Indlela uLoida Awahlukana ngayo Nokuba Sisimumu
Ngokubaliswa ngumama kaLoida
NJENGAYE nawuphi na umama olindele ukuzala, ndandinexhala lokuba usana lwam lusenokuzalwa lunesiphene esithile. Noko ke, ndandingasilindelanga isikhalo esihlab’ entliziyweni sikaLoida, umntwana wam wesithathu xa wafika kweli hlabathi. Engaqondanga, ugqirha wophula ingqosha kaLoida ngezinto zakhe zokubamba. Kwiiveki ezimbalwa emva kokutyandwa kulungiswa loo monakalo, uLoida wathunyelwa ekhaya. Noko ke, uvuyo lwethu lwaba lolwexeshana.
Kwiiveki ezimbalwa ezilandelayo, kwacaca ukuba kukho undonakele othile. Unyango lukaLoida lwaba nemiphumo engemihle—kuquka umkhuhlane, isifo sorhudo nokuxhuzula—yaye ukunyanga ezo mpawu zesifo kwabonakala ngathi kuyenza maxongo imeko yakhe. Kungekudala uLoida wasuka wanomzimba otyeketyeke. Ekugqibeleni oogqirha basixelela ukuba uLoida unedumbe ebuchotsheni. Bathi wayengenakuze akwazi ukuhamba okanye ukuthetha—okanye nkqu nokusiva.
Amalinge Okuqala Okuthetha Naye
Phezu kwako nje ukungazi nto ngeso sifo, ndandisavakalelwa kukuba uLoida angaziqonda izinto ezininzi. Ngoko ke ndamfundela iincwadi ezilula yaye ndazimisela ukumfundisa oonobumba. Kodwa uLoida wayengakwazi ukuthetha, engakwazi kubonisa nokuba kukho into ayiqondayo koko ndikuthethayo. Kwakungekho ndlela yakwazi enoba yintoni na—ukuba yayikho—awayeyiqonda.
Njengoko iminyaka yayiqengqeleka, imigudu yam yokufundisa uLoida yabonakala ngathi lilize. Sekunjalo, ndachitha iiyure ezininzi ndimfundisa. Sasimbandakanya nakwisifundo sethu seBhayibhile sentsapho noNoemí, intombi yethu encinane, sisebenzisa incwadi ethi Ukuphulaphula Kumfundisi Omkhulu nethi Incwadi Yam Yamabali EBhayibhile.a ULoida ndamfundela ngokuphindaphindiweyo izahluko ezininzi zezi ncwadi.
Ukungakwazi ukuthetha nomntu omthandayo kudimaza ngokwenene. Xa ndimse epakini uLoida, wayesuke ahlahlambe angathuthuzeleki. Kwakutheni? Kum kwakungathi ungcungcuthekiswa yinto yokuba engakwazi ukubaleka aze adlale njengabanye abantwana. Ngesinye isihlandlo, zesuka zehla iinyembezi kuLoida xa udade wabo wayendifundela okuthile kwincwadi yesikolo. Ngokucacileyo, kukho into eyayimkhathaza, kodwa ndandingayazi. ULoida wayephelela nje ekundumzeleni xa ethetha, nto leyo eyayibonisa iintswelo zakhe ezisisiseko zokutya, amanzi, ukulala, okanye ukuya kwindlu yangasese.
Xa wayeneminyaka esithoba ubudala, uLoida waqalisa ukuya kwisikolo sabantwana abaneentswelo ezikhethekileyo. Noko ke, ebudeni beminyaka emithathu elandelayo imeko yakhe yaba mandundu ngeyona ndlela. Wayesoyika ukuhamba nkqu nokucondoba umganyana ngaphandle kokuba uyaxhaswa, yaye waphants’ ukuyeka noko kundumzela. Sinomyeni wam sagqiba kwelokuba kuya kulunga simfundisele ekhaya uLoida.
Kwiminyaka emithandathu elandelayo, ndandifundisa uLoida kangangoko ndinako. Ndandimbhalela oonobumba ebhodini ndinethemba lokuba uLoida uza kubakhuphela. Imizamo yam yaba lilize. Ngaba ingxaki yayikukungaqondi, okanye yayikukuba uLoida wayengenako ukubhala ngenxa yokuba nedumbe ezandleni?
Xa wayeneminyaka eli-18 ubudala, kwaba nzima ngeyona ndlela ukunyamekela uLoida kangangokuba ndathandaza ngokunyanisekileyo kuYehova, ndicela ukuba andincede ndikwazi ukuthetha nentombi yam. Impendulo kumthandazo wam yeza ngendlela engaqhelekanga.
Ukwahlukana Nokuba Sisimumu
Oko kwafikelela kuvuthondaba xa iintombi zam zazihombisa igumbi lethu lokulala. Ngaphambi kokuba zisuse amaphepha amadala eludongeni, uNoemí wabhala amagama athile eludongeni—amagama afumaneka eBhayibhileni namagama abahlobo nawamalungu entsapho. Ngenxa yobugagu, intombi yam uRut yabuza uLoida enoba wayesazi kusini na apho libhalwe khona igama elithi “Yehova.” Okwammangalisayo kukuba, uLoida waya eludongeni waza wanqwala intloko yakhe ecaleni kwaloo ndawo lalibonakala kuyo igama likaThixo. URut wazibuza enoba uLoida wayenokuwaqonda kusini na amanye amagama, ngoko ke wamvavanya. Okwammangalisayo uRut kukuba, uLoida wayekwazi ukuchaza ngalinye lawo—nkqu namagama angazange awabone ebhaliwe ngaphambili! URut wahlanganisa intsapho yonke ukuze izibonele ngokwayo. ULoida wayekwazi ukufunda!
Ekuhambeni kwexesha, safumana indlela eyayiza kunceda uLoida akwazi “ukuthetha” nathi. Sancamathelisa amagama noonobumba kudonga olukwipaseji yethu. Ukubeka amagama amancinane kwibhodi ephathwa ngesandla kwakungancedi nto, ekubeni uLoida engakwazi kakuhle ukulawula izandla zakhe aze alathe kunobumba ngamnye. Ngoko ke xa uLoida efuna ukuthetha, usixelela oko ngokuya kunobumba ngamnye oseludongeni. Njengoko usenokucinga, oku kudinisa ngeyona ndlela. Enyanisweni, ukuze uLoida adlulisele inkcazelo enokuzalisa iphepha nje elinye kufuneka ahl’ esenyuka umgama onokuba ngangeekhilomitha, yaye oko kuthabatha iiyure ukuze agqibe!
Noko ke, uLoida unemincili kukuba ekwazi “ukuthetha” nathi. Enyanisweni, le yeyona nto wasixelela yona esithi: “Ndivuya ngeyona ndlela, ndiyambulela uYehova, kuba ngoku ndiyakwazi ukuthetha.” Simangalisiwe, sambuza oku uLoida: “Wawusenza ntoni ngoxa wawuhlala phantsi imini yonke?” ULoida wathi wayesoloko ecinga ngoko wayenqwenela ukuthetha nathi ngako. Eneneni, uLoida wathi kangangeminyaka eli-18 ebesoloko enqwenela ukuthetha nathi. Wathi: “Xa uRut wayeqalisa ukuya esikolweni, ndandizifundela incwadi yesikolo. Ndandishukumisa umlomo ndize ndindumzele, kodwa naningandiva. Kungenxa yoko ndandidla ngokusuke ndikhale.”
Ndalila ndacela uxolo ngokungamqondi kakuhle. ULoida waphendula wathi: “Ungumama olungileyo, yaye akuzange unikezele. Bendisoloko ndivuyiswa kukuba secaleni kwakho. Ndikuthanda gqitha. Ngoko ke ungaphinde ukhale. Uyeva?”
Inkqubela Yokomoya
ULoida wayesele enolwazi lweBhayibhile, yaye wayezazi ngentloko ezinye iindinyana zeBhayibhile. Kodwa kungekudala wasixelela ukuba ufuna ukugqabaza kwiSifundo seMboniselo sebandla, ingxubusho yeBhayibhile yeveki ngeveki enemibuzo neempendulo. Wayeza kukwenza njani oku? Kwakufuneka omnye kuthi amfundele lonke inqaku. Wayesandula ke uLoida akhethe imibuzo afuna ukuyiphendula. Sasiwabhala phantsi amagqabaza akhe njengoko esichazela wona. Kwandula ke, kwiintlanganiso omnye wethu afunde amagqabaza kaLoida. ULoida wakha wasixelela wathi: “Kundivuyisa ngokwenene ukuba nenxaxheba, kuba kundenza ndizive ndiyinxalenye yebandla.”
Xa wayeneminyaka engama-20 ubudala, uLoida wavakalisa umnqweno wokubhaptizwa. Xa wabuzwayo ukuba uyakwazi kusini na oko kuthethwa kukuzahlulela kukabani kuYehova, uLoida waphendula wathi wayesele ekwenzile oko kwiminyaka esixhenxe ngaphambili—xa wayeneminyaka eli-13 kuphela ubudala. Wathi: “Ndathandaza kuYehova, yaye ndamxelela ukuba ndifuna ukumkhonza ngonaphakade.” NgoAgasti 2, 1997, uLoida wafuzisela uzahlulelo lwakhe kuYehova ngokubhaptizwa emanzini. ULoida wasixelela wathi, “ndiyambulela uYehova, ngokuba owona mnqweno wam mkhulu uye wazaliseka!”
ULoida uyakunandipha ukuthetha ngoBukumkani bukaThixo kwizihlobo nabamelwane. Maxa wambi uhamba nathi njengoko sishumayela ebantwini esitratweni. Uye walungiselela neleta esiyishiya emnyango xa kungekho mntu emzini. ULoida unomdla okhethekileyo kubantu abakhulileyo nakwabo bagulayo. Ngokomzekelo, kwibandla lethu sinodade onqunyulwe umlenze. ULoida wasixelela wathi: “Ndiyazi ukuba kunjani ukungakwazi ukuhamba,” ngoko ke wabhala ileta ukuze akhuthaze lo dade. Kukwakho noJairo, inkwenkwana eselula kwelinye ibandla, ofe umzimba ukusuka entloko ukusa eluzwaneni. Xa uLoida weva ngesifo sayo, wayibhalela ileta. Inxalenye yayo yayisithi: “Kungekudala uYehova uza kusiphilisa. EParadesi akusayi kubakho kubandezeleka. Apho ke ndiya kukucel’ umngeni wokuba sibaleke. Ndiyahleka kuba kuya kuba mnandi ngokwenene oko. Ukucinga ukuba siya kuba kanye njengokuba uYehova wasidalayo, ngaphandle kokugula . . . Ngaba akubangeli mincili oko?”
Okwamnceda Wanyamezela
Ngoku ndazi okuninzi ngemikhwa yangaphambili kaLoida eyayikade indixakanisa. Ngokomzekelo, uLoida uthi xa wayeselula wayengakuthandi ukwangiwa kuba wayexinezeleke ngeyona ndlela. Wathi: “Kwakubonakala ikukundidlel’ indlala ukuba oodade wethu bakwazi ukuthetha nokufunda izinto ndibe mna ndingakwazi. Ndandiba nomsindo. Kwakubakho amaxesha apho ndandisithi akwaba ndandifile.”
Nakuba efumene isipho sokukwazi ukuthetha, uLoida ujamelene nocelomngeni oluninzi. Ngokomzekelo, rhoqo ngenyanga usoloko exhuzula aze aminxeke, yaye iingalo nemilenze yakhe ziye zingalawuleki. Ukongezelela koko, nasiphi na isigulo—nkqu nemfuxane—simenza buthathaka ngokuphawulekayo. Maxa wambi uLoida uye axinezeleke yimeko yakhe. Yintoni emnceda anyamezele? Masikhe simvumele akuxelele ngokwakhe:
“Umthandazo ubusoloko ulolona ncedo lubalaseleyo. Kundivuyisa gqitha ukuthetha noYehova, ndiziva ndisondele kuye. Ndiyaluxabisa uthando nengqalelo yabanye kwiHolo yoBukumkani. Phezu kwazo nje iingxaki endinazo zomzimba ndiziva ndinethamsanqa kuba, ndiye ndakhuliswa ngabazali ababini ababalaseleyo abandithanda kakhulu. Andinakuze ndikulibale oko oodade wethu bandenzela kona. Loo magama mahle bawabhala eludongeni asindisa ubomi bam. Ngaphandle kothando lukaYehova nothando lwentsapho yam, ubomi bam bebungayi kuba nanjongo.”
[Umbhalo osemazantsi]
a Zipapashwe yiWatchtower Bible and Tract Society of New York, Inc. Ethi Ukuphulaphula Kumfundisi Omkhulu ayisashicilelwa ngoku.
[Umfanekiso okwiphepha 24]
ULoida nentsapho yakowabo