa Zakhe.”—C. Thomson.

Igama lesiGrike elithi pro·sky·neʹo, eliguqulelwe ngokuthi “ukunqula” kumaHebhere 1:6, lisetyenzisiwe kwiNdumiso 97:7 kwiSeptuagint ukuguqulela igama lesiHebhere elithi sha·chahʹ, elithetha “ukuqubuda.” Esi isenokuba sisenzo esamkelekileyo sentlonelo ebantwini. (Genesis 23:7; 1 Samuweli 24:8; 2 Kumkani 2:15) Okanye linokuthetha unqulo loThixo oyinyaniso okanye olo lubhekiswa ngokuphosakeleyo koothixo bobuxoki.—Eksodus 23:24; 24:1; 34:14; Duteronomi 8:19.

Ngokuqhelekileyo ipro·sky·neʹo enikelwa kuYesu iyafana nokuqubuda kookumkani nakwabanye abantu. (Thelekisa uMateyu 2:2, 8; 8:2; 9:18; 15:25; 20:20 kunye neyoku-1 kaSamuweli 25:23, 24; 2 Samuweli 14:4-7; 1 Kumkani 1:16; 2 Kumkani 4:36, 37.) Ngokufuthi kucacile ukuba kuqutyudwa kuYesu ingekuba unguThixo kodwa ‘njengoNyana kaThixo’ okanye “uNyana woMntu” onguMesiya.—Mateyu 14:32, 33; Luka 24:50-52; Yohane 9:35, 38.

AmaHebhere 1:6 abhekisela kwisikhundla sikaYesu esingaphantsi koThixo. (Filipi 2:9-11) Apha zimbi iinguqulelo ziguqulela igama elithi pro·sky·neʹo ngokuthi “bonakalisani . . . imbeko” (The New English Bible), “qubudani” (New World Translation) okanye “guqani phambi” (An American Translation). Ukuba ubani uthanda inguqulelo ethi “nqulani,” unqulo olunjalo lulinganiselwe, kuba uYesu wamxelela oku uSathana: “YiNkosi [uYehova, NW] uThixo wakho oya kuqubuda kuyo [uhlobo lukapro·sky·neʹo], ukhonze yona yodwa.”—Mateyu 4:8-10.

Nangona INdumiso 97:7, ethetha ngokunqula uThixo, yayibhekiselwe kuKristu kumaHebhere 1:6, uPawulos wayebonisile ukuba uYesu ovusiweyo ‘wayelubengezelo lobuqaqawuli bukaThixo, nombhalo wenkqu yakhe.’ (Hebhere 1:1-3) Ngoko naluphi na “unqulo” izithunywa zezulu ezilunikela kuNyana kaThixo lulinganiselwe ibe lubhekiselwa kuYehova ngaye.